Rí wasngájma 17

A̱ꞌgo̱ tsí rígu tsu̱du̱u̱ xu̱kú xkawi̱i̱ꞌ

1 Nda̱wa̱á a̱ꞌkhue̱n ni̱ꞌkha̱ mbáa ánje̱l ná inuꞌ, mbáa máꞌ tsí mbá juwiin tsí juda mbá juwan xúba̱ me̱jno̱ꞌ, jamí niꞌthínꞌ: «Aya̱ ge̱jyoꞌ, ma̱snga̱jmáaꞌ jamínu̱ꞌ rí ma̱grui̱gú a̱ꞌgo̱ tsí na̱ngu̱jwa̱-mina̱ꞌ mi̱ndaꞌkho, tsí ꞌgí ná rawuun matha mba̱ꞌwo̱. 2 Ga̱jma̱á nindxu̱u̱ ikhaa̱ nibúún thúngaa numbaa, jamí asndo xó rí neꞌne-majngii̱n xa̱bo̱ tsí júwa̱ꞌ ná numbaa jaꞌnii rí nene̱ aꞌkhán ga̱jma̱á nindxu̱u̱».

3 Nda̱wa̱á a̱ꞌkhue̱n ánje̱l tsúꞌkhue̱n ni̱ka̱ jañúú ná mbaa niníí, ga̱jma̱á majñu̱u̱ Xu̱u̱ꞌ Ana̱ꞌlóꞌ. Ikhín ndi̱yo̱o̱ mbáa a̱ꞌgo̱ rígu tsu̱du̱u̱ mbáa xu̱kú xkawi̱i̱ꞌ maña̱a̱ꞌ, tsí juwan idxu̱u̱ jamí gu̱wa̱ꞌ chi̱jyu̱u̱ꞌ. Mbá xúgíí xtóo xu̱kú xkawi̱i̱ꞌ tsíge̱ꞌ tima mbiꞌyuu rí naꞌthán-xkawiu̱u̱ꞌ Ana̱ꞌlóꞌ. 4 Xómáꞌ a̱ꞌgo̱ júwuu̱n xtíin rí miꞌñuu jamí rí maña̱ꞌ giaxu̱u̱, xúꞌkhue̱n máꞌ neꞌne karatha-mine̱e̱ꞌ ga̱jma̱á ajwa̱nꞌ mo̱jmo̱ꞌ, itsí mitsaan jamí ga̱jma̱á itsí rí mbiꞌyuu pérla̱. Ná ñawúu̱n jayée̱ mbá rgúxi̱ ajwa̱nꞌ mo̱jmo̱ꞌ, rí gajni̱í rí xkawe̱ꞌ mi̱ndaꞌkho naꞌnii̱ gajmíi̱ xa̱bekha tsí nabóo̱ gajmíi̱. 5 Ná jédoo̱ ka̱ma mbiꞌyuu̱ rí kri̱ga̱ ngu̱ꞌwo̱o̱ rí nandoo gáꞌthán: «Xuajen mba̱a̱ Babilónia̱, ru̱dúún mbá xúgíin go̱ꞌo̱ tsí nu̱ngu̱jwa̱-mijná, xúꞌkhue̱n máꞌ ru̱dúu mbá xúgíí inii rí xkawe̱ꞌ na̱gu̱ma ná numbaa». 6 A̱ꞌkhue̱n ndi̱yo̱o̱ rí najnga̱a̱ a̱ꞌgo̱ tsúꞌkhue̱n, numuu rí niꞌña̱a̱ iꞌdiúún xa̱bi̱i Ana̱ꞌlóꞌ jamí iꞌdiúún tsí nijáñúú ga̱jma̱á numuu Jesús.

Ído̱ ndi̱yo̱o̱ a̱ꞌgo̱ tsíge̱ꞌ, maphú nimakuꞌ. 7 A̱ꞌkhue̱n niraxi̱ꞌlo̱ꞌ ánje̱l: «Náá numuu kajngó namakuaaꞌ róꞌ. Ikhúúnꞌ ma̱tha̱a̱nꞌ rí ríga̱ ngu̱ꞌwo̱o̱ ga̱jma̱á numuu a̱ꞌgo̱ tsíge̱ꞌ, jamí ma̱tha̱a̱nꞌ rí ríga̱ ngu̱ꞌwo̱o̱ ga̱jma̱á numuu xu̱kú xkawi̱i̱ꞌ tsí juwan idxu̱u̱ jamí gu̱wa̱ꞌ chi̱jyu̱u̱ꞌ tsí ríguu a̱ꞌgo̱. 8 Xu̱kú xkawi̱i̱ꞌ tsí nithayáá, nixtáa̱ nákhí wapha, jamí nándawa̱a̱ máꞌ. I̱ndo̱ó máꞌ numuu rí inu máꞌ ma̱ga̱jnúu̱ ná iñá rí me̱jno̱ꞌ kajngó ma̱mbáa̱ mbá jayu. Xómáꞌ xa̱bo̱ tsí júwa̱ꞌ ná numbaa, tsí asndo nákhí ni̱gu̱ma-ku̱maa numbaa na̱nguá ka̱ma mbiꞌñúú ná awúun i̱yi̱i̱ꞌ rí ka̱ma mbiꞌñúú tsí nduya jámuu, phú ma̱makúu̱n ído̱ mbuyáa̱ xu̱kú xkawi̱i̱ꞌ tsí nixtáa̱ nákhí wapha jamí nándawa̱a̱ máꞌ, jamí inu máꞌ ma̱ꞌkhe̱e̱ mbu̱júꞌ.

9 »Phú ndaꞌyóo rí ma̱ma̱ñuu xa̱bo̱ kajngó ma̱froꞌo̱o̱ ríge̱ꞌ: Mbá juwan idxu̱u̱ xu̱kú xkawi̱i̱ꞌ rí nithayáá, ikhaa naꞌne xtiꞌkhuu mbá juwan júba̱ ná ꞌgí a̱ꞌgo̱. 10 Jamí ikhaa máꞌ ne̱ naꞌne xtiꞌkhúún mbá juwiin thúngaa mangaa. Nijáñúú máꞌ witsuun thúngaa tsúꞌkhue̱n, mbáa naꞌthán-ñájun máꞌ xúge̱ꞌ, jamí i̱mba̱a̱ꞌ xóó máꞌ tsíꞌthán-ñájwii̱n. Jamí ído̱ gáꞌthán-ñájwii̱n, ma̱xáꞌthán-ñájwii̱n máꞌ mba̱yo̱ꞌ. 11 Xu̱kú xkawi̱i̱ꞌ tsí nixtáa̱ nákhí wapha, jamí nándawa̱a̱ máꞌ, ñajuu̱n thúngaa tsí migiñii. Jamí ikhaa̱ máꞌ ñajuu̱n mbáa thúngaa tsí juwiin mangaa, tsí nijúwa̱ꞌ ginuu, jamí ma̱mbáa̱ mbá jayu máꞌ mangaa̱.

12 »Mbá gu̱wa̱ꞌ che̱je̱ꞌ rí nithayáá, ikhaa naꞌne xtiꞌkhúún mbá gu̱wi̱inꞌ thúngaa tsí xóó tsígíꞌdi̱ín muthan-ñajun. Xómáꞌ thúngaa tsíge̱ꞌ mu̱dri̱guíi̱ tsiakhe̱ rí muthan-ñajwii̱n mbégo jayu máꞌ gajmíi̱ xu̱kú xkawi̱i̱ꞌ. 13 Mbá xúgíin thúngaa tsíge̱ꞌ, ikhiin tsí gu̱wi̱inꞌ, mbóó máꞌ numuu rí júwe̱e̱ꞌ: rí mu̱xna̱xíi̱ ná ñawúun xu̱kú xkawi̱i̱ꞌ mbá xúgíí ski̱ñúu̱ rí nuthan-ñajwii̱n ga̱jma̱á. 14 Mu̱ru̱waa̱ ski̱ñúu̱ rí ma̱tsa̱ñúu̱ gajmíi̱ A̱ꞌdá-mógó, xómáꞌ A̱ꞌdá-mógó ma̱ꞌngo̱o̱ inúu̱ numuu rí ikhaa̱ ñajuu̱n Xa̱bo̱ Ede̱ tsí jayá ikhúún mbá xúgíin xa̱bo̱ ede̱, jamí ikhaa̱ ñajuu̱n Thúngaa tsí naꞌthán-ñájúún mbá xúgíin thúngaa. Mangaa máꞌ gajmíí A̱ꞌdá-mógó tsí nindxaꞌwúún jamí niraꞌwíin Ana̱ꞌlóꞌ, jamí jmbiin ná inuu̱».

15 A̱ꞌkhue̱n niꞌthínꞌ xóó ánje̱l: «Matha mba̱ꞌwo̱ rí nithayáá ná ꞌgí a̱ꞌgo̱ tsí na̱ngu̱jwa̱-mina̱ꞌ, naꞌne xtiꞌkhuu mbaꞌa xuajen, mbaꞌa inii xa̱bo̱, mbaꞌa numbaa, jamí mbaꞌa ajngáa rí nuthan xa̱bo̱. 16 Jamí gu̱wa̱ꞌ che̱je̱ꞌ rí nithayáá ná idxu̱u̱ xu̱kú xkawi̱i̱ꞌ, ma̱xáxúu̱n gúyáa̱ a̱ꞌgo̱ tsí na̱ngu̱jwa̱-mina̱ꞌ. Mu̱dri̱guíi̱ mbá xúgíí rí gíꞌdoo a̱ꞌgo̱ asndo ma̱ꞌne tsaꞌtsaa gúni̱i̱, mu̱phi̱i̱ xuyuu jamí mune̱-gámba̱a̱ ga̱jma̱á agu. 17 Numuu rí Ana̱ꞌlóꞌ neꞌne rí ma̱mba̱xúu̱n kajngó muni̱i̱ rí nandoo Ana̱ꞌlóꞌ. Ikhaa numuu rúꞌkhue̱n, niguáꞌdáa̱ awan rí mu̱xna̱xíi̱ ná ñawúun xu̱kú xkawi̱i̱ꞌ mbá xúgíí ski̱ñúu̱, asndo gámbánuu mbá xúgíí ajngóo Ana̱ꞌlóꞌ. 18 Jamí a̱ꞌgo̱ tsí nithayáá, naꞌne xtiꞌkhuu xuajen mba̱a̱ rí naꞌthán-ñájúún mbá xúgíin thúngaa ná numbaa».