1 A̱ngui̱nꞌ, rí xúge̱ꞌ rá, nandaxo̱ꞌ rí ma̱gi̱da̱ꞌ idxa̱ꞌlaꞌ rí mitsaan naꞌne Ana̱ꞌlóꞌ ga̱jma̱á majñu̱ú mbámbá kuthuun tsí nanimbu̱únꞌ juyáá Jesús ná numbaa Masedónia̱. 2 Xa̱bi̱i Ana̱ꞌlóꞌ tsúꞌkhue̱n, phú mbaꞌa inii jamínu̱ꞌ nagóo̱-ranújngúu̱n jamí phú mingíníi̱. Maske máꞌ xúꞌkhue̱n, gajni̱í rí gagi ná awúun a̱kuíi̱n jamí phú mba̱a̱ mbúkha̱a̱ xúwán nuxnee̱. 3 Numuu rí ikhúúnꞌ neꞌne inuꞌ rí ikhii̱n máꞌ ndiye̱e̱ idxúu̱n rí muxnee̱ mbá xúgíí rí na̱ꞌngúu̱n, jamí asndo i̱tha̱án máꞌ mba̱a̱ xó rí na̱ꞌngúu̱n. 4 Phú mbaꞌa nothon nithan-jáñaxo̱ꞌ rí mu̱ni̱ꞌñúu̱xo̱ꞌ muxnee̱ mangii̱n rí mambáñúú xa̱bi̱i Ana̱ꞌlóꞌ tsí júwa̱ꞌ ná Jerusalén. 5 Ikhii̱n nixnee̱ i̱tha̱án máꞌ mba̱a̱ xó rí ikháanꞌxo̱ꞌ ni̱ju̱ma̱ꞌxo̱ꞌ, numuu rí ginii máꞌ ni̱xna̱xí-mijnée̱ ná ñawúun Táta̱ jamí nda̱wa̱á ni̱xna̱xí-mijnée̱ ga̱jma̱á nindxa̱ꞌ ikháanꞌxo̱ꞌ, xómá rí nandoo Ana̱ꞌlóꞌ. 6 Ikhaa jngó, ni̱tha̱n-jáñííxo̱ꞌ Títo̱ rí magíꞌmaa̱ ma̱grui̱guíi̱ mbúkha̱a̱ rí nu̱xna̱laꞌ rí mambáñúú xa̱bi̱i Ana̱ꞌlóꞌ, numuu rí ikhaa̱ nigíꞌdu̱u̱n ni̱grui̱guíi̱ ne̱. 7 Numuu rí ikháanꞌlaꞌ phú i̱tha̱án guáꞌdáálaꞌ mbá xúgíí: wéje̱ a̱kia̱nꞌlaꞌ ná inuu Ana̱ꞌlóꞌ, na̱ma̱ñalaꞌ nu̱tha̱nlaꞌ, nu̱ne̱-nuwiinlaꞌ, na̱ni̱gua̱ꞌlaꞌ rí mu̱mbáñúúlaꞌ xa̱bo̱, jamí nandalaꞌ ju̱ya̱ꞌxo̱ꞌ. Ikhaa jngó, xkuaꞌnii máꞌ guáꞌthi̱ínxo̱ꞌ rí mba̱a̱ gúxna̱laꞌ rí mambáñúú xa̱bi̱i Ana̱ꞌlóꞌ mangaa.

8 Ra̱ꞌkhá máꞌ numuu na̱xna̱-ñájwanlaꞌ rí xkuaꞌnii gúne̱laꞌ. I̱ndo̱ó máꞌ nandoꞌ rí ma̱gi̱da̱ꞌ idxa̱ꞌlaꞌ rí júwa̱ꞌ i̱ꞌwíin tsí phú na̱ni̱gúu̱nꞌ rí mu̱mbáyíi̱, kajngó ma̱kujma rí gakon rí nandalaꞌ ju̱ñu̱ú xa̱bo̱ mangáanꞌlaꞌ. 9 Numuu rí ndu̱ya̱álaꞌ máꞌ xáne jaꞌnii Tátiálóꞌ Jesukrísto̱. Maske máꞌ ikhaa̱ ñajuu̱n xa̱bo̱ tsí phú gíꞌdoo, neꞌne-mine̱e̱ꞌ xa̱bo̱ ngínáa ga̱jma̱á numuu rí nandoo̱ jaꞌyalaꞌ, kajngó ikháanꞌlaꞌ ma̱nindxa̱ꞌlaꞌ xa̱bo̱ tsí phú guáꞌdáá ga̱jma̱á majñu̱u̱ rí ngínáa̱ ikhaa̱.

10 Asndo nákhí máꞌ timbá tsigu, ikháanꞌ gináaꞌlaꞌ jayu ndiyalaꞌ rí mu̱xna̱laꞌ, jamí ikháanꞌ gináaꞌlaꞌ jayu ni̱gíꞌdi̱ínlaꞌ ni̱xna̱laꞌ. Ikhaa jngó, ma̱tha̱nꞌlaꞌ rí na̱ju̱mu̱ꞌ rí jaꞌyoo mu̱ne̱laꞌ: 11 phú máján rí mu̱ne̱-gáxi̱ílaꞌ xúge̱ꞌ rí ni̱ni̱ꞌñáálaꞌ mixndu asndo nákhí timbá tsigu, jamí gu̱xna̱laꞌ xómá rí guáꞌdáálaꞌ. Xkuaꞌnii kajngó ma̱kujma rí gakon rí na̱ni̱gua̱ꞌlaꞌ mu̱mbáyíílaꞌ. 12 Xí mbáa xa̱bo̱ jayáa a̱kui̱in rí maxná, Ana̱ꞌlóꞌ ma̱grui̱gú rí naxnée̱ xómá rí na̱ꞌngo̱o̱. Numuu rí Ana̱ꞌlóꞌ tsínda̱ꞌe̱e̱ máꞌ rí ra̱gíꞌdoo xa̱bo̱.

13 Ra̱ꞌkhá máꞌ rí mu̱xna̱laꞌ kajngó asndo ma̱pi̱ꞌdúun gúne̱ tsí i̱ꞌwíin, xómáꞌ ikháanꞌlaꞌ nda̱a̱ rí mu̱pholaꞌ gáꞌne. I̱ndo̱ó máꞌ na̱tha̱nlo̱ꞌ rí mbéꞌtháán gáꞌne.* 14 Xúge̱ꞌ ikháanꞌlaꞌ guáꞌdáálaꞌ rí mu̱xna̱laꞌ rí ndaꞌñúu̱ ikhii̱n. Nda̱wa̱á ma̱guáꞌdáa̱ ikhii̱n muxnee̱ rí ndaꞌyálaꞌ ikháanꞌlaꞌ. Xkuaꞌnii kajngó mbéꞌtháán gáꞌne. 15 Xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Na̱nguá máꞌ nipíduun eꞌne tsí phú mba̱a̱ ni̱gu̱xi̱i, ni máꞌ na̱nguá ndiꞌyóo eꞌne tsí lájwíin ni̱gu̱xi̱i».*

16 Núma̱aꞌ la Ana̱ꞌlóꞌ, numuu niꞌnii̱ rí Títo̱ ma̱xná-gamiéjuu̱n gúne̱laꞌ xómá rí naxná-gamiéjunꞌ ikhúúnꞌ e̱ne̱laꞌ. 17 Ikhúúnꞌ ni̱ndo̱ꞌo̱o̱ rí ma̱thangaa̱ gáꞌyalaꞌ, xómáꞌ ikhaa̱ phú nadxu a̱kuii̱n niriꞌñee̱ rí ma̱ꞌgee̱, numuu rí mangaa̱ máꞌ phú naxná-gamiéjuu̱n e̱ne̱laꞌ. 18 Nu̱xu̱ꞌmáaxo̱ꞌ ga̱jma̱á nindxu̱u̱ Títo̱ mbáa dxájwalóꞌ tsí máján kri̱ga̱ ajngáa numuu ná mbá xúgíí kuthuun tsí nanimbu̱únꞌ juyáá Jesús, ga̱jma̱á numuu rí naꞌthán-ráꞌee̱ ajngáa máján. 19 Jamí ra̱ꞌkhá i̱ndo̱ó rúꞌkhue̱n, rí ikhaa̱ máꞌ watraꞌwíi̱ nene̱ mbámbá kuthuun tsí nanimbu̱únꞌ juyáá Jesús, rí ma̱ꞌgee̱ ga̱jma̱á nindxa̱ꞌxo̱ꞌ ído̱ rí mu̱ꞌguá ju̱ya̱ꞌxo̱ꞌ rí mambáñúú xa̱bi̱i Ana̱ꞌlóꞌ ná Jerusalén. Ikháanꞌxo̱ꞌ nu̱gímbúxo̱ꞌ tsi̱gi̱jña̱ꞌ rúꞌkhue̱n kajngó ma̱gu̱ma-mba̱a̱ Táta̱, jamí ma̱kujma rí ikháanꞌlaꞌ phú na̱ni̱gua̱ꞌlaꞌ mu̱mbáyíí.* 20 Xkuaꞌnii kajngó mu̱xúthan xa̱bo̱ numaxo̱ꞌ ga̱jma̱á numuu xó rí nakua ju̱ya̱ꞌxo̱ꞌ mbúkha̱a̱ xúwán rí phú mba̱a̱ nu̱drígúxo̱ꞌ. 21 Numuu nandaxo̱ꞌ rí mu̱ne̱xo̱ꞌ ná pa̱jnu mbá xúgíí rí nu̱ne̱xo̱ꞌ, ra̱ꞌkhá máꞌ i̱ndo̱ó ná inuu Táta̱, rí ná inúú máꞌ xa̱bo̱ mangaa.

22 Nu̱xu̱ꞌmáaꞌxo̱ꞌ i̱mba̱a̱ꞌ dxájwaxo̱ꞌ rí ma̱ꞌga ga̱jma̱á nindxúu̱n mangaa, tsí phú mbaꞌa miꞌtsú ndi̱ya̱áxo̱ꞌ rí máján eꞌne ga̱jma̱á majñu̱u̱ mbaꞌa ñajun rí ni̱xna̱-ñájuu̱n ma̱ꞌnii̱. Jamí xúge̱ꞌ rá, i̱wa̱á máꞌ máján nañajwii̱n, numuu rí mbá jañii a̱kuii̱n jaꞌyalaꞌ. 23 Xí mbáa naraxe̱ numuu Títo̱, gu̱tháa̱nlaꞌ rí dxájuꞌ ikhúúnꞌ ñajuu̱n, jamí ikhaa̱ nambáyíꞌ rí mu̱ñajunxo̱ꞌ ga̱jma̱á numalaꞌ ikháanꞌlaꞌ. Xómáꞌ tsí i̱mbá a̱jmi̱i a̱ngia̱nꞌlóꞌ tsí nagóó ga̱jma̱á nindxu̱u̱ Títo̱ rá, ikhii̱n waxúnguii̱nꞌ nene̱ mbámbá kuthuun tsí nanimbu̱únꞌ juyáá Jesús, jamí nduya-makuíi̱ máꞌ Krísto̱ mangii̱n. 24 Ikhaa jngó, gu̱snga̱jmálaꞌ rí nandalaꞌ ju̱ñu̱úlaꞌ a̱ngia̱nꞌlóꞌ tsúꞌkhue̱n, kajngó mbuyáá mbámbá kuthuun tsí nanimbu̱únꞌ juyáá Jesús rí numuu rúꞌkhue̱n phú nadxu a̱kia̱nꞌxo̱ꞌ e̱ne̱laꞌ.