1 Rí xúge̱ꞌ rá, a̱ngui̱nꞌ, nandoꞌ rí ma̱rmáꞌáan a̱kia̱nꞌlaꞌ ju̱ya̱á ajngáa máján rí ni̱sngálaꞌ, ikhaa rí ni̱drígúlaꞌ jamí tsíni̱ꞌñáá-ranimba̱ꞌlaꞌ ju̱ya̱á. 2 Ga̱jma̱á majñu̱u̱ ajngáa ríge̱ꞌ ma̱jáwiáanꞌlaꞌ, xí tsíni̱ꞌñáálaꞌ jamí tsímbumalaꞌ rí ni̱sngálaꞌ. I̱ndo̱ó máꞌ numuu rí, xí nu̱ni̱ꞌñáálaꞌ ne̱, nda̱a̱ máꞌ numuu rí ninimba̱ꞌlaꞌ ne̱ xúꞌkhue̱n rá.

3 Numuu rí ginii jayu ni̱sngálaꞌ ikhaa máꞌ rí waꞌsngóꞌ ikhúúnꞌ: Rí Krísto̱ nijáñuu ga̱jma̱á numuu aꞌkhánlóꞌ, xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ. 4 Xúꞌkhue̱n máꞌ waꞌdii̱, jamí ndiyáa̱ mbiꞌyuu̱ nákhí nirámuu atsú mbiꞌi, xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ. 5 Nikujmaa̱ inuu Pédro̱,* jamí nda̱wa̱á nikujmaa̱ inúú tsí mbá gu̱wa̱ꞌ i̱jmi̱i (12) niꞌsngúu̱n. 6 Nda̱wa̱á nanújngoo rí mbá witsu siénto̱ (500) a̱ngia̱nꞌlóꞌ nikujmaa̱ inúú mbóó miꞌtsú. Mbá tikhuun tsúꞌkhue̱n xóó júwa̱ꞌ nduya xúge̱ꞌ, jamí i̱ꞌwíin nijáñúú máꞌ. 7 Nda̱wa̱á nikujmaa̱ inuu Santiágo̱.* I̱tha̱n nda̱wa̱á nikujmaa̱ inúú mbá xúgíin tsí ikhaa̱ nixúnguii̱nꞌ. 8 Jamí nda̱wa̱á jayu nikujmaa̱ inuꞌ ikhúúnꞌ, tsúún ñajunꞌ xómá ada̱ tsí tágu̱maa awúun mbiꞌi rí jaꞌyoo ma̱gu̱maa.

9 Ikhúúnꞌ ñajunꞌ tsí phú i̱tha̱án na̱nguá gíꞌdoo numuu rí mbá xúgíin tsí waxúngui̱inꞌ, ni máꞌ ra̱jáꞌyoꞌ rí ma̱nindxu̱ꞌ mbáa tsí waxúngua̱a̱ꞌ, numuu rí phú ne̱ne̱-ngíníilo̱ꞌ tsí nanimbu̱únꞌ juyáá Ana̱ꞌlóꞌ. 10 I̱ndo̱ó máꞌ numuu rí phú májáan a̱kui̱in Ana̱ꞌlóꞌ jaꞌyeꞌ, ikhaa jngó ninindxu̱ꞌ rí ñajunꞌ xúge̱ꞌ. Jamí táꞌne díí ga̱jma̱á nindxu̱ꞌ rí nixníꞌ Ana̱ꞌlóꞌ, a̱ꞌkhue̱n gakon, ikhúúnꞌ phú i̱tha̱án ni̱ñajun xó rí mbá xúgíin tsí waxúngui̱inꞌ. Ra̱ꞌkhá ski̱yu̱ꞌ ikhúúnꞌ naꞌne rí na̱ꞌngo̱ꞌ na̱ñajunlo̱ꞌ, rí ga̱jma̱á numuu rí Ana̱ꞌlóꞌ xtáa ga̱jma̱á nindxu̱ꞌ. 11 Ikhaa jngó, ga̱nindxu̱ꞌ ikhúúnꞌ o ga̱nindxúu̱n ikhii̱n, ikhaa máꞌ i̱sngááxo̱ꞌ, jamí ikhaa máꞌ rúꞌkhue̱n ñajuun rí ninimba̱ꞌlaꞌ.

12 Xí ikháanꞌxo̱ꞌ nu̱tha̱n-ráꞌaxo̱ꞌ rí Krísto̱ ndiyáa mbiꞌyuu, náá numuu kajngó mbá tikhuun tsí ikháanꞌlaꞌ nuthan rí ma̱xúya̱a mbiꞌñúú tsí nijáñúú róꞌ. 13 Xí ma̱xúya̱a mbiꞌñúú tsí nijáñúú, táyáa máꞌ mbiꞌyuu Krísto̱ mangaa xúꞌkhue̱n rá. 14 Jamí xí Krísto̱ táyáa mbiꞌyuu, nda̱a̱ máꞌ numuu rí nu̱tha̱n-ráꞌaxo̱ꞌ xúꞌkhue̱n rá, jamí nda̱a̱ máꞌ numuu rí wéje̱ a̱kia̱nꞌlaꞌ ná inuu Ana̱ꞌlóꞌ mangaa. 15 Xí gakon rí ma̱xúya̱a mbiꞌñúú tsí nijáñúú, ikháanꞌxo̱ꞌ ñajwanxo̱ꞌ xa̱bi̱i Ana̱ꞌlóꞌ tsí mi̱nduwiin xúꞌkhue̱n rá, numuu rí ikháanꞌxo̱ꞌ ni̱tha̱nxo̱ꞌ rí ikhaa̱ niꞌnii̱ rí mbayáa mbiꞌyuu Krísto̱. 16 Xí ma̱xúya̱a mbiꞌñúú tsí nijáñúú, táyáa máꞌ mbiꞌyuu Krísto̱ mangaa xúꞌkhue̱n rá. 17 Jamí xí táyáa mbiꞌyuu Krísto̱, nda̱a̱ máꞌ numuu rí wéje̱ a̱kia̱nꞌlaꞌ ná inuu Ana̱ꞌlóꞌ, jamí xóó máꞌ táꞌne mba̱a̱ a̱kui̱in Ana̱ꞌlóꞌ jaꞌyoo aꞌkhánlaꞌ xúꞌkhue̱n rá. 18 Xí xkuaꞌnii jaꞌnii, tsí nijáñúú nanimbu̱únꞌ juyáá Krísto̱, nindáti̱gii̱n máꞌ mangii̱n xúꞌkhue̱n rá. 19 Xí i̱ndo̱ó máꞌ jayu ná numbaa ríge̱ꞌ mbá jañii a̱kia̱nꞌlóꞌ guáꞌthi̱ínlóꞌ rí mambáyálóꞌ Krísto̱, ikháánꞌlóꞌ ñajwanlóꞌ tsí phú i̱tha̱án mingíníi inúú mbá xúgíin xa̱bo̱ xúꞌkhue̱n rá.

20 I̱ndo̱ó máꞌ numuu rí phú gakon rí ndiyáa mbiꞌyuu Krísto̱. Ikhaa̱ ñajuu̱n tsí ginii jayu ndiyáa mbiꞌyuu ná inúú tsí nijáñúú. 21 Xómá rí ga̱jma̱á majñu̱u̱ mbáwíi xa̱bo̱ nijáñúú mbá xúgíin xa̱bo̱, xkuaꞌnii máꞌ mangaa ga̱jma̱á majñu̱u̱ mbáwíi xa̱bo̱ mbuya̱a mbiꞌñúú tsí nijáñúú. 22 Xómá rí najáñúú mbá xúgíin xa̱bo̱ tsí na̱gu̱mii ga̱jma̱á majñu̱u̱ Adán, xkuaꞌnii máꞌ mangaa mbuya̱a mbiꞌñúú mbá xúgíin xa̱bo̱ tsí na̱gu̱mii ga̱jma̱á majñu̱u̱ Krísto̱. 23 I̱ndo̱ó máꞌ numuu rí mbámbáa gátu̱xi̱i ído̱ gága̱nú mbiꞌi: Krísto̱ ñajuun tsí ginii jayu. Nda̱wa̱á, ído̱ ma̱ꞌkhaa̱ mbuya̱a mbiꞌñúú tsí ñajúún xa̱bii̱. 24 A̱ꞌkhue̱n rí ma̱mbá numbaa, ído̱ rí Krísto̱ maxnáxii̱ rí niꞌthán-ñájuu̱n ná ñawúun Ana̱ꞌlóꞌ Mikhuíí, ído̱ gáꞌne gámbo̱o̱ ski̱ñu̱ú mbá xúgíin gíñá ꞌguéen, xúgíin xa̱bo̱ ñajun jamí xúgíin thúngaa. 25 Numuu ndaꞌyóo rí Krísto̱ maꞌthán-ñájun asndo náá gáꞌngo̱o̱ inúú mbá xúgíin tsí sia̱nꞌ gajmíi̱. 26 Jamí asndo nda̱wa̱á jayu ma̱ꞌne-gámbo̱o̱ tsiakhe̱ sia̱nꞌ rí naꞌne rí ma̱ja̱ñúú xa̱bo̱. 27 Numuu rí «mbá xúgíí niꞌgí Ana̱ꞌlóꞌ inuu̱ rí maꞌthán-ñájuu̱n».* Ído̱ nithán rí «mbá xúgíí» ni̱ge̱ꞌe̱ inuu̱ rí maꞌthán-ñájuu̱n, nakujma nguáná máꞌ rí Krísto̱ tsíꞌthán-ñájuu̱n asndo Ana̱ꞌlóꞌ, numuu rí jmína̱a̱ꞌ máꞌ Ana̱ꞌlóꞌ ñajuun tsí niꞌgíi̱ rí maꞌthán-ñájuu̱n mbá xúgíí. 28 Jamí ído̱ rí mbá xúgíí máꞌ ni̱to̱ꞌo̱o̱ ñawúu̱n rí maꞌthán-ñájuu̱n, a̱ꞌkhue̱n rí jmína̱a̱ꞌ máꞌ Krísto̱ mangaa, tsí A̱dée Ana̱ꞌlóꞌ, maniña-mine̱e̱ꞌ rí mi̱ꞌthán-ñájwíi̱n gáꞌne tsí niꞌgíi̱ rí maꞌthán-ñájuu̱n mbá xúgíí. A̱ꞌkhue̱n rí Ana̱ꞌlóꞌ maꞌthán-ñájuun mbá xúgíí jamí mbá xúgíin xa̱bo̱.

29 Xí ra̱ꞌkhá xkuaꞌnii, dí lá gámbáñúú tsí nu̱xu̱ꞌdú-maꞌán-mijná ná awúun iya ga̱jma̱á numúú tsí nijáñúú rá. Xí ni miꞌtsú ma̱xúya̱a mbiꞌñúú tsí nijáñúú, náá numuu kajngó nu̱xu̱ꞌdú-maꞌán-mijnée̱ ná awúun iya ga̱jma̱á numúú tsí nijáñúú róꞌ. 30 Jamí ikháanꞌxo̱ꞌ, náá numuu kajngó juwaxo̱ꞌ ná awúun ngamí rí ma̱ja̱ñáxo̱ꞌ mbámbá mbiꞌi róꞌ. 31 A̱ngui̱nꞌ, na̱tha̱nꞌ-jmbalaꞌ rí mbámbá mbiꞌi rí xtáálo̱ꞌ, ngamí ma̱ja̱ñúꞌ. Phú gakon rúꞌkhue̱n, xómá phú gakon rí nadxu a̱kui̱nꞌ ja̱ya̱ꞌlaꞌ numuu rí nanimba̱ꞌlaꞌ ju̱ya̱á Tátiálóꞌ Jesukrísto̱. 32 Xí i̱ndo̱ó máꞌ ná numbaa ríge̱ꞌ juwalóꞌ, dí ñajuun ni̱ꞌngo̱ꞌ rí ni̱tsa̱ñu̱ꞌ gajmíꞌ xa̱bo̱ tsí xómá i̱ndi̱í jaꞌñúú ná xuajen Éfe̱so̱ xúꞌkhue̱n rá. Xí ma̱xúya̱a mbiꞌñúú tsí nijáñúú, i̱wa̱á máján: «Gu̱peꞌtsolóꞌ jamí gu̱ꞌwa̱a̱nlóꞌ iya, numuu rí gátsíí ma̱ja̱ñálóꞌ».

33 Mu̱xúni̱ꞌñá-mijnálaꞌ rí ma̱gu̱ma-nduwáanꞌlaꞌ. Xáꞌnii iꞌthán mbá ajngáa: «Xa̱bo̱ tsí naguꞌwúún máꞌ nune̱ rí ra̱máján, mune̱-maꞌkhíi̱n xa̱bo̱ tsí naguꞌwúún máꞌ nune̱ rí máján». 34 ¡Ga̱jwi̱iꞌlaꞌ! Gu̱ndxa̱ꞌwa̱-mijná májánlaꞌ rí mu̱ne̱laꞌ, jamí náxúne̱laꞌ aꞌkhán. Numuu rí mbá tikhuáanꞌlaꞌ tsíne̱-nuwiinlaꞌ Ana̱ꞌlóꞌ. Na̱tha̱nꞌlaꞌ ríge̱ꞌ kajngó ma̱ti̱ya̱ꞌlaꞌ.

35 Á gáꞌne xí mbáa maraxe̱: «Xáne gúya̱a mbiꞌñúú tsí nijáñúú róꞌ. Xáne jaꞌnii xuñúu̱ gáꞌne ído̱ rí ma̱ga̱jnáa̱ ná iñá-wajen róꞌ». 36 ¡Maphú júgoo inaaꞌ! Ído̱ rí ikháánꞌ nathadu mbá tsíga, ndaꞌyóo rí ma̱ja̱ñúu ne̱ ginii kajngó ma̱jráꞌán ne̱. 37 Ra̱ꞌkhá inúu ne̱ rí ma̱jráꞌán ná inuu ju̱ba̱ꞌ ithadu, rí i̱ndo̱ó máꞌ tsíga ithadu, ga̱nindxu̱u̱ ne̱ ixí o i̱mba̱ inii tsíga mbo̱ꞌ. 38 Xómáꞌ Ana̱ꞌlóꞌ naxnúu̱ xuyuu ne̱ xómá naꞌne a̱kuii̱n ikhaa̱, jamí mbámbá tsíga kriꞌkhu xuyuu ne̱. 39 Ra̱ꞌkhá mbóó inii xuwi ñajuun mbá xúgíí xuwi rí ríga̱, rí mbá inii xuwi ñajúún xa̱bo̱, i̱mba̱ inii xuwi ñajúún xu̱kú-xáná, i̱mba̱ inii rí ñajúún i̱gi̱ꞌ, jamí i̱mba̱ inii rí ñajúún xu̱kú xna. 40 Mbá xó jaꞌnii xuyuu mbaꞌa rí ríga̱ mikhuíí, jamí i̱mba̱ xó jaꞌnii xuyuu mbaꞌa rí ríga̱ mbayíí. I̱ndo̱ó máꞌ numuu rí mbá xó tsiꞌyá mbaꞌa rí ríga̱ mikhuíí, jamí i̱mba̱ xó tsiꞌyá mbaꞌa rí ríga̱ mbayíí. 41 Mbá xó tsiꞌyáa a̱kha̱ꞌ, i̱mba̱ xó tsiꞌyáa go̱nꞌ, jamí i̱mba̱ xó tsiꞌñíi a̱ꞌgua̱án, numuu rí mbámbáa a̱ꞌgua̱án kriꞌkhu tsiꞌyáa̱.

42 Xkuaꞌnii máꞌ gáꞌne ído̱ rí mbuya̱a mbiꞌñúú tsí nijáñúú mangaa. Rí nidu ná awúun ju̱ba̱ꞌ naꞌga ne̱, jamí ído̱ rí mba̱ꞌya̱a ne̱ náxíga ne̱. 43 Rí nidu, xkawe̱ꞌ giaxu̱u̱ ne̱, jamí rí mba̱ꞌya̱a mitsaan giaxu̱u̱ ne̱. Rí nidu wabaa ne̱, jamí rí mba̱ꞌya̱a gakhi̱i̱ ne̱, náxájáñuu ne̱. 44 Rí nidu ñajuun xuwi ná numbaa ríge̱ꞌ, jamí rí mba̱ꞌya̱a, ñajuun xuwi rí nithán-ñájwíín eꞌne xe̱ꞌ. Xómá rí ríga̱ xuwi ná numbaa ríge̱ꞌ, xkuaꞌnii máꞌ ríga̱ xuwi rí nithán-ñájwíín eꞌne xe̱ꞌ mangaa.

45 Xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Adán, xa̱biya̱ tsí ginii jayu, ninindxu̱u̱ mbáa xa̱bo̱ tsí ndaꞌya».* Xómáꞌ Adán tsí nda̱wa̱á jayu, ninindxu̱u̱ xe̱ꞌ tsí naꞌne rí mbuya xa̱bo̱. 46 Ginii niríga̱ xuyuu xa̱bo̱ rí ni̱gu̱ma-ku̱maa ga̱jma̱á ju̱ba̱ꞌ, nda̱wa̱á ma̱ri̱gá xuyuu̱ rí mi̱ꞌthán-ñájwíín gáꞌne xe̱ꞌ. 47 Xa̱biya̱ tsí ginii, ni̱gu̱ma-ku̱maa̱ ga̱jma̱á ju̱ba̱ꞌ, jamí ná mbayíí ni̱ꞌkhe̱e̱. Xómáꞌ xa̱biya̱ tsí riajma̱a̱ tsí ñajuun Táta̱ tsí naꞌthán-ñájun,* ná mikhuíí ni̱ꞌkhe̱e̱. 48 Xómá jaꞌnii xa̱bo̱ tsí ni̱ꞌkha̱ ná mbayíí, xkuaꞌnii máꞌ jaꞌñúú xa̱bo̱ tsí júwa̱ꞌ ná numbaa ríge̱ꞌ mangaa. Jamí xómá jaꞌnii xa̱bo̱ tsí ni̱ꞌkha̱ ná mikhuíí, xkuaꞌnii máꞌ jaꞌñúú xa̱bo̱ tsí júwa̱ꞌ ná mikhuíí mangaa. 49 Xómá rí ninindxa̱ꞌlóꞌ xómá jaꞌnii xa̱bo̱ tsí ni̱gu̱ma-ku̱maa ga̱jma̱á ju̱ba̱ꞌ, xkuaꞌnii máꞌ ma̱nindxa̱ꞌlóꞌ xómá jaꞌnii xa̱bo̱ tsí ni̱ꞌkha̱ ná mikhuíí mangaa.

50 A̱ngui̱nꞌ, nandoꞌ gátha̱nꞌlaꞌ ríge̱ꞌ: Rí xómá jaꞌnii xuyalóꞌ xúge̱ꞌ, nda̱a̱ rí ma̱goo ma̱janálóꞌ ná naꞌthán-ñájun Ana̱ꞌlóꞌ, numuu rí xuyalóꞌ rí naꞌchúu ma̱xáxóo ma̱ri̱gá ne̱ ná ríga̱ rí tsíꞌchúu.

51 Gu̱dxawíín májánlaꞌ, numuu rí ma̱tha̱nꞌlaꞌ awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú: Ra̱ꞌkhá mbá xúgiáanꞌlóꞌ ma̱ja̱ñálóꞌ, i̱ndo̱ó máꞌ numuu rí mbá xúgiáanꞌlóꞌ ma̱xtiꞌkhuáanꞌlóꞌ mbá jayu. 52 Mbá nacha̱ jayu gáꞌne, xómá rí naxpáduu xa̱bo̱, ído̱ gáwán rí nda̱wa̱á jayu ajwa̱nꞌ e̱ꞌmbi. Numuu rí ma̱wán e̱ꞌmbi, jamí tsí nijáñúú mbuyaa̱ mbiꞌñúu̱ rí ma̱ju̱wée̱ꞌ jámuu, xómáꞌ ikháánꞌlóꞌ ma̱xtiꞌkhuáanꞌlóꞌ mbá jayu. 53 Numuu ndaꞌyóo rí ma̱xtiꞌkhu̱u xuyalóꞌ rí naꞌga, ma̱ꞌni̱i ne̱ rí tsíꞌga, jamí ikhaa máꞌ xuyalóꞌ rí najáñuu ma̱ꞌni̱i ne̱ rí tsíjáñuu. 54 Ído̱ gáxtiꞌkhu̱u rí naꞌga ma̱ꞌni̱i ne̱ rí tsíꞌga, jamí ikhaa máꞌ rí najáñuu ma̱ꞌni̱i ne̱ rí tsíjáñuu, a̱ꞌkhue̱n ma̱mba̱núu rí ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Ni̱ꞌngo̱o̱ ni̱gu̱ma-gámba̱a mbá jayu tsiakhe̱ rí naꞌne rí ma̱ja̱ñúú xa̱bo̱».*

55 «Ikháánꞌ, tsiakhe̱ rí naꞌne rí ma̱ja̱ñúú xa̱bo̱, náá ni̱ka̱ rí ni̱ꞌnga̱a̱ꞌ rá.

Ikháánꞌ, tsiakhe̱ rí naꞌne rí ma̱ja̱ñúú xa̱bo̱, náá ni̱ka̱ ski̱ya̱a̱ꞌ rá».*

56 Rí naꞌne rí ma̱ja̱ñálóꞌ ñajuun aꞌkhánlóꞌ. Rí nasngájma aꞌkhánlóꞌ ñajuun xtángawoo Moisés, jamí naxnúu ne̱ tsiakhe̱ aꞌkhánlóꞌ rí ma̱gu̱diáanꞌlóꞌ. 57 I̱ndo̱ó máꞌ numuu rí núma̱aꞌ la Ana̱ꞌlóꞌ rí naꞌnii̱ rí ma̱ꞌnga̱ꞌlóꞌ ga̱jma̱á majñu̱u̱ Tátiálóꞌ Jesukrísto̱.

58 Ikhaa jngó a̱ngui̱nꞌ, tsáanꞌ phú nandoꞌ ja̱ya̱ꞌlaꞌ, ga̱wajún-gúkuálaꞌ jamí ma̱xáꞌne níꞌnga̱ꞌlaꞌ. Gu̱ne̱laꞌ jámba̱ miꞌtsú ñajuun Táta̱, numuu rí ndu̱ya̱álaꞌ máꞌ rí jámuu gíꞌdoo numuu ñajun rí nu̱ne̱laꞌ ná inuu Táta̱.