1 Nda̱wa̱á a̱ꞌkhue̱n ni̱ya̱xe̱lo̱ꞌ mikhuíí, ikhín ndi̱yo̱o̱ ja̱ma̱ꞌtha mbá xkrugua. A̱ꞌkhue̱n ni̱dxawuun mbu̱júꞌ a̱ꞌwá rí ni̱dxawuun máꞌ ginii, ikhaa rí phú gakhe̱ niwán asndo xómá ajwa̱nꞌ e̱ꞌmbi. Ikhaa a̱ꞌwá rúꞌkhue̱n niꞌthínꞌ: «A̱tsimaaꞌ ge̱jyoꞌ kajngó ma̱snga̱jmáaꞌ rí ma̱ri̱gá nda̱wa̱á». 2 Mbrúma máꞌ rúꞌkhue̱n Xu̱u̱ꞌ Ana̱ꞌlóꞌ neꞌne asndo xó rí ndi̱yo̱o̱ inu-mbiꞌíí wáa jaꞌnii, a̱ꞌkhue̱n ndi̱yo̱o̱ wéje̱ mbá xíli̱i thúngaa ná mikhuíí. Jamí ná inuu xíle̱ rúꞌkhue̱n ꞌgí mbáa 3 tsí nambiꞌi-taꞌaa xómá itsí maxa rí mbiꞌyuu jáspe̱ jamí xómá itsí maña̱ꞌ rí mbiꞌyuu kornalína̱. Mbá tuaꞌáan ná wéje̱ xíli̱i thúngaa wéje̱ mbáa tu̱ka̱ya̱ꞌ, tsí nambiꞌi-taꞌaa xómá itsí maxa rí mbiꞌyuu esmerálda̱. 4 Mbá tuaꞌáan ná wéje̱ xíli̱i thúngaa wájun i̱mbá skíñú akho̱ (24) xíli̱ín thúngaa, ná trigi̱in mbá skíñú akhu̱un xa̱bo̱ buanuu tsí júwúún xtíin miꞌxá, jamí rígu ná idxúu̱n mbá ajwa̱nꞌ gamaku rí jndi, rí ajwa̱nꞌ mo̱jmo̱ꞌ ñajuun. 5 Ná tikhuíí wéje̱ xíli̱i thúngaa nangujwíi mbaꞌa nothon aguu rí naxpíbi, jamí phú wee nawán mbaꞌa nothon. Xúꞌkhue̱n máꞌ ná inuu wéje̱ xíli̱i thúngaa nakha mbá juwan agu, rí xómá aguu rondo̱ jaꞌnii, jamí ikhaa rúꞌkhue̱n ñajuun mbá juwiin xu̱u̱ꞌ Ana̱ꞌlóꞌ. 6 Ikhín máꞌ ná inuu xíli̱i thúngaa ndi̱yo̱o̱ xó mbá iya a̱pha̱ rí xómá tsíꞌtsún miꞌxá jaꞌnii, nambiꞌi-taꞌa ne̱ xómá iyaniwan.

Ná tikhuíí jamí mbá nawa̱a̱ ná wéje̱ xíli̱i thúngaa ndi̱ñu̱ú mbá akhu̱un tsí nduya, tsí mbá xúgíí jayu xuñúú guáꞌdáá idúún, ná inúu̱ jamí ná tsu̱dúu̱n. 7 Tsí ginii xómá i̱ndi̱í phuu jaꞌnii̱, tsí riajma̱a̱ xómá xede̱ jaꞌnii̱, tsí riatsíi xómá inuu xa̱bo̱ jaꞌnii inuu̱, jamí tsí riakhui̱i̱ xómá bi̱yú tsí na̱ka̱ inuu gíñá jaꞌnii̱. 8 Mbámbáa tsí mbá akhu̱un tsí nduya guáꞌdáa̱ mbá majun xpípíi̱n. Ná tsu̱du̱u̱ jamí ná agoo xpípíi̱n guáꞌdáa̱ idúu̱n. Xúꞌkhue̱n máꞌ mbiꞌíí mbruꞌwíín nuthee̱n:

«Tsí Jaꞌwii, tsí jaꞌwii, tsí jaꞌwii ñajuun Táta̱,

Ana̱ꞌlóꞌ tsí gíꞌdoo mbá xúgíí tsiakhe̱,

tsí xtáa̱ máꞌ jayu, tsí nixtáa̱ máꞌ asndo nákhí wajyúú mbiꞌi, jamí wéje̱ máꞌ rí ma̱ꞌkha̱».

9 Jámba̱ miꞌtsú rí mbá nákhu̱un tsí nduya, nune̱-mba̱a̱, nduya-makuíi̱ jamí nuxnaa̱ la núma̱aꞌ tsí ꞌgí ná xíli̱i thúngaa, tsí xtáa̱ jámuu, 10 a̱ꞌkhue̱n tsí mbá skíñú akhu̱un (24) xa̱bo̱ buanuu, nu̱sma̱ti̱gúu̱n inuu tsí ꞌgí ná xíli̱i thúngaa, nune̱-mba̱a̱ tsí xtáa̱ jámuu, jamí nu̱stri̱ge̱e̱ ajwa̱nꞌ gamaku rí jndi drígúu̱n ná inuu thúngaa. A̱ꞌkhue̱n nuthee̱n:

11 «Ikháánꞌ Táta̱,* jaꞌyaaꞌ rí ma̱gu̱ma-mba̱ánꞌ,

ma̱tri̱gú gamaku jamí ma̱tri̱gú tsiakhe̱.

Numuu rí ikháánꞌ nithane̱-ku̱maa mbá xúgíí rí ríga̱ ná numbaa.

Ni̱gu̱ma-ku̱maa ne̱ jamí ríga̱ ne̱ ga̱jma̱á numuu rí ikháánꞌ nandaaꞌ».