1 Ə̂ngû morofo amanə vəna mandânə, mə nâ kwatə̂mə mâ Jeruzalamə, əmə gâ ndə Barənabasə, â mə zâ ndje Titə gâ ndə əmə. 2 Mə nâ mâ je mbrə ə̂në Ndjapä yîsə̂ nə gashu kə əmə rə. Mâ je, lə ə̈bə̈ aangbɔ kʉtə̂ əmə də azü ə̂në əndje sə̂ gâ pâ Laglizə nə kɔ, mə yîsə̂ Ə̂rɔ̂ Əpʉ ə̂në mə mʉ lə takpa tə̂ azü ə̂në əndje sə̂ sə̂ tə Ajuwufu ne kɔ kə əndje. Mə mbrə̂ rə mbrə ə̂në mə yində nə yi ə pa tshemandâ kosəra ə̂në mə mbrə kɔ ə sə tə ambanə ne. 3 Bale, Titə, ə̂në tshə sə̂ gâ ndə əmə, ə̂në tshə sə̂ sə̂ tə Juwufu ne kɔ, ə̈bə̈ əzü zâ ətshə zâ də awlra ndə kə pa tshə wa gandja ne. 4 Bale, alabə̈ alaye tə alayïəterə lî lə angbanə gâ lə takpa tə̂ ä ə yîndə kə wa ətshə də gandja nə. Azü səkɔ lî gâ lə aangbɔ nə̂ ä ndə kə pa əndje kpia ä ə wu äwä ərə ə̂në ä sə kə mbrə nə ndə tshelə ä lə Jezu Kristə nə kɔ ka ə gu də ä kwatəndje gâ tshekudu âgbɔ̂ əpʉ nə̂ Mayïzə tə akanga. 5 Alɔ bale, ä yîndə nə yî kə əndje ə djî əpʉ ama əndje ne, kanika djatra əpʉ lə Ə̂rɔ̂ Əpʉ nə daka pə lə takpa tə̂ e.

6 Bale, azü nə ə̂në əndje wû əndje tə əgbro azü Laglizə nə kɔ, bale kə sə əndje leme-e ətshinə sə̂ sə̂ tə âgbɔ̂ ərə lə ala əmə ne, mbrə ə̂në Ndjapä wu wu tshelə azü ə wu ne. Əgbro azü səkɔ zâ əmə zâ bale də awlra ndə kə pa mə mbrə ə̈bə̈ ərə kpî ne. 7 Bale, əndje wû ə pa Ndjapä zâ kosəra kə mʉ Ə̂rɔ̂ Əpʉ kə azü ə̂në əndje sə sə tə Ajuwufu ne kɔ kə əmə, mata ə̂në tshə zâ kə mʉ nə kə Ajuwufu kə Piarə kɔ. 8 Mbrə ə̂në Ndjapä nə mbrə̂ əmə tə əzü-awla mbrə ə̂dû amarä, ndje mata ə̂në tshə mbrə̂ Piarə nə tə əzü-awla mbrə Ajuwufu kɔ. 9 Bale, Zake də Piarə gâ ndə Zââ ə̂në azü nə̂ Kristə nə wû əndje tə yêrɔ̂ Laglizə nə kɔ, əndje wusə̂ nə kpro ə pa Ndjapä zâ kosəra səye tshî kə əmə gâ ye; əndje têgbɔ kəna ä də Barənabasə, ndə kə yisə̂ nə ə pa əndje yîndə nə kə ä gâ ye. Rəkɔ, ä djî tə̂ ä nɔ̂ bale ə pa, ənə̂ ä, ä sə kə ro ə mbrə kosəra lə takpa tə̂ amarä kpî, â ənə̂ əndje, əndje sə kə ro lə takpa tə̂ Ajuwufu nə. 10 Əndje yû tshuku kʉtə̂ ərə bale kə ä ə pa ə̂sə̂ alayïəyo lə Laglizə nə̂ alane ro ä ro ne, â ərə ə̂në mə mbrə̂ də lɔsu əmə nɔ̂ kɔ kə sə̂.

11 Bale, alɔ ə̂në Piarə nə nâ mâ Atiɔshə kɔ, mə wə̂ra tə̂ əmə tə̂ əpʉ kə ətshə də ala azü nɔ̂, mbrə ə̂në tshə mbrə̂ ərə mbrə̂ də äwänə ne. 12 Mbrə ə̂në, angbʉlînə ndə kə pa alabə̈ azü ə̂në Zake wlâ əndje kɔ yî kumu əndje, ətshə də azü ə̂në əndje sə̂ sə̂ tə Ajuwufu ne kɔ sə̂ kə zɨ rəgo. Bale, alɔ ə̂në azü səkɔ yî kumu əndje gâ ye kɔ, tshə dɔ̂ âdɔ̂ əndje ə dɔ̂ ə sə̂ kpî, mbrə awa azü nə ə̂në əndje gbɔ̂ də əpʉ kə wa gandja nə kɔ. 13 Ə̂dû alaye də Ajuwufu nə mbrə̂ ndje tə̂ əndje kʉ də awa nə rə mata Piarə nə, â kə mbrə ərə də lɔsu əndje nə bishi bishi nə frɔ̂ Barənabasə nə ndje â tshə tê mandâ əndje. 14 Alɔ ə̂në mə wû ə pa əndje mbrə̂ tə̂ əndje mbrə̂ ndji ə lï də djatra əpʉ lə Ə̂rɔ̂ Əpʉ ne kɔ, mə pâ kə Piarə nə lə ala azü nɔ̂ ə pa: «Ə̈bə̈ ə̂në bə sə tə Juwufu kɔ, kotəye, bə mbrə̂ tə̂ zə mata azü ə̂në əndje sə sə tə Ajuwufu ne kɔ, bə mbrə̂ ərə mbrə̂ Lïndə̂ âgbɔ̂ əpʉ nə̂ Ajuwufu nə ne. Rəkɔ, bə lï ndə kə pa bə tegbɔ azü ə̂në əndje sə sə tə Ajuwufu ne kɔ də awlra ndə kə pa əndje mbrə aərə mata Ajuwufu nə atâ a?»

15 Ä-ä, əndje zû ä ə zû tə Ajuwufu nə, ä sə sə tə ə̂dû amarä ne, ə̂në əndje wusə̂ âgbɔ̂ əpʉ nə̂ Ndjapä wu bale ne kɔ. 16 Bale, ä wusə̂ nə ə pa Ndjapä wu əzü tə ə̂rɔ̂nə lə ala ye tshî tə̂ äwä kə za lɔsu ye kə Jezu Kristə, ə də̂ tə̂ äwä kə mbrə ərə nɔ̂ ə lï də âgbɔ̂ əpʉ nə̂ Mayïzə də̂ ne. Ä-ä ndje, ä zâ lɔsu ä kə Kristə nə gâ ye ndə kə pa Ndjapä wu ä tə aə̂rɔ̂ azü lə ala ye tə̂ äwä lɔsu ä nə ə̂në ä zâ kə Jezu Kristə nə kɔ. Mbrə ə̂në ə̈bə̈ əzü bale lï lï ndə kə pa tshə sə tə ə̂rɔ̂ əzü lə ala Ndjapä tə̂ äwä kə mbrə aərə nɔ̂ Lïndə̂ âgbɔ̂ əpʉ ne. 17 Bale, ä sə kə pra äwä ndə kə pa ä sə tə aə̂rɔ̂ azü nə lə ala Ndjapä lə Kristə nə. Ə̂në ä sə kə mbrə rə kɔ, kədə Ajuwufu nə wu ä ndje tə alayïnyaka, mata ə̂dû amarä nə, rəkɔ, Kristə nə sə kəmə tə əyïkosəra mbrə nyaka nə a? Bale ne! 18 Mbrə ə̂në kədə mə gu kwatə̂mə ndə âgbɔ̂ əpʉ nə ə̂në mə dô tshepa əmə gbo nə gâ ye kɔ, mə sə kə wa ngbanga gâ pâ əmə də ə̂tə̂ əmə. 19 Mbrə ə̂në, tə̂ äwä âgbɔ̂ əpʉ nə, mə tshû kuzu âgbɔ̂ əpʉ nə gâ ye, ndə kə pa mə sə tə sorô mbrə Ndjapä. Ä də Kristə nə tshû la masheyɔ gâ ye. 20 Ə də̂ əmə də̂ kə sə tə sorô kɔ ne, Kristə nə kə sə tə sorô nə lə əmə kɔ. Sorô ə̂në mə sə də nə kpəsəye tə əzü kɔ, mə sə də nə tə̂ äwä lɔsu əmə ə̂në mə zâ kə Ɨrɨ Ndjapä, ə̂në tshə yîndə əmə, ə̂në ə kâ tə̂ ye də ə̂tə̂ ye mbrə əmə kɔ. 21 Mə wəra tə̂ əmə wəra tə̂ ə̂rɔ̂tə̂ Ndjapä nə ne; mbrə ə̂në kədə əzü kə sə tə ə̂rɔ̂ əzü lə ala Ndjapä tə̂ äwä âgbɔ̂ əpʉ nə, rəkɔ, Kristə nə tshû yera ambanə â tshû kɔ.