14 Yufala i no moa mekem ol rabis fasin,

yufala i mekem ol samting nomo we i gud.

Long olgeta tingting blong yufala,

yufala i mas wok had blong mekem pis.

3 Yu mas trastem Hae God,

mo yu mas mekem ol fasin we i gud,

blong yu save stap long graon ya,

nao yu harem gud from we yu yu sef.

13 Mi mi savegud

we bambae mi stap gogo mi luk

we Hae God bambae i mekem i gud tumas long mi

long laef ya we yumi stap long hem naoia.

6 Hae God,

plis yu no lego fasin ya blong yu

we yu yu kaen tumas,

mo oltaem yu stap lavem man tumas.

Yu yu stap soemaot fasin ya,

i stat longtaem finis, kam kasem tede.

7 Plis yu fogivim mi,

yu tekemaot ol sin blong mi

mo ol rabis fasin we mi stap mekem

taem mi yang yet.

Hae God, yu yu gud tumas,

mo oltaem yu stap lavem man,

plis yu tingbaot mi oltaem.

17 Fasin blong Hae God i stret gud,

mo olgeta samting we hem i mekem

i stap soemaot samting ya.

Hem i God we i gat sore long man,

mo olgeta wok blong hem

i stap soemaot fasin ya blong hem.

9 Nao sipos yu harem tok blong mi, bambae yu save luksave ol fasin we i gud, mo yu save jajem ol man long stret fasin, mo yu save mekem i stret long olgeta man, mo bambae yu save olgeta samting we i stret blong yu mekem.

22 Laef blong puaman i nogud, be i moa gud, i winim laef blong man blong giaman. Mo man we i wantem tumas ol samting, bambae hem i sem long fes blong ol man.*

22 Be Tabu Spirit, hem i stap mekem ol man oli gat narafala fasin. Hem i stap mekem we oltaem olgeta oli stap lavem ol man, mo oli stap glad, mo oli gat pis long tingting blong olgeta. Hem i stap mekem we tingting blong olgeta i longfala, mo oli gat sore long man, mo we fasin blong olgeta i gud nomo, mo i stret oltaem we i no save jenis. 23 Hem i stap mekem we olgeta oli kwaet man, mo oli save blokem ol samting we olgeta nomo oli wantem. I no gat loa blong blokem yufala long ol samting ya.

10 From samting ya, oltaem, sipos yumi gat janis, yumi mas mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.

29 Long ol toktok blong yufala, yufala i no mas talem ol rabis tok we i save spolem man. Yufala i mas talem ol gudfala tok we i save mekem ol man we oli slak oli kam strong moa. Tok olsem i save givhan moa long ol man we oli harem.

32 ✝Yufala i mas mekem i gud long ol Kristin brata mo sista blong yufala, mo yufala i mas kaen gud long olgeta. Mo yufala i mas fofogivim yufala, olsem we long Kraes, God i fogivim yufala finis.

9 Yufala i mas lavem ol man, we yufala i no giaman. Oltaem yufala i mas agens long ol rabis fasin, be yufala i mas holemstrong ol gudfala fasin.

21 Bambae yufala i no letem ol rabis fasin i winim yufala. Yufala i mas holemstrong ol stret fasin blong yufala, blong winim ol rabis fasin.

23 ✝Yufala i stap talem se, "I fri blong yumi mekem evri samting," be i no evri samting we oli gud blong yumi mekem. Yufala i stap talem se, "I fri blong yumi mekem evri samting," be i no evri samting we oli save givhan long yumi.

33 Yufala i no go krangke. Wan man blong bifo i talem se, "Ol stret man nomo, be ol fren blong olgeta we oli no stret, oli save spolem fasin blong olgeta."

8 Mo oltaem bambae hem i save givim ol gudgudfala samting long yufala, we bambae i plante we plante. Nao bambae yufala i no save sot, yufala i gat i naf blong givhan long yufala long evri rod, mo antap bakegen, blong givhan long ol gudgudfala wok.

9 ✝Mo mi wantem se ol woman oli putum klos blong olgeta we i stret nomo, i no blong pulum ae blong man, mo i no blong flas. Bambae oli no mas mekem hea blong olgeta i flas tumas, mo oli no mas putum ol flas samting we oli wokem long gol mo perel*, mo ol dres ya we praes blong olgeta i antap tumas, blong mekem ol man oli glad long olgeta. 10 Olgeta oli mas mekem ol gudgudfala wok, from we hemia i prapa fasin blong ol woman we oli stap talem se oli lavem God.

14 ✝Jisas Kraes, hem i givim laef blong hem blong sevem yumi. Hem i tekemaot yumi long ol fasin blong yumi we i no stret, i mekem yumi fri. Mo hem i mekem yumi evriwan i kam wan famle, we laef blong yumi i klin, yumi man blong hem nomo, mo yumi strong blong mekem ol gudfala samting.

5 Nao from samting ya, yufala i mas traehad blong mekem fasin blong yufala i kam gud moa. Yufala i gat fasin blong bilif finis, ale yufala i mas soemaot bilif ya long ol fasin we i stret. Mo taem yufala i stap mekem ol fasin we i stret, ale yufala i mas soemaot we yufala i gat save. 6 Mo taem yufala i kasem save ya finis, ale yufala i mas soemaot we yufala i save blokem ol samting we yufala nomo i wantem. Mo taem yufala i save mekem olsem, ale yufala i mas soemaot we yufala i gat paoa blong holem wok longtaem. Mo taem yufala i gat paoa blong holem wok longtaem, ale yufala i mas soemaot samting ya long fasin ya we yufala i stap mekem ol samting we God i wantem. 7 Mo taem yufala i stap mekem ol samting we God i wantem, ale yufala i mas soemaot we yufala i lavem ol brata blong yufala. Mo taem yufala i stap lavem ol brata blong yufala, ale yufala i mas soemaot we yufala i lavem olgeta man.

13 ?Sipos yufala i stap traehad blong mekem ol gudfala fasin, hu man bambae i save spolem yufala? I no gat.

16 Mo Profet Jeremaea i gohed i talemaot we Hae God i talem se, "Olgeta. Mi mi talem long yufala, se yufala i go stanap long ples we ol rod i joen long hem, mo yufala i traem askem long ol man se, ‘?Ol rod ya we i blong bifo, weswan long olgeta i gudfala rod blong folem?’ Mo taem oli soemaot wan rod long yufala, be rod ya nao, bambae yufala i wokbaot long hem, nao yufala i save stap gud, we yufala i gat pis long laef blong yufala.

"Be yufala i girap, yufala i talem se, ‘!No! !Mifala i no wantem go!’

7 "Hae God i gud tumas. Taem ol man blong hem oli stap long trabol, hem i save lukaot gud long olgeta. Hem i sefples blong olgeta we oli putum tingting blong olgeta i stap strong long hem.

15 ✝Mo i no gat man we i laetem laet, nao i kavremap long wan baket. Taem man i laetem laet, hem i mas putum i stap antap long ples blong laet, blong mekem we ol man insaed long haos oli gat laet. 16 ✝Nao long sem fasin, laef blong yufala i olsem laet, mo yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao bambae olgeta oli save leftemap nem blong Papa blong yufala, we i stap long heven."

36 Yufala i mas gat sore long man, olsem we Papa blong yufala i gat sore long man."