5 momentos em que Jesus mostrou como amar ao próximo

44 Bale, əmə, mə pa kə e ə pa: e yïndə alayïkowɔ nə̂ e. E yü Ndjapä mbrə azü ə̂në əndje ma ərə kanga kə e kɔ.

30 Jezu kîrə əpʉ kə ətshə ə pa: «Ə̈bə̈ koshe âfɔ mâ Jeruzalamə ndə kə jerə gu na ye gâ Jerikɔ. Tshə nâ ʉrrr ə tê gâ lə kəna alayïkowɔ, əndje kô aərə nə̂ ye tə̂ ye nɔ̂, ə dâ ətshə ʉrrr trö də kuzu ə tshî ətshə tʉ ə rô ərə nə̂ əndje. 31 Bale, ə̈bə̈ awotokrɔ kə Əyïlingû zâ kʉtə̂ äwä səkɔ ə wûtu gâ tə̂ koshe səkɔ, ə dɔ̂ ə dɔ̂ gâ pâ nə ə rô ərə nə̂ ye. 32 Ə̈bə̈ əzü lə marä nə̂ Levi zâ ndje kʉtə̂ äwä səkɔ, ə wû koshe səkɔ ə dɔ̂ ə dɔ̂ gâ pâ nə ə rô ndje ərə nə̂ ye. 33 Bale, mandânə, ə̈bə̈ əzü əgɔ Samari ə̂në tshə sə̂ lə ə̈ngrʉ̈ ana kɔ wûtu gâ tə̂ koshe səkɔ. Tshə wû ətshə, əyo ye mbrə̂ ətshə. 34 Tshə nâ trö də ətshə ə yûtu tshela aəku nə̂ ye də kâdâ gâ ndə duva, də kə i tshela nə. Mandânə, tshə zâ ətshə gâ pâ agia ana nə̂ ye də ə̂tə̂ ye ə gû də ətshə gâ lə ə̈bə̈ anda nə̂ alayïana mbrə ndə kə pa tshə ga ndə ye. 35 Tshe nə krâ, tshə kô ngendja* bishi kə əyïnga anda nə ə pâ kə ətshə ə pa: "Gä ndə koshe səye kə əmə. Kədə bə ndɨ ngendja â ro ənə̂ sə̂ ə̂në mə kô kə əbə kɔ, kə do tə̂ əmə mə piyi nə kə əbə je."» 36 Kwatəndje, Jezu yû awoyisə̂ âgbɔ̂ əpʉ nə̂ Əyïlingû səkɔ ə pa: «Ənə̂ zə, əde lə takpa tə̂ azü vəta səkɔ kə sə tə bəngâ koshe səkɔ ə̂në tshə tê gâ lə kəna alayïkowɔ səkɔ?» 37 Tshə kîrə əpʉ ə pa: «Ətshə nə ə̂në tshə mbrə̂ ə̂rɔ̂ ərə kə ətshə kɔ.» Bale, Jezu pâ kə ətshə ə pa: «Gü, əbə ndje, ə mbrə̈ mata ətshə.»

3 Bale, aawoyisə̂ âgbɔ̂ əpʉ nə̂ Mayïzə gâ ndə Afariza zâ ə̈bə̈ yashe ə̂në əndje tê ətshə də ə̈bə̈ koshe kpî ə̂në tshə sə̂ kə pra ətshə kɔ ə nâ də ətshə, ə zâ ətshə tɔ gâ lə ə̂grû tə̂ azü nə, 4 ə pâ kə Jezu ə pa: «Awoyisə̂ ərə, əndje tê yashe səye kprəkəshe də kə pra ə̈bə̈ koshe kpî tə̂ äkɔ̈ nə. 5 Mayïzə lə âgbɔ̂ əpʉ, zâ äwä kə ä ndə kə pa ä gbo marä tə̂ ayashe rəke də badja ə wo əndje. Rəkɔ, əbə, bə pa atâ a?»

6 Əndje pâ əpʉ səkɔ rə ndə kə tra lɔsu Jezu nə, kanika ə sɔtə̂ ə̈bə̈ əpʉ ndə kə lea ətshə tə̂ nə. Bale Jezu nə têrə gâ tʉ ə vɔ̂tə̂ kə ta fraka də yana kəna ye gâ tə̂ ashɔ. 7 Ə̂në əndje sə̂ pə kə yu ətshə də əpʉ nə kɔ, tshə zâ kumu ye gâ lafɔ ə pâ kə əndje ə pa: «Lə takpa tə̂ e, əzü ə̂në tshə mâ ə̈bə̈ nyaka mâ alɔ bale ne, tshə zä badja nə ə gbö ətshə də nə angbʉlînə!» 8 Tshə kwâtə̂ye ə têrə gâ tʉ ə vɔ̂tə̂ kə ta fraka nə gâ tə̂ ashɔ nə. 9 Alɔ ə̂në əndje djî əpʉ səkɔ, əndje vɔ̂tə̂ kə gbətɔ tə̂ əndje bale bale, ə vɔ̂tə̂ nə tə̂ aâgbɔ̂ azü nə. Â Jezu nə dâka pə kʉtə̂ ye gâ ndə yashe nə ə̂në tshə sə̂ kôto gâ ə̂grû nə kɔ. 10 Bale, Jezu nə zâ kumu ye gâ lafɔ ə pâ kə ətshə ə pa: «Yashe, azü nə sə kotâ a? Ə̈bə̈ əzü bale wâ wâ ngbanga gâ lə kumu zə ne a?» 11 Tshə kîrə əpʉ ə pa: «Ə̈bə̈ əzü bale ne, Âgbɔ̂ Əzü!» Bale, Jezu nə pâ kə ətshə ə pa: «Əmə ndje, mə wa ngbanga wa gâ lə kumu zə ne; gü na ye ə mbrə̈ nyaka mbrə̈ kwatə̂zə mandânə səye ne.»]*

Jezu grɔ̂ rəka tə̂ ə̈bə̈ əyïkosəra nə̂ ə̈bə̈ kapita nə̂ atrugu

5 Alɔ ə̂në Jezu sə̂ kə li gâ lə gala Kaprənayɔmə kɔ, ə̈bə̈ kapita nə̂ atrugu əgɔ Rɔmə nâ gâ ngotə̂ ye ə kɨ ə̂sə̂ əyo tə̂ ye kə ətshə 6 ə pa: «Âgbɔ̂ Əzü, əyïkosəra nə̂ əmə sho gâ tʉ mâ lə anda. Ə̂tə̂ ye ka ətshə tə bandanə â äwä ndə kə pa tshə afɔ gâ lafɔ guta gu ne.» 7 Jezu pâ kə ətshə ə pa: «Mə sə kə na ndə kə grɔ rəka tə̂ ye.» 8 Kapita nə̂ atrugu nə kîrə əpʉ kə ətshə ə pa: «Âgbɔ̂ Əzü, mə lï lï ndə kə pa bə li gâ lə anda nə̂ əmə ne. Bale, pä kʉtə̂ ə̈bə̈ əpʉ bale, rəka nə sə kə katə̂ əyïkosəra nə̂ əmə nə. 9 Mbrə ə̂në əmə də ə̂tə̂ əmə, mə sə gâ tshekudu alabə̈ aâgbɔ̂ azü. Mə sə də atrugu gâ tshekudu əmə ə̂në mə sə kə za ama kə əndje. Kədə mə pa kə ə̈bə̈ nə bale ə pa: "Nä mâ ko-e!", tshə sə kə na na ye. Alɔ ə̂në mə pa kə ə̈bə̈ ata nə ə pa: "Nä mâtəye!", tshə sə kə na nə. Alɔ ə̂në mə pa kə əyïkosəra nə̂ əmə nə ə pa: "Mä ərə səye!", tshə sə kə ma nə.»

10 Mandânə ə̂në Jezu djî əpʉ səkɔ, əpʉ nə tô tə̂ ye. Tshə pâ kə azü ə̂në əndje zâ äwä ye kɔ ə pa: «Djatra əpʉ, mə pa kə e: mə sɔ̂tə̂ marä tə̂ lɔsu rəke sɔ̂ ndə ə̈bə̈ əzü bale lə əgɔ Isərayalə nɔ̂ ne. 11 Mə pa kə e, azü ngbatshe sə kə afɔ djoko tə̂ tshepalɔ də lɔtebanga ə na ə sə gâ tʉ ndə kə zɨ ərə äwä bale də Abraamo də Izakə gâ ndə Jakɔbə lə Əgɔngerə tshelafɔ. 12 Bale, azü ə̂në Əgɔngerə nə sə mbrə əndje kɔ, əndje sə kə wli əndje gashu gâ lə əbutshe. Kôto də̂ əndje sə kə kɨ nə də ngɔla əndje ə sə kə zɨ tshelə əji əndje.»

13 Mandânə, Jezu pâ kə kapita nə̂ atrugu nə ə pa: «Gü na ye! Ndjapä mä kə əbə ə lï də lɔsu zə.» Kʉ pə kôto səkɔ, rəka nə̂ əyïkosəra nə kâtə̂ nə.

13 Ə̈bə̈ âgbɔ̂ kə yi tə̂ ə̂në ə ro ənə̂ sə̂ ə̂në əzü ka tə̂ ye də sorô ye nɔ̂ mbrə agbɔbəngâ nə kɔ guta gu ne.