1 Ído̱ rí mbáa tsí ikháanꞌlaꞌ gíꞌdoo xkujndu ga̱jma̱á i̱mba̱a̱ꞌ, á tsíti̱yu̱u̱ꞌ rí nanújngoo̱ ná inúú xa̱bo̱ ñajun tsí tsíne̱-nuwiin Ana̱ꞌlóꞌ rá dxe̱ꞌ. Náá numuu kajngó tsíka̱ jayóo̱ xkujndu ríge̱ꞌ ná inúú xa̱bi̱i Ana̱ꞌlóꞌ róꞌ. 2 Á tsíya̱álaꞌ rí xa̱bi̱i Ana̱ꞌlóꞌ wéje̱ rí mu̱ra̱jwa̱ꞌ numúú xa̱bo̱ tsí júwa̱ꞌ ná numbaa rá dxe̱ꞌ. Xí ikháanꞌlaꞌ wéje̱ rí mu̱ra̱jwa̱ꞌlaꞌ numúú xa̱bo̱ tsí júwa̱ꞌ ná numbaa, na̱nguá máꞌ mingíjyúu rí mu̱ra̱jwa̱ꞌlaꞌ numuu xkujndu rí maka xúꞌkhue̱n rá. 3 Ndu̱ya̱á májánlaꞌ máꞌ rí ikháánꞌlóꞌ mu̱ra̱jwa̱ꞌlóꞌ numúú asndo ánje̱l. I̱wa̱á lá xkujndu rí ríga̱ ná numbaa ríge̱ꞌ mu̱xúra̱jwa̱ꞌlóꞌ numuu. 4 Ikhaa jngó, xí guáꞌdáálaꞌ xkujndu ga̱jma̱á numuu rí ríga̱ tsitsíí ná numbaa ríge̱ꞌ, mu̱xúraꞌwíinlaꞌ xa̱bo̱ tsí na̱nguá gíꞌdoo numúú ná inúú tsí nanimbu̱únꞌ juyáá Jesús rí mu̱ra̱jwa̱ꞌ numalaꞌ. 5 Na̱tha̱nꞌlaꞌ ríge̱ꞌ kajngó ma̱ti̱ya̱ꞌlaꞌ. Á ndawa̱a̱ asndo nimbáa tsí na̱ma̱ñuu ma̱ra̱jwa̱ꞌ numúú a̱ngui̱in ná majña̱ꞌlaꞌ kajngó dxe̱ꞌ. 6 Maphú mate̱ꞌ rí mbáa dxájwalóꞌ na̱tsa̱ñu̱u̱ꞌ ga̱jma̱á i̱mba̱a̱ꞌ dxájwalóꞌ ná inúú xa̱bo̱ ñajun tsí tsíne̱-nuwiin Ana̱ꞌlóꞌ.

7 Mbáá máꞌ rí phú xkawe̱ꞌ ikujma rí mbáko máꞌ ikháanꞌlaꞌ na̱tsa̱ña̱ꞌlaꞌ. Náá numuu kajngó tsíne̱ mba̱a̱ a̱kia̱nꞌlaꞌ ído̱ rí na̱gu̱máaꞌlaꞌ rí ra̱máján róꞌ. Náá numuu kajngó tsíni̱ꞌñá-mijnálaꞌ rí ma̱gu̱ma-kúwa̱ꞌlaꞌ róꞌ. 8 Xómáꞌ ikháanꞌlaꞌ nu̱ne̱laꞌ rí ra̱máján jamí nu̱ne̱-ku̱ꞌwúúnlaꞌ asndo a̱ngia̱nꞌlaꞌ máꞌ.

9 Ndu̱ya̱á máꞌ májánlaꞌ rí xa̱bo̱ tsí nune̱ rí xkawe̱ꞌ, nda̱a̱ rí gájanúu̱ ná naꞌthán-ñájun Ana̱ꞌlóꞌ. Mu̱xúne̱-nduwa-mijnálaꞌ. Ni máꞌ tsí nubúún gajmíí a̱ꞌgo̱ tsí túya̱a̱, ni máꞌ tsí nune̱-mbi̱in tsí ra̱ꞌkháa Ana̱ꞌlóꞌ ñajúún, ni máꞌ tsí nubúún gajmíí a̱ꞌgui̱i i̱mba̱a̱ꞌ xa̱bo̱, ni máꞌ xa̱bekha tsí nune̱-mijná go̱ꞌo̱, ni máꞌ xa̱bekha tsí nubúún gajmíí xa̱bekha, 10 ni máꞌ tsí nune̱-ku̱ꞌwá, ni máꞌ tsí na̱ni̱gu̱ún mu̱guaꞌdáá mi̱ndaꞌkho, ni máꞌ tsí najngi̱in, ni máꞌ tsí nuxna-maꞌán, ni máꞌ tsí nu̱drígú-jáꞌñúú xa̱bo̱ ga̱jma̱á mi̱nduwa, nda̱a̱ rí gájanúu̱ ná naꞌthán-ñájun Ana̱ꞌlóꞌ. 11 Ikhaa ríge̱ꞌ ninindxu̱ún mbá tikhuun tsí ikháanꞌlaꞌ. Xómáꞌ Ana̱ꞌlóꞌ neꞌne mba̱a̱ a̱kuii̱n máꞌ jaꞌyalaꞌ, neꞌne-jaꞌwáa̱nꞌlaꞌ máꞌ, jamí nánda̱a̱ máꞌ aꞌkhánlaꞌ ga̱jma̱á numuu Táta̱ Jesukrísto̱,* jamí ga̱jma̱á numuu Xu̱u̱ꞌ Ana̱ꞌlóꞌ.

12 Mbá tikhuun xa̱bo̱ nuthan: «Mbá xúgíí rí nandoꞌ, ma̱goo ma̱ne̱lo̱ꞌ», i̱ndo̱ó máꞌ numuu rí ra̱ꞌkhá mbá xúgíí nafriya̱ꞌ. «Mbá xúgíí rí nandoꞌ, ma̱goo ma̱ne̱lo̱ꞌ», i̱ndo̱ó máꞌ numuu rí ikhúúnꞌ ma̱xáni̱ꞌñá-mina̱ꞌ rí maxná-ñájwinꞌ asndo nimbá. 13 I̱ꞌwíin xa̱bo̱ nuthan: «Rí ganitsu ni̱gu̱ma-ku̱maa ne̱ rí ma̱ti ne̱ ná awúun xa̱bo̱, jamí xa̱bo̱ gíꞌdoo awúun kajngó ma̱ti ganitsu». I̱ndo̱ó máꞌ numuu rí Ana̱ꞌlóꞌ ma̱ꞌne-gámbo̱o̱ mbá nájma̱ rúꞌkhue̱n. Xómáꞌ xuyalóꞌ, tágu̱ma-ku̱maa ne̱ kajngó mu̱ꞌbálóꞌ gajmiálóꞌ xa̱bo̱ tsí túꞌyáalóꞌ, rí xuyalóꞌ ni̱gu̱ma-ku̱maa ne̱ kajngó mu̱ꞌne̱-mba̱a̱lóꞌ Táta̱, jamí Táta̱ xtáa̱ rí ma̱ña̱wu̱u̱n xuyalóꞌ. 14 Xómá rí Ana̱ꞌlóꞌ neꞌne rí mbayáa mbiꞌyuu Táta̱, xkuaꞌnii máꞌ ma̱ꞌnii̱ rí mbu̱ꞌyáa mbiꞌyalóꞌ mangáanꞌlóꞌ ga̱jma̱á ski̱yu̱u̱ꞌ. 15 Ndu̱ya̱á májánlaꞌ máꞌ rí mbámbáa tsí ikháanꞌlaꞌ jimaa ná xuyuu Krísto̱. Ra̱máján rí mba̱ya̱lo̱ꞌ mbá dxájuu xuyuu Krísto̱ jamí ma̱ne̱ rí mago̱-mina̱ꞌ ne̱ ga̱jma̱á mbáa a̱ꞌgo̱ tsí na̱ngu̱jwa̱-mina̱ꞌ. 16 Á tsíya̱álaꞌ rí xa̱bo̱ tsí nabóo ga̱jma̱á a̱ꞌgo̱ tsí na̱ngu̱jwa̱-mina̱ꞌ, nanindxu̱u̱ i̱mba̱wíi xa̱bo̱ ga̱jmáa̱ rá dxe̱ꞌ. Numuu rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Nájmii̱ ma̱nindxúu̱n i̱mba̱wíi xa̱bo̱».* 17 Xómáꞌ tsí na̱ru̱wa-mina̱ꞌ ga̱jma̱á Táta̱ rá, naꞌni̱i la i̱mbo̱ó nímii̱ ga̱jma̱á nindxu̱u̱.

18 Mu̱xúba̱ꞌlaꞌ gajmiálaꞌ xa̱bo̱ tsí túya̱a̱laꞌ. Asndo náá máꞌ rí i̱mba̱ aꞌkhán rí naꞌne xa̱bo̱, tsíꞌne-ñawúu̱n máꞌ xuyuu̱. Xómáꞌ tsí nabóo ga̱jma̱á xa̱bo̱ tsí táyáa rá, naꞌnii̱ aꞌkhán ga̱jma̱á numuu xuyuu̱. 19 Á tsíya̱álaꞌ rí ikháanꞌlaꞌ ñajwanlaꞌ xómá guꞌwóo Xu̱u̱ꞌ Ana̱ꞌlóꞌ rá dxe̱ꞌ. Xu̱u̱ꞌ Ana̱ꞌlóꞌ xtáa ná awúun a̱kia̱nꞌlaꞌ, jamí na̱nguá jaꞌyalaꞌ ikháanꞌlaꞌ xuyalaꞌ. 20 Numuu rí Ana̱ꞌlóꞌ niꞌtsiáanꞌlaꞌ. Ikhaa jngó, gu̱ne̱-mba̱a̱laꞌ Ana̱ꞌlóꞌ ga̱jma̱á xuyalaꞌ jamí ga̱jma̱á xa̱ꞌlaꞌ, numuu rí ikhaa rúꞌkhue̱n jaꞌyoo Ana̱ꞌlóꞌ.*