1 Nindiyuu ajwa̱nꞌ e̱ꞌmbi ánje̱l tsí tiwitsii, a̱ꞌkhue̱n ndi̱yo̱o̱ nixpátríguíi mbáa a̱ꞌgua̱án mikhuíí ná inuu ju̱ba̱ꞌ. Ikhaa̱ nijanáa̱ rí marmáꞌthoo̱ ga̱jma̱á iñá rí me̱jno̱ꞌ. 2 Ído̱ rí a̱ꞌgua̱án nirmáꞌthoo iñá rí me̱jno̱ꞌ, a̱ꞌkhue̱n nigájnuu gúní ikhín asndo xó mbá iñá mba̱a̱ rí nakha-roꞌoo mi̱ndaꞌkho jaꞌnii. A̱ꞌkhue̱n neꞌne jína inuu a̱kha̱ꞌ jamí inuu gíñá. 3 Ná majñu̱u̱ gúní nigájnúú tsíꞌbu tsí niguátaan ná inuu ju̱ba̱ꞌ, jamí nijanúu̱ tsiakhe̱ rí mu̱phúu̱n xa̱bo̱, xómá tsiakhe̱ rí guáꞌdáá xi̱yú. 4 Jamí waꞌxná-ñájúu̱n rí mu̱xúphi̱i̱ nimbá ra̱xa̱, ni máꞌ iná maxa rí ríga̱ ná tsu̱du̱u̱ ju̱ba̱ꞌ, ni máꞌ nimbá inúu ixe̱, rí i̱ndo̱ó máꞌ mu̱phúu̱n xa̱bo̱ tsí ra̱júda tsinuu Ana̱ꞌlóꞌ ná jédúún. 5 Xúꞌkhue̱n máꞌ waꞌxná-ñájúu̱n rí mu̱xúradíi̱n xa̱bo̱, rí i̱ndo̱ó máꞌ muni̱i̱ rí mu̱míni̱í mi̱ndaꞌkho xa̱bo̱ mbá witsuun go̱nꞌ. Numuu rí naꞌkho̱ mi̱ndaꞌkho ná naꞌphi̱i̱, xómá naꞌkho̱ eꞌne xi̱yú. 6 Awúun mbiꞌi rúꞌkhue̱n mbuꞌyá xa̱bo̱ rí ma̱ja̱ñúú, jamí mu̱xúxkamaa̱ xó rí ma̱ja̱ñúu̱. Maphú ma̱ꞌne a̱kuíi̱n rí ma̱ja̱ñúu̱, jamí ma̱xáxóo gája̱ñúu̱.

7 Tsí tsíꞌbu asndo xómá guáyo̱ tsí júwa̱ꞌ máꞌ na̱ma̱ñúú rí magóó ná ríga̱ xkujndu jaꞌñúu̱. Ná idxúu̱n tráma rí xómá ajwa̱nꞌ gamaku rí jndi jaꞌnii, rí ajwa̱nꞌ mo̱jmo̱ꞌ ñajuun. Rí inúu̱, xómá inúú xa̱bo̱ jaꞌnii ne̱. 8 Rí tsu̱u̱n idxúu̱n xómá tsu̱u̱n idxu̱u̱ a̱ꞌgo̱ jaꞌnii ne̱. Rí iñúu̱ xómá iñuu i̱ndi̱í phuu jaꞌnii ne̱. 9 Xómáꞌ ná xo̱xtúu̱n kathama rí xómá ajwa̱nꞌ jaꞌnii nambáñúu̱. Rí xpípíi̱n, wee jayu eꞌne ne̱ xómá wee eꞌne ído̱ rí phú mbaꞌa nakhúu ixe̱ i̱xu̱máá guáyo̱ tsí na̱tu̱ꞌu̱ún ná ríga̱ xkujndu. 10 Rí tsilúu̱n, xómá tsilúún xi̱yú jaꞌnii ne̱, jamí ná tsilúu̱n guáꞌdáa̱ iyandáwúu̱n. Nuni̱i̱ rí mu̱míni̱í xa̱bo̱ awúun rí mbá witsuun go̱nꞌ ga̱jma̱á iyandáwúu̱n. 11 Thúngaa tsí naꞌthán-ñájúún tsíꞌbu ñajuun ánje̱l tsí naꞌthán-ñájun ná iñá rí me̱jno̱ꞌ. Abadón mbiꞌyuu ánje̱l tsúꞌkhue̱n rí ajngáa ebréo̱, jamí Apolión mbiꞌyuu̱ rí ajngáa griégo̱.

12 Xkuaꞌnii ninújngoo timbá «wáái̱i̱» rí nindxaꞌwá bi̱yú, jamí xóó máꞌ ndaꞌyóo ma̱ꞌkha̱ ne̱ i̱jma̱.

13 Nindiyuu ajwa̱nꞌ e̱ꞌmbi ánje̱l tsí timajwiin, a̱ꞌkhue̱n ni̱dxawuun mbá a̱ꞌwá rí nagájnuu ná majñu̱u̱ mbá nákho̱ chi̱jyu̱u̱ꞌ ajwa̱nꞌ mo̱jmo̱ꞌ ná nakha wájya, rí wéje̱ ná inuu Ana̱ꞌlóꞌ. 14 A̱ꞌwá rúꞌkhue̱n niꞌthúun ánje̱l tsí timajwiin nindiyuu ajwa̱nꞌ e̱ꞌmbi: «Atrakhúún mbá nákhu̱un ánje̱l tsí xtuꞌwúún ná rawuun matha mba̱a̱ rí mbiꞌyuu Éu̱fra̱te̱s». 15 A̱ꞌkhue̱n watrakhúún mbá nákhu̱un ánje̱l tsí júwa̱ꞌ kiajúún máꞌ rí mu̱radíin mbóó rí atsú kuthuun xa̱bo̱ numbaa. Numuu rí guáꞌthíi̱n máꞌ rí ma̱ga̱nú tsigu, go̱nꞌ, mbiꞌi jamí mbrúma rúꞌkhue̱n, rí mu̱radíi̱n xa̱bo̱. 16 Jamí ni̱dxawuun wáthi̱in xa̱bo̱ tsí juda ajwa̱nꞌ trámúú guáyo̱ naguwá, ni̱dxawuun rí mbá a̱jma̱ siénto̱ miyón (200 000 000) ñajúu̱n.

17 Xáꞌnii jaꞌñúú guáyo̱ jamí xa̱bo̱ tsí trámúu̱ ndi̱yo̱o̱lo̱ꞌ inuu mbiꞌíí: Ná xo̱xtu̱ún xa̱bo̱ kathama ajwa̱nꞌ maña̱ꞌ rí xómá agu jaꞌnii rí nambáñúu̱, miꞌñuu xómá safíro̱ jamí mo̱jmo̱ꞌ xómá asúfre̱. Rí idxu̱ún guáyo̱ xómá idxu̱u̱ i̱ndi̱í phuu jaꞌnii ne̱, jamí ná rawúu̱n nangujwíi agu, gúní jamí asúfre̱. 18 Ga̱jma̱á numuu atsú inii jamínu̱ꞌ ríge̱ꞌ, nijáñúú mbóó rí atsú kuthuun xa̱bo̱ ná numbaa. Ikhaa ga̱jma̱á numuu agu, gúní jamí asúfre̱ rí nangujwíi ná rawúún guáyo̱. 19 Numuu rí ná rawúún guáyo̱ guáꞌdáá tsiakhe̱ jamí ná tsilúu̱n. Rí tsilúu̱n gíꞌdoo idxu̱u̱ xómá a̱bo̱ꞌ, jamí ga̱jma̱á tsilúu̱n nune̱-jámbi̱ñúu̱ꞌ xa̱bo̱.

20 Xómáꞌ i̱ꞌwíin xa̱bo̱ tsí tájáñúú ga̱jma̱á jamínu̱ꞌ rúꞌkhue̱n rá, túni̱ꞌñáa̱ rí nuni̱i̱ rí xkawe̱ꞌ, ni máꞌ túni̱ꞌñáa̱ rí nune̱-mbii̱n gíñá ꞌguéen, ni máꞌ túni̱ꞌñáa̱ rí nune̱-mbii̱n tsí ra̱ꞌkháa Ana̱ꞌlóꞌ ñajúún, tsí ninii̱ ga̱jma̱á ajwa̱nꞌ mo̱jmo̱ꞌ, ajwa̱nꞌ miꞌxá, ajwa̱nꞌ brónse̱, itsí jamí ga̱jma̱á ixe̱. Mbá xúgíin tsúꞌkhue̱n, tsí nene̱-ku̱mii xa̱bo̱ ga̱jma̱á ñawúún, na̱nguá i̱ya̱xi̱i̱ ni máꞌ tsídxawíi̱n ni máꞌ tsíngrigúu̱n ga̱jma̱á nakhúu̱n. 21 Xúꞌkhue̱n máꞌ táthanga̱a a̱kuíi̱n rí nu̱radíi̱n xa̱bo̱, ni máꞌ rí nuni̱i̱ xawan, ni máꞌ rí nubúu̱n gajmíi̱ xa̱bo̱ tsí túya̱a̱, ni máꞌ rí nune̱-ku̱ꞌwée̱.