1 Nda̱wa̱á a̱ꞌkhue̱n ndi̱yo̱o̱ wájun akhu̱un ánje̱l ná mbá nákho̱ rakhóo numbaa. Nijanúu̱ tsiakhe̱ rí ma̱wajún-ꞌthíi̱n mbá xúgíí gíñá kajngó ma̱xáxnúu ne̱ ná inuu numbaa, ni máꞌ ná inuu iya a̱pha̱, ni máꞌ ná inuu ixe̱. 2 Xúꞌkhue̱n máꞌ ndi̱yo̱o̱ i̱mba̱a̱ꞌ ánje̱l tsí nagájnuu ná na̱ꞌkha̱ a̱kha̱ꞌ, jamí jayée̱ tsinuu Ana̱ꞌlóꞌ tsí ndaꞌya. A̱ꞌkhue̱n phú gakhe̱ nindxaꞌwée̱ inúú mbá nákhu̱un ánje̱l tsí nijanúú tsiakhe̱ rí mune̱-ñawíín numbaa jamí iya a̱pha̱. 3 Xáꞌnii niꞌthúu̱n: Mu̱xúne̱-ñawíínlaꞌ xóó ju̱ba̱ꞌ, iya a̱pha̱, ni máꞌ ixe̱, asndo gámba̱ꞌxo̱ꞌ rí mu̱gíꞌmaxo̱ꞌ tsina ná jédúún yumbée Ana̱ꞌlóꞌ. 4 Jamí ni̱dxawuunlo̱ꞌ wáthi̱in tsí nida tsina: mbá 144 000 rí mbá xúgíin kuthuun xa̱bi̱i i̱ji̱in Israél.

5 Mbá 12 000 tsí xa̱bi̱i Judá nida tsina,

mbá 12 000 tsí xa̱bi̱i Rubén,

mbá 12 000 tsí xa̱bi̱i Gád,

6 mbá 12 000 tsí xa̱bi̱i Asér,

mbá 12 000 tsí xa̱bi̱i Neftalí,

mbá 12 000 tsí xa̱bi̱i Manasés,

7 mbá 12 000 tsí xa̱bi̱i Simeón,

mbá 12 000 tsí xa̱bi̱i Lebí,

mbá 12 000 tsí xa̱bi̱i Isakár,

8 mbá 12 000 tsí xa̱bi̱i Sabulón,

mbá 12 000 tsí xa̱bi̱i José,

mbá 12 000 tsí xa̱bi̱i Benjamín nida tsina.

9 Nda̱wa̱á a̱ꞌkhue̱n ni̱ya̱xe̱lo̱ꞌ, jamí ndi̱ñu̱ú mbaꞌiin mi̱ndaꞌkho xa̱bo̱ tsí naguwá mbá xúgíí numbaa, mbá xúgíí inii xa̱bo̱, mbá xúgíí ajngáa rí nuthan xa̱bo̱, jamí mbá xúgíí xuajen, jamí ndawa̱a̱ tsí na̱ꞌngo̱o̱ ma̱gu̱xnii̱. Wájwii̱n ná inuu wéje̱ xíli̱i thúngaa jamí ná inuu A̱ꞌdá-mógó, júwúu̱n xtíin miꞌxá jamí traꞌa̱ iná ida ñawúu̱n. 10 Phú gakhe̱ nu̱ndxa̱ꞌwe̱e̱ rí nuthee̱n:

«Ana̱ꞌlóꞌ tsí ꞌgí ná xíli̱i thúngaa,

jamí A̱ꞌdá-mógó nene̱-jríñáaꞌlóꞌ».

11 Mbá xúgíin ánje̱l wájun mbá tuaꞌáan ná wéje̱ xíli̱i thúngaa, mbá tuaꞌáan ná trigi̱in xa̱bo̱ buanuu, jamí mbá tuaꞌáan ná wájun akhu̱un tsí nduya. A̱ꞌkhue̱n ni̱smáti̱gu̱ún ánje̱l xúꞌkhue̱n máꞌ ni̱ꞌgíi̱ inúu̱ asndo mbayíí, jamí nene̱-mba̱a̱ Ana̱ꞌlóꞌ. 12 Jamí nithee̱n:

«¡Xkuaꞌnii gáꞌne!

Tsí jaꞌyoo mi̱ꞌthán rí máján ga̱jma̱á numuu jamí ma̱gu̱ma-mba̱a̱,

tsí jaꞌyoo rí ma̱ma̱ñuu jamí ma̱grui̱gúu la gamaku,

tsí jaꞌyoo rí mi̱tiamakuíí, jamí maꞌthán-ñájun,

xúꞌkhue̱n máꞌ jaꞌyoo rí ma̱gi̱ꞌdoo tsiakhe̱ jámuu mbiꞌi,

ikhaa ñajuun Ana̱ꞌlóꞌ.

¡Xkuaꞌnii gáꞌne!».

13 A̱ꞌkhue̱n mbáa tsí xa̱bo̱ nikhi̱i̱ niraxi̱ꞌ:

―Tsíin ñajúún jamí náá niguwá xa̱bo̱ tsíge̱ꞌ, tsí júwúún xtíin miꞌxá róꞌ.

14 Xómáꞌ ikhúúnꞌ ni̱riꞌñuu̱lo̱ꞌ:

―Táta̱, ikháánꞌ nathayáá tsíin ñajúu̱n jamí náá niguwée̱ꞌ.

A̱ꞌkhue̱n ikhaa̱ niꞌthínꞌlo̱ꞌ:

―Tsíge̱ꞌ ñajúún tsí ni̱ꞌngu̱ún ninújngúún ná awúun jamínu̱ꞌ rí mba̱a̱ mi̱ndaꞌkho. Nijñáa̱ xtíñúu̱ jamí nene̱-miꞌxáa̱ ne̱ ga̱jma̱á iꞌdiuu A̱ꞌdá-mógó.

15 »Ikhaa numuu rúꞌkhue̱n wájwii̱n ná inuu ꞌgí xíli̱i Ana̱ꞌlóꞌ.

Mbiꞌíí mbruꞌwíín traꞌii̱n nune̱-mba̱a̱ ná guꞌwá dxákuii̱n.

Xómáꞌ tsí ꞌgí ná xíli̱i thúngaa,

ma̱xtáa ga̱jma̱á nindxúu̱n jamí ma̱ña̱wúu̱n.

16 Nánguá mu̱míníi̱ rí ma̱xki̱dxúu̱n, ni máꞌ náxájándawúu̱n.

Nánguá mbuyáa̱ rí mika, ni máꞌ a̱kha̱ꞌ náxátsikhíi̱n.

17 Numuu rí A̱ꞌdá-mógó tsí wéje̱ ná majñu̱u̱ ꞌgí xíli̱i thúngaa ma̱ña̱wúu̱n xómá eꞌne waxtú,

jamí ma̱ꞌgee̱ jaguu̱n ná ríga̱ iya rí naꞌne rí mbuyee̱ jámuu.

Xómáꞌ Ana̱ꞌlóꞌ maxúdíi mbá xúgíí iyoo idúu̱n.