1 Nda̱wa̱á a̱ꞌkhue̱n ndi̱yo̱o̱ rí na̱ga̱taa ná mikhuíí mbáa ánje̱l tsí phú mba̱a̱ ski̱yu̱u̱ꞌ, jambráꞌaa̱ ná awúun du̱u̱n. Wéje̱ tu̱ka̱ya̱ꞌ ná idxu̱u̱, rí inuu̱ nambiꞌi-taꞌa xómá a̱kha̱ꞌ, jamí mbá jañii rí mbijwa̱ꞌ nakhúu̱ maña̱ꞌ jayu xómá ri̱ꞌyu̱u̱ agu. 2 Jayée̱ mbá i̱yi̱i̱ꞌ lájwíin rí ja̱ma̱ꞌtha ná ñawúu̱n. Nitsijii̱ nakhú mújúu̱n ná inuu iya a̱pha̱, jamí nakhú xti̱yu̱u̱ꞌ nitsijii̱ ná inuu ju̱ba̱ꞌ. 3 A̱ꞌkhue̱n phú gakhe̱ nindxaꞌwée̱, xómá indxaꞌwá mbáa i̱ndi̱í phuu, jamí núkho̱ máꞌ niwán nixpíbi mbá juwan nothon. 4 Ído̱ wámba̱ nixpíbi rí mbá juwan nothon, ni̱ꞌgí-mina̱ꞌ rí ma̱tháán. A̱ꞌkhue̱n ni̱dxawuun mbá a̱ꞌwá ná mikhuíí rí niꞌthínꞌ: «Ma̱xáta̱snga̱jmá rí nithan a̱ꞌwá rí nixpíbi mbá juwan nothon, ni máꞌ ma̱xára̱tháán ne̱».

5 A̱ꞌkhue̱n rí ánje̱l tsí ndi̱yo̱o̱ nitsiji nakhúu ná inuu iya a̱pha̱ jamí ná inuu ju̱ba̱ꞌ, nixúxi̱i̱ ñawúu̱n* ná mikhuíí 6 jamí nixuda-mine̱e̱ꞌ rí maꞌthée̱n rí gakon ga̱jma̱á numuu tsí xtáa̱ ndaꞌya jámuu, ikhaa tsí neꞌne-ku̱maa mikhu, ju̱ba̱ꞌ, iya a̱pha̱, jamí ga̱jma̱á máꞌ mbá xúgíí rí ríga̱ ná inuu ne̱ jamí ná awúun ne̱. Xáꞌnii niꞌthée̱n: «Nánguá mba̱yo̱ꞌ mbiꞌi rá. 7 Ído̱ rí ánje̱l tsí tijwaan mandiyuu ajwa̱nꞌ e̱ꞌmbi, a̱ꞌkhue̱n rí ma̱mba̱núu mbá xúgíí awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú. Ma̱ri̱gá xómá rí ikhaa̱ niꞌthúu̱n yumbée̱ tsí ni̱rawíjnga̱a ajngóo̱ wajyúú».

8 A̱ꞌkhue̱n a̱ꞌwá rí ni̱dxawuun ná mikhuíí niꞌthínꞌ mbu̱júꞌ: «Ayu gátri̱gú i̱yi̱i̱ꞌ lájwíin rí ja̱ma̱ꞌtha ná ñawúun ánje̱l tsí wéje̱ ná inuu iya a̱pha̱ jamí ná inuu ju̱ba̱ꞌ».

9 A̱ꞌkhue̱n nikalo̱ꞌ ná wéje̱ ánje̱l jamí ni̱ndo̱ꞌo̱o̱ rí maxníꞌ i̱yi̱i̱ꞌ lájwíin. Jamí ikhaa̱ niꞌthínꞌ: «Ayá ne̱ jamí atso ne̱. Ná rawaanꞌ ma̱ꞌne thawuun ne̱ xómá yáá, jamí ná awáanꞌ ma̱ꞌne miꞌkhu̱u̱n ne̱». 10 A̱ꞌkhue̱n ni̱gruígúlo̱ꞌ i̱yi̱i̱ꞌ lájwíin ná ñawúun ánje̱l jamí nikho ne̱. Phú máján thawuun ne̱ ná rawunꞌ xómá yáá, jamí ná awúnꞌ phú miꞌkhu̱u̱n ne̱ ndi̱yo̱o̱. 11 A̱ꞌkhue̱n waꞌthúnꞌ: «Mba̱ꞌyóo rí ma̱rawíjnga̱a mbu̱jwáaꞌ rí naꞌthán Ana̱ꞌlóꞌ rí ma̱gíꞌnuu mbaꞌa xuajen, mbaꞌa numbaa, mbaꞌa ajngáa jamí rí ma̱gíꞌníí mbaꞌiin thúngaa».