1 A̱ꞌkhue̱n ndi̱yo̱o̱ rí ná ñawún mújúun tsí ꞌgí ná xíli̱i thúngaa jayée̱ mbá i̱yi̱i̱ꞌ jambúxu̱u̱ꞌ rí waꞌtháán inuu jamí tsu̱du̱u̱, xúꞌkhue̱n máꞌ phú xa̱ꞌ xtoꞌwóo ne̱ ga̱jma̱á mbá juwan tsina. 2 Jamí ndi̱yo̱o̱ mbáa ánje̱l tsí phú mba̱a̱ ski̱yu̱u̱ꞌ, tsí phú gakhe̱ indxaꞌwá ído̱ rí naraxe̱: «Tsáa jaꞌyoo marakhúu tsinuu ne̱ jamí marmáꞌthoo i̱yi̱i̱ꞌ jambúxu̱u̱ꞌ rá». 3 Jamí tákujmaa asndo nimbáa ná mikhuíí ni máꞌ ná numbaa ni máꞌ ná agoo ju̱ba̱ꞌ, tsí ma̱goo marmáꞌthoo jamí ma̱gu̱xnuu i̱yi̱i̱ꞌ jambúxu̱u̱ꞌ. 4 Xómáꞌ ikhúúnꞌ phú na̱mbi̱ya̱ꞌlo̱ꞌ numuu rí tákujmaa asndo nimbáa tsí jaꞌyoo marmáꞌthoo jamí ma̱gu̱xnuu i̱yi̱i̱ꞌ jambúxu̱u̱ꞌ. 5 A̱ꞌkhue̱n niꞌthínꞌ mbáa máꞌ tsí xa̱bo̱ nikhi̱i̱: «Náxáta̱mbi̱ya̱ꞌ rá. Numuu rí a̱ꞌdá-ri̱jyu̱u̱ꞌ thúngaa Dabíd, tsí nutháa̱n i̱ndi̱í phuu drígu̱ún xa̱bi̱i Judá, ni̱ꞌngo̱o̱ jamí jaꞌyoo̱ marakhúu̱ rí mbá juwan tsinuu i̱yi̱i̱ꞌ jambúxu̱u̱ꞌ jamí marakhúu̱ ne̱».

6 A̱ꞌkhue̱n ndi̱yo̱o̱ wéje̱ mbáa A̱ꞌdá-mógó ná ti̱kua̱pha̱a̱ inuu xíli̱i thúngaa, jamí ná majñu̱ú mbá nákhu̱un tsí nduya, xúꞌkhue̱n ná majñu̱ú xa̱bo̱ buanuu. Asndo nakujma tsínu̱u̱ꞌ rí waꞌxnáa̱ ma̱ja̱ñúu̱ kajngó ma̱nindxu̱u̱ tsi̱gi̱jña̱ꞌ. Gíꞌdoo̱ mbá juwan chi̱jyu̱u̱ꞌ, jamí gíꞌdoo̱ mbá juwan iduu̱ rí ñajuun mbá juwiin xu̱u̱ꞌ Ana̱ꞌlóꞌ tsí waxúꞌmii ná tsu̱du̱u̱ mbá xúgíí numbaa. 7 A̱ꞌkhue̱n nixuꞌma-mina̱ꞌ A̱ꞌdá-mógó jamí ni̱grui̱guíi̱ i̱yi̱i̱ꞌ jambúxu̱u̱ꞌ rí gída̱ꞌ ná ñawún mújúun tsí ꞌgí ná xíli̱i thúngaa. 8 Ído̱ ni̱grui̱guíi̱ ne̱, a̱ꞌkhue̱n mbá nákhu̱un tsí nduya, gajmíi̱ tsí mbá skíñú akhu̱un (24) xa̱bo̱ buanuu, ni̱smáti̱gúu̱n inuu A̱ꞌdá-mógó. Mbámbáa̱ jayá mbá ixe̱ nidi̱í rí gíꞌdoo nítúu, jamí mbá xúba̱ me̱jno̱ꞌ ajwa̱nꞌ mo̱jmo̱ꞌ gajni̱í wájya ndaa thawuun, rí ikhaa rúꞌkhue̱n ñajuun tsakuun rí nune̱ xa̱bi̱i Ana̱ꞌlóꞌ. 9 Jamí nusiee̱n ajmúú nuxe̱ꞌ ríge̱ꞌ:

«Ikháánꞌ jaꞌyaaꞌ rí ma̱tri̱gú i̱yi̱i̱ꞌ jambúxu̱u̱ꞌ jamí ma̱tra̱khuíí tsinuu ne̱.

Numuu rí ikháánꞌ waxnáaꞌ rí ma̱ja̱ñáaꞌ,

jamí ga̱jma̱á iꞌdiaaꞌ niratse̱wíin mbá xúgíí inii xa̱bo̱,

tsí júwa̱ꞌ mbá xúgíí xuajen jamí nuthan mbá xúgíí ajngáa ná mbá xúgíí numbaa, rí ma̱nindxúu̱n xa̱bi̱i Ana̱ꞌlóꞌ.

10 Ikháánꞌ nithane̱ rí ma̱nindxúu̱n thúngaa,

Nithane̱ rí ma̱nindxúu̱n dxakuun tsí mu̱ñajun ná inuu Ana̱ꞌlóꞌ.

Ikhii̱n muthan-ñajwíi̱n numbaa».

11 Ído̱ ni̱ya̱xe̱, a̱ꞌkhue̱n ni̱dxawuun a̱ꞌwúún mbaꞌiin mi̱ndaꞌkho ánje̱l tsí wájun mbá tuaꞌáan ná wéje̱ xíli̱i thúngaa, ná wájun tsí nduya jamí ná trigi̱in xa̱bo̱ buanuu. Ninújngoo mbaꞌiin mi̱ndaꞌkho ánje̱l, ndawa̱a̱ tsí gáꞌngo̱o̱ ma̱gu̱xnuu̱. 12 Jamí phú gakhe̱ nu̱ndxa̱ꞌwe̱e̱. Xáꞌnii nithee̱n:

«A̱ꞌdá-mógó tsí waꞌxnáá rí ma̱ja̱ñúu jaꞌyoo̱ rí maꞌthán-ñájwii̱n,

jaꞌyoo̱ rí ma̱janáa̱ mbá xúgíí rí máján ríga̱ jamí mi̱ꞌthán rí phú na̱ma̱ñuu̱.

Jaꞌyoo̱ rí ma̱janáa̱ mba̱a̱ tsiakhe̱ jamí mi̱tiamakuíi̱,

xúꞌkhue̱n máꞌ rí ma̱gu̱ma-mba̱a̱ jamí mi̱ꞌthán rí máján numuu̱».

13 Xúꞌkhue̱n máꞌ ni̱dxawuun a̱ꞌwúún mbá xúgíin tsí neꞌne-ku̱mii Ana̱ꞌlóꞌ: tsí júwa̱ꞌ mikhuíí, tsí júwa̱ꞌ ná inuu ju̱ba̱ꞌ, tsí júwa̱ꞌ ná awúun ju̱ba̱ꞌ, jamí tsí júwa̱ꞌ ná awúun iya a̱pha̱. Xáꞌnii ni̱dxawuun rí nithee̱n:

«Tsí ꞌgí ná xíli̱i thúngaa jamí A̱ꞌdá-mógó,

a̱gi̱ꞌthán rí máján ga̱jma̱á numúu̱ ikhii̱n jamí a̱gu̱ma-makúu̱n.

A̱gu̱ma-mbii̱n jamí guthan-ñajwii̱n ikhii̱n jámuu mbiꞌi».

14 Wámba̱ rúꞌkhue̱n, mbá nákhu̱un tsí nduya nuthan: «¡Xkuaꞌnii gáꞌne!». Jamí tsí mbá skíñú akhu̱un xa̱bo̱ buanuu, ni̱smáti̱gúu̱n xúꞌkhue̱n máꞌ nene̱-mba̱a̱ tsí xtáa ndaꞌya jámuu.*