1 Ríge̱ꞌ eꞌne riatsú nothon rí ma̱ꞌgá gáya̱ꞌlaꞌ. «Mbámbá rí ma̱gu̱ma-mbáníí numuu, jaꞌyoo rí ma̱ju̱wá a̱jmi̱i o atsúun xa̱bo̱ tsí ndiyáá rí niríga̱». 2 Nákhí nika gáya̱ꞌlaꞌ rí riajma̱ nothon, ni̱thu̱ún tsí nune̱ aꞌkhán jamí mbá xúgíin tsí i̱ꞌwíin: «Xí i̱mba̱ miꞌtsú rí ma̱ꞌgá gáya̱ꞌlaꞌ xkuaꞌnii máꞌ xóó e̱ne̱laꞌ, ma̱xáne̱ mba̱a̱ a̱kui̱nꞌ ja̱ya̱ꞌlaꞌ». Ikhaa jngó rí xúge̱ꞌ rá, rí na̱nguá xtáá a̱ꞌkhue̱n, ikhaa máꞌ nathangu̱ún na̱thúu̱n ga̱jma̱á majñu̱u̱ i̱yi̱i̱ꞌ rí na̱xu̱ꞌmá ná inalaꞌ. 3 Numuu rí ikháanꞌlaꞌ máꞌ nu̱nda̱ꞌa̱laꞌ rí mbu̱ya̱álaꞌ xí gakon rí Krísto̱ naꞌthán ga̱jma̱á majñu̱ꞌ ikhúúnꞌ. Jamí Krísto̱ na̱nguá wabaa̱ ga̱jma̱á nindxa̱ꞌlaꞌ, rí nasngájmee̱ mbá xúgíí ski̱yu̱u̱ꞌ ga̱jma̱á nindxa̱ꞌlaꞌ. 4 Gakon máꞌ rí wabaa̱ nákhí waꞌdujmaa̱ ná ixe̱ krúsi̱. I̱ndo̱ó máꞌ numuu rí xúge̱ꞌ, xtáa̱ ndaꞌyee̱ ga̱jma̱á majñu̱u̱ ski̱yu̱u̱ꞌ Ana̱ꞌlóꞌ. Xkuaꞌnii máꞌ mangáanꞌxo̱ꞌ, wabáanꞌxo̱ꞌ ga̱jma̱á nindxu̱u̱, i̱ndo̱ó máꞌ numuu rí ga̱jma̱á numalaꞌ ikháanꞌlaꞌ ma̱juwaxo̱ꞌ ga̱jma̱á majñu̱u̱ ski̱yu̱u̱ꞌ Ana̱ꞌlóꞌ.

5 Gu̱ya̱xe̱-mijnálaꞌ máꞌ ikháanꞌlaꞌ, kajngó mbu̱ya̱álaꞌ xí nanimba̱ꞌlaꞌ ju̱ya̱á gisngáá ga̱jma̱á numuu Jesús. Gu̱ya̱xe̱-mijnálaꞌ kajngó mbu̱ya̱álaꞌ rí Krísto̱ xtáa̱ ga̱jma̱á nindxa̱ꞌlaꞌ. O i̱ndo̱ó máꞌ xí na̱nguá inimba̱ꞌlaꞌ ju̱yáa̱ rá mbo̱ꞌ. 6 Xómáꞌ ikhúúnꞌ na̱ju̱mu̱ꞌ rí mbu̱ya̱álaꞌ máꞌ rí xa̱bi̱i Krísto̱ ñajwanxo̱ꞌ. 7 Jamí nu̱tha̱n-jáñííxo̱ꞌ Ana̱ꞌlóꞌ kajngó mu̱xúne̱laꞌ nimbá rí ra̱máján. Nu̱nda̱ꞌa̱xo̱ꞌ rúꞌkhue̱n, ra̱ꞌkhá máꞌ numuu ma̱kujma rí ikháanꞌxo̱ꞌ nu̱tha̱nxo̱ꞌ rí gakon, rí i̱ndo̱ó máꞌ numuu rí mu̱ne̱laꞌ rí máján. Ma̱xáꞌñuu máꞌ xí nakujma rí ikháanꞌxo̱ꞌ ni̱ngra̱ꞌáanꞌxo̱ꞌ. 8 Numuu rí ikháanꞌxo̱ꞌ ma̱xáꞌnga̱ꞌxo̱ꞌ ma̱wajún-ꞌthi̱ín rí gakon, rí i̱ndo̱ó máꞌ nu̱tha̱n-mbááxo̱ꞌ numuu rí gakon. 9 Ikhaa jngó, nadxu a̱kia̱nꞌxo̱ꞌ ído̱ rí wabáanꞌxo̱ꞌ, jamí ikháanꞌlaꞌ gúkuáanꞌlaꞌ. Jamí jaꞌnii máꞌ xóó nu̱tha̱n-jáñííxo̱ꞌ Ana̱ꞌlóꞌ ga̱jma̱á numalaꞌ, kajngó ma̱ꞌne káxáanꞌlaꞌ. 10 Ikhaa numuu rúꞌkhue̱n, wapha máꞌ i̱xu̱ꞌmá i̱yi̱i̱ꞌ ríge̱ꞌ inalaꞌ, ído̱ rí xóó tsíka gáya̱ꞌlaꞌ, kajngó ma̱xáríyáꞌlaꞌ mi̱ndaꞌkho ga̱jma̱á tsiakhe̱ rí nixníꞌ Táta̱ ído̱ rí ma̱gánúlo̱ꞌ. Numuu rí Táta̱ nixníꞌ tsiakhe̱ rí ma̱mbáyálaꞌ ma̱gajáanꞌlaꞌ, ra̱ꞌkhá rí ma̱ne̱-gámbáanꞌlaꞌ.

11 A̱ngui̱nꞌ, na̱tha̱n-ngáwalaꞌ ga̱jma̱á ajngáa ríge̱ꞌ: ga̱juwalaꞌ gagi. A̱gajáanꞌlaꞌ asndo rí ma̱ꞌne káxáanꞌlaꞌ. Gu̱xna̱alaꞌ tsiakhe̱ a̱kia̱nꞌlaꞌ. Mbóó ju̱ma̱ꞌlaꞌ gáꞌne rí mu̱ñajunlaꞌ. Jamí tsímáá gájuwalaꞌ. Xkuaꞌnii kajngó Ana̱ꞌlóꞌ tsí nandoo jaꞌyalóꞌ jamí tsí naꞌne rí ma̱juwalóꞌ tsímáá ma̱xtáa ga̱jma̱á nindxa̱ꞌlaꞌ.

12 Gu̱ra̱xi̱-mijnáalaꞌ mbá xúgiáanꞌlaꞌ ga̱jma̱á gamaku. 13 Nu̱ra̱xáa̱nꞌlaꞌ mbá xúgíin xa̱bi̱i Ana̱ꞌlóꞌ tsí júwa̱ꞌ ge̱jyoꞌ.*

14 Táta̱ Jesukrísto̱ gáꞌne-tsakun-rámáaꞌlaꞌ. Ana̱ꞌlóꞌ mikhuíí gásngájma rí nandoo jaꞌyalaꞌ, jamí Xu̱u̱ꞌ Ana̱ꞌlóꞌ gáxtáa ga̱jma̱á nindxa̱ꞌlaꞌ mbá xúgiáanꞌlaꞌ. Xkuaꞌnii gáꞌne.*