1 Numuu rí nduꞌyáálóꞌ máꞌ rí ído̱ gángudi-ri̱ga̱a guꞌwá-xtíin dríga̱ꞌlóꞌ ríge̱ꞌ, rí ñajuun xuyalóꞌ, Ana̱ꞌlóꞌ gíꞌdoo mbá guꞌwá rí maxnálóꞌ ná mikhuíí, rí jámuu ríga̱. Ra̱ꞌkhá ga̱jma̱á ñawúún xa̱bo̱ numbaa ni̱gu̱ma guꞌwá rúꞌkhue̱n. 2 Gakon máꞌ rí phú nu̱guwanlóꞌ awúun mbiꞌi rí juwalóꞌ ná awúun xuyalóꞌ, jamí naꞌne máꞌ a̱kia̱nꞌlóꞌ rí ma̱ta̱ꞌa̱lóꞌ ná awúun guꞌwálóꞌ rí ríga̱ ná mikhuíí. 3 Xkuaꞌnii kajngó ma̱ju̱ꞌwáanꞌlóꞌ xtíñalóꞌ rí nuxe̱ꞌ, jamí ma̱xákujma rí tsaꞌtsáánlóꞌ. 4 Awúun mbiꞌi rí juwalóꞌ ná awúun guꞌwá-xtíin ríge̱ꞌ, rí ñajuun xuyalóꞌ, phú nu̱guwanlóꞌ jamí najmálóꞌ. Ra̱ꞌkhá máꞌ numuu nandalóꞌ rí ma̱ga̱jnáaꞌlóꞌ ná awúun xuyalóꞌ rí wayuu, rí phú naꞌne a̱kia̱nꞌlóꞌ ñajuun rí ma̱ta̱ꞌa̱aꞌlóꞌ ná awúun xuyalóꞌ rí nuxe̱ꞌ, kajngó xuyalóꞌ rí najáñuu ma̱ga̱n-roꞌoo ne̱ xuyalóꞌ rí ndaꞌya. 5 Ana̱ꞌlóꞌ neꞌne-ku̱máa̱ꞌlóꞌ rí ma̱ꞌnii̱ xkuaꞌnii ga̱jma̱á nindxa̱ꞌlóꞌ, jamí nixniálóꞌ Xu̱u̱ꞌ tsí nasngájma rí ma̱ꞌne-mbánuu̱ rí nixuda-mine̱e̱ꞌ ma̱ꞌnii̱.

6 Ikhaa jngó, jámba̱ miꞌtsú mbá jañii a̱kia̱nꞌlóꞌ juwalóꞌ, maske máꞌ nduꞌyáálóꞌ rí awúun mbiꞌi rí juwalóꞌ ná awúun xuyalóꞌ ríge̱ꞌ, tsíngua̱ꞌ juwalóꞌ ná inuu Táta̱. 7 Numuu rí na̱nguá máꞌ juwalóꞌ ga̱jma̱á numuu rí nduꞌyáálóꞌ, rí juwalóꞌ ga̱jma̱á numuu rí wéje̱ a̱kia̱nꞌlóꞌ ná inuu Ana̱ꞌlóꞌ. 8 Ikhaa numuu rúꞌkhue̱n mbá jañii a̱kia̱nꞌlóꞌ, jamí i̱tha̱án máꞌ naꞌne a̱kia̱nꞌlóꞌ rí náxájuwalóꞌ ná awúun xuyalóꞌ ríge̱ꞌ, kajngó ma̱juwalóꞌ ga̱jma̱á nindxu̱u̱ Táta̱. 9 Ikhaa jngó nuꞌxná-mijnálóꞌ tsiakhe̱ rí mu̱ꞌne̱lóꞌ rí na̱ni̱gu̱u̱ꞌ Ana̱ꞌlóꞌ, ga̱ꞌne máꞌ xí juwalóꞌ ná awúun xuyalóꞌ o nijáñalóꞌ máꞌ mbo̱ꞌ. 10 Numuu rí mbá xúgiáanꞌlóꞌ ndaꞌyóo rí mu̱xna̱xí-mijnálóꞌ ná inuu Krísto̱, kajngó maxúꞌdaa̱ awan ga̱jma̱á numalóꞌ. A̱ꞌkhue̱n rí mbámbáa ma̱grui̱gúu rí jaꞌyoo mbayáa ga̱jma̱á numuu rí máján o rí ra̱máján neꞌne nákhí nixtáa̱ ná awúun xuyuu.

11 Numuu rí ikháanꞌxo̱ꞌ ndu̱ya̱áxo̱ꞌ rí jaꞌyoo rí mi̱tiamakuíí Táta̱, ikhaa numuu rúꞌkhue̱n nu̱xna̱-mijnáxo̱ꞌ tsiakhe̱ rí i̱ꞌwíin xa̱bo̱ ma̱nimbu̱únꞌ juyáa̱. Xómáꞌ Ana̱ꞌlóꞌ naꞌne-nuwáanꞌxo̱ꞌ máꞌ, jamí gúꞌthu̱u̱n rí ikháanꞌ mangáanꞌlaꞌ nu̱ne̱-nuwáanꞌxo̱ꞌ máꞌ. 12 Ra̱ꞌkhá máꞌ nu̱tha̱nxo̱ꞌ rí máján ga̱jma̱á numa máꞌ ikháanꞌxo̱ꞌ mbu̱júꞌ ná inalaꞌ. I̱ndo̱ó máꞌ nandaxo̱ꞌ rí mbu̱ya̱álaꞌ náá numuu gíꞌmaa rí ma̱ꞌdxu a̱kia̱nꞌlaꞌ ju̱ya̱ꞌxo̱ꞌ, kajngó ma̱ma̱ñalaꞌ rí mu̱riꞌñúúlaꞌ xa̱bo̱ tsí nu̱xu̱xí-mijná ga̱jma̱á numuu rí nakujma ná inuu xa̱bo̱, jamí ra̱ꞌkhá ga̱jma̱á numuu rí ríga̱ ná awúun a̱kui̱in xa̱bo̱. 13 Ikhaa jngó, xí xó najmiyaxo̱ꞌ jaꞌnii i̱ya̱álaꞌ, ga̱jma̱á numuu máꞌ Ana̱ꞌlóꞌ rí xkuaꞌnii jaꞌñáaꞌxo̱ꞌ. Jamí xí tsíjmiyaxo̱ꞌ rá, ga̱jma̱á numuu rí mambáyálaꞌ máꞌ ikháanꞌlaꞌ. 14 Ga̱jma̱á numuu rí Krísto̱ nandoo jaꞌyalóꞌ, na̱tsu̱dáanꞌxo̱ꞌ rí mu̱ndxa̱ꞌwa̱-mijnáxo̱ꞌ ríge̱ꞌ: rí mbáwíi máꞌ Krísto̱ nijáñuu ga̱jma̱á numúú mbá xúgíin xa̱bo̱, jamí rúꞌkhue̱n iꞌthán rí mbá xúgiáanꞌlóꞌ nijáñalóꞌ. 15 Krísto̱ nijáñuu ga̱jma̱á numúú mbá xúgíin xa̱bo̱, kajngó tsí nduya náxájúwe̱e̱ꞌ rí muni̱i̱ rí nandúu̱n ikhii̱n, rí ga̱ju̱wée̱ꞌ rí muni̱i̱ rí nandoo Krísto̱, tsí nijáñuu jamí ndiyáa mbiꞌyuu ga̱jma̱á numúu̱ ikhii̱n.

16 Ga̱jma̱á numuu rúꞌkhue̱n, ikháanꞌxo̱ꞌ nánguá máꞌ i̱ndxa̱ꞌwa̱-mijnáxo̱ꞌ ga̱jma̱á numuu nimbáa xa̱bo̱ xómá ene̱ jayu xa̱bo̱ ná numbaa ríge̱ꞌ. Maske máꞌ nákhí wajyúú ne̱ne̱-nuwiinxo̱ꞌ Krísto̱ xómá ene̱ jayu xa̱bo̱ ná numbaa ríge̱ꞌ, nánguá máꞌ i̱ya̱áxo̱ꞌ xkuaꞌnii rí xúge̱ꞌ rá. 17 Ikhaa jngó, xí mbáa xa̱bo̱ xtáa̱ ga̱jma̱á nindxu̱u̱ Krísto̱, mbáa xa̱bo̱ tsí ni̱gu̱ma-nuxi̱iꞌ ñajuu̱n. Wámba̱ máꞌ mbá xúgíí rí wayuu, jamí mbá xúgíí neꞌne-nuxi̱iꞌ rí xúge̱ꞌ rá. 18 Mbá xúgíí rí nuxe̱ꞌ na̱ꞌkha̱ ná inuu Ana̱ꞌlóꞌ, tsí neꞌne rí tsímáá gámbáxi̱iꞌxo̱ꞌ ga̱jma̱á nindxu̱u̱ máꞌ ikhaa̱ ga̱jma̱á majñu̱u̱ Krísto̱. Xúꞌkhue̱n máꞌ nixnángawalóꞌ rí mu̱ꞌthánlóꞌ rí Ana̱ꞌlóꞌ nandoo rí tsímáá gámbáxii̱ gajmíi̱ xa̱bo̱. 19 Rúꞌkhue̱n iꞌthán rí jmína̱a̱ꞌ máꞌ Ana̱ꞌlóꞌ naꞌne rí tsímáá gámbáxi̱in xa̱bo̱ numbaa ga̱jma̱á nindxu̱u̱. Ga̱jma̱á majñu̱u̱ Krísto̱ naꞌgí-mine̱e̱ꞌ rí ma̱ꞌne mba̱a̱ a̱kuii̱n jaꞌyoo̱ aꞌkhúún xa̱bo̱. Jamí ikháanꞌxo̱ꞌ nixnángawaxo̱ꞌ Ana̱ꞌlóꞌ rí mu̱thu̱únxo̱ꞌ xa̱bo̱ ajngáa rúꞌkhue̱n. 20 Ikhaa jngó, ikháanꞌxo̱ꞌ nixúnguáanꞌxo̱ꞌ Krísto̱ rí mu̱tha̱nxo̱ꞌ ajngóo̱, asndo xó rí jmína̱a̱ꞌ máꞌ Ana̱ꞌlóꞌ naꞌthán-jáñalaꞌ ga̱jma̱á majña̱ꞌ ikháanꞌxo̱ꞌ jaꞌnii. Nu̱tha̱n-jáñalaꞌxo̱ꞌ ga̱jma̱á majñu̱u̱ Krísto̱, rí tsímáá gámbáxi̱iꞌlaꞌ ga̱jma̱á nindxu̱u̱ Ana̱ꞌlóꞌ. 21 Krísto̱ táꞌne nimbá aꞌkhán, xómáꞌ Ana̱ꞌlóꞌ neꞌne rí ikhaa̱ mamínu̱u̱ꞌ ga̱jma̱á numuu aꞌkhánlóꞌ, kajngó ikháánꞌlóꞌ ma̱nindxa̱ꞌlóꞌ xa̱bo̱ tsí nánda̱a̱ aꞌkhúún ga̱jma̱á majñu̱u̱ Krísto̱.