1 A̱ꞌkhue̱n nikujma mbá rí phú wáá ná mikhuíí: mbáa a̱ꞌgo̱ júwuun xtíin rí nambiꞌi-taꞌa xómá a̱kha̱ꞌ, ná agoo nakhúu̱ ka̱maa go̱nꞌ, jamí ná idxu̱u̱ rígu mbá ajwa̱nꞌ gamaku rí jndi, rí timii gu̱wa̱ꞌ i̱jmi̱i (12) a̱ꞌgua̱án. 2 Jago̱-édee̱ jamí nandxaꞌwée̱ rí naꞌkho̱ awúu̱n, numuu rí inu máꞌ ma̱ꞌne-xuajii̱n.

3 A̱ꞌkhue̱n nikujma i̱mba̱ rí phú wáá ná mikhuíí: mbáa a̱bo̱ꞌ xkawi̱i̱ꞌ tsí phú mba̱a̱ jamí maña̱a̱ꞌ, tsí gíꞌdoo juwan idxu̱u̱ jamí gu̱wa̱ꞌ chi̱jyu̱u̱ꞌ, xúꞌkhue̱n máꞌ mbámbá idxu̱u̱ rígu mbá ajwa̱nꞌ gamaku lájwíin rí jndi. 4 Ga̱jma̱á tsiluu̱ nixmátii̱n mbóó rí atsú kuthiin a̱ꞌgua̱án tsí timii ná mikhuíí jamí nixídíi̱n ná inuu ju̱ba̱ꞌ. Jamí ído̱ rí phú nangiyuu máꞌ rí ma̱ꞌne-xuajen a̱ꞌgo̱, a̱ꞌkhue̱n ni̱ka̱ a̱bo̱ꞌ xkawi̱i̱ꞌ tsí phú mba̱a̱ jamí maña̱a̱ꞌ ná mijngi kri̱ga̱a̱ a̱ꞌgo̱, kajngó mi̱khu̱u̱ a̱dée ído̱ gágu̱maa. 5 Jamí a̱ꞌgo̱ niꞌnii mbáa dxáma tsí maꞌthán-ñájúún mbá xúgíin inii xa̱bo̱ tsí júwa̱ꞌ ná numbaa, maꞌthán-ñájúu̱n ga̱jma̱á xkuíya̱ ajwa̱nꞌ rí phú gúkú. I̱ndo̱ó máꞌ numuu rí mbá nacha̱ ni̱ka̱ jiꞌyáa a̱dée a̱ꞌgo̱ ná inuu Ana̱ꞌlóꞌ jamí ná ꞌgí xílii̱. 6 Xómáꞌ a̱ꞌgo̱ nigáyuu̱ ni̱ke̱e̱ ná mbaa niníí, ná neꞌne-mújúun Ana̱ꞌlóꞌ rí mi̱tia̱wáa̱n jamí ma̱janáa̱ rí mi̱khui̱i̱ mbá atsú tsigu i̱tikhu.*

7 Nda̱wa̱á a̱ꞌkhue̱n ni̱gi̱ꞌdu̱u̱n mbá xkujndu mba̱a̱ ná mikhuíí. Ánje̱l tsí phú mba̱a̱ ski̱yu̱u̱ꞌ, tsí mbiꞌyuu Migéél gajmíi̱ ánje̱l tsí gíꞌdii̱n ni̱tsa̱ñúu̱ gajmíi̱ a̱bo̱ꞌ xkawi̱i̱ꞌ, gajmíí máꞌ ánje̱l drígo̱o̱ a̱bo̱ꞌ mangaa. 8 Nindáti̱go̱o̱ a̱bo̱ꞌ gajmíí ánje̱l tsí gíꞌdiin, jamí nánguá nijanúu̱ rí ma̱ju̱wée̱ꞌ ná mikhuíí. 9 Xkuaꞌnii waꞌda-maꞌáan a̱bo̱ꞌ maña̱a̱ꞌ tsí phú mba̱a̱, tsí xtáa̱ wajyúú mbiꞌi, tsí mbiꞌyuu gixa̱a̱ jamí Satanás, tsí naꞌne-nduwiin xa̱bo̱ mbá xúgíí inuu numbaa. Waxkriya̱a̱ꞌ ná mikhuíí rí ma̱ꞌgee̱ ná inuu ju̱ba̱ꞌ gajmíi̱ máꞌ ánje̱l tsí gíꞌdii̱n.

10 A̱ꞌkhue̱n ni̱dxawuun mbá a̱ꞌwá rí phú gakhe̱ niꞌthán ná mikhuíí:

«Ni̱ga̱nú mbiꞌi rí Ana̱ꞌlóꞌ ma̱ꞌne-jáwíin xa̱bi̱i rá,

ni̱ga̱nú mbiꞌi rí ma̱kujma ski̱yu̱u̱ꞌ, jamí rí maꞌthán-ñájwii̱n ikhaa̱.

Xúꞌkhue̱n máꞌ ni̱ga̱nú mbiꞌi rí maꞌthán-ñájun Krísto̱ drígo̱o̱.

Numuu rí waxkriya̱a̱ꞌ tsí naꞌne-xtutaa ga̱jma̱á numúú a̱ngia̱nꞌlóꞌ,

tsí naꞌne aꞌkhúu̱n mbiꞌíí mbruꞌwíín ná inuu Ana̱ꞌlóꞌ.

11 Ikhii̱n ni̱ꞌngúu̱n inuu gixa̱a̱ ga̱jma̱á ski̱yu̱u̱ꞌ iꞌdiuu A̱ꞌdá-mógó

jamí ga̱jma̱á máꞌ ajngáa rí nithan-raꞌee̱.

Numuu támíñúu̱ rí ma̱mbá mbiꞌñúu̱, rí nijúwe̱e̱ꞌ na̱ma̱ñúu̱ máꞌ asndo rí ma̱ja̱ñúu̱.

12 Ikhaa numuu rúꞌkhue̱n, ¡ga̱ꞌdxu a̱kui̱in mikhu,

jamí ga̱ꞌdxu a̱kui̱ín tsí júwa̱ꞌ ná inuu ne̱!

¡Xómáꞌ ikháanꞌlaꞌ tsáanꞌ juwalaꞌ ná inuu ju̱ba̱ꞌ,

jamí ná iya a̱pha̱, phú gakhe̱ mu̱míni̱ílaꞌ!

Numuu rí gixa̱a̱ ni̱ga̱taa̱ ná juwalaꞌ

jamí phú najiꞌnáa̱ numuu ndaꞌyoo̱ rí nánguá mbaꞌa mbiꞌi ma̱xtáa̱».

13 Ído̱ ndiꞌyoo a̱bo̱ꞌ xkawi̱i̱ꞌ tsí phú mba̱a̱ jamí maña̱a̱ꞌ rí waꞌda-maꞌáa̱n ná inuu ju̱ba̱ꞌ, a̱ꞌkhue̱n ni̱ka̱-raxkoo̱ a̱ꞌgo̱ tsí niꞌnii dxáma. 14 Xómáꞌ a̱ꞌgo̱ nijanáa̱ nájma̱ xpípíi bi̱yú tsí phú mba̱a̱ kajngó ma̱ꞌngo̱o̱ ma̱ki̱xi̱i̱ ma̱ꞌgee̱ ná mbaa niníí, tsíngua̱ꞌ ná inuu a̱bo̱ꞌ xkawi̱i̱, ná ni̱gu̱ma-mújúun rí mi̱tia̱wáa̱n jamí ma̱janáa̱ rí mi̱khui̱i̱ mbá atsú tsigu i̱tikhu. 15 A̱ꞌkhue̱n rí a̱bo̱ꞌ xkawi̱i̱ꞌ, phú mba̱je̱ꞌ iya nixídíi̱ ga̱jma̱á rawuu̱n ná tsu̱du̱u̱ a̱ꞌgo̱, asndo xómá iyoo mbá matha, kajngó ma̱gu̱ꞌwi̱i̱ a̱ꞌgo̱ gáꞌne iya. 16 Xómáꞌ ju̱ba̱ꞌ nimbáyúu a̱ꞌgo̱, numuu rí ni̱wa̱ja̱n ne̱ jamí niꞌña̱a̱ ne̱ iya rí ningujwíi ná rawuun a̱bo̱ꞌ xkawi̱i̱ꞌ tsí maña̱a̱ꞌ. 17 A̱ꞌkhue̱n rí phú nijiꞌnáa a̱bo̱ꞌ xkawi̱i̱ꞌ tsí phú mba̱a̱ jaꞌyoo a̱ꞌgo̱, jamí ni̱ke̱e̱ gáꞌñúu̱ xkujndu i̱ꞌwíin i̱ji̱in a̱ꞌgo̱, ikhiin tsí nune̱-mbáníí ajngóo Ana̱ꞌlóꞌ jamí tsíni̱ꞌñáá gisngáá rí niꞌthán-ráꞌa Jesukrísto̱.