1,2 Agrama abarama no Israel yoba munga i, no kowano awano okna erimere ka tau di tebo, ene praiglkwa. Ye dumo Isip kide kodidre, dumo wau yomara suna ede eigwa igne, God ye kamun kua mina atne mogl, ede okna pidre, konbauna obuno di togo, ye okuo sika si ede eigwa. Te, ye ede mudi nigl Retsi we dimara eigwa igne, God ye mudi nigl suna i konbauna yauro togo, Israel yoba konbauna yauro tomara i, ede nigl koglo ibo eigwa. Israel yoba ye kamun kua sika sidre, mudi nigl ede koglo eimara i mina ye mudu u swara pi mogl, Moses duglo buniwe di i nogugl edigwa. 3 Ana God kimagl ersre, Israel yoba bret togwa i, ye mudu neigwa. 4 Te, God kimagl ta ama eruko, nigl kobuglo mina ede meda ugwa i, ye mudu neigwa. Kobuglo i, Krais ye Israel yoba siragl mere suglno moglkwa i, i nogugl edugwa. Krais ye kaima Israel yoba dumo aglo mere ta eimara i, akie keme pidre, ye suglno moglkwa pre diga. 5 No Israel yoba kowano awano dumo wau yomara suna wanigwa igne, God ye kaima taragl podo yegl ere togwa, ba Israel yoba mere kide ye mabuno kide erimara i God kide kandre, yoba i tau mere dumo wau yomara suna i si goglkwa.

6 Ana taragl yegl mere Israel yoba meglmara okna plau dugwa i, nono erme munga i ama kandre, nomane inamga paugwa. Israel yoba tadaglme eramnedi pre, konbauna simere yegl, nono yegl ta erekramga pre diga. 7 Okna ibo ye tau god kibi kiano bekidre, kamage ere teimere yegl, nono ta erekramga paugwa. God kamo okna bogl atne edigwa i, Israel yoba erikwa i pre yegl dugwa,

Ye ame di mogl, mie ya wain ki nedre,

ye adigl, mabuno gua gua erimiwe*

di, yegl dugwa. 8 Te, okna ibo Israel yoba tau mere ere mogl, yagl abu ta bogl kunogl ne wan meglko, God ege swara ta yoba 23,000 si goglkwa. Nono kandre, mabuno yegl ta erekramga paugwa. 9 Te, nono ama Yagl Kade dem kubro norabo mo ta eran, kanamnedi erekramga paugwa. Israel yoba tau okna ibo yegl erikwa pre God toki kide dedugo, ye u Israel yoba kaiglko, Israel yoba mere geglkwa. 10 Te, nono ama God ka tekramga paugwa. Okna ibo Israel yoba tau ama God ka teigo, God angelo ta ye si gorabedi dedugo, ye u yoba mere si goglkwa. 11 Taragl yegl mere okna ibo Israel yoba meglmara plau dugo, bogl atne edigwa i, nono kandre, nomane inamga pre beglkwa. Nono erme munga i, taragl mudu dudunabuka igne magigl erukwa ba nono okna ibo siragl mere plau dumere i pre kan ersre, nomane inamga paugwa.

12 Ana ene adigl gigledi moledi pratnga ba tadaglme mina yage si dinatnga pre kan kun ero! 13 Ene pro! Tadaglme ta ene den mudn mina pogglau boran, ene ere mogl, tadaglme i na swara moglmara pogglau boglmedi prikro. Nono yoba munga i, kuno yegl keme munga. Nono yegl munga ba God ye ege ege ka dumara adigl moglsre, ake ple di noro moglkwa pre ye kanige eran, tadaglme ene si atne edekrabuka. Tadaglme ene den mudn mina pogglau borabuka ba God ege ege ene tadaglme ta ere dinatnedi konbauna si tenabuka.

14 Agrama abrama ene na dena muduna suna meglkwa i, ene prio. Israel yoba okna ibo erikwa i, nono kandre, nomane inamga paugwa pre ye okna god kibi kamage ere teigwa i, ene yegl ta erekrio. Yoba god kibi kagno kade teigwa mabuno i, ene erekre, teke ede eglke pio. 15 Ene yoba meglko, nomano paugwa pre na ka tau dinaglka i, enene pre yubu sio. 16 Nono wain nuglo toide kap mina edidre, God di wakai yei tedre, nomga i, nono mudu Krais bormaimo mina atne munedi i nogugl edumga. Te, nono bret ake buko didre, nomga i, Krais ogo nagie nono akie pre bagla dumedi, i nogugl edumga. 17 Bret swara keme yogo, nono mudu bret swara i mina nomga pre nono yugobuno swara kaima munga i, nogugl paugwa. 18 Te, Israel yoba okna erikwa i, ene prio. Ye sipsip si gogl, gagl, God tawa teigwa igne i ye ama sipsip i mie tau bagl neigwa. Ye akie bagl neimara i mina ye God swara kagie kade tomniwedi, i nogugl edigwa. Kuno yegl mere, yoba erme god kibi ta tawa gagl tedre, mie tau bagl nenaiglmara i, ene akie nebi, ene god kibi i akie kagie kade teigwa mere yegl i nogugl edigwa pre ene yegl erekrio.

19 Ana na diga i, god kibi kaima ta meglkwa pre dikrika. Te, yoba ye tawa gagl teigwa i, mem kaima pamere erimedi 20 yegl pre ta dikrika. God swara keme moglkwa ba yoba tau god kibi pre mediglkwa i, ye God swara moglkwa i tawa gagl tekrikwa. Ye god kane kane kagno dagl, tawa gagl tomne digwa ba ye murubuglo kide tawa gagl teigwa. Yegl pre ye god kibi kagno kade tedre, mie bagl neimara i, ene akie nebi, ene ye bogl akie murubuglo kide kagno kade teigwa mere yegl panabuka pre ene yegl erekrio diga. 21 Ene Yaglno Kade kagie kade tenamnedi nigl wain nedre, bret ama nedre, aglke kor yoba murubuglo kide kagno kade tenamnedi nigl wain ya kaya mokna neimara akie mogl nenaiglkwa i, kuno ta erekrukwa. 22 Ene prikwa, no yobuglno podo pamedi pre Yagl Kade dem kubrabedi mabuno tau eramga ba ye ta no sikrabedi primo? Ta manugwa. Yagl Kade swara yobuglomo podo paugwa pre nono ye dem kubrabedi eun, ye no sinabuka.

23 Ana ene tau digwa i, No God yobama mogl kodumga pre mabuno kane kane ta eramnedi pramga i, eramga aglau ta paikrumiwe digwa, ba ka digwa i kuno ta erekrukwa. Mabuno tau eramga i, nono ta ake ple di norokrabuka pre nono kiano mina ta yakekramga. 24 Te, ene mabuno tau ere, enene wakai praiglkwa i pre erekre, ene agroma abaroma wakai moraiglkwa i pre erio.

25 Ana na mie pre diga ikra, yegl dinaglka. Yoba mie ta yu maket eribi, ene ta i nenamnedi pribi, i neo. Ene kinano suo gudu, ye god kibi ta tomo mo tekrumo mo i, ene pramnedi kira pogl prikrio. 26 I siragl pre dumo makan mudu ya taragl mudu makandigle meglkwa ya paigwa i, nono Yaglno Kade swara i, nem yagl moglkwa.*

27 Ana yoba ta Jisas pre mediglkrukwa ye kipamara kaya mokna ene bogl akie nenamnedi ene ta di garan, ebi, ye kaya mokna mo mie siragl mere ta yubu si tenabuka i, ene neo. Ene kinano suo gudu, kira pogl prikrio. 28,29 Ene yoko i nenaiglkwa ba yoba ta ene di te, Mie i, ye god yegl ta moglkwa i kagie dagl teimiwe di, yegl ta dinan, ene nekrio. Enene praiglkwa, mie i kide ta yeikrukwa nenamga aglau ta paikrumiwe di, yegl praiglkwa ba ene nebi, yoba i kandre, ene kide erimedi pre dinabuka pre ene nekrio diga. 30 Ba yoba yegl ta dikran, i nenamga. Kaya mokna ya mie mudu wakai yogwa pre na God di wakai yei tedre, ta nebo, aglau ta paikrukwa pre yoba ta ere mogl, na i neimara i mina kagna ere kide erabuka i ta kuno erekrukwa.

31 Yegl pre ene kaya mokna mo mie nenaiglkwa mo nigl nenaiglkwa mo mabuno siragl mere ta eraiglkwa i, ene siragl mere eribi, God kagie kade inabuka i keme erio. 32 Te, ene yoba swara ta Juda yoba mo Grik yoba mo pre mediglkwa yoba God yugobunomo mina meglkwa i, kide prisre, yage sinaiglmedi erekrio. 33 Na mabuno erimere yegl ene ama eraiglmedi prika. Na nana wakai pragledi ere wan moglkrika. Ta manugwa. Na yoba mudu Jisas kamo pre mediglbi, God ye ere inabedi prika. Yegl pre na mabuno siragl mere eribo, yoba wakai prisre, Jisas kamo pre, wakai moraiglkwa i swara erika. Erimere yegl, ene ama yegl erio.