1 Nda̱wa̱á nisngájmiꞌ ánje̱l mbá matha rí naꞌne rí mbuya jámuu xa̱bo̱. Nambiꞌi-taꞌa ne̱ xómá iyaniwan, jamí nagájnuu ne̱ ná ꞌgí xíli̱i Ana̱ꞌlóꞌ ga̱jma̱á máꞌ A̱ꞌdá-mógó. 2 Nagáyuu ne̱ ná ti̱kua̱pho̱o̱ jamba̱a̱ ma̱jña̱ꞌ rí kri̱ga̱ ná awúun xuajen. Mbámbá kri̱doo matha wéje̱ ixe̱ rí naꞌne rí ma̱ju̱wá jámuu xa̱bo̱, rí naxná xndúu mbámbáa go̱nꞌ, mbá gu̱wa̱ꞌ i̱jma̱ (12) nothon rí mbá tsigu. Xómáꞌ inúu ne̱ ñajuun thana rí ma̱ꞌni̱i a̱kui̱ín xa̱bo̱ tsí júwa̱ꞌ ná numbaa. 3 Náxáríga̱ rí mi̱ꞌxná-máꞌíin xa̱bo̱ ná awúun xuajen rúꞌkhue̱n. Ikhín ma̱ge̱ꞌe̱ xíli̱i Ana̱ꞌlóꞌ ga̱jma̱á máꞌ A̱ꞌdá-mógó, jamí tsí ñajúún yumbée̱ mune̱-mba̱ꞌwi̱i̱. 4 Mbá xúgíi̱n mbuyáa̱ jmína̱a̱ꞌ Ana̱ꞌlóꞌ, jamí ma̱gi̱ꞌma mbiꞌyuu̱ ná jédúu̱n. 5 Náxáríga̱ mbroꞌon ikhín. Jamí tsí ma̱ju̱wá ikhín ma̱xáꞌyóo rí ma̱mbiꞌñúu̱ agu, ni máꞌ ma̱xáꞌyóo aguu a̱kha̱ꞌ, numuu rí ma̱mbiꞌñúu̱ máꞌ ga̱jma̱á aguu Ana̱ꞌlóꞌ Mikhuíí, jamí ikhii̱n muthan-ñajwii̱n jámuu mbiꞌi.

6 A̱ꞌkhue̱n niꞌthínꞌ ánje̱l: «Ajngáa rí gakon ñajuun ríge̱ꞌ jamí ndaꞌyóo rí ma̱nimbu̱únꞌ ne̱ xa̱bo̱. Xómáꞌ Táta̱, Ana̱ꞌlóꞌ tsí naxnúú Xu̱u̱ꞌ tsí nu̱rawíjnga̱a ajngóo̱, nixúngua̱a̱ꞌ ánje̱l drígo̱o̱, kajngó masngájmúu̱ yumbée̱ rí inu máꞌ ma̱ri̱gá».

7 «¡Gu̱dxawíínlaꞌ, ma̱ꞌkha máꞌ wapha! Phú gagi xtáa̱ tsí naꞌne-mbánuu ajngáa rí nigájnanga̱a ná awúun i̱yi̱i̱ꞌ ríge̱ꞌ».

8 Ikhúúnꞌ ñajunꞌ Juáán, tsí ndiꞌyoo jamí nidxawuun mbá xúgíí ríge̱ꞌ. Ído̱ wámbo̱ꞌ ndi̱yo̱o̱ ne̱ jamí ni̱dxawuun ne̱, a̱ꞌkhue̱n ni̱smáti̱go̱ꞌ inuu ánje̱l tsí nisngájmiꞌ mbá xúgíí rúꞌkhue̱n, kajngó ma̱ne̱-mba̱a̱lo̱ꞌ. 9 Xómáꞌ ikhaa̱ niꞌthínꞌ: «¡Ma̱xátha̱ne̱ rúꞌkhue̱n! Numuu rí yumbée máꞌ Ana̱ꞌlóꞌ ñajunꞌ mangúúnꞌ xómá ikháánꞌ, xómá a̱ngia̱anꞌ tsí nu̱rawíjnga̱a ajngóo Ana̱ꞌlóꞌ, jamí xómá rí mbá xúgíin tsí nune̱-mbáníí ajngáa rí naꞌthán ná awúun i̱yi̱i̱ꞌ ríge̱ꞌ. Athane̱-mba̱a̱ i̱ndo̱ó máꞌ Ana̱ꞌlóꞌ».

10 Jamí niꞌthínꞌ xóó ánje̱l: «Ma̱xáta̱rkaꞌu ajngáa rí nigájnanga̱a ná awúun i̱yi̱i̱ꞌ ríge̱ꞌ, numuu rí nangiyuu máꞌ mbiꞌi rí ma̱mba̱núu ne̱. 11 Ikhaa jngó, tsí naꞌne rí xkawe̱ꞌ, ga̱ꞌnii̱ máꞌ xóó rí xkawe̱ꞌ. Jamí tsí naꞌne-maꞌchú-mina̱ꞌ rá, ga̱ꞌne-maꞌchú-mine̱e̱ꞌ máꞌ xóó. Xúꞌkhue̱n máꞌ tsí naꞌne rí máján, ga̱ꞌnii̱ máꞌ xóó rí máján. Jamí tsí xa̱bi̱i Ana̱ꞌlóꞌ ñajuun, ga̱nindxu̱u̱ máꞌ xóó xa̱bi̱i Ana̱ꞌlóꞌ».

12 «¡Gu̱dxawíínlaꞌ! ¡Ma̱ꞌkha máꞌ wapha! Jamí ja̱ya̱ máꞌ gamaku rí ma̱grui̱gúu mbámbáa xómá jaꞌyoo ñajun rí niꞌnii̱. 13 Ikhúúnꞌ ñajunꞌ xómá tsina Álfa̱ jamí xómá tsina Oméga̱, tsí na̱gi̱ꞌdu̱u̱n-muu jamí tsí ndámba̱wóo, tsí ginii jayu jamí tsí nda̱wa̱á jayu».

14 Phú gagi júwa̱ꞌ xa̱bo̱ tsí nujñáa xtíñúú. Ikhiin tsúꞌkhue̱n tsí ma̱goo ma̱tu̱ꞌu̱ún ná xuajen jamí ma̱goo mu̱pho̱ xndúu ixe̱ rí naꞌne rí ma̱ju̱wá jámuu xa̱bo̱. 15 Xómáꞌ tsí xu̱wánꞌ ma̱nguanúu̱ rixa̱á. Ikhiin tsúꞌkhue̱n ñajúún tsí nune̱ xawan, tsí nubúún gajmíí xa̱bo̱ tsí túya̱a̱, tsí nu̱radíin xa̱bo̱, tsí nune̱-mbi̱in tsí ra̱ꞌkháa Ana̱ꞌlóꞌ ñajúún, jamí mbá xúgíin tsí na̱ni̱gu̱ún jamí nune̱-ku̱maa tsixuxtaa.

16 «Ikhúúnꞌ ñajunꞌ Jesús, ni̱xu̱ꞌmáalo̱ꞌ ánje̱l drígo̱ꞌ kajngó maꞌthánlaꞌ mbá xúgíí ríge̱ꞌ ná mbámbá kutháanꞌlaꞌ tsáanꞌ nanimba̱ꞌlaꞌ ju̱yo̱ꞌ. Ikhúúnꞌ ñajunꞌ xa̱bo̱ guꞌwóo jamí xa̱bo̱ ri̱jyu̱u̱ꞌ thúngaa Dabíd, xúꞌkhue̱n máꞌ ikhúúnꞌ ñajunꞌ a̱ꞌgua̱án natse tsí phú gakhi̱i̱ aguu».

17 Xómáꞌ Xu̱u̱ꞌ Ana̱ꞌlóꞌ jamí a̱ꞌgui̱i A̱ꞌdá-mógó nuthee̱n: «¡Aya̱ máꞌ, Táta̱!». Jamí tsí nadxawuun, gaꞌthée̱n: «¡Aya̱ máꞌ, Táta̱!». Tsí najándawoo, ga̱ꞌkhe̱e̱. Tsí nandoo gágáan iya, ga̱ga̱a̱n iya rí naꞌne rí ma̱ju̱wá jámuu xa̱bo̱, kixná jayu máꞌ ne̱.

18 Jámba̱a̱ tsí nadxawuun ajngáa rí nigájnanga̱a ná awúun i̱yi̱i̱ꞌ ríge̱ꞌ, ikhúúnꞌ na̱thu̱u̱n ríge̱ꞌ: Xí mbáa naꞌne-ra̱ꞌmáa rí naꞌthán i̱yi̱i̱ꞌ ríge̱ꞌ, Ana̱ꞌlóꞌ ma̱ꞌne-ra̱ꞌmáa ná tsu̱du̱u̱ xa̱bo̱ tsúꞌkhue̱n jamínu̱ꞌ rí naꞌthán ná awúun i̱yi̱i̱ꞌ ríge̱ꞌ. 19 Xí mbáa narígúu tháan ajngáa rí nigájnanga̱a ná awúun i̱yi̱i̱ꞌ ríge̱ꞌ, Ana̱ꞌlóꞌ marígúu rí jaꞌyoo̱ ná i̱yi̱i̱ꞌ ná tima mbiꞌñúú tsí nduya jámuu,* xúꞌkhue̱n máꞌ ma̱gata̱a rí jaꞌyoo̱ ná xuajñuu Ana̱ꞌlóꞌ, xómá rí naꞌthán ná awúun i̱yi̱i̱ꞌ ríge̱ꞌ.

20 Tsí naꞌthán mbá xúgíí ríge̱ꞌ, naꞌthán: «Gakon i̱tha̱nꞌlaꞌ rí ma̱ꞌkhalo̱ꞌ máꞌ wapha».

Xkuaꞌnii gáꞌne. ¡Aya̱ máꞌ, Táta̱ Jesús!

21 Táta̱ Jesukrísto̱ gáꞌne-tsakun-rámáaꞌlaꞌ mbá xúgiáanꞌlaꞌ. Xkuaꞌnii gáꞌne.*