1 Ído̱ rí A̱ꞌdá-mógó nirakhúu tijwan tsinuu i̱yi̱i̱ꞌ, a̱ꞌkhue̱n wíí neꞌne ná mikhuíí xómá mbá skíñú gu̱wa̱ꞌ (30) wáa kíxnuu-makoo ajwa̱nꞌ. 2 Nda̱wa̱á a̱ꞌkhue̱n ndi̱ñu̱ú mbá juwiin ánje̱l tsí wájun ná inuu Ana̱ꞌlóꞌ, jamí mbámbáa̱ nijanáá mbá ajwa̱nꞌ e̱ꞌmbi rí mandiyuu̱.

3 A̱ꞌkhue̱n ni̱ꞌkha̱ i̱mba̱a̱ꞌ ánje̱l tsí jayá mbá xúba̱ ajwa̱nꞌ mo̱jmo̱ꞌ rí najmaa mi̱kha wájya, ni̱wi̱ji̱i̱ ná wéje̱ ajwa̱nꞌ mo̱jmo̱ꞌ ná nakha wájya, rí wéje̱ ná mijngi ꞌgí xíli̱i thúngaa. Phú mba̱a̱ wájya ndaa thawuun nijanáá ánje̱l tsúꞌkhue̱n rí maxnáxi̱i̱ ga̱jma̱á máꞌ ajngáa rí nithán-jáñíí Ana̱ꞌlóꞌ ene̱ mbá xúgíin xa̱bii̱. 4 A̱ꞌkhue̱n ná xúba̱ ajwa̱nꞌ mo̱jmo̱ꞌ rí jayá ánje̱l ná ñawúun nigájnuu gúní ndaa thawuun ga̱jma̱á ajngáa rí nithán-jáñíí Ana̱ꞌlóꞌ ene̱ xa̱bii̱, nitsimuu ne̱ asndo ná inuu Ana̱ꞌlóꞌ. 5 A̱ꞌkhue̱n rí ánje̱l tsúꞌkhue̱n niwatuu̱n xúba̱ rí na̱gu̱ma gúní jamí nigruíye̱e̱ꞌ xa̱mbo̱ꞌ awúun ne̱, rí tráma inuu ajwa̱nꞌ mo̱jmo̱ꞌ ná nakha wájya, jamí nidee̱ ne̱ ná inuu ju̱ba̱ꞌ. A̱ꞌkhue̱n nixpíbi mbaꞌa nothon, phú wee niwán mbaꞌa nothon jamí nixma mangaa.

6 Jamí ánje̱l tsí mbá juwiin nijanúú ajwa̱nꞌ e̱ꞌmbi, nene̱-mbánu-mijnée̱ rí mu̱ndiyíi̱ ne̱.

7 Nindiyuu ajwa̱nꞌ e̱ꞌmbi ánje̱l tsí ginii, a̱ꞌkhue̱n nifrigu iꞌtsí jamí agu ja̱nda̱wa̱ꞌ ga̱jma̱á iꞌdi, rí waꞌda ná inuu ju̱ba̱ꞌ. Nikha mbóó rí atsú kuthiin ju̱ba̱ꞌ, xúꞌkhue̱n máꞌ nikha mbá xúgíí ixe̱ jamí mbá xúgíí iná maxa rí ríga̱ ná awúun mbóó rí atsú kuthiin ju̱ba̱ꞌ.

8 Nindiyuu ajwa̱nꞌ e̱ꞌmbi ánje̱l tsí riajma̱a̱, a̱ꞌkhue̱n nixpátrígú ná awúun iya a̱pha̱ mbá rí xómá júba̱ mba̱a̱ mi̱ndaꞌkho jago̱ aguu jaꞌnii. A̱ꞌkhue̱n rí iya a̱pha̱ niꞌni̱i iꞌdi mbóó rí atsú kuthiin ne̱. 9 Nijáñúú mbóó rí atsú kuthuun mbá xúgíin tsí nduya ná awúun iya a̱pha̱. Xúꞌkhue̱n máꞌ wámba̱a mbóó rí atsú kuthiin guꞌwá-rguwa mangaa.

10 Nindiyuu ajwa̱nꞌ e̱ꞌmbi ánje̱l tsí riatsíi, a̱ꞌkhue̱n nixpátríguíi ná mikhuíí mbáa a̱ꞌgua̱án tsí phú mba̱a̱ jamí nakhaa xómá aguu rondo̱. Nixpátuáꞌáa̱n ná awúun mbóó rí atsú kuthiin rí mbá xúgíí matha jamí iduu iya. 11 A̱ꞌgua̱án tsúꞌkhue̱n mbiꞌyuu «Rí Miꞌkhu̱u̱n». A̱ꞌkhue̱n neꞌne miꞌkhu̱u̱n mbóó rí atsú kuthiin iya. Jamí phú mbaꞌiin xa̱bo̱ nijáñúú neꞌne iya rúꞌkhue̱n, numuu rí neꞌne miꞌkhu̱u̱n ne̱.

12 Nindiyuu ajwa̱nꞌ e̱ꞌmbi ánje̱l tsí riakhui̱i̱, a̱ꞌkhue̱n nijámbi̱yu̱u̱ꞌ mbóó rí atsú kuthiin a̱kha̱ꞌ, mbóó rí atsú kuthiin go̱nꞌ, jamí mbóó rí atsú kuthiin a̱ꞌgua̱án, kajngó ma̱ꞌne mijína mbóó rí atsú kuthiin ná inúu̱. Xkuaꞌnii neꞌne mijína mbóó rí atsú kuthiin mbiꞌi jamí xúꞌkhue̱n máꞌ mbroꞌon mangaa.

13 Nda̱wa̱á a̱ꞌkhue̱n ndi̱yo̱o̱ rí ngrigo̱o̱ꞌ mbáa ánje̱l* ná mikhuíí, jamí ni̱dxawuun rí phú gakhe̱ indxaꞌwée̱: «¡Wáái̱i̱, wáái̱i̱, wáái̱i̱! Á tháán mingíníi xa̱bo̱ tsí júwa̱ꞌ ná numbaa ído̱ gúndiyíí e̱ꞌmbi i̱mbá atsúun ánje̱l tsí júwa̱ꞌ máꞌ na̱ma̱ñúú rí mu̱ndiyíí ne̱ rá».