2 Xa̱bo̱ Korínto̱ 10

Páblo̱ naꞌthán-mbáá ga̱jma̱á numuu ñajun rí naꞌne

1 Ikhúúnꞌ Páblo̱, tsúún nu̱tha̱nlaꞌ numuꞌ rí phú wabúúnꞌ ído̱ rí xtáá ga̱jma̱á nindxa̱ꞌlaꞌ, jamí phú namangu̱ꞌ ído̱ rí xtáá tsíngua̱ꞌ, na̱tha̱n-jáñalaꞌ ga̱jma̱á majñu̱u̱ rí tsímangu̱u̱ꞌ jamí naꞌne-yádalóꞌ Krísto̱. 2 Ikhaa jngó, na̱tha̱n-jáñalaꞌ rí ído̱ ma̱ꞌgá gáya̱ꞌlaꞌ, mu̱xúꞌñúúlaꞌ rí ma̱mangu̱ꞌ ná inalaꞌ, xómá na̱ꞌgí-mina̱ꞌ rí ma̱ne̱lo̱ꞌ ná inúú tsí nuthan rí ikháanꞌxo̱ꞌ nu̱ne̱xo̱ꞌ xómá rí nune̱ jañúú xa̱bo̱ numbaa. 3 Gakon máꞌ rí xa̱bo̱ numbaa ñajwanxo̱ꞌ, i̱ndo̱ó máꞌ numuu rí tsítsa̱ña̱ꞌ gajmiáxo̱ꞌ xa̱bo̱ sia̱nꞌ xómá rí nune̱ jañúú xa̱bo̱ numbaa. 4 Numuu rí ikháanꞌxo̱ꞌ najmaxo̱ꞌ ski̱yu̱u̱ꞌ Ana̱ꞌlóꞌ, ra̱ꞌkhá ski̱ñu̱ú xa̱bo̱ numbaa, rí mu̱rngudi-ri̱ga̱axo̱ꞌ ski̱yu̱u̱ꞌ xa̱bo̱ sia̱nꞌ. 5 Xúꞌkhue̱n máꞌ nu̱ne̱-gámba̱ꞌxo̱ꞌ ju̱ma̱ tsixuxtaa jamí mbá xúgíí inii rí nuthan tsiꞌyá xa̱bo̱, rí na̱we̱je̱-ꞌthu̱u̱n rí i̱ꞌwíin xa̱bo̱ mune̱-nuwiin Ana̱ꞌlóꞌ. Nu̱xna̱xíxo̱ꞌ mbá xúgíí ju̱mu̱ú xa̱bo̱ numbaa ná inuu Krísto̱, kajngó mune̱-mbáníi̱ rí naꞌthée̱n ikhaa̱. 6 Jamí juwa máꞌ na̱ma̱ñaxo̱ꞌ rí mu̱ne̱xo̱ꞌ rí ma̱ꞌne-numa̱a aꞌkhúun jámba̱a̱ tsí najñaguii, ído̱ gúya̱áxo̱ꞌ rí ikháanꞌlaꞌ nu̱ne̱-mbáníílaꞌ máꞌ mbá xúgíí.

7 Ikhúúnꞌ nda̱yo̱o̱ rí ikháanꞌlaꞌ nu̱ya̱xi̱ílaꞌ i̱ndo̱ó máꞌ rí nakujma ná inalaꞌ. Xí mbáa ndaꞌyoo gúkúu rí xa̱bi̱i Krísto̱ ñajuun, gíꞌmaa máꞌ mba̱ꞌyoo̱ rí ikháanꞌ mangáanꞌxo̱ꞌ ñajwanxo̱ꞌ xa̱bi̱i Krísto̱. 8 Maske máꞌ asndo xó rí na̱ku̱xí-mina̱ꞌ guéño ga̱jma̱á numuu tsiakhe̱ rí guáꞌdááxo̱ꞌ jaꞌnii, na̱nguá máꞌ i̱ti̱yu̱ꞌ. Numuu rí Táta̱ nixnáxo̱ꞌ tsiakhe̱ rúꞌkhue̱n kajngó mu̱ne̱xo̱ꞌ rí ma̱gajáanꞌlaꞌ, ra̱ꞌkhá rí mu̱ne̱-gámbáanꞌlaꞌxo̱ꞌ. 9 Na̱tha̱nꞌlaꞌ ríge̱ꞌ kajngó ma̱xáju̱ma̱ꞌlaꞌ rí nandoꞌ gáne̱-mi̱ꞌñálaꞌ ga̱jma̱á majñu̱u̱ i̱yi̱i̱ꞌ rí na̱ne̱lo̱ꞌ. 10 Numuu rí mbá tikhuun nuthan: «Phú namangu̱u̱ꞌ jamí gakhe̱ iꞌthán tsí Páblo̱ ga̱jma̱á majñu̱u̱ i̱yi̱i̱ꞌ rí naꞌtháán. Xómáꞌ ído̱ rí wíji̱i̱ ná inúú xa̱bo̱, phú namíñuu̱ jamí nda̱a̱ numuu rí naꞌthée̱n». 11 Xa̱bo̱ tsí nuthan rúꞌkhue̱n, jaꞌyoo ma̱fruꞌúu̱n rí xómá jaꞌnii ajngáxo̱ꞌ ga̱jma̱á majñu̱u̱ i̱yi̱i̱ꞌ rí nu̱ne̱xo̱ꞌ ído̱ rí juwaxo̱ꞌ tsíngua̱ꞌ, xkuaꞌnii máꞌ jaꞌñáaꞌxo̱ꞌ ído̱ rí juwaxo̱ꞌ ga̱jma̱á nindxa̱ꞌlaꞌ mangaa.

12 Numuu rí ikháanꞌxo̱ꞌ, na̱nguá máꞌ i̱ꞌngo̱o̱ a̱kia̱nꞌxo̱ꞌ rí mu̱ne̱-mbrígu-mijnáxo̱ꞌ ni máꞌ rí mu̱giéwan-mijná gajmiáxo̱ꞌ mbá tikhuun tsí nuthan rí máján ga̱jma̱á numúú máꞌ ikhiin. Ído̱ rí nu̱giéwan-mijnée̱, jamí nune̱-mbrígu-mijnée̱ ga̱jma̱á awan rí ni̱ꞌgíi̱ máꞌ ikhii̱n, nu̱snga̱jmee̱ rí tsífruꞌúu̱n mbá jayu. 13 Xómáꞌ ikháanꞌxo̱ꞌ, mu̱xúne̱-mba̱a̱-mijnáxo̱ꞌ ga̱jma̱á numuu rí na̱nguá máꞌ jaꞌyaxo̱ꞌ. Ana̱ꞌlóꞌ ñajuun tsí nasngájma asndo náá jayáa rí ma̱goo mu̱ñajunxo̱ꞌ, jamí ikhaa̱ máꞌ niꞌnii̱ rí ma̱guáꞌnúxo̱ꞌ asndo ná juwa ikháanꞌlaꞌ. 14 Ikhaa jngó, tága̱táꞌáanꞌxo̱ꞌ máꞌ ná jayáa ndawaa. Xí numuu rí ni miꞌtsú xóó túꞌguáxo̱ꞌ ná juwalaꞌ, a̱ꞌkhue̱n rí ma̱goo mu̱ꞌthánlóꞌ rí ni̱ga̱táꞌáanꞌxo̱ꞌ ná jayáa ndawaa. Numuu rí ikháanꞌ gináaꞌxo̱ꞌ jayu niguáꞌnú ju̱ya̱ꞌxo̱ꞌ ajngáa máján ga̱jma̱á numuu Krísto̱ ná juwalaꞌ. 15 Jamí tsítha̱n-tsiꞌyáxo̱ꞌ máꞌ ga̱jma̱á numuu ñajun rí nene̱ i̱ꞌwíin. A̱ꞌkhue̱n gakon, guáꞌthi̱ínxo̱ꞌ rí ma̱ꞌga-ragaja̱a̱ máꞌ xúꞌkhue̱n rí wéje̱ a̱kia̱nꞌlaꞌ ná inuu Ana̱ꞌlóꞌ, kajngó ma̱goo ma̱ꞌga-raꞌne mba̱a̱ máꞌ xúꞌkhue̱n ñajun rí nu̱ne̱xo̱ꞌ ga̱jma̱á nindxa̱ꞌlaꞌ. 16 Xúꞌkhue̱n máꞌ guáꞌthi̱ínxo̱ꞌ rí mu̱ꞌguá gútha̱n-ráꞌaxo̱ꞌ ajngáa máján ná xuajen rí triga̱ i̱tha̱án tsíngua̱ꞌ ná juwa ikháanꞌlaꞌ, i̱ndo̱ó máꞌ numuu rí mu̱xúne̱-tsiꞌyáxo̱ꞌ ga̱jma̱á numuu ñajun rí nene̱ i̱ꞌwíin. 17 A̱ꞌkhue̱n gakon, tsí nandoo gákúxe̱-mina̱ꞌ, gakúxe̱-mine̱e̱ꞌ ga̱jma̱á numuu rí naꞌne Táta̱. 18 Numuu ído̱ rí mbáa xa̱bo̱ naꞌthán rí máján ga̱jma̱á numuu máꞌ ikhaa, nda̱a̱ máꞌ rí gíꞌdoo numuu rúꞌkhue̱n. Rí phú i̱tha̱án gíꞌdoo numuu ñajuun rí Ana̱ꞌlóꞌ maꞌthán rí máján ga̱jma̱á numuu xa̱bo̱.