19 Ɗu inahɗi ne faan ciŋ ɗu ceɗ kahan Fuuɗsi Hoolohngaani e ? Fuuɗsi gen nga ɗu, Fuuɗsi Hoolohngaani Kooh eɗ ɗu. E ɗu raak haf ɗu haa. 20 Ɗu romuuɗ po candoomiŋ ɗu eɗohuuɗ. Kon yakɗaat Kooh na faan ciŋ ɗu.

27 Waaye maa dege faaniŋ ngo in miskiɗ po ŋ yilifa, ne ŋ yegɗuu ɓooɓi Yegɗohiŋ Muci po ƴut, ŋ han aañu.

3 Ali ŋ paysoh raak-raakiŋ ngo jen,

ŋ eɗoha kañam wuu ñakiɗ ci,

ŋ nam eɗoh faaniŋ ngo ne wa dohu*,

te ŋ waaɗɗi morom mbo ɗah,

wa raakiɗɗi so ali njiriñ.

13 Ɓoo jen, Yawuut na nikaaɗi Yawuut, ñaam na nikaaɗi ñaam, ɓoo jen ɓoktu ŋ Fuuɗsi yinoori ne ɓoo nik faan yino. Ɓoo jen, ɓoo nam anɗu ŋ culiŋ Fuuɗsi yinooreem.

4 Laam findi faan nikoh yino, wa raakka cir laayiɗ te ca jen ca ɓaahɗi ini ca na haɓɗe, 5 wa mand ɗaa nga ɓoo, ali ɓoo laayoh na, ɓoo faan yino ŋ niki ɓoo nik ŋ Kiristaani te ɓoo jen ambsukohha nikka cir ci.

8 Meeɗiɗ faaniŋ ɗa yoonduk, wa raakiɗ njiriñ, waaye njirñiŋ wa laayɗi. Meeɗiɗ haf fu tum ini neɓ Kooh weɗ raak njiriñ ŋ in ci jen, wa hun na gapohiŋ Kooh ŋ kipes kii na wi na haye.

41 Kinaat neeh, kiimaat Kooh a ndengiɗ ɗu po ɗu keenuu ŋ fiir ; waaɗ-waaɗi wii nga waaye faan ci raakɗi hatil. »

29 Hasiŋ ɗa ñaahmi waaɗ ɗa ɓek ŋ bakaaɗ ɗah, nihsaa fu mbeta ; cir yino nihsuk ŋ faaniŋ ɗa, weɗ ngisoh wa jen, wa mbetu ŋ yongkaaha yakka.

25 Weɗ tah mi na woyee ɗu ne : Kinaat jaahiɗ ŋ kipes kiŋ ɗu, ŋ ini ɗu ñaman [na ini ɗu anan]. Kinaat jaahiɗ ŋ faan ciŋ ɗu, ŋ ini ɗu ɓekkan. Kipes uupiɗɗi kañam njiriñ e ? Te faan namɗi uupiɗ ɓekkaah njiriñ e ?

28 Kinaat nup ɓi na ape faan te ɓa minɗi ap ruuh. Nupaat Yi min ambsoh faan na ruuh jen a sooƴiɗ ca ŋ yongkaaha yakka.

1 Ŋ jamanooneem, ɓo' laayiɗ coheen ne ɓa sikɗuk Yeesu ; mboolnda laayya laay po ɓa daktiɗoheeɗa. Yeesu kockoh ŋ taalubeeciŋ ɗe, a woosa ɓa ne : « Wortukaat naafeehaakiŋ Farisen ci, wa mand na lawiir. 2 In nu ɗembɗu ɗah, wa hey teeɓohse te in nu ɗemb ɗah, wa hey inhasse. 3 Kon in nu ɗu woo na wek ɗah, wa hey kerhasse noh cong ; te in nu ɗu moondɗoh ŋ nof ŋ ɗooƴ tuuƴ ɗah, wa hey leehkasse ŋ ɗafuk taɓah ci.

4 Ñam na woyee ɗu ne, ɗu ɓi nawleeciŋ ngo, kinaat nup ɓi min top dong ngaŋ ap faan. 5 Ŋ hey ɗu teeɓe ya ɓa a yi ɗu joy nup : Nupaat Kooh yi min ɗu ɓek ŋ yongkaaha, ne ɗu apu po ƴut ɗah. Ee, ñam na woyee ɗu ne, a yi ɗu joy nup. 6 Sel ƴin yatuus na toonohseeɗi daram kanak dong e ? Moona deey, Kooh alɗi yino nga ca. 7 Te a inhiɗ sah findi find ciŋ haf ciŋ ɗu hend, mbaa kanaat neƴƴoh ! E ɗu uupiɗ juuk sel njiriñ. »

8 Yeesu ɓaatta nga ne : « Ñam na woyee ɗu ne, ɓo' nu woo ŋ fiki ɓooɓi ne a ɓaah nga so ɗah, mi yi Kuɓkiŋ ɓoyi ŋ hey name woo ŋ fiki malaakaaciŋ Kooh ne ɓoyeem ɓaah nga so. 9 Waaye ɓo' nu taasuk ko ŋ fiki ɓooɓi ɗah, a hey name taasku ŋ fiki malaakaaciŋ Kooh. 10 Ɓo' nu woo in moɗaaɗi ŋ Kuɓkiŋ ɓoyi ɗah, a ɗaasnuk ɗah, a hey ɗaasse ; waaye ɓo' nu woo in moɗaaɗi ŋ Fuuɗsi Hoolohngaani ɗah, a ɗaassanɗi.

11 Ɓa ɓay ɗu ŋ sinaagog ca, wala ŋ fiki kilifaaca ne ɓa attee ɗu ɗah, kinaat feyu ŋ findi ɗu joy ngeloh, 12 laam Fuuɗsi Hoolohngaani, hey ɗu teeɓe ndeem ini ɗu joy woo. »

13 Ŋ ɗooƴ mboolnda raakka ƴaara woo Yeesu nga ne : « Jangɗohohi, woya taambɗoh ho, ɓoo paysoh lamaahi baab ɓoo faɗiɗ ɓoo. » 14 Yeesu loffa ɗe ne : « Ƴaariŋ ngo, ya ɓa tum mbo atte’ohiŋ ɗu, po ŋ joyya ɗu paysoh raak-raak kiŋ ɗu ? » 15 A woosa ɓooɓa jen ne : « Wortukaat, kinaat waaɗ raak kopor in hend na cakna mboɓ, laam kipes ɓo' nikɗi ŋ ini a raak, ali a raakoh na ! »

16 Weɗi Yeesu naandsukoh ɓa andiinii : « A nikee heɗ raak-raak, yohon ciŋ ɗe laaɓpa keeh-keeh. 17 A woosa ŋ haf ce ne : " Ŋ joy ye haɓiɗ ? Ŋ raakɗi ɗiski ŋ min ɗaak laaɓɗiŋ ngo jen. " 18 A woyissa ne : " Seka, inii weɗ mi na hee tume : Mi na hee nihse ndap ciŋ ngo cii, ŋ haɓiɗ ci uup ca yak, ŋ ɓek laaɓɗiŋ ngo nga, na in ciŋ ngo cinooci. 19 Ƴut ɗah, ŋ woo ŋ haf fo ne : ‘Ƴaari, fu ɗaakkiɗ laayiɗ, pesoha ɓi kiisi kiis. Ɗiski wa nik, iɗsiɗka, fu ñame, fu ane, fu neɓsiɗke.’ " 20 Waaye Kooh woosa ɗe ne : " Naandɗi ! Ŋ weki woti, ŋ hey ɓaye kiñin kiŋ ɗa. Moo, ya ɓa raakan ɗaakkiŋ ɗa kotii ? " » 21 Yeesu ɓaatta nga ne : « Ɓoyi na waake raak-raak a nangɗohe, te a raakɗi ali in ŋ Kooh, a in mand ɗaa rahsan ɗe. »

22 Ƴutta, Yeesu woosa taalubeeciŋ ɗe ne : « Weɗ tah mi na woyee ɗu ne, kinaat jaahiɗ ŋ kipes ki, ŋ ini ɗu ñaman. Kinaat jaahiɗ ŋ faan ciŋ ɗu, ŋ ini ɗu ɓekkan. 23 Laam kipes weɗ uup kañam, te faan weɗ nam uupiɗ ɓekkaah njiriñ. 24 Markaat ngaak-suur ci, ca na sokeeɗi, ca na nguɗeeɗi, ca raakɗi ɗaakkoha, ca raakɗi ndap ; waaye Kooh yii ñamiɗ ca, te a ɗu uupiɗ sel ci njiriñ. 25 Ya ɓa min jaahiɗ nga ɗu, po a ɓaat wahtu ŋ kipes kiŋ ɗe ? 26 Nik ne ini ƴissuuteem, ɗu minɗaa ɗah, wa ye tah ɗu feyse ŋ in ci cinooci ?

27 Markaat pos ciŋ paangiici findi ca na mande : Ca na pangkeeɗi, ca na teɗeeɗi ; ñam na woyee ɗu ne Suleymaan sah, na ina a raakee jen, a moosɗi raakoh kulɓa mand na yino nga ca moɗ. 28 Kosi ɗu kos ƴissuutiɗ ! A Kooh na ɓekɗe paangfi ɓekɗi moɗɗeem woti, ali nik ne kim sah, wa miniɗ dohu. Kooh tumiɗ paangfi ineem ɗah, ŋ woyisɗi ɗu, ɗu ɓi uupiɗa njiriñ.

29 Kinaat feyu ŋ ini ɗu ñaman, wala ini ɗu na hee ane. 30 E ɓooɓi inahɗi Kooh na gene waak in ceem, waaye Baabiŋ ɗu inhiɗ ne ɗu etohiɗ ca. 31 Mbaa ɗah, waakaat ini na kaɗɗe Nguuriŋ ɗe fiki, a hey ɗu wa one, a ɓaatiɗ ɗu cinooci nga. »

32 Yeesu ɓaatissa nga ne : « Ɗu ɓi gatiŋ ngo, ɗu laayɗi, waaye kinaat neƴƴoh, wa neɓiɗ Kooh ne a ɓaahndoh ɗu ŋ Nguuriŋ ɗe. 33 Toonaat ini ɗu raak, ɗu eɗa ñakiɗ ci, weɗ ne ɗu waak ɗaakkoha minaaɗi yahuk, ɗu nangɗoh raak-raak ŋ Eel ci ; wa heyɗi reehe, wa roksanɗi, te wa ñuhkanɗi. 34 Laam ɗiski raak-raakiŋ ɗu nik, keeñ ciŋ ɗu na name nik nga. »

35 Yeesu woyissa taalubeeciŋ ɗe ne : « Tokɗukaat, te laampaaciŋ ɗu kanaat ƴim. 36 Mandaat na ñaam ci na seke heɗ ɓa yi joy wiirkoh ŋ kilook, ne a laɓɗee rek ɗah, ɓa rangsiɗ ɗe buntaani. 37 Wa hey neɓe ŋ ñaam ceem, ne heɗ ɓa hay, raak ɓa sekee ɗe ɗah. Ñam na woyee ɗu wa te wa keeh, a hey ɓekke kulɓa pangkoha, a ɓoofiɗ ñaam ciŋ ɗe, a noɗɗee ɓa, ɓa ñame. 38 Ali a hay ŋ ndengelnde wek wala ŋ wiisaaɗi, a raak ɓa sekee ɗe ɗah, wa hey neɓe nga ɓa.

39 Inhaat ne, heɗ kahni inheen wahtuuni roki na hee aasohe kahan ce ɗah, a heeɗi ɗe faɗe a aas. 40 Ɗu, namaat kooɗuk, laam Kuɓkiŋ ɓoyi hayan ŋ jamanooni ɗu liiɓɗi. »

41 Weɗi Piyeer woyoh ɗe ne : « Kilifaani, fu na woye na ɓoo ŋ andiinii, wala na mboolndi jen ? » 42 Yeesu Heɗi woosa ɗe ne : « Ya ɓa a yi ñaami woor, te a ñaannja po, heɗ ce hee ɓaaɓe ɗah, a nak ɗe niiɗɗu kahan ce ne a eɗee pangkoh ciŋ ɗe ɓinooɓi kañam ŋ jamanooniŋ wa ? 43 Ñaameem hey neɓɗe ne heɗ ce hay, raak ɗe tumee ineem findi a nakohee ɗe wa ɗah. 44 Ñam na woyee ɗu wa te wa keeh, heɗ ce hey ɗe tufkiɗe, a adgoh in ciŋ ɗe jen.

45 Waaye ñaameem woo ŋ ɗooƴ ce ne heɗ ce hayɗi paaɗ, a nik nga a laɓee ñaam ci ɓinooɓi, ƴaar na ɓitiɓ, a ñame, a ane, a laaree ɗah, 46 heɗ ce hey haye ŋ mbehi a foogɗi, ŋ wahtuuni a inahɗi, a hey ɗe mbugale, a tum ɗe findi ɓooɓi kerhaaɗi-woo ci na tumse.

47 Ñaami inah ini heɗ ce waaɗ, a sannga wa tum, te a kooɗkiɗɗi hayiŋ heɗ ce, a hey laɓse ndooɗ laayiɗ. 48 Waaye ñaami inahɗi ini heɗ ce waaɗ, te a tum ini a joy laɓohu ɗah, a hey laɓse ƴissuut. Ɓo' nu eɗu in laayiɗ ɗah, a hey meeksasse in laayiɗ ; ɓoyi uup dengkohu, a yi uupan meeksu. »

49 Yeesu woosa ne « Ŋ hayiɗ Adina ne ŋ tum yongkaah nga, te ŋ waaɗeen lool ne wa nik fuuɗuuɗ po ƴutiɗ. 50 Ɗiski wa nik ndii, ŋ joyiɗ hooƴu ŋ miskiɗ keeh-keeh, te ŋ raakanɗi jam po mbaɗna wa nikan. 51 Ɗu liiɓiɗ ne ŋ hay ne ŋ ɓay jam ŋ Adina e ? Muk ! Ŋ ɓay saɓsukoh. 52 Ini camboh woti, ɓo' yatuus nik ŋ fah ɗah, ɓa hey saɓsukohe ; kaahay ci sang kanak ci, kanak ci sang kaahay ci. 53 Baab sang kuɓu ƴaar, kuɓu ƴaar sang baab ; yaay sang kuɓu ɓitiɓ, kuɓu ɓitiɓ sang yaay ; payum ɓitiɓ sang kilook, kilook sang payum ɓitiɓ. »

54 Yeesu woyissa mboolnda ne : « Ɗu hotta ngaaɓ ɗah, ɗu na jaare woo ne : " Wa hey toɓe " te weɗ na raake. 55 Sarngi laɓ ɗah, ɗu woo ne : " Wa hey dohe " te weɗ na raake. 56 Naafeehaaci ! Ɗu marak eel ci na kehƴi ɗah, ɗu inah ini na hee raake ; kon ɗu min na inhaaɗi’oh findi Kooh na pangkohe woti-woti ?

57 Wa ye tah po ɗu ɗuunnga ini yurhiɗi joy haɓɗu ? 58 Ɓo' ɓayee ɗa waas ɗah, jeema kerhiɗoh na ɗe. Fu tumɗaa ŋ waasi po ɗu ree ngelohaana ɗah, a hey ɗa fase po ŋ atte’ohi, yeem eɗ ɗa alkaateeni, yeem rang ɗa ŋ kasoona. 59 Ñam na woyee ɗa ne, fu pulohanɗi ndaam feeh fu wirindɗi po ŋ darmi uup ƴissuut ɗah. »

4 A faan yino dong raak, wa nikka kosiɗ ci, a Fuuɗis yino dong raak ; wa yaakaar yino dong nam raak, te yaakaareem, Kooh ɓeeɗuk ɗu ne ɗu rahasa.

22 Ɓitiɓ ci, teyɗukɗaat ƴaar ciŋ ɗu, findi ɗu teyɗukɗoh Heɗi. 23 Laam ƴaar a yi yilif ɓitiice, findi Kiristaani yilfoh ɓi Janguuni, ɓeɗ ɓi faaniŋ ɗe te a nikka Mucɗohiŋ ɓa.

15 Jamiŋ Kiristaani adgohaat keeñ ciŋ ɗu, ɗu ɓeeɗku ŋ jameem ŋ niki ɗu nik faan yino. Genaat corkiɗ Kooh !

22 Nikiɗi Kooh ɓayya ƴoha a nihsoh ŋ ɓoya weem, a mahha ɓitiɓ naa, a kommba ɓoya ɗe.

23 Wa ɓoya hot ɗe, a ƴeella, a woosa ne :

« Waasii,

yii a ƴohiŋ ƴoh ciŋ ngo

na nehiŋ nehiŋ ngo !

Ɓoyii teeksan ɓo' ɓitiɓ,

laam a kooɗohu ŋ ɓo' ƴaar. »

24 Wa taamboh ɗaa po, ƴaar hey saɓsukohe na yaay na baab, a ŋoɗ ŋ ɓitiice, ɓa nik faan yino.

16 Ineem weɗ tah ɓoo na faɗsukeeɗi. Ali nik ne faan ciŋ ɓoo ca ɗii yahkeeɗa, keeñ ciŋ ɓoo na uupe as Kooh-nu-wiis.

24 A yi ŋ haf ce, a yi gaduk bakaaɗ ciŋ ɓoo ŋ faaniŋ ɗe ŋ daaƴa a daaƴu ŋ kurwaana ne ɓoo reehɗukoh na bakaaɗ, aas ŋ kipes yurhiɗ. E gaañ ciŋ ɗe wiriɗ ɗu.

2 Laam ɓoo jen, ɓoo laayiɗ findi ɓoo na kafndukohe. Ɓo' nu kafndukɗi ŋ woo ciŋ ɗe ɗah, a ɓo' mitiɗ, yi min amb cir ciŋ faaniŋ ɗe jen.