Casa de Deus

Tawa teigwa yugu yomara yoba taragl tau topo beglkwa i, Jisas si meda edugwa

12 Ana Jisas ede tawa teigwa yugu yomara togl suna pidre, yoba taragl tau i pi topo bogl meglkwa i, si meda edugwa. Ye si meda edidre, mige topo suade erikwa yobamo i, bogl ake yake tedre, kua yumugl mige beglkwa yobamo i, siano ama ake yake tedre, 13 yoba mudu yegl di togwa, God kamo mina bage ta beglkwa i, yegl dugwa, Na yuguna i, yoba kamage eraiglkwa dumo ta yenabiwe* dugwa. Ba ene dumo i, ere i kunogl gogl yoba teke paigwa dumo mere yegl edimiwe* dugwa.

Tawa teigwa yugu yomara yoba taragl tau topo beglkwa i, Jisas si meda edugwa

13 Ana Juda yoba ere mogl, God okna ibo ye kowano awano oglo si pidre, Isip yoba wano komono si goglkwa i pre moraiglkwa ege i ede magigl ugo, Jisas ye duglo beglkwa yagl bogl ede Jerusalem eigwa. 14 Ede Jerusalem eigo, Jisas ede pi tawa teigwa yugu yomara togl suna pidre, kanugwa i, yoba kau ya sipsip ya kua yumugl topo beglko, te mige topo suade erikwa yoba ama tebol mina ame di mogl, mige topo suade eriko, kanugwa. 15 Jisas taragl yegl erikwa i kandre, kide pre, kan tau magigl i yogwa i idre, ake pema si, ere i duglnai mere yegl edidre, duglnai i mina yoba maket ere meglkwa i ya sipsip ya kau togl suna meglkwa i pra, si meda edugwa. Si meda edidre, mige topo suade erikwa yoba i, tebolno ake yake tedre, mige mogono pia si bage bage edugwa. 16 Yegl ersre, te yoba ta kua yumugl mige beglkwa i di te, yegl dugwa, Ene kua yumugl topo beglkwa i, i ede meda pio! Na Nina yugumo maket mere ta edekrio! dugwa. 17 Yegl dugwa pre ye duglo beglkwa yagl prikwa, God kamo mina okna ibo bage ta yegl beglkwa,

Ene yugunen wakai yenabedi nomane sidre, pre mitna edinaluwe*

di, yegl beglkwa, te erme ye beglmere i, Jisas erumiwe di, ye duglo beglkwa yagl yegl prikwa.

19,20 God ene Mudu Murubuglo togo, ene meglmara atne moglkwa pre ene ogono nagino i, Mudu Murubuglo yugumo mere yegl yogwa. Te, God yene ere mogl, ene topo si ikne edidre, bitno moglkwa pre ene erme meglkwa i, enene pre ta moglkrikwa. God ene bitno moglko, ene God taraglmo mere yegl meglkwa pre ene ogono nagino mina mabuno siragl mere ta eribi, God kagie kade inabuka i keme erio!

15 na tabre ta ukribo, ene pepa i kersre, God yobama mabuno siragl mere ta eraiglkwa paugwa i, ene pre pogl sidre, ye di tenatnga pre boglka. Na God yobama we diga i, nono God kor aimadi moglkwa i yugobunomo munga i pre diga. God yugobunomo munga i, nono God kamo kaima paugwa i, ake gi dinamga paugwa. Yugu kauglage adigl paugo, kege te mitna edimere mere yegl, nono God kamo ake mitna ede, ake gi kaima dinamga pre diga.

6 Ana Moses yegl erukwa ba Krais yugugl i nigl kogon yoba mere moglkrukwa. Ye God Wam moglsre, ye swara mogl mitna ede, yugu i sugl moglkwa. Te, nono God ye dumere kaima ere norabedi pre moglsre, okuo gun yenamga i pre kaima panabedi prumun, nono ama God yugumo mere yegl moramga.

44 Stiven ka yegl didre, ka tau ama yegl dugwa, Nono kowano awano dumo wau yomara suna dumo aglo mere ta wan meglkwa i, God lomo kobuglo mina bogl togwa, ye sel yugu mina yugugl yeigwa i, sel yugu i boglo ere idre, wan meglkwa. Ana sel yugu i, siragl mere yenabuka i God ye Moses di togo, siragl mere obuno di tomere i, Israel yoba bekidre, keigwa. 45 Ye yegl ersre, boglo ere i wan mogl, geglko, yugobuno okuo wigwa i ama sel yugu i boglo ere igo, Josua bogl akie ede dumo Kenan suna wigwa. Ye ede suna wigo, God ye ede okna pi, nono kawano awano kudano eruko, ye yugobuno pere pere makan nem ta meglkwa i, yobuglo ere tedre, makano igwa. Nono kowano awano dumo Kenan igwa igne ede u King Devit moglkwa igne i tawa teigwa sel yugu i, yei pai moglkwa. 46 Yei pai moglko, King Devit i, God ye wakai kanugo, King Devit ere mogl, nono kowano awano Jekop Godmo i yugu kei tenagledi God di prukwa. 47 Di prukwa ba God mane dugwa pre Devit yugu ta kei tekrukwa. Okuo ye wam Solomon ere mogl, tawa teigwa yugu kei tomiwe di, Stiven yegl dugwa.

48 Ana Stiven yegl didre, ama ye kot ere teigwa yoba di te, yegl dugwa, Ene na tawa teigwa yugu di kide yei tene digwa ba ene prio! dugwa. God Mogl Mitna Kaima Edugwa i, ye yoba ta yugu keimara atne kipai moglkrukwa. God kamo kep yoba ta okna ka yegl boglkwa, 49 Yagl Kade yegl dume dugwa. Kamun mina ibo i, na ame di moglmara siana king mere yegl yogwa. Te, dumo makan i, na katna bolamugl yeimara mere yegl yogwa. Yegl pre ene yugu siragl mere kei naribi, na yugu i mina yugugl kipadre, ir si pragle? dugwa. 50 I siragl pre nana taragl mudu ere yeiga yomiwe* di, God ye kamo mina yegl dumiwe di, Stiven yegl dugwa.

16 Ana Jekop adiglsre, yegl dugwa, Yawe kaima dumo magigl i moglkwa ba na okna kankriwe dugwa. 17 Te, ye kudugl goglsre, ka ta ama yegl dugwa, Na igle moglka kudugl goluwa! Dumo magigl i God kipamara mere yegl yogwa. Te, dumo i ama heven ibo duamo mere yegl yomiwe di, yegl dugwa.