1 Á nu̱gíꞌdi̱ín mbu̱jwáxo̱ꞌ nu̱tha̱n rí máján ga̱jma̱á numa máꞌ ikháanꞌxo̱ꞌ dxe̱ꞌ. O ndaꞌyóo rí mu̱xna̱xíxo̱ꞌ ná inalaꞌ i̱yi̱i̱ꞌ rí naꞌthán rí máján ga̱jma̱á numaxo̱ꞌ dxe̱ꞌ. O mu̱nda̱ꞌa̱ꞌlaꞌxo̱ꞌ ikháanꞌlaꞌ rí mu̱tha̱nlaꞌ rí máján ga̱jma̱á numaxo̱ꞌ, xómá nune̱ mbá tikhuun dxe̱ꞌ. 2 Jmína̱áꞌ máꞌ ikháanꞌlaꞌ ñajwanlaꞌ xómá i̱yi̱i̱ꞌ rí naꞌthán rí máján ga̱jma̱á numaxo̱ꞌ, rí waꞌtháán ná awúun a̱kia̱nꞌxo̱ꞌ, rí na̱gu̱ma-nuwiin jamí nu̱raxnuu mbá xúgíin xa̱bo̱. 3 Nakujma nguáná máꞌ rí ikháanꞌlaꞌ ñajwanlaꞌ xómá i̱yi̱i̱ꞌ rí niꞌtháán Krísto̱, rí ni̱xna̱xí ikháanꞌxo̱ꞌ. I̱yi̱i̱ꞌ rúꞌkhue̱n táwaꞌtháán ne̱ ga̱jma̱á ñaꞌñúú, rí waꞌtháán ne̱ ga̱jma̱á majñu̱u̱ Xu̱u̱ꞌ Ana̱ꞌlóꞌ tsí ndaꞌya. Ni máꞌ táwaꞌtháán ne̱ ná tsu̱du̱u̱ xapa itsí, rí waꞌtháán ne̱ ná awúun a̱kui̱ín xa̱bo̱ numbaa.

4 Ikhaa numuu rúꞌkhue̱n, naꞌne mbá jañii a̱kia̱nꞌxo̱ꞌ ná inuu Ana̱ꞌlóꞌ ga̱jma̱á majñu̱u̱ Krísto̱. 5 Ra̱ꞌkhá máꞌ ikháanꞌxo̱ꞌ phú na̱ꞌnga̱ꞌxo̱ꞌ rí mu̱ne̱xo̱ꞌ mbá ñajun ga̱jma̱á máꞌ ski̱ya̱ꞌxo̱ꞌ, kajngó mu̱ndxa̱ꞌwa̱-mijnáxo̱ꞌ rí ikháanꞌxo̱ꞌ phú na̱ꞌnga̱ꞌxo̱ꞌ. A̱ꞌkhue̱n gakon, Ana̱ꞌlóꞌ ñajuun tsí naꞌne rí ma̱ꞌnga̱ꞌxo̱ꞌ mu̱ne̱ mbá xúgíí rí nu̱ne̱xo̱ꞌ. 6 Ana̱ꞌlóꞌ neꞌne rí ma̱nindxa̱ꞌxo̱ꞌ yumbáá tsí najmii nu̱ñajun ga̱jma̱á numuu mbá awan nuxe̱ꞌ. Ra̱ꞌkhá rí mu̱ꞌne̱-mbáníílóꞌ mbá xtángoo rí waꞌtháán, rí mu̱ꞌne̱-mbáníílóꞌ rí naꞌthán Xu̱u̱ꞌ Ana̱ꞌlóꞌ, numuu rí xtángoo rí waꞌtháán naꞌne ne̱ rí ma̱ja̱ñúú xa̱bo̱, xómáꞌ Xu̱u̱ꞌ Ana̱ꞌlóꞌ naꞌnii̱ rí mbuya xa̱bo̱.

7 Awan wayuu rí naꞌne rí ma̱ja̱ñúú xa̱bo̱, rí waꞌtháán xtángawoo ná tsu̱du̱u̱ xapa itsí, phú wáá jaꞌnii ne̱ nákhí ni̱gi̱ꞌdu̱u̱n ne̱, rí asndo xa̱bo̱ Israél tsíyoo rí mu̱ra̱ꞌe̱e̱ inuu Moisés numuu rí phú nambiꞌi-taꞌa ne̱, maske máꞌ na̱ka̱-rayámba̱ rí nambiꞌi-taꞌa ne̱. 8 Xí xkuaꞌnii neꞌne ga̱jma̱á nindxu̱u̱ awan wayuu rúꞌkhue̱n, á ra̱ꞌkhá i̱tha̱án máꞌ wáá jaꞌnii awan nuxe̱ꞌ rí na̱ꞌkha̱ jayóo Xu̱u̱ꞌ Ana̱ꞌlóꞌ rá. 9 Xí phú wáá ninindxu̱u̱ awan wayuu rí naxná-máꞌíin xa̱bo̱ rí ma̱ja̱ñúú, ¡phú i̱tha̱án máꞌ wáá jaꞌnii awan rí naꞌne rí Ana̱ꞌlóꞌ maꞌthán rí nánda̱a̱ aꞌkhánlóꞌ! 10 Numuu rí phú wáá ninindxu̱u̱ nákhí wajyúú, na̱nguá máꞌ wáá guéño ne̱, xí na̱giewan ne̱ ga̱jma̱á awan nuxe̱ꞌ, rí phú i̱tha̱án wáá jaꞌnii. 11 Ikhaa jngó, xí phú wáá ninindxu̱u̱ awan rí wéje̱ máꞌ rí ma̱mbáa, phú i̱tha̱án máꞌ wáá jaꞌnii awan rí ríga̱ jámuu.

12 Ikhaa numuu rúꞌkhue̱n, ikháanꞌxo̱ꞌ ga̱jma̱á mbá jañii a̱kia̱nꞌxo̱ꞌ guáꞌthi̱ínxo̱ꞌ ná inuu Ana̱ꞌlóꞌ, jamí tsímíñaxo̱ꞌ rí mu̱tha̱nxo̱ꞌ. 13 Tsíne̱xo̱ꞌ xómá neꞌne Moisés, rí nirugoo̱ inuu̱ ga̱jma̱á mbá xtíin kajngó mu̱xúyáá xa̱bo̱ Israél xáne na̱ka̱-rayámba̱a rí wéje̱ máꞌ rí ma̱mbáa. 14 Xómáꞌ xa̱bo̱ Israél táfruꞌúu̱n, ni máꞌ tsífruꞌúu̱n asndo xúge̱ꞌ. Ído̱ rí nu̱raxnuu̱ xtángoo drígo̱o̱ awan wayuu, tsífruꞌúu̱n ne̱, numuu rí júgoo inúu̱ eꞌne ikhaa máꞌ xtíin. I̱ndo̱ó máꞌ ga̱jma̱á majñu̱u̱ Krísto̱ ma̱goo ma̱ma̱ꞌthoo inúu̱. 15 Asndo mbiꞌi xúge̱ꞌ, ído̱ rí nu̱raxnuu̱ i̱yi̱i̱ꞌ rí niꞌtháán Moisés, tsífruꞌúu̱n ne̱ numuu rí júgoo a̱kuíi̱n eꞌne xtíin. 16 I̱ndo̱ó máꞌ numuu rí ído̱ rí ma̱thanga̱a a̱kuíi̱n ná inuu Táta̱, a̱ꞌkhue̱n rí ma̱ma̱ꞌthoo inúu̱. 17 Numuu rí Táta̱ ñajuun Xe̱ꞌ, jamí ná xtáa̱ Xu̱u̱ꞌ Táta̱, ikhín nijáwíin máꞌ xa̱bo̱. 18 Ikhaa jngó, mbá xúgiáanꞌ ikháánꞌlóꞌ tsáanꞌ ni̱ma̱ꞌthoo máꞌ inalóꞌ, ñajwanlóꞌ xómá iyaniwan ná nakujma rí nambiꞌi-taꞌaa Táta̱, jamí mbámbá mbiꞌi na̱ka̱-raxtiꞌkhuáanꞌlóꞌ kajngó ma̱nindxa̱ꞌlóꞌ i̱tha̱án xómá jaꞌnii̱ ikhaa̱. Ríge̱ꞌ ñajuun rí naꞌne Xu̱u̱ꞌ Táta̱.