1 »Aratháán ajngáa ríge̱ꞌ ná inuu i̱yi̱i̱ꞌ ma̱ꞌga inuu ánje̱l tsí na̱ña̱wu̱ún tsí nanimbu̱únꞌ juyeꞌ ná xuajen Éfe̱so̱. Xáꞌnii iꞌthán tsí gíꞌdiin mbá juwiin a̱ꞌgua̱án ná ñawún mújúun jamí ngroꞌoo ná majñu̱u̱ mbá juwan ajwa̱nꞌ mo̱jmo̱ꞌ ná natráma agu: 2 Ikhúúnꞌ na̱ne̱-núwíinlo̱ꞌ ñajun rí nathane̱, rí natiajun mi̱ndaꞌkho jamí tsíꞌne níꞌnga̱a̱ꞌ. Nda̱yo̱o̱ máꞌ rí tsíꞌkho̱ a̱kia̱anꞌ ene̱ tsí ra̱májíin. Xúꞌkhue̱n máꞌ ni̱tra̱jwa̱ꞌ numúú tsí nuthan rí xa̱bo̱ tsí waxúngui̱inꞌ neꞌne Ana̱ꞌlóꞌ ñajúún, jamí nithayáá rí mi̱nduwii̱n. 3 Phú nitamíni̱í jamí phú mba̱a̱ a̱kia̱anꞌ neꞌne, xúꞌkhue̱n máꞌ phú nitiajun* numuu rí nandaaꞌ xtayoꞌ jamí tsíꞌne wabaa a̱kia̱anꞌ.

4 »I̱ndo̱ó máꞌ numuu rí ríga̱ mbóó rí tsíni̱gu̱ꞌ ithane̱: rí nánguá iyalaꞌ ju̱ya̱-mijnálaꞌ xómá nákhí rí ginii. 5 Ikhaa jngó, ¡ga̱rmáꞌáan a̱kia̱anꞌ dí ñajuun rí nitatsíñáá-rathane̱! A̱thanga̱a a̱kia̱anꞌ jamí atagíꞌma̱a ma̱tha̱ne̱ rí nithane̱ nákhí ginii. Xí na̱nguá ithanga̱a a̱kia̱anꞌ rá, a̱ꞌkhue̱n rí ma̱ꞌgá máꞌ nacha̱ gáxpa̱thíínlo̱ꞌ jamí ma̱rígúulo̱ꞌ ajwa̱nꞌ dríga̱a̱ꞌ ná na̱rigu agu. 6 Xúꞌkhue̱n máꞌ ríga̱ mbá rí na̱ni̱gu̱ꞌ ithane̱: rí tsíyaaꞌ xtayáá rí nune̱ xa̱bi̱i Nikolás, ikhaa máꞌ rí tsíyoꞌ ja̱yo̱o̱ mangúúnꞌ.

7 »Tsí gíꞌdoo ñaꞌwuun, gadxawuu̱n rí naꞌthán Xu̱u̱ꞌ Ana̱ꞌlóꞌ, rí naꞌthúu̱n mbámbá kuthuun tsí nanimbu̱únꞌ juyáá Jesús. Tsí ma̱ꞌngo̱o̱, ma̱xnu̱u̱ mi̱khui̱i̱ xndúu ixe̱ rí naꞌne rí ma̱ju̱wá jámuu xa̱bo̱, ikhaa rí wéje̱ ná ti̱kua̱pho̱o̱ mbayuu Ana̱ꞌlóꞌ rí phú mitsaan.

8 »Aratháán ajngáa ríge̱ꞌ ná inuu i̱yi̱i̱ꞌ ma̱ꞌga inuu ánje̱l tsí na̱ña̱wu̱ún tsí nanimbu̱únꞌ juyeꞌ ná xuajen Esmírna̱. Xáꞌnii iꞌthán tsí ginii jayu jamí nda̱wa̱á jayu, tsí nijáñuu jamí ndiyáa mbiꞌyuu: 9 Ikhúúnꞌ na̱ne̱-núwíinlo̱ꞌ ñajun rí nathane̱, jamí nda̱yo̱o̱lo̱ꞌ rí natamíni̱í xúge̱ꞌ, xúꞌkhue̱n máꞌ nda̱yo̱o̱lo̱ꞌ rí mingínááꞌ, maske máꞌ ná awúun a̱kia̱anꞌ gatíí rí máján. Nda̱yo̱o̱ máꞌ rí nuthan xkawe̱ꞌ numaaꞌ tsí na̱ju̱mu̱ú rí xa̱bo̱ judío̱ ñajúún, maske máꞌ ra̱ꞌkhá ikhaa ñajúu̱n, rí xa̱bo̱ tsí na̱gi̱mbíin ga̱jma̱á numuu Satanás ñajúu̱n. 10 Ma̱xámíñaaꞌ nitháan gáꞌne rí inu ma̱ꞌkha̱ ma̱ta̱míni̱í. Wapha máꞌ i̱tha̱a̱nꞌlo̱ꞌ rí mbá tikhuun tsí ikháanꞌlaꞌ magóó géjwa̱nꞌ gáꞌne gixa̱a̱, kajngó mba̱ꞌyoo̱ xí gakon rí nanimba̱ꞌlaꞌ ju̱yo̱ꞌ, jamí phú mu̱míni̱ílaꞌ awúun rí mbá gu̱wa̱ꞌ mbiꞌi. Ga̱ꞌne jañii a̱kia̱anꞌ xtayoꞌ asndo rí ma̱ja̱ñáaꞌ ga̱jma̱á numuꞌ, jamí ikhúúnꞌ ma̱xna̱a̱ꞌ ma̱ra̱xtaa jámuu.

11 »Tsí gíꞌdoo ñaꞌwuun, gadxawuu̱n rí naꞌthán Xu̱u̱ꞌ Ana̱ꞌlóꞌ, rí naꞌthúu̱n mbámbá kuthuun tsí nanimbu̱únꞌ juyáá Jesús. Tsí ma̱ꞌngu̱ún, nda̱a̱ nitháan rí ma̱gíꞌníi̱ gáꞌne tsiakhe̱ rí na̱gu̱díin xa̱bo̱ rí riajma̱ nothon.

12 »Aratháán ajngáa ríge̱ꞌ ná i̱yi̱i̱ꞌ ma̱ꞌga inuu ánje̱l tsí na̱ña̱wu̱ún tsí nanimbu̱únꞌ juyeꞌ ná xuajen Pérga̱mo̱. Xáꞌnii iꞌthán tsí gíꞌdoo chíde̱ xíni rí a̱jma̱ rawuun: 13 Ikhúúnꞌ na̱ne̱-núwíinlo̱ꞌ ñajun rí nathane̱, jamí nda̱yo̱o̱lo̱ꞌ rí ikháánꞌ xtaa ná naꞌthán-ñájun Satanás. Maske máꞌ xkuaꞌnii rá, jaꞌnii máꞌ nanimba̱a̱ꞌ xtayoꞌ, ni máꞌ tára̱tha̱n rí tsíthane̱-nuwúún nákhí ni̱xi̱ya̱a̱ Antípa̱s, tsí mbá jañii a̱kui̱in ninimbo̱o̱ꞌ jaꞌyeꞌ ná xuajen rí xtáa̱ Satanás. 14 I̱ndo̱ó máꞌ numuu rí ríga̱ mbá tikhu rí tsíni̱gu̱ꞌ ithane̱: rí nitatsíñáá rí ma̱ju̱wá ná xtaa a̱ꞌkhue̱n tsí tsíñúú gúni̱ꞌñáá gisngáá drígo̱o̱ Baláám, tsí nisngróꞌoo Balák rí ma̱ꞌne rí mune̱ aꞌkhán i̱ji̱in Israél. Balák niꞌthúún i̱ji̱in Israél rí ma̱goo mu̱phi̱i̱ ganitsu rí kixnáxe̱ ná inúú tsí ra̱ꞌkháa Ana̱ꞌlóꞌ ñajúún jamí rí mubúu̱n gajmíi̱ xa̱bo̱ tsí túya̱a̱. 15 Xúꞌkhue̱n máꞌ mangaa, xtaꞌdiin ná xtaa a̱ꞌkhue̱n tsí tsíñúú gúni̱ꞌñáá gisngáá drígu̱ún xa̱bi̱i Nikolás, gisngáá rí ikhúúnꞌ naxúwu̱nꞌ eꞌne.* 16 Ikhaa jngó, a̱thanga̱a a̱kia̱anꞌ. Jamí xí na̱nguá rá, ma̱ꞌkha máꞌ nacha̱ ná xtaa kajngó ma̱ne̱ gajmíꞌ xa̱bi̱i Nikolás ga̱jma̱á ski̱yu̱u̱ꞌ ajngáa rí nagájnuu ná rawunꞌ, rí xómá chíde̱ jaꞌnii.

17 »Tsí gíꞌdoo ñaꞌwuun, gadxawuu̱n rí naꞌthán Xu̱u̱ꞌ Ana̱ꞌlóꞌ, rí naꞌthúu̱n mbámbá kuthuun tsí nanimbu̱únꞌ juyáá Jesús. Tsí ma̱ꞌngo̱o̱, ma̱xnu̱u̱ ganitsu rí mbiꞌyuu maná mi̱khui̱i̱, rí gúꞌdo̱ꞌ ná ngu̱ꞌwa̱. Xúꞌkhue̱n máꞌ ma̱xnu̱u̱ mbá itsí miꞌxá lájwíin ná waꞌtháán mbá mbiꞌyuu rí nuxe̱ꞌ, rí ndawa̱a̱ tsí eꞌne-nuwiin, rí i̱ndo̱ó máꞌ tsí na̱grui̱gú ne̱.

18 »Aratháán ajngáa ríge̱ꞌ ná i̱yi̱i̱ꞌ ma̱ꞌga inuu ánje̱l tsí na̱ña̱wu̱ún tsí nanimbu̱únꞌ juyeꞌ ná xuajen Tiatíra̱. Xáꞌnii iꞌthán A̱dée Ana̱ꞌlóꞌ, tsí nambiꞌi-taꞌa mi̱ndaꞌkho iduu xómá ri̱ꞌyu̱u̱ agu jamí nambiꞌi-taꞌa nakhúu xómá ajwa̱nꞌ rí ni̱gu̱ma-tsaꞌtsa inuu: 19 Ikhúúnꞌ na̱ne̱-núwíinlo̱ꞌ ñajun rí nathane̱. Nda̱yo̱o̱ mújúnꞌ máꞌ rí nandaaꞌ xtañúú a̱ngia̱anꞌ jamí táta̱tsi̱ꞌñáá rí nanimba̱a̱ꞌ xtayoꞌ, xúꞌkhue̱n máꞌ tsítatsíñáá rí nathane̱-mbi̱in i̱ꞌwíin jamí na̱ꞌnga̱a̱ꞌ inuu jamínu̱ꞌ. Nda̱yo̱o̱ máꞌ mangaa rí i̱tha̱án máꞌ mbaꞌa rí nathane̱ xúge̱ꞌ xó rí nákhí ginii.

20 »I̱ndo̱ó máꞌ numuu rí ríga̱ mbá tikhu* rí tsíni̱gu̱ꞌ ithane̱: natatsíñáá rí Jesabél, a̱ꞌgo̱ tsí naꞌthán rí na̱gu̱wíjnga̱a ajngóo Ana̱ꞌlóꞌ, maꞌsngúún yumbéꞌ. Ga̱jma̱á majñu̱u̱ rí naꞌsngáa̱ naꞌne-rájíi̱n yumbéꞌ rí mubúu̱n gajmíi̱ xa̱bo̱ tsí túya̱a̱, jamí naꞌthúu̱n rí mu̱phi̱i̱ ganitsu rí kixnáxe̱ ná inúú tsí ra̱ꞌkháa Ana̱ꞌlóꞌ ñajúún. 21 Ikhúúnꞌ ni̱xnu̱u̱ máꞌ mbiꞌi rí ma̱thanga̱a a̱kuii̱n, xómáꞌ ikhaa̱ tsíyoo̱ gáthanga̱a a̱kuii̱n jamí tsíyoo̱ gániñuu̱ rí nabóo̱ gajmíi̱ mbaꞌiin xa̱bo̱. 22 Ikhaa jngó, ikhúúnꞌ ma̱ne̱ rí mbayóo̱ mbá nandii rí gakhi̱i̱ mi̱ndaꞌkho. Jamí tsí nubúún ga̱jma̱á nindxu̱u̱ ikhaa̱, ma̱ne̱ rí mu̱míníi̱ mi̱ndaꞌkho, xí tsíni̱ñáa̱ rí ni̱ma̱ñúu̱ neꞌne a̱ꞌgo̱ tsúꞌkhue̱n. 23 Xómáꞌ i̱jii̱n, ma̱ne̱ rí mbañúu̱ mbá nandii rí ma̱gu̱díi̱n. A̱ꞌkhue̱n mbá xúgíí kuthuun tsí nanimbu̱únꞌ juyáá Jesús mbuyáá rí ikhúúnꞌ na̱ne̱-núwíin rí na̱ju̱mu̱u̱ jamí nda̱yo̱o̱ rí nandoo gáꞌne mbámbáa xa̱bo̱, xúꞌkhue̱n máꞌ ma̱xnu̱u̱ mbámbáa xómá jaꞌyoo ñajun rí neꞌne.

24 »Xómáꞌ i̱ꞌwáanꞌlaꞌ tsáanꞌ juwalaꞌ ná xuajen Tiatíra̱, ra̱guáꞌdáálaꞌ gisngáá drígo̱o̱ a̱ꞌgo̱ tsúꞌkhue̱n. Ni máꞌ túne̱-nuwiinlaꞌ rí mbá tikhuun nuxna mbiꞌíí "rí me̱jno̱ꞌ na̱ma̱ñuu Satanás". Ikhaa jngó náxáxna̱-ngáwalaꞌ máꞌ i̱mba̱ rí mu̱ne̱laꞌ. 25 I̱ndo̱ó máꞌ na̱tha̱nꞌlaꞌ rí mu̱xúni̱ꞌñáálaꞌ rí guáꞌdáálaꞌ xúge̱ꞌ, asndo mbiꞌi rí ma̱ꞌkhalo̱ꞌ.

26 »Tsí ma̱ꞌngo̱o̱ jamí ma̱ꞌne-mbánuu rí nandoꞌ ikhúúnꞌ asndo rí ma̱mbá numbaa, ma̱xnu̱u̱ tsiakhe̱ rí maꞌthán-ñájúu̱n xa̱bo̱ ná mbá xúgíí numbaa. 27 Jamí "maꞌthán-ñájúu̱n ga̱jma̱á nixí ajwa̱nꞌ. Maxpígu-makii̱n xómá daan ju̱ba̱ꞌ". Xómá rí ikhúúnꞌ mangúúnꞌ ni̱gruígú tsiakhe̱ neꞌne Tátéꞌ. 28 Xúꞌkhue̱n máꞌ ma̱xnii̱lo̱ꞌ a̱ꞌgua̱án tsí na̱ꞌkha̱ miꞌcha̱.

29 »Tsí gíꞌdoo ñaꞌwuun, gadxawuu̱n rí naꞌthán Xu̱u̱ꞌ Ana̱ꞌlóꞌ, rí naꞌthúu̱n mbámbá kuthuun tsí nanimbu̱únꞌ juyáá Jesús.