19 Un ba ingeo unu nï komwu ënë obedo öt ka Tipo Naleng na bedo ï ïwu, n’Obanga ömïöwu? Un ba ibedo unu mewu kenwu. 20 Un ëwïlöwu awïla kï wel. Pï manön, tii unu kï komwu më ketho dheo ï kom Obanga.

27 Ayelo koma, ëka amïö bedo opiina ëk ka dong atyeko tïtö köp both jö nökënë, kür abed dhanö na ba ebino mïö mïc.

3 Ka an amïö jami kïbëc na an atye ködë both ëcan, ëka ajalö thon koma më awanga kï mac, nakun ba atye kï mar, ba bino könyöna kï gin mörö.

13 Pïën onu kïbëc, Eyuda ëka jö Grecia, opii ëka jö na löörë kën-gï, onu ebatica ëka ëdökö kom acël ï Tipo acël nön, onu kïbëc ënywakö Tipo acël nön.

4 Onu etye kï dul kom na pol ï kom acël, dul kom ni thon ba tio gïnï tic acël këkën. 5 Kömanön thon, kadï bed onu thon etye na pol, onu ebedo kom acël ï Kiricito, na dhanö acëlacël bedo calö dul kom awodhe.

8 Pïën pwony më ryëö ler kom tye kï köny mökö, ëntö lworo Obanga tye kï köny ï yodhi kïbëc, pïën twërö kelo kwö më karë ni ëka kï karë na tye ka bino anyim.

41 Bed na wangwu thwolo ëka ïlëg unu, ëk kür ïdöny unu ï atëmatëma. Cwiny mïtö, ëntö kom görü."

29 Ka wangi më kucem ënë mii ipodho ï bal, köl iyuu ökö. Bër nini më rwenyo dul komi acël nï löönö bolo komi kïbëc ï mac më kapïny.

25 "Pï manön an akobo niwu nï, kür ibed unu kï par pï kwöwu, nï ngö na un ibino camö onyo madhö; onyo pï komwu, nï ngö na un ibino ruko. Kwöwu pïrë ba tëk löö cem, ëka kom pïrë ba tëk löö böng?

28 Kür ilwor unu jö na neko kom ëntö ba neko tipo. Ëntö lwor unu Obanga na twërö neko tipo ëka kom kanya acël ï mac kapïny.

1 Ï karë nön, pol dhanö elip kï elip ögürë gïnï kanya acël, nakun nyönërë gïnï kën-gï. Yecu öcakö twak both ëlübkörë na kobo nï, "Gwökërë unu kï kom thöbï* k’Eparicayo, na ënë kite më twodo. 2 Gin mörö kïbëc n’eumo ökö ïmüng, Obanga bino elo ökö kanyalër. Ëka gin mörö ope n’eumo na ba ebino ngeeno. 3 Pï manön jö kïbëc bino winyo ngö nï twakö unu ïmüng, ëka ngö nï mwöngö ï ith awodhi, jö nökënë bino tuco ökö.

4 "Nyikoneina, akobo niwu nï kür ilwor unu jö na neko kom ëka kinge manön, ba dök römö tïmö gin mörö nökënë. 5 Ëntö abino nyutho bothwu ngat na myero ilwor unu. Lwor unu Obanga na ut kï twër më neko dhanö cë bolo ökö ï mac kapïny. Eyo, akobo niwu nï, lwor unu ën. 6 Wïny abic ba ëcadhögï ï wel më cïlïng na tïtïdï? Ëntö ba tye mörö n’Obanga wie wil ködë. 7 Kadï bed yer wiwu kïbëc ëkwanö ökö, kür ibed unu kï lworo. Un pïrwu tëk rwök löö wïny na pol."

8 Cë Yecu okobo both ëlübkörë nï, "Akobo niwu nï ngat na bino tuco nyïnga ï nyim jïï, Wod ka dhanö thon bino tuco nyïngë ï nyim emalaika k’Obanga. 9 Ëntö ngat na bino kwëröna ï nyim jïï, ën thon ebino kwërö ökö ï nyim emalaika k’Obanga. 10 Jö kïbëc na twakö twak na rac ï kom Wod ka dhanö ebino tïmö nïgï kïca. Ëntö ngat na bino yanyö Tipo Naleng, ba ebino tïmö nïnë kïca.

11 "Ka ekelowu ï pido ï nyim ëtëla ëka ëlöc kï wegi twër më cinagoga, kür ibed unu kï par na pol kite na myero ïtwak unu ködë. Kür thon ïpar unu ngö na un ibino gamö onyo köp mënë na un ibino twakö. 12 Pïën Tipo Naleng bino pwonyowu ï caa nön ï ngö na myero ikob unu."

13 Ngat acël kï kin lwak okobo both Yecu nï, "Apwony, kob n’ömëra ëk wan epok ködë lïm k’apapwa na wan eleo."

14 Yecu ögamö nïnë nï, "Okona, nga n’oketha më bedo angöl-köp ëka apok jami niwu?" 15 Cë Yecu okobo nïgï nï, "Bed unu na wangwu thwolo ëka ïgwökërë unu kï kom woro më lïm. Kwö ka dhanö ba ocung ï kom wel lïm na thwönë na ën ute ködë."

16 Cë Yecu obolo nïgï carolok nï, "Alönyö mörö yam tye na cem mërë öcëk ï pwodho na thwönë. 17 Ën openyere kï ï cwinye kënë nï, ‘Abino tïmö ngö? Ka ketho cemna ope.’

18 "Cë ën okobo nï, ‘Man ënë gin na an abino tïmö. Abino rworwobo derena ökö ëka agöö dere na thwon cë dong aketho cem ïë ëka jamina.’ 19 Abino kobo nï cwinya këna nï, ‘In dong iut kï cem na thwönë kï jami na bëcö na pol na bino römöni pï mwaka na pol. Ywe giri, cem, medhi ëka ibed kï yom cwiny.’ "

20 "Ëntö Obanga okobo nïnë nï, ‘In amingo! Ï kiwor na tin ni, kwöni ebino kwanyö ökö kï bothi. Cë nga na bino lunyo jami na in ïkanö?’ "

21 Cë Yecu ojiko na kobo nï, "Bino bedo nï kömanön both jö na kanö jamigï kïbëc pïrgï kën-gï ëntö nwongo ba ut kï lönyö mërë both Obanga."

22 Cë Yecu okobo both ëlübkörë nï, "Pï manön akobo niwu nï kür ibed unu kï par na pol pï kwö na mewu nï ibino camö unu ngö onyo pï komwu nï ibino ruko unu ngö. 23 Kwö pïrë tëk löö cem ëka kom pïrë tëk löö ruk ökö. 24 Par unu mönö pï agak! Ba cwö gïnï kodhi onyo kaö kac, ba ut gïnï kï dërö onyo ka ketho jami cïthë Obanga pod pïdhögï. Un ba ingeo nï pïrwu tëk both Obanga löö wïny ökö? 25 Nga kï kinwu na römö mëdö caa acël mörö ï kom kwö mërë pï bedo kï par na pol? 26 Kite na ba ïrömö unu tïmö gin na tïtïdï, pïngö ibedo unu kï par na pol pï jami nökënë?

27 "Tham unu kite n’athure döngö ködë. Ba tio gïnï tic mörö onyo wïö wicu. Ëntö akobo niwu nï kadï bed Colomon yam orukere kï dheo mërë kïbëc, ën ba orukere na bër na cal kï mörö acël ï kin-gï. 28 Cë ka Obanga ruko lum na ut ï thim nï kömanön, na bedo pï nïnö na tin këkën ëka diki ebolo ökö ï mac, ën bino rukowu na löö un jö na yeewu nönök!

29 "Kür ibed unu thamö pï gin nï bino unu camö onyo madhö. Kür ïpar unu pï jami ni. 30 Pïën jö na ba ngeo Obanga rangö jami nön, ëka Apapwu ngeo ngö na un ïmïtö. 31 Nakaka manön, keth unu cwinywu ï kom Ker k’Obanga, cë jami nön kïbëc ebino mëdö bothwu.

32 "Kür ilwor unu, un lwak na nönök pïën Apapwu ïë obedo na yom më mïö Ker mërë bothwu. 33 Cadhu jami ni ut unu ködë ëka mïï unu both ëcan. Kwö unu ocwe më lïm na ba tii, kan unu lönyöwu na ba thum ï polo, kanya akwo mörö ba römö thuno ïë ëka nyënyë thon ba balö. 34 Pïën kanya lönyöni tye ïë ënë cwinyi thon tye ïë.

35 "Bed nï yübërë unu pï tic, nakun tarawu lyël. 36 Bed unu na calö jö na kürö adwong-gï ka dwogo kï ï yüb më nyom ëk ëyab nïnë dholokek pïöpïö ka ën othuno. 37 Bino bedo më gum pï etic n’adwong-gï bino nwongogï neno ka ën obino. An akobo niwu köp adyer, ën bino ruko böngü mërë më tic. Bino mïögï bedo ï mëja më cem ëka poko nïgï cem 38 Bino bedo na bër pï etic n’adwong-gï bino nwongogï öyübërë, kadï bed nï adwong ni bino thuno dingwor.

39 "Nïang unu man nï ka kono yam won öt onwongo ngeo caa na kwo bino ködë, ën onwongo ba yeo nï ödöny ï ödë. 40 Un thon myero ïyübërë, pïën Wod ka dhanö bino bino ï caa na un ba ingeo."

41 Cë Petero openyo Yecu nï, "Rwoth, in ibolo carolok ni bothwa onyo both jö kïbëc?"

42 Rwoth Yecu ögamö nï, "Nga n’obedo agwök öt na genere ëka ryëk? Ënë ngat n’adwong mërë bino ketho më löönö etic mërë ëk ömïïgï cemgï ï caa na mïtërë. 43 Bino bedo na bër both atic nön ka adwong mërë odwogo cë onwongo ën tye ka tïmö nï kömanön. 44 An akobo niwu köp adyer, ën bino ketho ën më löönö jami mërë kïbëc. 45 Ëntö k’atic nön ötwak kënë kënë nï, ‘Adwong ögalërë më dwogo,’ cë öcakö pwodo etic ewodhe na cwö kï man obedo mon nakun ën cemo ëka medho naka mër. 46 Adwong k’atic nön bino dwogo ï nïnö ëka ï caa na ën ba ngeo. Adwong ni bino pwodo atic ni na rac ëka ketho ën ï kin jö na ba genere."

47 "Atic na ba ngeo ngö n’adwong mërë mïtö ëka ba yübërë ïë dök ba lübö ngö n’adwong mërë mïtö, ebino pwodo ën rwök arwöka. 48 Ëntö ngat na ba ngeo, cë otio ngö na twërö mïö epwode, ebino pwodo ën na nönök Dhanö n’ëmïö na thwönë, ebino mïtö na thwönë kï bothe ëka ngat n’egeno kï jami na pol, ebino penyo na pol rwök."

49 Cë Yecu okobo nï, "An akelo ngölö-köp ëka apokapoka ï lobo na an athamö nï öcakërë dong ökö. 50 Ëntö aut kï batica na myero awok ïë kï can ëka pëkö naka wang n’othum. 51 Un ïthamö nï an abino më kelo kuc ï lobo? Akobo niwu nï pe ëntö apokapoka. 52 Cakërë kobedini jö abic bino bedo gïnï ï pacö acël, k’apokapoka ï kin-gï. Jö adek bino pokere kï jö arïö ëka jö arïö bino pokere kï jö adek.

53 "Apap bino pokere ökö kï wode

ëka athïn bino pokere k’apap mërë.

Aya bino pokere kï nyarë

ëka nyakö bino pokere k’aya mërë.

Adha bino pokere kï cii wode

ëka cii wod bino pokere k’adha mërë."

54 Cë Yecu okobo both lwak nï, "Ka ïnënö unu edou otingere n’olyero yo kuthö, pïöpïö ikobo unu nï, ‘Wang na köth ocwe,’ cë cwe thon. 55 Ëka ka yamö kudho na bino kï kukwap, un ikobo nï, ‘Pïny bino bedo na lyeth rwök,’ cë bino tïmërë kömanön. 56 Un etwodo! Ingeo unu poko anyuth na tye ï lobo ëka ï polo ï kom kit na nïnö bino bedo ködë. Pïngö dong ba ïrömö poko unu anyuth më karë ni?

57 "Pïngö ba ïtwërö unu ngölö-köp n’atïr pïrwu kenwu? 58 Ka ïcïdhö both angöl-köp nakun ïnywakö unu yoo acël kï ngat n’odothi, tëm kï tëk më yübö köp ködë nakun pod itye unu ï wangayoo ëk kür oteri ï nyim angöl-köp. Pï manön, ëk kür ömïï ï cïng ngat na löö buc cë oteri ï od buc. 59 Akobo niwu nï ba ibino donyo kï ï buc naka ka ïcülö cül kïbëc, na wi cïlïng mörö ba orem."

4 Kom tye acël ëka Tipo k’Obanga tye acël—kite na gen thon tye acël n’Obanga ocwodowu ïë—

22 Un mon, mïrë unu kenwu ï thë löc ka cwöwu, na calö ïmïrë unu kenwu both Rwoth. 23 Pïën ëcwö ënë obedo awi dhakö kite na Kiricito obedo awi jö n’oye ën, na gïn ënë kome, ëka Kiricito obedo alar ka jö n’oye ën.

15 Pïën ecwodowu ï kuc na calö dul kom acël, mïï unu kuc ka Kiricito ölöö cwinywu ëka ibed unu kï pwöc.

22 Cë Rwoth Obanga ocweo dhakö kï ï kom cogo lak nget na ën ökwanyö kï ï kom dhanö, ëka okelo dhakö both dhanö.

23 Cë Dhanö okobo nï,

"Man ënë cogo më cogona

ëka ringo më ringo koma,

ebino cwodo ën nï ‘dhakö,’

pïën ëkwanyö ën kï ï kom dhanö."

24 Pï tyën köp ni ëcwö bino wëkö apap mërë ëka aya mërë cë rïbërë kï dhakö mërë ëka jö arïö bino dökö kom acël.

16 Pï manön, cwinywa ba tye ka dök cen, kadï del komwa ni tye ka bal, ëntö kwö më ïwa tye ka röc nïnö kï nïnö.

2 Adyer onu kïbëc ëtïmö bal ï yodhi na pol. Ëntö ka cë ngat mörö ba ötïmö bal ï ngö na ën kobo, nwongo ën obedo dhanö na kite bër ëka dökï twërö gwökö kome kïbëc.