1 Ikhaa jngó, ikháanꞌxo̱ꞌ tsáanꞌ ñajwanxo̱ꞌ máꞌ yumbée Ana̱ꞌlóꞌ, nu̱tha̱n-jáñalaꞌxo̱ꞌ rí ma̱xáꞌne rí ni̱drígúlaꞌ xúgi̱íꞌ rí nixnálaꞌ Ana̱ꞌlóꞌ. 2 Numuu rí Ana̱ꞌlóꞌ naꞌthán:
«Ído̱ ni̱ga̱nú mbiꞌi rí ma̱dxawaanꞌ, ni̱dxawaanꞌlo̱ꞌ.
Jamí ído̱ ni̱ga̱nú mbiꞌi rí ma̱ne̱-jríñáaꞌ, ni̱mbáyáaꞌlo̱ꞌ».6.2 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 49.8.
Ikhaa mbiꞌi rí madxawaanꞌ Ana̱ꞌlóꞌ ñajuun xúge̱ꞌ. Jamí ikhaa mbiꞌi rí ma̱ꞌne-jríñáaꞌ Ana̱ꞌlóꞌ ñajuun xúge̱ꞌ.
Namínu̱u̱ꞌ jamí naxpígaa a̱kui̱in Páblo̱
3 Tsíne̱xo̱ꞌ nimbá rí ma̱ꞌne-ñawúún xa̱bo̱, kajngó mu̱xúthan xkawe̱ꞌ xa̱bo̱ ga̱jma̱á numuu ñajun rí nu̱ne̱xo̱ꞌ. 4 A̱ꞌkhue̱n gakon, ga̱jma̱á majñu̱u̱ mbá xúgíí rí nu̱ne̱xo̱ꞌ nu̱snga̱jmáxo̱ꞌ rí yumbée Ana̱ꞌlóꞌ ñajwanxo̱ꞌ. Na̱ꞌngo̱o̱ a̱kia̱nꞌxo̱ꞌ rí mu̱míni̱íxo̱ꞌ, rí ma̱nújngaxo̱ꞌ awúun jamínu̱ꞌ, jamí phú mbaꞌa inii rí nu̱xpígaa a̱kia̱nꞌxo̱ꞌ ju̱ya̱á. 5 Nuxnaxo̱ꞌ xa̱bo̱ jamí nu̱xu̱dáa̱nꞌxo̱ꞌ géjwa̱nꞌ. Nu̱xkamiixo̱ꞌ xa̱bo̱ tsí wee jayu i̱ndxa̱ꞌwa̱ rí najiꞌníi juyaxo̱ꞌ. Phú gakhe̱ i̱ñajunxo̱ꞌ, jamí ríga̱ mbiꞌi rí tsínu̱ꞌxo̱ꞌ ni máꞌ tsípeꞌtsoxo̱ꞌ. 6 Nu̱snga̱jmáxo̱ꞌ rí yumbée Ana̱ꞌlóꞌ ñajwanxo̱ꞌ ga̱jma̱á majñu̱u̱ rí jaꞌwu juwaxo̱ꞌ, rí nafraꞌa̱ꞌxo̱ꞌ rí gakon, rí na̱ꞌngo̱o̱ a̱kia̱nꞌxo̱ꞌ jamí rí májáan a̱kia̱nꞌxo̱ꞌ. Mbá xúgíí ríge̱ꞌ nu̱ne̱xo̱ꞌ ga̱jma̱á majñu̱u̱ Xu̱u̱ꞌ Ana̱ꞌlóꞌ, jamí ga̱jma̱á numuu rí gakon nandaxo̱ꞌ ju̱ñu̱ú xa̱bo̱. 7 Nu̱tha̱n-ráꞌaxo̱ꞌ ajngáa rí gakon ga̱jma̱á tsiakhe̱ rí naxnáxo̱ꞌ Ana̱ꞌlóꞌ, jamí nu̱ne̱xo̱ꞌ rí máján. Ikhaa rúꞌkhue̱n ñajuun ski̱ya̱ꞌxo̱ꞌ rí gída̱ꞌ ná ñawún májánxo̱ꞌ jamí ná ñawún xti̱ya̱ꞌxo̱ꞌ. 8 Ído̱ nguáná nduya̱-makuaxo̱ꞌ xa̱bo̱, jamí ído̱ nguáná tsíya̱-makuaxo̱ꞌ. Ído̱ nguáná nuthee̱n rí máján ga̱jma̱á numaxo̱ꞌ, jamí ído̱ nguáná nuthan-xkawia̱ꞌxo̱ꞌ. Ído̱ nguáná nuthan xa̱bo̱ rí mixtutáanꞌxo̱ꞌ, jamí ído̱ nguáná nuthee̱n rí kuwáanꞌxo̱ꞌ. 9 Ído̱ nguáná nune̱ xa̱bo̱ asndo xó rí tsíne̱-nuwáanꞌxo̱ꞌ, maske máꞌ na̱gu̱ma-nuwáanꞌ májánxo̱ꞌ. Ído̱ nguáná na̱ju̱mu̱ú xa̱bo̱ rí nijáñaxo̱ꞌ máꞌ, xómáꞌ ikháanꞌxo̱ꞌ jaꞌnii máꞌ xóó juwaxo̱ꞌ. Nu̱xpa̱tháanꞌxo̱ꞌ xa̱bo̱, i̱ndo̱ó máꞌ numuu rí ikhii̱n tsíꞌngúu̱n gúradiáa̱nꞌxo̱ꞌ. 10 Maske máꞌ nakujma rí juwa-jínáxo̱ꞌ, jámba̱ miꞌtsú nadxu a̱kia̱nꞌxo̱ꞌ. Maske máꞌ nakujma rí mingínáaꞌxo̱ꞌ, xómáꞌ ikháanꞌxo̱ꞌ phú mbaꞌiin xa̱bo̱ nu̱ne̱xo̱ꞌ rí ma̱nindxu̱ún xa̱bo̱ tsí phú guáꞌdáá. Maske máꞌ nakujma rí nda̱a̱ nitháan rí guáꞌdááxo̱ꞌ, xómáꞌ ikháanꞌxo̱ꞌ mbá xúgíí máꞌ guáꞌdááxo̱ꞌ.
11 A̱ngui̱nꞌ, xa̱bo̱ Korínto̱, jaꞌwu máꞌ ni̱tha̱nꞌlaꞌxo̱ꞌ mbá xúgíí rí nu̱ndxa̱ꞌwa̱-mijnáxo̱ꞌ. Ni̱rmáꞌtháá mbá jayu a̱kia̱nꞌxo̱ꞌ ná inalaꞌ. 12 Ikháanꞌxo̱ꞌ jámba̱ miꞌtsú nandaxo̱ꞌ ju̱ya̱ꞌlaꞌ, i̱ndo̱ó máꞌ ikháanꞌlaꞌ tsíyalaꞌ ju̱ya̱ꞌxo̱ꞌ jámba̱ miꞌtsú. 13 Ikhaa jngó, na̱tha̱n-jáñalaꞌ xómá rí mbáa xa̱bo̱ naꞌthán-jáñúú i̱ji̱in, rí ga̱galaꞌ ju̱ya̱ꞌxo̱ꞌ xómá rí ikháanꞌxo̱ꞌ nandaxo̱ꞌ ju̱ya̱ꞌlaꞌ.
Ma̱xámbáxa̱ꞌ gajmiálaꞌ xa̱bo̱ tsí tsínimbu̱únꞌ juyáá Krísto̱
14 Ikháanꞌlaꞌ na̱nguá mbríguáanꞌ gajmiálaꞌ xa̱bo̱ tsí tsínimbu̱únꞌ juyáá Krísto̱, ikhaa jngó mu̱xúda-mijná gajmiálaꞌ. Xáne lá gágoo mu̱wa̱a rí máján ga̱jma̱á rí xkawe̱ꞌ rá. O xáne lá gágoo rí ma̱mbáxu̱u̱ꞌ rí mbiꞌi ga̱jma̱á rí mijína rá. 15 Xáne lá gágoo rí ma̱mbáxu̱u̱ꞌ Krísto̱ ga̱jma̱á gixa̱a̱ rá. O xáne lá gágoo rí ma̱mbáxu̱u̱ꞌ tsí nanimbo̱o̱ꞌ jaꞌyoo Krísto̱ ga̱jma̱á tsí tsínimbo̱o̱ꞌ rá. 16 Xáne lá gágoo rí ma̱mbáxu̱u̱ꞌ guꞌwá dxákuiin Ana̱ꞌlóꞌ ga̱jma̱á nindxu̱ún tsí ra̱ꞌkháa Ana̱ꞌlóꞌ ñajúún rá. Numuu rí ikháanꞌ ñajwanlaꞌ6.16 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán «ikháánꞌlóꞌ ñajwanlóꞌ». guꞌwá dxákuiin Ana̱ꞌlóꞌ tsí xtáa ndaꞌya, xómá rí jmína̱a̱ꞌ máꞌ Ana̱ꞌlóꞌ niꞌthán:
«Ma̱xtáá ná majñúu̱ ikhii̱n jamí ma̱ngrigo̱ꞌ ga̱jma̱á nindxúu̱n.
Ikhúúnꞌ ma̱nindxu̱ꞌ Anúu̱ jamí ikhii̱n ma̱nindxúu̱n xa̱bo̱ xuajñuꞌ.6.16 Ajngáa ríge̱ꞌ na̱ꞌkha̱ ná I̱yi̱i̱ꞌ rí naꞌthán ga̱jma̱á numúú xa̱bi̱i Lebí 26.12, ná I̱yu̱u̱ꞌ Jeremía̱s 32.38, jamí ná I̱yu̱u̱ꞌ Esekiél 37.27.
17 Ikhaa jngó naꞌthán Táta̱ mangaa:
A̱ga̱jnálaꞌ ná majñu̱ú xa̱bo̱ tsúꞌkhue̱n, gu̱ne̱-janíí-mijnálaꞌ.
Mu̱xúru̱gua̱laꞌ rí xkawe̱ꞌ.
A̱ꞌkhue̱n rí ikhúúnꞌ ma̱gruíguáanꞌlaꞌ.6.17 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 52.11, jamí ná I̱yu̱u̱ꞌ Esekiél 20.34, 41.
18 Jamí ikhúúnꞌ ma̱nindxu̱ꞌ Ana̱ꞌlaꞌ,
xómáꞌ ikháanꞌlaꞌ ma̱nindxa̱ꞌlaꞌ i̱ji̱nꞌ.
Xkuaꞌnii iꞌthán Táta̱ tsí gíꞌdoo mbá xúgíí tsiakhe̱».6.18 Ajngáa ríge̱ꞌ na̱ꞌkha̱ ná riajma̱ I̱yu̱u̱ꞌ Samuél 7.8, 14.
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)