1 Ído̱ rí ma̱ꞌkha̱a Táta̱ Jesukrísto̱ maxúꞌdaa̱ awan numúú xa̱bo̱ tsí nduya jamí tsí nijáñúú máꞌ, jamí magíꞌdu̱u̱n maꞌthán-ñájwii̱n. Ikhaa jngó, ná inuu Ana̱ꞌlóꞌ jamí ná inuu máꞌ Táta̱ Jesukrísto̱ na̱xna̱ngáwaaꞌ ríge̱ꞌ: 2 Arathán-raꞌa ajngóo Ana̱ꞌlóꞌ. Ma̱xáta̱tsi̱ꞌñáá rí ma̱ra̱tha̱n-ráꞌa, á ikhaa mbiꞌi o ra̱ꞌkháa mbiꞌi rí ma̱ra̱tha̱n-ráꞌa mbo̱ꞌ. Atasngájmúú xa̱bo̱ rí ra̱máján nune̱, ataxprígúu̱n, arathán-múꞌúu̱n ga̱jma̱á gisngáá rí máján, jamí phú mba̱a̱ a̱kia̱anꞌ gátha̱ne̱. 3 Numuu rí ma̱ga̱nú mbiꞌi rí náxáxúún xa̱bo̱ gúdxawíín gisngáá rí máján, rí ma̱gúu̱n gúdxawíi̱n i̱ꞌwá ajngáa rí kuitsúun iwán, a̱ꞌkhue̱n rí ma̱gi̱mbúun xa̱bo̱ tsí nusngáá, tsí nuthan ajngáa rí na̱ni̱gúu̱nꞌ mu̱dxawíi̱n. 4 Mu̱ni̱ꞌñáa̱ rí nu̱dxawíi̱n gisngáá rí gakon, jamí ma̱thangii̱n mu̱dxawíi̱n ajngáa kuitsúun rí nune̱-ku̱maa xa̱bo̱ numbaa. 5 Xómáꞌ ikháánꞌ rá, Timotéo̱, xawi lá gátha̱ne̱ inuu mbá xúgíí. Ga̱ꞌngo̱o̱ a̱kia̱anꞌ rí ma̱ta̱míni̱í. Arathán-rúꞌúún máꞌ xúꞌkhue̱n xa̱bo̱ ajngáa máján, jamí athane̱-mbáníí ñajun rí ni̱ge̱ꞌe̱ inaaꞌ ma̱tha̱ne̱.

6 Numuu rí ikhúúnꞌ inu máꞌ xtáá rí mi̱xnáxu̱ún xómá mbá tsi̱gi̱jña̱ꞌ ná inuu Ana̱ꞌlóꞌ, inu máꞌ na̱ga̱nú mbiꞌi rí ma̱ni̱ꞌñúu numbaa ríge̱ꞌ. 7 Phú gakhe̱ nigíꞌnuꞌ rí ma̱ne̱ ñajuun Ana̱ꞌlóꞌ, ni̱ꞌngo̱ꞌ ne̱ne̱-gáxu̱u̱ ñajun rí ni̱ge̱ꞌe̱ inuꞌ rí ma̱ne̱, jamí táni̱ꞌñúu rí nanimbo̱ꞌ gisngáá ga̱jma̱á numuu Krísto̱. 8 Rí xúge̱ꞌ rá, ríga̱ mújúun máꞌ gamaku rí maxníꞌ Táta̱, tsí naxúdaa mújúun awan. Ikhaa̱ maxníꞌ gamaku ído̱ rí ma̱ꞌkhaa̱, numuu rí nixtáá xómá rí nandoo Ana̱ꞌlóꞌ, jamí ra̱ꞌkhá máꞌ i̱ndo̱ó ikhúúnꞌ maxníꞌ gamaku mbiꞌi rúꞌkhue̱n, rí mangaa máꞌ mbá xúgíin tsí mbá jañii a̱kui̱ín guáꞌthi̱ín rí ma̱ꞌkhaa̱.

9 Araxná-mina̱ꞌ tsiakhe̱ rí mi̱dxa̱ꞌ máꞌ wapha gátha̱yo̱ꞌ. 10 Déma̱s niniña-ti̱gu̱ún, numuu rí phú nandoo̱ jaꞌyoo̱ rí ríga̱ ná numbaa, jamí ni̱ke̱e̱ ná xuajen Tesalóni̱ka̱. Xómáꞌ Kresénte̱ ni̱ka̱ ná numbaa Galásia̱, jamí Títo̱ ni̱ka̱ ná numbaa Dalmásia̱. 11 I̱ndo̱ó máꞌ Lúka̱s xtáa ga̱jma̱á nindxu̱ꞌ ge̱jyoꞌ. Ído̱ gídxá, aya̱ ga̱jma̱a̱ꞌ Márko̱s numuu rí ma̱jmaa̱ mambáyíꞌ ma̱ꞌnii̱ ñajun rí gúꞌdo̱ꞌ ge̱jyoꞌ. 12 Xómáꞌ Tíki̱ko̱ ni̱xu̱ꞌmáa̱ ma̱ꞌgee̱ ná xuajen Éfe̱so̱. 13 Ído̱ gídxá, ayá mi̱dxa̱ꞌ tháan xtátsi̱nꞌ rí ni̱ni̱ꞌñúu ná Tróa̱s, ná guꞌwóo Kárpo̱. Ada mi̱dxa̱ꞌ tháan i̱yu̱u̱ꞌ jambúxu̱u̱ꞌ rí waꞌtháán inuu mangaa, jamí phú i̱tha̱án máꞌ na̱xna̱ngáwaaꞌ rí mi̱da-gídxá tháan xtá jambúxu̱u̱ꞌ rí waꞌtháán inuu.

14 Alejándro̱, xa̱bo̱ tsí nañajuun ajwa̱nꞌ, phú niꞌñiꞌ mi̱ndaꞌkho rí ra̱máján. Táta̱ gáꞌne-numaa̱ xómá jaꞌyoo rí niꞌnii̱. 15 A̱tia̱wa̱n-mína̱ꞌ mangáánꞌ inuu̱, numuu rí phú gakhe̱ ni̱we̱je̱-ꞌthu̱u̱n rí nu̱sngááxo̱ꞌ.

16 Nákhí timbá miꞌtsú rí ni̱tha̱n-mbáyú-mina̱ꞌ ná inuu xa̱bo̱ ñajun ná Róma̱, asndo nimbáa dxájwalóꞌ táꞌthán-mbáá numuꞌ. A̱ꞌkhue̱n gakon, mbá xúgíi̱n ni̱ni̱ꞌñá-ti̱gúu̱n. Ana̱ꞌlóꞌ gáꞌne mba̱a̱ a̱kui̱in jaꞌñúu̱ ga̱jma̱á numuu rúꞌkhue̱n. 17 I̱ndo̱ó máꞌ numuu rí Táta̱ nixtáa ga̱jma̱á nindxu̱ꞌ, jamí nixníꞌ tsiakhe̱ rí ma̱tha̱n-ráꞌa ajngóo̱ kajngó mu̱dxawíín ne̱ mbá xúgíin xa̱bo̱ tsí ra̱ꞌkháa judío̱ ñajúún. Xkuaꞌnii neꞌne-jríñúuꞌ Táta̱ kajngó ma̱xája̱ñúꞌ gúne̱ xa̱bo̱ tsí xómá i̱ndi̱í phuu jaꞌñúú. 18 Nda̱yo̱o̱ mújúnꞌ máꞌ rí Táta̱ ma̱ꞌne-jríñúu̱ inuu mbá xúgíí rí ra̱máján, jamí ma̱ña̱wi̱nꞌ asndo mbiꞌi rí ma̱ꞌgaa̱ jañúu̱ mikhuíí ná naꞌthán-ñájwii̱n. A̱gu̱ma-mba̱a̱ ikhaa̱ jámuu mbiꞌi. Xkuaꞌnii gáꞌne.

19 Na̱ra̱xi̱inlo̱ꞌ a̱ngia̱nꞌlóꞌ Prisíla̱* jamí Akíla̱, xúꞌkhue̱n máꞌ mbá guꞌwíin xa̱bi̱i Onesífo̱ro̱ mangiin. 20 Erásto̱ ninguanúu ná xuajen Korínto̱, xómáꞌ Trófi̱mo̱ najáñuu̱ ni̱ni̱ꞌñúu̱ ná xuajen Miléto̱. 21 Araxná-mina̱ꞌ tsiakhe̱ rí mi̱dxa̱ꞌ máꞌ wapha, nákhí rí xóó máꞌ tsíga̱nú go̱nꞌ rí naꞌne ngúwán. Nu̱ra̱xi̱ín Eubúlo̱, Pudénte̱, Líno̱, Kláu̱dia̱ jamí mbá xúgíin a̱ngia̱nꞌlóꞌ. 22 Táta̱ Jesukrísto̱ gáxtáa ga̱jma̱á nindxa̱a̱ꞌ, jamí Ana̱ꞌlóꞌ gáꞌne-tsakun-rámáaꞌlaꞌ mbá xúgiáanꞌlaꞌ. Xkuaꞌnii gáꞌne.*