1 Nda̱wa̱á a̱ꞌkhue̱n ni̱dxawuun ná mikhuíí, asndo xómá a̱ꞌwúún xa̱bo̱ tsí phú mbaꞌiin mi̱ndaꞌkho jaꞌnii, tsí nuthan ajngáa ríge̱ꞌ:

«¡A̱gu̱ma-mba̱a̱ Ana̱ꞌlóꞌ!

Ikhaa̱ neꞌne-jríñáa̱ꞌlóꞌ,

ikhaa̱ jaꞌyoo̱ rí ma̱grui̱guíi̱ gamaku, naꞌnii̱ rí phú wáá,

jamí ikhaa̱ phú gíꞌdoo̱ tsiakhe̱.

2 Numuu rí Ana̱ꞌlóꞌ naxudaa mújúun awan jamí jmbu ga̱jma̱á numúú xa̱bo̱.

Ikhaa̱ niꞌnii̱ rí ma̱grui̱gú jamínu̱ꞌ a̱ꞌgo̱ tsí na̱ngu̱jwa̱-mina̱ꞌ mi̱ndaꞌkho,

tsí nibóo gajmíí mbaꞌiin xa̱bo̱ jamí neꞌne-maꞌkhíi numbaa.

Ana̱ꞌlóꞌ neꞌne rí mamínu̱u̱ꞌ a̱ꞌgo̱ tsúꞌkhue̱n,

kajngó ma̱ꞌne-numaa̱ rí ni̱gu̱díi̱n yumbée Ana̱ꞌlóꞌ».

3 A̱ꞌkhue̱n nithee̱n mbu̱júꞌ:

«¡A̱gu̱ma-mba̱a̱ Ana̱ꞌlóꞌ!

Numuu rí jámuu ma̱we̱je̱ gúniúu rí nakhaa a̱ꞌgo̱ tsúꞌkhue̱n».

4 A̱ꞌkhue̱n rí xa̱bo̱ buanuu tsí mbá skíñú akhu̱un (24) jamí mbá akhu̱un máꞌ tsí nduya, ni̱smáti̱gúu̱n rí mune̱-mba̱a̱ Ana̱ꞌlóꞌ, tsí ꞌgí ná xíli̱i thúngaa, jamí nithee̱n:

«¡Xkuaꞌnii gáꞌne! ¡A̱gu̱ma-mba̱a̱ Ana̱ꞌlóꞌ!».

5 A̱ꞌkhue̱n nigájnuu mbá a̱ꞌwá ná ꞌgí xíli̱i thúngaa, rí niꞌthán:

«¡Gu̱ne̱-mba̱a̱laꞌ Ana̱ꞌlóꞌ mbá xúgiáanꞌ ikháanꞌlaꞌ, tsáanꞌ ñajwanlaꞌ yumbée̱,

mbá xúgiáanꞌ ikháanꞌlaꞌ tsáanꞌ ndu̱ya̱-makuíi̱laꞌ,

xa̱bo̱ tsí makiin jamí xa̱bo̱ tsí mba̱ꞌwu̱un!».

6 A̱ꞌkhue̱n ni̱dxawuun mbaꞌa a̱ꞌwá, xómá a̱ꞌwúún xa̱bo̱ tsí mbaꞌiin mi̱ndaꞌkho jaꞌnii, xómá a̱ꞌwóo mbá xtangaya rí phú mba̱a̱ jaꞌnii, jamí xómá gakhe̱ nawán ído̱ rí naxpíbi mikhuíí jaꞌnii. Xáꞌnii iꞌthán a̱ꞌwá:

«¡A̱gu̱ma-mba̱a̱ Ana̱ꞌlóꞌ!

Numuu rí naꞌthán-ñájun máꞌ Táta̱, Ana̱ꞌlóꞌ tsí gíꞌdoo mbá xúgíí tsiakhe̱.

7 Ga̱ꞌdxu a̱kia̱nꞌlóꞌ, ga̱juwalóꞌ gagi

jamí gu̱ꞌne̱-mba̱a̱lóꞌ Ana̱ꞌlóꞌ.

Numuu rí ni̱ga̱nú máꞌ mbiꞌi rí manigúún A̱ꞌdá-mógó,

jamí xtáa̱ máꞌ na̱ma̱ñuu tsí ma̱ꞌne a̱ꞌguii̱.

8 Jamí nijanáa̱ majúwuu̱n xtíin máján rí ni̱gu̱ma ga̱jma̱á gúmá líno̱,

rí jaꞌwu jamí nambiꞌi-taꞌa».

Numuu rí xtíin máján rí ni̱gu̱ma ga̱jma̱á gúmá líno̱, naꞌne xtiꞌkhuu rí máján nune̱ xa̱bi̱i Ana̱ꞌlóꞌ.

9 A̱ꞌkhue̱n niꞌthínꞌlo̱ꞌ ánje̱l: «Aratháán ríge̱ꞌ: "Gagi júwa̱ꞌ xa̱bo̱ tsí watsaꞌwúún rí mu̱peꞌtso-añúú ná manigúún A̱ꞌdá-mógó"». Jamí niꞌthínꞌ xóó: «Ajngáa rawuun Ana̱ꞌlóꞌ rí phú gakon ñajuun ríge̱ꞌ».

10 A̱ꞌkhue̱n ni̱smáti̱go̱ꞌ ná nakhúu ánje̱l kajngó ma̱ne̱-mba̱a̱lo̱ꞌ, xómáꞌ ikhaa̱ niꞌthínꞌ: «¡Ma̱xátha̱ne̱ rúꞌkhue̱n! Athane̱-mba̱a̱ i̱ndo̱ó máꞌ Ana̱ꞌlóꞌ, numuu rí yumbáá máꞌ ñajunꞌ mangúúnꞌ, xómá rí ikháánꞌ jamí xómá a̱ngia̱anꞌ tsí tsíni̱ꞌñáá gisngáá drígo̱o̱ Jesús. Tsí nuthan-raꞌa ajngóo Jesús, guáꞌdáa̱ xu̱únꞌ tsí ni̱rawíjnga̱a ajngóo Ana̱ꞌlóꞌ».

11 Nda̱wa̱á a̱ꞌkhue̱n ndi̱yo̱o̱ rí ja̱ma̱ꞌtha mikhu, jamí nikujmaa mbáa guáyo̱ miꞌxáa. Xómáꞌ xa̱bo̱ tsí ríguu guáyo̱ mbiꞌyuu̱ «Tsí Jmbii jamí Kuwiin», numuu rí phú jmbii̱ ído̱ rí na̱ra̱jwe̱e̱ꞌ jamí ído̱ rí naꞌnii̱ xkujndu. 12 Rí iduu̱ nambiꞌi-taꞌa xómá ri̱ꞌyu̱u̱ agu, jamí tráma mbaꞌa ajwa̱nꞌ gamaku rí jndi ná idxu̱u̱. Ka̱ma waꞌtháán mbiꞌyuu̱ rí tsíꞌne-nuwiin nimbáa, rí i̱ndo̱ó máꞌ ikhaa̱ iꞌyoo̱. 13 Xómáꞌ xtíin rí júwuu̱n niꞌña̱to̱ꞌoo iꞌdi, jamí rí mbiꞌyuu̱ ñajuun: «Ajngóo Ana̱ꞌlóꞌ». 14 Naguwá ga̱jma̱á nindxu̱u̱ mbaꞌiin mi̱ndaꞌkho xa̱bo̱ tsí ku̱ra̱tuun ajwa̱nꞌ, tsí júwa̱ꞌ ná mikhuíí. Trámúu̱ guáyo̱ miꞌxíin mangii̱n jamí júwúu̱n xtíin líno̱ rí phú máján, rí miꞌxá jamí jaꞌwu. 15 Ná rawuu̱n nagájnuu mbá chíde̱ xíni kajngó ma̱ꞌne-jámbi̱yu̱u̱ꞌ mbá xúgíí xuajen numbaa. Maꞌthán-ñájuu̱n ne̱ ga̱jmáa̱ nixí ajwa̱nꞌ rí gúkú mi̱ndaꞌkho, jamí jmína̱a̱ꞌ máꞌ ikhaa̱ maxúꞌduu̱n xndú úba̱ ga̱jma̱á nakhúu̱ kajngó ma̱ga̱jnúu iyoo ne̱. Rí iyoo úba̱ naꞌne xtiꞌkhuu rí najiꞌnáa Ana̱ꞌlóꞌ tsí gíꞌdoo mbá xúgíí tsiakhe̱. 16 Ná xtíñuu̱ jamí ná sndi̱yu̱u̱ꞌ ka̱ma waꞌtháán mbiꞌyuu ríge̱ꞌ: «Thúngaa tsí naꞌthán-ñájúún mbá xúgíin thúngaa jamí Xa̱bo̱ Ede̱ tsí jayá ikhúún mbá xúgíin xa̱bo̱ ede̱».

17 Nda̱wa̱á a̱ꞌkhue̱n ndi̱yo̱o̱ wéje̱ mbáa ánje̱l ná inuu a̱kha̱ꞌ, nindxaꞌwée̱ inúú mbá xúgíin xu̱kú xna tsí ngrigu̱ún ná inuu gíñá: «A̱guwalaꞌ, gu̱ru̱wa-mijnáalaꞌ kajngó mu̱peꞌtso-añalaꞌ ná ndxa̱a̱ mba̱a̱ rí neꞌne-mújúun Ana̱ꞌlóꞌ. 18 A̱guwalaꞌ mu̱pholaꞌ xuñúú thúngaa, xuñúú xa̱bo̱ tsí nuthan-ñajúún tsí ku̱ra̱tuun ajwa̱nꞌ, xuñúú xa̱bo̱ tsí gakhe̱ a̱kui̱ín. Xúꞌkhue̱n máꞌ mu̱pholaꞌ xuñúú guáyo̱ jamí xa̱bo̱ tsí trámii tsu̱dúu̱n, xuñúú mbá xúgíí inii xa̱bo̱, xa̱bo̱ tsí nuthan-ñajun-mijná máꞌ ikhiin jamí yumbáá waꞌtsi̱in, xa̱bo̱ tsí makiin jamí xa̱bo̱ tsí mba̱ꞌwu̱un».

19 A̱ꞌkhue̱n ndi̱yo̱o̱ xu̱kú xkawi̱i̱ꞌ jamí ndi̱ñu̱ú thúngaa tsí nuthan-ñajun ná numbaa, gajmíi̱ xa̱bíi̱n tsí ku̱ra̱tuun ajwa̱nꞌ. Ni̱ru̱wa-mijnáa̱ rí muni̱i̱ xkujndu gajmíi̱ tsí ríguu guáyo̱ miꞌxáa jamí gajmíi̱ xa̱bii̱ tsí ku̱ra̱tuun ajwa̱nꞌ. 20 Tsí xu̱kú xkawi̱i̱ꞌ nikhuáa̱ ga̱jmáa̱ tsí na̱gu̱wíjnga̱a ajngáa mi̱nduwa. Ikhaa tsíge̱ꞌ ñajuun tsí neꞌne rí phú wáá ná inuu xu̱kú xkawi̱i̱ꞌ, jamí ga̱jma̱á majñu̱u̱ rúꞌkhue̱n neꞌne-nduwii̱n tsí ni̱dri̱gú tsinuu xu̱kú xkawi̱i̱ꞌ jamí nene̱-mba̱a̱ xtiꞌkhuu̱. Nájmi̱i tsíge̱ꞌ waxúꞌdu-maꞌíi̱n ná awúun agu a̱pha̱ rí nakha ga̱jma̱á asúfre̱. 21 Xómáꞌ tsí i̱ꞌwíin, nijáñúu̱ ga̱jma̱á chíde̱ rí nagájnuu ná rawuun tsí ríguu guáyo̱ miꞌxáa, jamí mbá xúgíin xu̱kú xna niꞌphi̱i̱ asndo ni̱gi̱ꞌmúu̱ xuñúú xa̱bo̱ tsí nijáñúú.