1 ✝Long namba tu yia we Darias i king* long Pesia, long namba sikis manis*, long fas dei blong hem, Hae God i givim tok blong hem long Profet Hagae, blong hem i go talemaot long Serubabel we i distrikejen* blong Juda*, mo long Josua we i hae pris*. Serubabel ya, papa blong hem Sealtiel, mo Josua ya, papa blong hem Jehosadak.

2 Nao Profet Hagae i talem se, "Hae God i gat olgeta paoa, mo hem i talem se, ‘Ol man ya oli stap talem se i no taem yet blong wokem haos* blong mi bakegen.’ "

3 Mo profet i go talemaot long ol man we Hae God i talem se, 4 "Ol man blong mi. ?From wanem yufala i stap slip long ol gudgudfala haos, be haos blong mi i stap we i nogud yet? 5 ?Ating yufala i no luksave samting ya we i stap kasem yufala? 6 Yufala i stap planem plante kakae long ol garen blong yufala, be smol kakae nomo i stap kamaot long hem. Yufala i stap kakae, be kakae ya i no naf long yufala. Yufala i stap dring waen, be waen ya tu i no naf blong mekem yufala i harem gud long hem. Yufala i gat klos blong yufala, be ol klos ya i no naf blong mekem yufala i wom. Mo man blong wok i stap wok had blong kasem mane, be mane ya we i stap kasem i no naf blong holem hem, from we oltaem nomo poket i stap brok. 7 ?Olsem wanem? ?Yufala i no luksave ol samting ya we i stap kasem yufala? 8 Naoia yufala i mas go long bus, yufala i katem ol timba, yufala i kam wokem haos blong mi bakegen, blong bambae mi save harem gud long hem. Mo yufala i save mekem wosip long mi bakegen, long fasin we mi mi glad long hem.

9 "Oltaem yufala i stap wet se bambae yufala i kasem plante kakae long ol garen blong yufala, be smol kakae nomo i stap kamaot long olgeta. Taem yufala i stap tekem ol kakae ya i kam long haos blong yufala, mi mi stap mekem win i blu long hem, nao ol kakae ya i lus. ?Yufala i ting se mi mekem olsem from wanem? Mi mekem olsem from we yufala i stap hadwok blong wokem ol haos blong yufala, be haos blong mi i stap we i nogud yet. 10 Nao from samting ya, mi mi no stap sanem ren i kam blong mekem ol garen blong yufala i gru gud. 11 Mi mi letem finis blong olgeta ples long kantri blong yufala oli drae evriwan. Olgeta ples antap long hil, mo ol ples blong wokem garen, mo ol plantesen blong grep*, mo ol plantesen blong ol tri ya olif* oli drae evriwan. Trabol ya i kasem ol man mo ol anamol, mo i kasem olgeta samting we yufala i stap wok long hem."

12 Nao Serubabel mo Hae Pris* ya Josua mo olgeta man ya we oli bin stap wok slef* long Babilonia nao oli kambak, oli mekem samting ya we Hae God we i God blong olgeta i talem.* wok slef long Babilonia, oli mekem samting ya we Hae God we i God blong olgeta i talem. Olgeta man ya oli sem man nomo we Hae God i tokbaot long vas 2. Olgeta ya, oli fraet, nao oli obei long ol tok ya blong hem we Profet Hagae i talemaot.

13 Nao profet i talemaot bakegen long ol man ya we Hae God i talem se, "Mi bambae mi stap wetem yufala."

14,15 Hae God i gat olgeta paoa, nao hem i givim gudfala tingting long olgeta blong oli wokem bakegen haos* blong hem. Nao long namba tu yia blong King Darias, long namba sikis manis* blong yia ya, long namba twanti fo dei blong hem, olgeta ya oli statem wok blong haos ya bakegen.