1 Ka̱shile kaꞋa ubuta̱ u kusheɗeku u tsu n katsura ka̱ tsu,

a makyan dem ufoɓushi u ɗa wi u ɓa̱nka̱ tsu a ayin atakaci.

1 Vuza na baci wi a̱ ida̱shi a̱

a̱ ubuta̱ u MalaꞋimili dem,

wi ta̱ a kuvuka a̱ kulu ku vuza vu utsura dem,

2 wi ta̱ a kufuɗa kudana Vuzavaguɗu,

<<Avu ɗa ubuta̱ u kusheɗeku u va̱,

m mashilya ma utsura ma̱ va̱,

avu ɗa vuza na vi a ku inda mu,

avu ɗa Ka̱shile ka̱ va̱,

wa̱ nu u ɗa n zuwai ka̱ɗu ka̱ va̱.>>

3 Mayun wi ta̱ a̱ ku utuka̱ wu a maza ma uma a gbani-gbani,

kpamu wu utuka̱ wu atakaci a na a̱ kutuka̱ n ukpa̱.

4 Wi ta̱ a kupala wu tsu na motoku,

ma tsu pala muku n ni n evelyu,

vi ta̱ a̱ kuda̱sa̱ngu m ma̱ta̱na̱ a ɗaka vi le.

Ma̱riki ma̱ ni mi ta̱ ke ere wu,

ka̱ta̱ u shamkpa wu.

1 N ciga wu ta̱ Vuzavaguɗu,

avu ɗa utsura u va̱.

2 Vuzavaguɗu, avu ɗa katali ke kusheɗeku ka̱ va̱, mashilya ma̱ va̱ n kishi ka̱ va̱,

Ka̱shile kaꞋa katali ke kusheɗeku ka̱ va̱, wa̱ a̱ ni u ɗa n tsu sheɗeku.

ma̱ra̱ga̱ ma̱ va̱ n kishi ka̱ va̱,

ubuta̱ u kusheɗeku u va̱ kpamu.

3 N tsu ɗeke ta̱ Vuzavaguɗu,

a̱yi na u yotsoi kucikpa,

kpamu u tsu wawa mu ta̱ ekiye a irala i va̱.

1 Ere mu Ka̱shile,

adama a na avu ɗa ubuta̱ u kusheɗeku u va̱.

1 Vuzavaguɗu ɗa kutashi ku va̱ n kishi ka̱ va̱,

wovon u yayi n kupana?

Vuzavaguɗu ɗa ubuta̱ u kusheɗeku va̱,

wovon u yayi n kupana?

2 Ɗa baci uma a gbani-gbani a̱ ta̱wa̱i wa̱ a̱ va̱,

adama a na una mu,

i ta̱ a̱ kuta̱ɗa̱tsa̱ a̱ yikpa̱.

3 Ko ɗa baci ka̱tsura̱ ko osoji ka̱ ka̱ra̱Ꞌi mu,

mi a kupana wovon ba,

ko ɗa baci irala i va̱ a̱ tuka̱i mu n kuvon,

n nannai dem mi ta̱ o kuyongo n ka̱ɗu ida̱shi.

1 N ta̱wa̱ ta̱ wa̱ a̱ nu Vuzavaguɗu,

adama a na vu ere mu,

ka̱ta̱ vu ka̱sukpa̱ a̱ ciya̱ ulyaꞋi a̱ va̱ ba,

avu Ka̱shile ka usuɓi kaꞋa,

wawa mu mi ta̱ ufolu u nu.

2 Pana ka mu, vu wawa mu gogo na,

vu okpo ubuta̱ u kusheɗeku u va̱,

mashilya ma utsura,

ma na ma ku isa mu.

3 Avu ɗa ubuta̱ u kusheɗeku u va̱, n mashilya ma̱ va̱,

tono nu mpa tsu na vu yaꞋin uzuwakpani.

4 Ere mu a maza ma na a zuwakai mu,

adama a na avu ɗa ubuta̱ u kusheɗeku u va̱.

5 Ekiye a̱ nu a ɗa n zuwai wuma u va̱,

avu ɗa vu shiba̱i mu,

Vuzavaguɗu, Ka̱shile ku usuɓi.

3 Vu okpo ubuta̱ u kusheɗeku u va̱,

ubuta̱ u na n kubansa makyan dem.

Neke kadanshi a wawa mu,

adama a na avu ɗa ubuta̱ u kusheɗeku u va̱,

m mashilya me ku ere mu.

8 U laꞋa ta̱ n kugaꞋan vu sheɗeku u Vuzavaguɗu,

a na va ku lemece ke vuma ma̱tsa̱n.

9 U laꞋa ta̱ n kugaꞋan vu sheɗeku u Vuzavaguɗu,

a na va ku lemece ke muku mu ngono ma̱tsa̱n.

5 A̱ Ka̱shile kaꞋa koci wuma u va̱ u ciya̱i kuvuka,

wa̱ a̱ ni u ɗa n keɗei a̱pa̱Ꞌa̱.

6 A̱yi ɗa koci katali ka̱ va̱ n kishi ka̱ va̱,

a̱yi ɗa ubuta̱ wu ukanji u va̱,

mi a kupana wovon ba.

7 Wishi u va̱ n tsugbayin tsu va̱ tsu uta̱ ta̱ u Ka̱shile,

a̱yi ɗa katali ka gbayin ka̱ va̱,

ubuta̱ u kusheɗeku u va̱.

8 Uma, zuwai a̱ɗu a̱ ɗa̱ wa̱ ni makyan dem,

i dana yi ili i na yi a̱ɗu a̱ ɗa̱ ra̱ka̱.

adama a na Ka̱shile kaꞋa ubuta̱ u kusheɗeku u tsu. Kuvuka

17 Mi ta̱ a ku cikpa wu, avu katsura ka̱va̱,

avu Ka̱shile, ubuta̱ wu ukanji uva̱, Ka̱shile ka na ka cigai mu.

1 Vuzavaguɗu, makyan dem avu ɗa ubuta̱ wi ida̱shi i tsu.

Ali tsukaya n tsukaya.

2 Kafu vu yaꞋan nsasan,

kafu a iɗika

kafu kpamu vu yaꞋan aduniyan,

avu Ka̱shile kaꞋa ko wannai.

Vi n ugiti ba tana vi n ukocishi ba.

9 Vuzavaguɗu ɗa ubuta̱ u kusheɗeku wa aza a na a takacikai,

ubuta̱ u kusheɗeku u ɗa a makyan ma atakaci.

10 Vuzavaguɗu, aza a na e yevei nu,

i ta̱ a kuzuwa a̱ɗu e le wa̱ a̱ nu,

vu tsu varuku vuza na u ta̱wa̱i wa̱ a̱ nu ba.

7 Ka̱shile,

nu n yiɗa̱i a ku gisanku ugain wu ucigi u nu u na u tsu sabaꞋa ba?

Uma a̱ tsu ciya̱ ta̱ ubuta̱ u kusheɗeku a ɗaka vu evelyu a̱ nu.

7 Vuzavaguɗu vuza singai ɗa,

ubuta̱ u kusheɗeku u ɗa wi a kanna ka atakaci.

U tsu ere ta̱ aza a na a̱ tsu sheɗeku wa̱ a̱ ni.

4 Avu vo okpo ta̱ ubuta̱ u kusheɗeku u vuza vu unambi,

koɓolo n vuza na wi a̱ kula̱nsa̱ uɓa̱nki, a̱ ka̱tsuma̱ ka atakaci ka̱ ni,

vo okpo ta̱ kpamu ubuta̱ u kusheɗeku a ayin a̱ mini ma̱ wunla̱i,

koɓolo n kulu a ayin a̱ usuɗukpi u kanna,

adama a na ayinviki a aza a gbani-gbani

i ta̱ tsu mini ma̱ wunla̱i ma na ma̱ tsu pura̱ mashilya,

26 A̱yi vuzana wi n wovon u u Vuzavaguɗu wi ta̱ a̱ kuciya̱ ida̱shi i ma̱ta̱na̱,

kpamu Vuzavaguɗu wi ta̱ o ku okpo ubuta̱ u kusheɗeku u muku n ni.

29 Uye u Vuzavaguɗu mashilya ma ku ere maꞋa u vuza vu usuɓi,

ama ili munuka i ɗa ubuta̱ wa aza kuyaꞋan ka gbani-gbani.