1 Nda̱wa̱á a̱ꞌkhue̱n ndi̱yo̱o̱ na̱ga̱taa i̱mba̱a̱ꞌ ánje̱l ná mikhuíí. Phú mba̱a̱ ski̱yu̱u̱ꞌ jamí phú gakhe̱ nimbiꞌi-taꞌa ná numbaa neꞌne aguu̱. 2 Xúꞌkhue̱n máꞌ phú gakhe̱ nindxaꞌwée̱:

«¡Ni̱ka̱tixa̱ ne̱ rá! ¡Wámba̱a xuajen mba̱a̱ Babilónia̱ rá!

Niꞌni̱i ne̱ guꞌwúún gíñá ꞌguéen, jamí ná nduya̱a xu̱únꞌ mbá xúgíí inii gíñá xkawi̱inꞌ.

Niꞌni̱i ne̱ ná nune̱ xáñúú mbá xúgíí inii xu̱kú xna tsí naꞌpho̱ xuwi niꞌga jamí xkawi̱inꞌ mi̱ndaꞌkho.

3 Numuu rí xuajen Babilónia̱ neꞌne rí mbá xúgíin xa̱bo̱ numbaa mune̱ aꞌkhán ga̱jma̱á nindxu̱u̱.

Ga̱jma̱á nindxu̱u̱ ikhaa̱ nibúún mbá xúgíin thúngaa numbaa,

xómáꞌ xa̱bo̱ tsí nu̱ngu̱jwa̱, niꞌnii̱ rí phú ma̱guáꞌdáa̱ mbúkha̱a̱,

ga̱jma̱á numuu rí phú na̱ni̱gu̱u̱ꞌ ma̱xtáa̱ naꞌnii̱ rí nandoo xuyuu̱».

4 A̱ꞌkhue̱n ni̱dxawuun i̱mba̱ a̱ꞌwá ná mikhuíí:

«A̱ga̱jnáaꞌlaꞌ ná xuajen rúꞌkhue̱n, ikháanꞌlaꞌ tsáanꞌ xa̱bi̱ꞌ ñajwanlaꞌ,

ra̱ꞌkhá mu̱ne̱ mangáanꞌlaꞌ aꞌkhán rí naꞌnii̱ ikhaa̱,

jamí mu̱drígú mangáanꞌlaꞌ jamínu̱ꞌ rí ma̱grui̱guíi̱ ikhaa̱ gáꞌne.

5 Numuu rí nitíí aꞌkhúu̱n asndo mikhuíí,

jamí tsímbumuu Ana̱ꞌlóꞌ jaꞌyoo mbá xúgíí rí xkawe̱ꞌ niꞌnii̱.

6 Gu̱ñíi̱laꞌ xómá rí ikhaa̱ niꞌñúu̱ tsí i̱ꞌwíin xa̱bo̱.

Gu̱ne̱-numaa̱laꞌ a̱jma̱ nothon xómá rí niꞌnii̱,

gu̱xnáa̱laꞌ mamínu̱u̱ꞌ a̱jma̱ nothon gakhe̱ xómá rí ikhaa̱ niꞌnii̱ rí mu̱míni̱í i̱ꞌwíin.

7 Ikhaa̱ phú nikúxe̱-mine̱e̱ꞌ jamí ni̱gi̱ꞌdoo̱ mbá xúgíí inii rí na̱ni̱gu̱u̱ꞌ,

ikhaa jngó xkuaꞌnii máꞌ mba̱a̱ gúxnáa̱laꞌ rí mamínu̱u̱ꞌ rí xúge̱ꞌ rá.

Numuu rí niꞌthán-mine̱e̱ꞌ:

"Ge̱jyoꞌ ꞌgúnꞌlo̱ꞌ xómá ꞌgí a̱ꞌgo̱ thúngaa.

Ra̱ꞌkhá a̱ꞌgóxuáꞌa ñajunlo̱ꞌ,

jamí ni miꞌtsú ma̱xága̱nú jamínu̱ꞌ ná inuꞌ".

8 Numuu rí xkuaꞌnii nakúxe̱-mina̱ꞌ xuajen Babilónia̱,

mbóó mbiꞌi ma̱grui̱guíi̱ atsú jamínu̱ꞌ ríge̱ꞌ:

mbayée̱ nandii rí ma̱ja̱ñúu̱, ma̱mbi̱ye̱e̱ꞌ jamí ma̱xki̱dxu̱u̱.

Xúꞌkhue̱n máꞌ ma̱mbá-ri̱ga̱a xuajen ga̱jma̱á agu,

numuu rí phú mba̱a̱ ski̱yu̱u̱ꞌ Ana̱ꞌlóꞌ Mikhuíí tsí naxúdaa awan ga̱jma̱á numuu̱».

9 Xómáꞌ thúngaa numbaa tsí nibúún jamí nijúwa̱ꞌ mújúún ga̱jma̱á nindxu̱u̱, phú mu̱mbi̱ye̱e̱ꞌ jamí ma̱tájwíin a̱kuíi̱n ído̱ gúyáa̱ gúniúu rí nakhaa̱. 10 Phú ma̱mi̱ꞌñúu̱ gáꞌne jamínu̱ꞌ rúꞌkhue̱n, jamí asndo tsíngua̱ꞌ ma̱wa̱jwíi̱n rí muthee̱n:

«¡Wáái̱i̱ lá xuajen mba̱a̱, phú mingínááꞌ xuajen Babilónia̱, xuajen rí phú mba̱a̱ ski̱yu̱u̱ꞌ!

Numuu rí mbégo xúge̱ꞌ ni̱ga̱nú jamínu̱ꞌ inaaꞌ».

11 Xúꞌkhue̱n máꞌ xa̱bo̱ tsí nu̱ngu̱jwa̱ inuu mbá xúgíí numbaa, phú mu̱mbi̱ye̱e̱ꞌ jamí ma̱tájwíin a̱kuíi̱n numuu xuajen rúꞌkhue̱n, numuu rí nimbáa xa̱bo̱ náxáꞌtse̱ rí nu̱ngu̱jwe̱e̱. 12 Rí nu̱ngu̱jwe̱e̱ ñajuun ajwa̱nꞌ mo̱jmo̱ꞌ, ajwa̱nꞌ miꞌxá, itsí mitsaan jamí itsí rí mbiꞌyuu pérla̱, xúꞌkhue̱n máꞌ xtíin máján rí ni̱gu̱ma ga̱jma̱á gúmá líno̱ jamí séda̱, xtíin rí miꞌñuu jamí rí maña̱ꞌ giaxu̱u̱. Mangaa máꞌ mbá xúgíí inii ixe̱ rí ndaa thawuun, mbá xúgíí inii ja̱ꞌne rí na̱gu̱ma ga̱jma̱á itso̱ iñúú xu̱kú, ixe̱ máján, ajwa̱nꞌ brónse̱, yérro̱ jamí itsí rí mbiꞌyuu mármo̱l. 13 Xúꞌkhue̱n máꞌ nu̱ngu̱jwe̱e̱ xtáyoo kanéla̱, iná ndaa thawuun, wájya ndaa thawuun, wájya rí mbiꞌyuu míra̱, iya ndaa thawuun, jamí mangaa máꞌ iyoo úba̱ rí ni̱ga̱yu̱u̱ꞌ, yatsi̱i xndú olíbo̱, jndo̱o̱ꞌ ixí iña rí i̱tha̱án máján, ixí iña, gajmíí máꞌ xede̱, xu̱kú mogo̱, guáyo̱, ixe̱ kixmátaa, jamí yumbáá waꞌtsi̱in. 14 Jamí xa̱bo̱ muthan, mutháa̱n xuajen Babilónia̱:

«Nánguá xtaꞌdáá nimbá rí phú na̱ni̱gua̱a̱ꞌ ma̱raꞌdáá rá.

Nindáti̱ga̱a̱ꞌ mbá jayu xúgíí rí mitsaan niraꞌdáá,

jamí ni miꞌtsú náxáraꞌdáá ne̱».

15 Xa̱bo̱ tsí ni̱ngu̱jwa̱ xúgíí ríge̱ꞌ jamí phú niguáꞌdáá mbúkha̱a̱ ga̱jma̱á numuu xuajen, ma̱wa̱jwíi̱n tsíngua̱ꞌ inuu Babilónia̱ rí mu̱mbi̱ye̱e̱ꞌ, numuu rí phú ma̱mi̱ꞌñúu̱ rí mu̱dri̱guíi̱ ikhaa máꞌ jamínu̱ꞌ. Xúꞌkhue̱n máꞌ natájwíin a̱kuíi̱n, 16 jamí muthee̱n:

«¡Wáái̱i̱ lá xuajen, ngínáa xuajen mba̱a̱!

Ikhaa̱ nijúwuu̱n xtíin máján rí ni̱gu̱ma ga̱jma̱á gúmá líno̱, rí miꞌñuu jamí rí maña̱ꞌ giaxu̱u̱,

jamí neꞌne-karatha-mine̱e̱ꞌ ga̱jma̱á ajwa̱nꞌ mo̱jmo̱ꞌ,

ga̱jma̱á máꞌ itsí mitsaan jamí itsí rí mbiꞌyuu pérla̱.

17 Numuu rí mbégo xúge̱ꞌ wámba̱a mbá xúgíí rí ni̱gi̱ꞌdoo̱ mi̱ndaꞌkho».

Mbá xúgíin xa̱bo̱ tsí nagóó juñu̱ú guꞌwá-rguwa, xa̱bo̱ tsí nune̱-numa rí nagóó ná awúun ne̱, xa̱bo̱ tsí nu̱ñajun ná awúun ne̱ mangaa, jamí xa̱bo̱ tsí jayá mbiꞌñúú ga̱jma̱á rí ríga̱ ná awúun iya a̱pha̱, mbá xúgíin tsúꞌkhue̱n niwájwii̱n tsíngua̱ꞌ. 18 Jamí ído̱ ndiyáa̱ gúní jamí ri̱ꞌyu̱u̱ agu rí nakha xuajen, nithee̱n: «Ni miꞌtsú táríga̱ mbá xuajen rí phú mba̱a̱ ski̱yu̱u̱ꞌ xómá Babilónia̱». 19 A̱ꞌkhue̱n ni̱strámáa̱ yujnda̱ꞌ idxúu̱n numuu rí natájwíin a̱kuíi̱n, jamí nu̱mbi̱ye̱e̱ꞌ rí nuthee̱n:

«¡Wáái̱i̱ lá xuajen mba̱a̱!

Ikhaa̱ niꞌnii̱ rí mbá xúgíin xa̱bo̱ tsí guáꞌdáá guꞌwá-rguwa ná awúun iya a̱pha̱,

mu̱guaꞌdáá guéño mbúkha̱a̱,

jamí mbégo xúge̱ꞌ wámba̱-ri̱ga̱a mbá xúgíí rí gíꞌdoo̱».

20 Ga̱ꞌdxu a̱kia̱nꞌlaꞌ, tsáanꞌ juwalaꞌ mikhuíí,

tsáanꞌ ñajwanlaꞌ xa̱bi̱i Ana̱ꞌlóꞌ.

Ga̱ꞌdxu a̱kia̱nꞌlaꞌ tsáanꞌ ñajwanlaꞌ tsí waxúngui̱inꞌ

jamí tsáanꞌ ni̱rawíjnga̱alaꞌ ajngóo Ana̱ꞌlóꞌ,

numuu rí Ana̱ꞌlóꞌ niꞌnii̱ rí Babilónia̱ ma̱grui̱gú jamínu̱ꞌ

ga̱jma̱á numuu rí niña̱ꞌlaꞌ xa̱bo̱ xuajen rúꞌkhue̱n.

21 A̱ꞌkhue̱n ni̱ꞌkha̱ mbáa ánje̱l tsí phú mba̱a̱ ski̱yu̱u̱ꞌ, niwatuu̱n mbá itsí rí mba̱a̱ mi̱ndaꞌkho, rí xómá tse̱no̱ jaꞌnii, nixpátuáꞌée̱n ne̱ ná awúun iya a̱pha̱ jamí niꞌthúu̱n xuajen:

«Xkuaꞌnii máꞌ mi̱dxo̱ꞌ mbayíí mangáánꞌ,

Babilónia̱, xuajen mba̱a̱,

jamí ma̱mbá-ri̱gáanꞌ mbá jayu.

22 Ni miꞌtsú náxáwán ná awúun xuajñaaꞌ

ajmúú rí nawán ga̱jma̱á ixe̱ nidi̱í rí gíꞌdoo nítúu, e̱ꞌe̱n, ni máꞌ ga̱jma̱á ajwa̱nꞌ e̱ꞌmbi.

Ni miꞌtsú náxákujmii ikhín

xa̱bo̱ tsí na̱ma̱ñúú nune̱ asndo náá máꞌ ñajun.

Ni miꞌtsú náxáwán rí nuno̱ xa̱bo̱

ga̱jma̱á tse̱no̱ ná xuajñaaꞌ.

23 Ni miꞌtsú náxámbiꞌi nimbá agu ná nijúwa̱ꞌ xa̱bo̱.

Ni miꞌtsú náxáríga̱ ndxa̱a̱ rí nuda-mijná xa̱bo̱ mangaa.

Numuu rí xa̱bia̱aꞌ tsí nu̱ngu̱jwa̱, phú mba̱a̱ tsiakhe̱ niguáꞌdáa̱ ná numbaa,

xúꞌkhue̱n máꞌ nithane̱-nduwaa mbá xúgíí numbaa ga̱jma̱á tsirájá dríga̱a̱ꞌ.

24 Ikháánꞌ xuajen Babilónia̱, gíꞌmáá aꞌkhán rí niradíin tsí ni̱rawíjnga̱a ajngóo Ana̱ꞌlóꞌ, xúꞌkhue̱n máꞌ tsí ñajúún xa̱bi̱i Ana̱ꞌlóꞌ,

jamí gíꞌmáá aꞌkhán ga̱jma̱á numúú mbá xúgíin tsí nijáñúú nene̱ xa̱bo̱ ná inuu mbá xúgíí numbaa».