1 Nao Profet Sefanaea i talem se, "Ol man Jerusalem.* !Sore tumas long yufala! Fasin blong yufala i nogud olgeta. Oltaem yufala i stap girap agens long Hae God, mo yufala i stap mekem i strong tumas long ol man ples blong yufala. 2 Yufala i no save lesin nating long Hae God, mo taem hem i tok long yufala blong stretem yufala, be yufala i no save harem hem nating. Yufala i no save trastem hem, mo yufala i no save kam long hem blong i givhan long yufala. 3 Ol haeman blong taon ya, oli olsem laeon we i hanggri i stap singaot bigwan. Mo ol man blong jajem man, oli olsem wael dog we i hanggri tumas. Taem hem i kakae wan samting, be i no save livim haf i stap go kasem long moning. 4 Ol profet, ol wok blong olgeta i olbaot nomo, man i no save trastem olgeta, mo ol pris* oli stap mekem ol samting we i tabu, i kam doti long fes blong Hae God, mo oli stap tanem Loa* blong hem blong i folem tingting blong olgeta, blong oli save win long hem. 5 Nating we olgeta ya oli stap mekem olsem, be Hae God i stap oltaem long taon ya. Oltaem, fasin blong hem i stret olgeta, neva hem i mekem samting we i no stret. Evri moning, hem i stap soemaot stret fasin blong hem long ol man blong hem, we i no save mestem. Nating we hem i stap mekem olsem long olgeta, be ol man we fasin blong olgeta i no stret, oli no gat sem nating, oltaem nomo oli stap mekem i nogud."

6 Nao profet i gohed i talemaot we Hae God i talem se, "Ol man blong mi. I gat plante kantri we mi mi bin kilim ol man blong olgeta finis. Ol taon blong olgeta, wetem ol stonwol blong ol taon ya, mo ol wajhaos* blong olgeta, mi spolem olgeta evriwan finis. Ol taon ya oli stap nating, mo bigrod blong olgeta oli emti, i no moa gat man blong i wokbaot long olgeta. 7 Mi mi ting se taem yufala i luk ol samting ya we mi mi mekem, bambae yufala i save ona long mi, mo yufala i save harem ol tok we mi talem long yufala blong stretem yufala, mo yufala i save stap tingbaot ol tok ya, we mi mi bin tijim yufala long hem. Be yufala i girap, yufala i agens long mi olsem bifo.

8 "!Yufala i lukaot! Dei ya blong mi i stap kam we mi bambae mi talemaot we olgeta kantri oli mas kasem panis. Mi mi tingbaot finis blong tekem ol man blong olgeta kantri wetem ol king blong olgeta oli kam wanples, nao bambae oli haremsave paoa blong kros blong mi. Olgeta ples long wol ya, bambae mi spolem olgeta evriwan long paoa blong kros blong mi, we bambae i laet olsem faea."

9 Mo bakegen, Profet Sefanaea i talemaot we Hae God i talem se, "Nao biaen long ol samting ya, mi bambae mi jenisim tingting blong ol man blong olgeta kantri, nao bambae oli stap prea long mi nomo. Bambae oli no moa save prea long ol narafala god, bambae oli stap obei long mi nomo. 10 Ol man blong mi we oli stap olbaot long kantri ya Itiopia we i longwe tumas, bambae oli kam, oli givim presen long mi. 11 Mo yufala ol man blong mi, long taem ya, bambae yufala i no moa save sem from fasin ya we fastaem yufala i girap, yufala i agens long mi. Olgeta we oli praod, mo oli stap mekem hed, bambae mi tekemaot olgeta evriwan, nao bambae yufala i no moa save girap agens long mi bakegen long tabu hil* blong mi. 12 Be yufala we tingting blong yufala i stap daon, bambae mi letem yufala nomo i stap long ples ya, nao bambae yufala i stap kam long mi blong mi givhan long yufala. 13 ✝Yufala ol laen* blong Isrel* we bambae yufala i laef i stap, bambae yufala i no moa save mekem i nogud long narafala man, mo bambae yufala i no moa save talem ol giaman toktok, mo yufala i no moa save giaman long man blong trikim hem. Bambae yufala i no moa save sot long wan samting, bambae yufala i stap gud, i no gat wan samting i save spolem yufala. Mo bambae i no moa gat man blong mekem yufala i fraet."

14 Nao Profet Sefanaea i talem se,

"Ol laen* blong Isrel.*

Yufala i mas glad,

yufala i singsingaot.

Ol man Jerusalem.*

Yufala i mas harem gud

long olgeta tingting blong yufala.

15 Naoia panis blong yufala i finis,

Hae God i no moa save panisim yufala.

Hem i tekemaot ol enemi

blong yufala finis.

Hem i King blong yufala,

mo naoia hem i stap wetem yufala,

mo i no moa gat wan samting

blong yufala i fraet long hem.

16 I gat taem i stap kam

we bambae ol man oli talem

long ol man Jerusalem se,

‘Ol man Saeon.*

Yufala i no fraet,

yufala i no letem han blong yufala i stap hang

blong soemaot se yufala i stap harem nogud.

17 Hae God i God blong yufala,

mo hem i stap wetem yufala.

Paoa blong hem

i stap mekem yufala i win.

Hem bambae i glad long yufala.

Fasin blong hem

we oltaem hem i stap lavem man,

bambae i mekem yufala i gat niufala laef.*

Hem bambae i glad tumas long yufala

we bambae i stap singsing from.

18 Hem bambae i glad tumas,

olsem ol man we oli stap mekem lafet.’ "

Mo profet i talemaot we Hae God i talem se,

"Bigfala trabol ya,

mi bambae mi tekemaot,

mo bambae mi mekem

we yufala i no moa sem.

19 I gat taem i stap kam

we bambae mi mi givim panis long olgeta

we oli stap mekem i strong tumas long yufala.

Olgeta ya we oli no save wokbaot gud

bambae mi sevem olgeta,

mo olgeta we oli stap wok slef*

long narafala kantri

mi bambae mi tekem

olgeta evriwan i kambak

long stret ples blong olgeta.

Olgeta ya we oli stap sem,

bambae mi tekemaot sem long olgeta,

mi mekem ol man oli ona gud long olgeta,

mo olgeta man long wol ya

bambae oli stap presem olgeta.

20 Ol man Jerusalem.

I gat taem i stap kam,

we ol man ples blong yufala

we oli stap olbaot long evri ples,

bambae mi tekem olgeta i kambak

long stret ples blong yufala bakegen.

Bambae mi mekem nius blong hae nem blong yufala

i kasem olgeta ples long wol ya,

mo bambae mi mekem yufala

i kam rijman bakegen.

Mi mi Hae God,

mo hemia tok blong mi."