Conversão

19 E’i zanku, tamasunku huta tamagu’a rukarehe huta, Anumzamofonte enkeno, kumitamia eri atreramantegahie.

38 Hazageno, Pita’a zamagrikura anage hu’ne, tamagu’a rukrahe nehutma, Jisas Kraisi agifi mono tina frenkeno, kumi’timia apaseramante’na, ruotge Avamu’mofo museza tamagra erigahaze.

30 E’inahu hu’za zamagena humi’za e’naza kna’a, Anumzamo’a agesa ontahi’ne. Hagi menina agra miko kaziga vahera hankavenentake ke huno, tamagu’a rukarehe hiho huno hu’ne.

17 Ana knareti agafa hu’neana, Jisasi’a mono ke huzmasamino anage hu’ne, Tamagu’a rukrahe hiho, na’ankure Anumzamofo mona kuma’mo’a hago tava’o nehie.

8 Ana hu’nagu raga rentenkeno, tamagu’a rukrehe hunaze huno tamage’za sena,

15 Anumzamo’ma huhampri’nea kna hago eforehie. Anumzamofo kumamo’a hago eravao hie. Tamagu’a rukrahe huta Knare Musenkere tamentinti hiho.

7 Hanki Nagra amanage hu’na neramasmue. Anahukna kante, 99ni’a vahe’mo’za fatgo hu’nazankiza zmagu’a rukrehe osugahazanagi, mago kumi vahe’mo, agu’a rukrehe nehigeno’a monafina tusi muse nehaze.

10 Hanki amanage hu’na neramasmue, anahu kante mago kumi vahe’mo’ma agu’ama rukrahe’ma nehige’za, Anumzamofo ankeromo’za tusi muse nehaze.

32 Nagra fatgo vahera zamagi hukura ome’noe, hagi kumi vahe’mo’za zamagu’a rukrehe hihogu e’noe.

32 Na’ankure vahe’ma nefrizage’na Nagra musena nosuanki, tamagu’a rukrahe huta ofri amne maniho hu’na Miko’zama Kegava Hu’noa Anumzamo’na nehue.

21 Hianagi kefo avu’ava zama nehania vahe’mo’ma kefo avu’ava zama netreno agu’a rukrahe huno tra keni’a amage nenteno, knare avu’ava’ene fatgo avu’ava’enema hanuno’a, ofrigahianki amne manigahie.

Anumzamo’ma fatgoma huno vahe’ma refkoma hania zamofo naneke

1 Ra Anumzamo’a amanage huno nasmi’ne, 2 Zamafahe’moza aka krepi raga nazageno mofavre’zmimofo zamagitera akahune hutama Israeli vahe’motama nehaza fronka nanekemofo agafa’amo’a nankna hu’ne? 3 Nagra kasefa hu’na mani’noa Ra Anumzamo’na huankino, mago’mo’e huno Israeli mopafina ama fronka nanekea osutfa hugahaze. 4 Na’ankure mika vahera Nagri vaheke mani’naze. Hagi nefa’ene nemofo’enena Nagri vahe mani’na’ankino, iza’o kumi’ma hanimoke frigahie. 5 Hagi mago fatgo avu’ava’ma nehania vahe’mo’ma knare huno fatgo avu’ava’ma nehuno, 6 havi anumzamofonte’ma Kresramanama vuntesaza ne’zama onege, Israeli vahe’mofo kaza osu havi anumzante mono huontege, ru vahe’mofo a’nene savri nosuno, ika kri eri’nesia a’ene monko’za nosuno, 7 mago vahe’mofo havige huno keonke’zama’a eri havia nosuno, amigahue huno’ma eri’nesia zana ete ami fatgo nehuno, musufa noseno, amunte omne vahe ne’za nemino, kukena’a omane vahe kukena hunenteno, 8 zagoma nofi’ma huno eri’nea vahera agofetu huno zago agia ahenteno e’norino, havi avu’ava’ma huzankura koro nehuno, tare vahe’mofo kea fatgo kazigati refko nehuno, 9 kasegeni’ane tra ke’ni’anema kegava huno amage’ma antesuno’a, agra fatgo vahe manigahiankino tamage huno ofri manigahie huno Miko’zama Kegava Hu’nea Ra Anumzamo’a hu’ne.

10 Hianagi e’inahu huno’ma fatgo avu’ava’ma nehania vahe’mofo mofavremo’ma vahe’ma aheno korama’a eri neragino, nefuma knare osu avu’ava’ma hunenteno, 11 nefa’a anara osugahianagi, agra havi anumzamofonte’ma kresramnama vuntesaza ne’zana neneno, ru vahe’mofo a’nene savri nehuno, 12 zamunte omne vahe’ene miko zankuma atupama nehaza vahera zamazeri savri huno fenozmia enerino, vahe’za musufa enerino, kamigahue huno’ma huvempa huno eri’nea zana nomino, havi anumzamofonte monora hunenteno, hi’mnage avu’ava nehuno, 13 zagoma nofi’ma hu’nea vahera rama’a agofetu huno zago agia ahenteno e’neria vahe’mo’a agra ofri amne manigahio? I’o. Agra amnea omanigahianki, frigahie. Na’ankure kasrino hi’mnage avu’ava zantmi hu’neankino, tamage huno kumi’amofo knazana agra’a erino frigahie. 14 Hagi e’inahu kefo avu’ava’ene ne’mofo mofavremo’ma nefa’ma hu’nea kumi avu’avazama negeno, avaririno ana avu’avara osu mani koro huno mani’neno, 15 havi anumzante’ma Kresramanama vuntesaza ne’zama onege, Israeli vahe’mofo kaza osu anumzante’ma mono huontege, ru vahe’mofo a’nene savri nosuno, 16 mago vahera havige hunteno keonke’zama’a eri havia nosuno, amigahue huno’ma eri’nesia zana ete nemino, musufa noseno, amunte omne vahera ne’zana nezamino, kukenagu atupa hu’naza vahera kukena hunezmanteno, 17 zamunte omane vahera zamazeri haviza nosuno, zagoma nofi’ma hu vahera agofetu huno zago agia ahenteno e’norino, kasegeni’ane tra ke’ni’anema kegava huno amage’ma antesuno’a, agra nefa’ma hu’nea kumi avu’avazamofo nona hunora ofrigahianki, tamage huno amne manigahie. 18 Hagi nefa’a frigahie. Na’ankure agra havige huno vahe’mofo zantamina eri savri nehuno, musufa neseno, vahe’amofona knare avu’avara huozmante’neankino, ana kefo avu’va’zama hu’nea zantera frigahie. 19 Hagi mofavre’amo’ma knare huno fatgo avu’ava’ma nehuno, kasege’nine tra ke’ni’anema kegava huno amage’ma nenteno, ofrino amnema manisigeta, amanage huta nantahigegahaze, nahigeno nefa’ma hu’nea kumi’mofo mizama’a nemofo’a e’orie? huta hugahaze. 20 Hagi kumi’ma hania vahe’moke frigahie. Hagi mofavremo’a nefa’ma hu’nenia kumimofo nona’a knazana e’orisigeno, mago ne’mo’a mofavre’amo’ma hu’nesia kumimofo nona’a knazana e’origahie. Hagi fatgo avu’ava’ma nehania vahera agri fatgo avu’avate mizana nemino, kefo avu’ava’ma hania vahera, agri’a kefo avu’ava zante azeri haviza hugahie. 21 Hianagi kefo avu’ava zama nehania vahe’mo’ma kefo avu’ava zama netreno agu’a rukrahe huno tra keni’a amage nenteno, knare avu’ava’ene fatgo avu’ava’enema hanuno’a, ofrigahianki amne manigahie. 22 Hagi magore hu’na mago kumi’agura nagesa ontahigosue. Na’ankure fatgo avu’avaza hugahiankino ofri amne manigahie. 23 Miko’zama Kegava Hu’nea Anumzamo’a huno, kefo avu’ava’ma nehia vahe’ma nefrigeta, tamagesama antahi’zana Nagrikura musena nehie huta nehazo? I’o. Nagra musena nosue. Hagi kefo avu’ava zama’a atreno amnema mani’zanku nave’nesie. 24 Hianagi fatgo avu’ama nehania ne’mo’ma atreno’ma kefo avu’ava ome nehuno, kasrino hi’mnage avu’avazama ome haniana, agra manigahio? I’o. Agra omanigahianki frisigeno maka fatgo avu’ava’ma hu’nea zamo’a amnezankna hanige’na, Nagra ana zankura nagesa ontahigahue. Na’ankure kefo avu’ava huno kumi hu’neankino ana kumimofo nona’a omanigahianki frigahie. 25 Hianagi amanage huta hugahaze, Ra Anumzamo’ma hia avu’ava zamo’a fatgo osie huta hugahaze. Hagi Israeli vahe’mota antahiho, Nagri navu’navamo fatgoa hunefi, tamagri tamavu tamava’mo fatgoa hu’ne? 26 Hagi Fatgo avu’ava’ene vahe’mo’ma ana fatgo avu’ava’ama atreno kumi’ma haniana, agra kumi hugahiankino frigahie. Na’ankure fatgo osu avu’azama hania zanku huno agra frigahie. 27 Hagi kefo avu’ava’ma nehania vahe’mo’ma ana kefo avu’ava’ma atreno agu’ama rukrahe huno’ma fatgo avu’ava zama haniana, agra’a agu’vazigahie. 28 Na’ankure agra maka kefo avu’ava’ma hu’nea zana keno antahino nehuno, ana avu’ava zana atreno agu’a rukrahe hu’neankino, tamage huno agra ofrino manigahie. 29 Hianagi Israeli vahe’mota huta, Ra Anumzamofo avu’avamo’a fatgo osu’ne huta nehaze. Hagi tamage huno Nagri navu’navamo’a fatgoa osu’nefi? I’o. Tamagri tamavu tamava’mo fatgoa osu’ne. 30 E’ina hu’negu Israeli vahera, magoke magoke’mota tamagrama hu’nesaza avu’ava zante ante’na Nagra refko huramantegahue huno Mikozama Kegava Hu’nea Anumzamo’a hu’ne. Hagi aru tamagri kumi avu’ava zamo tamazeri haviza hanigi kefo avu’ava zana atreta tamagu’a rukrahe hiho. 31 Hagi kefo avu’avazama nehaza zana netreta tamagu’a rukrahe huta kasefa tamagu tamagesa enerita kasefa avamu eriho. Hagi Israeli vahe’mota nahanigeta tamagra frigahaze? 32 Na’ankure vahe’ma nefrizage’na Nagra musena nosuanki, tamagu’a rukrahe huta ofri amne maniho hu’na Miko’zama Kegava Hu’noa Anumzamo’na nehue.

9 Ramo’a huvempama hu’nea kerera, mago’a vahe’mo’zama nentahizaza huno akoheno eri’zana e’norie. Hagi akoheno kavega anteno mani’neno, mago’a vahe’mo’za fanane osnaze huno mani’ne. Hianagi maka vahe’mo’za zamagu’a rukrehe hanazegu zamavega anteno mani’ne.

7 Kefo tamavu tamava’ma nehaza vahe’mota ana tamavu tamava’zana netrenke’za, fatgo osu antahintahima e’neri’za vahe’mota ana antahintahitamia netretma rukrahe huta Ra Anumzana tagri Anumzamofonte eho. Ana’ma hanageno’a Anumzamo’a tusi’a asunku huneramanteno kumitamia atreramantegahie.

22 Zaho’mo hanintiri hampo erino eviaza hu’na, tamagri kefozana eri netre’na, kna’ane anafru huramia ata ko zahomo eri huhu huno eviaza hu’na kumi tamia eri atre’noe. Ana hu’negu Nagrite rukrahe huta eho, na’ankure nagra ko tamagu’vazina tamavre’noe.

Tamagua rukrahe hiho hu’nea naneke

12 Hagi Ra Anumzamo’a huno, ne’zana a’o nehuta, zavira neteta, mika tamagu’areti huta Nagritega eho.

13 Hagi kasunku’ma hanunka amega kavufgare kukena tagatora osunka, tumokamo’a netanena kasunka hunka Ra Anumzana kagra’a Anumzamofontera eno. Na’ankure Agra asunku Anumzana mani’neno, ame huno arimpa ohe Anumzankino, vahe’ma avesinte zamo’a Agripina avite’ne. Ana hu’neankino Agra ame hunora vahera knazana zamino, zamazeri havizana osugahie.

14 Nagri vaherema hu’noa vahe’mo’zama zamagu’a erinterami’za, nunamuma nehu’za, nagri navugosagu’ma nehake’za, kefo avu’ava’zama nehaza zama atresage’na, monafintira nunamu’zmia nentahi’na kumizmia atre’nezmante’na, mopazmia eri knare hugahue.

Ozmahe zamagatere’nea knare antahimi knamofo musenkasema Hezekaia hu’nea naneke

1 Ra Anumzamofo nonte Jerusalemi e’za, Ra Anumzana Israeli vahe' Anumzamo’ma Ozmahe Zamagatere’nea zanku eme antahimiza musenkase hihogu, maka Israeli vahetegane, Juda vahetegama kema erino vuno enoma hu vahera Hezekaia’a huzmantege’za nevazageno, ana zanke huno Efraemi nagategane Manase nagateganena avona kretregeno vu’ne. 2 Hagi kini ne’ene, eri’za vahe’aramine, maka Jerusalemi kumapima nemiza vahe’mo’zanena, namba 2 ikante eme atru hu’za ne’zana kre’za nene’za Anumzamo’ma Ozmahe Zamagatere’nea zanku’ma antahiminaku antahintahia retroma haza zamo’a knare hu’ne. 3 Ana kna fatgorera ne’zana kre’za nene’za musena osu’naze. Na’ankure ana knarera rama’a pristi vahe’mo’za zamazeri agrua osazageno, Jerusalemi kumapina vahera eme atrua osu’naze. 4 Hagi Ozmahe Zamagatere’nea zanku’ma antahimiza ne’zama kre’za nene’za antahimi antahintahima retro’ma hazazamo’a, kini ne’mofo avure’ene maka vahetmimofo zamavurera fatgo hu’ne. 5 Ana hige’za mika Israeli mopafima sauti kaziga Besebati’ma marerino noti kaziga Dani moparegama mani’naza vahetmintega kea atre’za, maka vahera Jerusalemi kumapi eme atru huta Ra Anumzana Israeli vahe Anumzamo’ma Ozmahe Zmagatere’nea zanku’ma antahimiza kre’za nenaza ne’za kreta neneta antahimiho hu’za hu’naze. Na’ankure kasegefima krente’nea kante ante’za ana maka vahe’mo’za ana kna kegava hu’za ovariri’nazanki, osi’a vahe’mo’za kegava hu’za avariri’naze. 6 E’ina hu’negu kini ne’mo’a maka Israeli vahetegane, Juda vaheteganena amanage huno avona kreteno zamige’za avoma erino vuno eno’ma hu vahe’mo’za eri’za vu’naze. Maka Israeli vahe’mota ete rukrahe huta Ra Anumzana Abrahamune, Aisakine, Israeli vahe Anumzamofonte enkeno, osi’a nagama Siria kini ne’mo’ma tamavararigetama fre’naza nagara Ra Anumzamo’a rukrahe huno eno tamagrane emanigahie. 7 Hagi kote’ma tamagehe’zane tamafuhe’zanema Ra Anumzana tamagehe’i Anumzamofoma zamefi’ma humiza azeri arimpama hazageno, zamahe frigetama ke’nazazana osiho. 8 Tamagehe’zama hu’naza zana huta Anumzamofo kegura tamagu’a azeri hankave otita, Ra Anumzamofo agoraga nemanita, eri ruotge’ma hu’nea mono noma’afi eta Ra Anumzana tamagri Anumzamofo monora eme huntenkeno arimpama aheneramantea zamo’a ome amne hino. 9 Na’ankure Ra Anumzana tamagri Anumzamo’a rimpa fru huno asunku Anumzankino tamagrama ete rukrahe’ma huta Agritegama esageno’a avresra huramanteno amagena huoramigahie. 10 Higeno ana avona, avoma erino vuno eno hu vahe’mo’za eri’za kumate kumate Efraemi mopafine, Manase mopafine, Zebuluni mopafi vahetmina zamiza vu’nazanagi, ana kegura hunte’za kiza zokago ke hu’naze. 11 Hianagi Asa nagapinti’ene Manase nagapinti’ene Zebuluni nagapinti’enena osi’a naga’mo’za anankema nentahi’za zmavufga anteramiza, Jerusalemi kumatera e’naze. 12 Ana’ma nehazageno’a, Anumzamo’a Juda naga’mofonte azana anteno zamagua eri mago hige’za Ra Anumzamo’ma kini ne’ene eri’za vahe’araminema zamasamige’za ome zamasmiza zana amage ante’za ana zana hu’naze.

Ra Anumzamo’ma Ozmahe Zamagatere’nea kna ete agafa hu’za kegava hu’naza naneke

13 Hagi namba 2 ikantera tusi’a vahe’mo’za Zo-ore Breti kre’za nene’za musenkase hu’naku Jerusalemi kumatera eme atru hu’naze. 14 Hagi mika havi anumzante’ma Kresramana vu itaramine, mika mnanentake’za kre mnama vu itaramima Jerusalemi kumapima me’neana eri’za vu’za Kidroni agupofi ome atre’naze. 15 Hagi namba 2 ikamofo 14ni zupa Ozmahe Zamagatere’nea zanku’ma antahimi’za, sipisipi anentatamina ahe’naze. Ana’ma hazage’za pristi vahe’mo’za zamagazegu nehu’za zamagra’a zamazeri ruotge hute’za, kresramanama vu ofa eri’za Ra Anumzamofo nompi vu’naze. 16 Hagi Anumzamofo eri’za vahe Mosese kasegefima me’nea kante ante’za, pristi vahetamine Livae vahe’mo’za eri’za kankamuzmire otitere hu’ne’za, Livae vahe’mo’za korana eri’za pristi vahe’ma eme zamizage’za eri’za kre sramnavu itarera ru tritri hu’naze. 17 Na’ankure ana vahe kevufina zamazeri agruma osu vahetmina rama’a mani’naze. E’ina hu’negu Livae vahe’mo’za Ozmahe Zmagatere’nea zanku’ma antahimiza nehaza sipisipi anentatamina mago mago vahe’mofo amente amente ahe’za zamazeri agru hu’naze. Na’ankure ana maka vahe’mo’za agrua osu’nazankiza Ra Anumzamofontera sipisipi afu anentamina ohe’naze. 18 Hagi Efraemi nagapinti’ene, Manase nagapinti’ene Isaka nagapinti’ene Zebuluni nagapinti’enema e’naza vahera, kini ne' Hezekai’a nunamuna huzmantetege’za, kasegea amagera ante’za zamagra’a zamazeri agru osu’nazanagi, Ozamahe Zmagatere’nea zanku’ma antahimi’za nenaza ne’zana amne ne’naze. Na’ankure Hezekaia’a amanage huno nunamuna hu’ne, Knare Ra Anumzamoka magoke magoke vahe’mofo kumira apasezmanto. 19 Hagi mono nomofo kasegema amage antezamo azeri agru osugahianagi, iza’o, Anumzamofonte’ma agu’ama anteno Ra Anumzana agehe’i Anumzamofoma amagema antesia vahera kumi’a apasento. 20 Anage higeno Ra Anumzamo’a Hezekaia nunamuna antahimino vahetmina zamazeri knare nehuno, kumizmia atrezmante’ne. 21 Hagi Israeli vahetmima Jerusalemi kumate’ma atruma hu’naza vahe’mo’za 7ni’a knafi Zo-ore Bretima nenaza knaguma antahimi ne’zana kre’za nene’za, musena nehazageno Livae vahe’ene, pristi vahe’mo’za maka kna zavenaramina nehe’za zagamera hu’za Ra Anumzamofona maka hanavezmireti hu’za agi’a erisga hu’naze. 22 Hezekai’a knare antahintahima ante’za Ra Anumzamofo eri’zama eri’za Livae vahetmina zamazeri hankavetike zamasami’ne. Anagema hutege’za Israeli vahe’mo’za 7ni’a knama huhampri’naza knafi ne’zana kre’za nene’za zamarimpa fru ofa nehu’za, Ra Anumzana zamagehe’i Anumzamofona susu hunte’naze.

23 Ana hute’za maka vahe’mo’za mago zamarimpa hu’za mago’ene 7ni’a zagegna erinte’za, Ozmahe Zmagatere’nea zankura ne’zana kre’za nene’za antahimi’naze. E’ina hige’za 7ni’a zagegnafi ne’zana kre’za nene’za musenkase hu’naze. 24 Hagi kini ne' Hezekai’a Juda vahetmina, ofama hu’zana 1tauseni’a bulimakao afutminki, 7tauseni’a sipisipi afutminki huno zamigeno, kini ne’mofo eri’zama e’neriza kva vahe’mo’za 1tauseni’a bulimakao afutminki, 10 tauseni’a sipisipi afutminki hu’za zami’naze. Hagi rama’a pristi vahe’mo’za zamagra’a zamazeri agrua Anumzamofo avurera hu’naze. 25 Hagi maka Juda vahe’mo’zane, maka vahetmima Israeli mopafinti’ma e’naza vahe’mo’zane, pristi vahe’mo’zane, Livae vahe’mo’zane, maka ruregati’ma Juda mopafima enemaniza vahe’mo’zanena musenkase hu’naze. 26 E’ina higeno Jerusalemi kumapina vahe’mo’za tusi muse hu’naze. Na’ankure Israeli kini ne' Deviti nemofo Solomoni knareti’ma eno ana knare’ma ehanati’neana, e’inahu’zana Jerusalemi kumapina fore osu’nea knaza fore hu’ne. 27 Hagi anante pristi vahe’mo’zane Livae vahe’mo’zanena oti’za ana vahetmina asomu ke huzmantageno, Anumzamo’a nunamu zamia antahi’ne. Na’ankure nunamu zamimo’a monafinka Ra Anumzamo’ma nemania ruotge kumapi mareri’ne.

Zamagu’a rukrahe hihogu zamagi hu’nea naneke

1 Dairusi’ma mago kafuma kinima mani vagareteno namba 2 kafuma unemanigeno’a, ana kafumofona 8ti ikantera Ra Anumzamo’a Berekia nemofo, Ido negeho Zekaraiana amanage huno nanekea asami’ne, 2 Nagra Ra Anumzamo’na kagehemokizmia tusi’a narimpa ahezmante’noe. 3 E’ina hu’negu amanage hunka vahetmina zamasamio, Hihamu’ane Ra Anumzamo’a amanage nehie, Ete rukrahe huta Nagrite enkena, Nagra Hihamuane Anumzamo’na ete rukrahe hu’na tamagritera va’neno, huno Hihamunentake Ra Anumzamo’a nehie. 4 Ko’ma tamagehe’mozama hu’naza zana osiho. Hagi tamagehemo’zama kefo zamavu’zmavazama nehazage’za ko’ma mani’za e’naza kasnampa vahe’mo’zama huama hu’za, Hihamunentake Ra Anumzamo’a amanage nehie, menina kefo avu’ava zama nehaza zana atreta tamagu’a rukrahe hiho hu’za hunazanagi, ana keni’a antahi’za zamagu’a rukrahera osu’naze, huno Ra Anumzamo’a nehie. 5 Tamagehe’za menina iga mani’naze? Hagi kasnampa vahe’mo’za ofri mani vava hu’za nevazafi? 6 Hianagi maka nanekema eri’za vaheni’a kasnampa vahepima huvazi’nama hu’noa kemo’a, tamagehe’mofona zamagate ore’neanki, Nagrama hu’noa kante anteno ana zana efore hu’ne. E’inama higeno’a zamagu’a rukrahe nehu’za amanage hu’naze. Na’anoma Monafinka Sondia vahe’mofo Ra Anumzantegati’ma erisunema huta hu’nona zana erune. Agra nazano huramantegahuema huno’ma hu’nea zana hurante’ne.

Mopama keno vano hu naga’mofo naneke

7 Hagi Dairusi’ma mago kafuma kinima manivagareteno namba 2 kafuma nemanigeno, 11ni ikamofona 24 zupa Ra Anumzamo’a mago’ane Kasnampa ne' Berekia nemofo, Ido negeho Zekaraia’na amanage huno kea nasami’ne, 8 Kenagera ava’nagnaza negogeno, mago krahopi miteli zafarami me’nefi koranke hosi afumo’a oti’negeno, ana hosi afu agumpina mago ne' mani’nege’na ke’noe. Hagi ana ne’mofo amefira koranke’ma, osapake’ene efeke hosi afutami mani’nazage’na ke’noe. 9 Anazama nege’na nagri’enema nanekema nehia ankerona amanage hu’na antahige’noe, Ranimoka, ama zana nazane? Anagema hugeno’a nagri’enema nanekema nehia ankeromo’a amanage huno kenona hu’ne, E’i zana nazampi, nagra kaveri hugahue huno hu’ne. 10 Hagi miteli zafaramimofo amu’nompi mani’nea ne’mo’a amanage huno nasmi’ne, Ama nagara Ra Anumzamo’a ama mopafima vano huta na’a fore nehifi keho huno’ma huzmante’nea nagare. 11 Anage higeno hosi agumpima mani’naza naga’mo’za Ra Anumzamofo ankeroma miteli zafa amu’nompima oti’nea nera amanage hu’za asami’naze, Ama mopafima vanoma huta konana, mika ama mopafima mani’naza vahe’mo’za fru hu’za akohe’za mani’naze. 12 Anagema higeno’a Ra Anumzamofo ankeromo’a amanage hu’ne, Monafi sondia vahe’mokizmi Ra Anumzamoka nama’a zupa Jerusalemi kumaku’ene Juda mopafima me’nea rankumataminkura kasunkura huozmante krimpa ahezmantenka vugahane? Karimpama ahezmantenkama e’nanana hago 70'a kafu evie. 13 Higeno Ra Anumzamo’a asunku hunteno fru kefinti, nagri’enema keagama nehia ankerona kenona hunte’ne. 14 Ana hutegeno nagri’enema keagama hu’nea ankeromo’a amanage hu’ne, Monafinka sondia vahe’mofo Ra Anumzamo’a amanage hie hunka ranke hunka huama huo. Jerusalemi kumaku’gu’ene Saioni kumaku’enena tusiza hu’na navesia nentoe. 15 Hagi kokankoka vahe’ma zamarimpa fruma hu’za nemani’za vahekura, tusi narimpa ahenezmantoe. Na’ankure osi’ama vaheni’ama narimpama ahezmantoge’za, zamagra razampi zamazeri haviza nehaze. 16 E’ina hu’negu Ra Anumzamo’a amanage nehie, Nagra nasunku hunezmante’na ete rukrahe hu’na Jerusalemi oankino, Nagri nona ana kumapina ete eri so’e hu’za ki’nageno, mesarimima nehaza nofinu Jerusalemi kumara ante’za ke’za mesarimia hugahaze, huno Monafi sondia vahe’mofo Ra Anumzamo’a hu’ne. 17 Monafi sondia vahe’mofo Ra Anumzamo’a amanage hie hunka ete mago’ene ranke hunka huama huo, Nagri rankuma’mo’a ete mago’ane mika zampina knare huno hageno marerinigeno, Ra Anumzamo’a mago’ane Saionia azeri so’e nehuno, nagri rankumare huno Jerusalemia huhamprigahie.

18 Anante nagra kesga hu’na navuga koana, 4'a pazive me’nege’na ke’noe. 19 Nagranema keaga nehia ankero nera anante amanage hu’na antahige’noe. Ama zana nazane hu’na antahigogeno, amanage huno kenona hu’ne, E’i pazivetamina Juda vahe’ene, Israeli vahe’ene, Jerusalemi vahe’enema zamahe panani’ma hazage’za panani’ma hu’za fre’naza pazivetamine hu’ne. 20 Anante Ra Anumzamo’a 4'a vahetmima ainireti’ma keonke zama troma nehaza vahetmina naveri hu’ne. 21 Anante nagra antahige’na, ama vahe’zaga zamagra na’a hunaku neaze hu’na antahigogeno, amanage hu’ne. Ama 4'a pazivemo’za Juda vahera zamahe panani hazage’za panani hu’za fre’naze. Hianagi menima neaza vahe’mo’za ama ana 4'a pazivetamina, e’i 4'a kumate vahetaminki’za zamazeri zamagogonefe’za zamazeri haviza hunaku neaze.

19 Nagrama navesizmantoa naga’mofona hanavetina, zamazeri fatgo nehu’na, zamavumarora nentoe. E’ina hu’negu knare tamavu’tmavama hu’zanku nentahitma, tamagu’a rukrehe huta fatgo huta maniho.

5 E’ina hu’negu tamagripima ama mopafi kefo tamavutamava zama me’nesiana ahefriho. Ana avu’avara monko avu’avazama, agru osu avu’avazama, rumofo zantema kenunu hu’zama, havi agu’agesa antahizama, agraguke antahi avu’avazane, e’inahu avu’avazamo’a havi anumzante mono hunteankna hu’neanki atreho.

13 Atrenkeno mago tmavufgamo kumimofo eri’zana e’norina, Anumzamofo tamavufga ami vagareho. Na’ankure tamagra ko fri’nazane, hu’neanagi menina kasefa maniza erita mani’naze. Hagi ana miko tamavufgamo’a knare’zama eriforehu erizaza me’nenkeno, Anumzamofona ragi amino.

Oza aza huta knaza erisuna naneke

1 Hagi nenafugta magotamimo’ma kumipima evuramisigeta, Ruotge Avamumofo nevaririsamota, ana kumapima evuramizankura tamagra’a kegava hu’netma, fru avu’avazampinti e’inahu vahera azeri fatgo hugahaze.

21 E’ina hu’negu mika agru osu avu’ava zana erinetreta, tamagu’afima kefo avu’avazama me’nesiana erinetretma, anteramitma, tamagu tamema tamaguma vazisia nanekema Anumzamo’ma tamagu’afima hankre’neana eriho.