16 Mawandiko yose ya Mnungu yawandikwa kwa kulongozwa ni Mnungu, naho yadaha kukuhiniza ikindedi na kufingiza wiihi na kuwaogola want’hu na kuwalongoza wekale wikazi ukumwelela Mnungu, 17 vileke mnt’hu akumdamanyila ndima Mnungu ande kakint’ha, naivo adahe kudamanya kila ndima yedi.

24 "Elo mnt’hu yeyose akuunga anitegeleze mbuli zangu, niyo adamanya enga ivo, uyo aliganyizwa no mnt’hu azengile nyumba yakwe mnanga mwo luwe.

16 Mbuli ya Kilisito yaungwa ikale mndani mwenyu imemile. Kehinizeni na kulangilizana kwa umanyi wose. Kemeni mila ya kumtogola Mnungu, mlekeleni Mnungu mwe mioyo yenyu kwa kumgamba, nivedi.

4 Mbuli zose ziwandikwa aho kale, zawandikagwa kihinizwe vileke kuligana na ugoja no kugeligwa moyo kikwink’hwa kulawa mwa Mawandiko Yakukile kipate kunda na kawiilo.

1 Ngelo izi za Sulemani mwana kilume ywa Daudi seuta ywa Izilaeli.

2 Ngelo izi zawenk’haga want’hu mzungu na wogohi, naho zawatenda wamanye mbuli zedi. 3 Ngelo izi zawatenda kunda mzungu na ukindedi na kudamanya yakwelela. 4 Zawenk’ha umanyi wadya heweina ubala, wabwanga nawo, wapata umanyi vileke wekale kwa wengele. 5 Mta mzungu ategeleze na kongezela umanyi wakwe, na mta ubala apate ulangilizi, 6 Mnt’hu amanye mbuli ze mizungu ne miliganyizo na mbuli za wata umanyi na ngelo.

7 Kumvika Zumbe Mnungu ni nk’hongelo ya umanyi, mna wahezi waubela mzungu una ubala.

5 Muunge Zumbe Mnungu kwa moyo wako wose na kwo unt’hu wako wose na kwa ludole lwako lwose. 6 Mzikumbukile zisigilizi izi huwasigiilani dielo naho zinde mwe mioyo yenyu. 7 Mzihinize kwa wana wenyu. Zinde ni simulizi yenyu mkanda hakaya hegu mkanda kwe samo hegu mkagenda mwe sila na mkanda mhumula hegu mkanda mwadamanya ndima.

8 Mwanangu tegeleza makanyo ya iso, naho use kuleka mahinizo ya nyokwe. 9 Ayo nayande enga taji ina mahambo mwo mtwi wako, enga mkufu ukuwagila wa mwe singo yako.

20 Mwanangu tozesa malagizo ya iso naho unase kujala mahinizo ya nyokwe. 21 Uyaike mwo moyo wako mazuwa yose, naho uyakaulisise. 22 Umwo ukagenda nayakulongoze, umwo ukagona nayakwamile, umwo ukenuka nayakulangilize. 23 Kwaviya sigilizi iyo ni enga lumuli, naho sigilizi iyo ni enga ung’azi, makanyo ayo ni yedi nayakuike mwe sila yo ugima.

5 Waungwa kunda na mzungu na umanyi, unase kujala hegu kulemela ulosi wangu. 6 Unase kuleka mzungu, nuwo noukulele, uungise vileke ukwamile. 7 Mbuli yedi vitendese ni kunda na mzungu, lava chochose unanacho ukepatile umanyi. 8 Uutozese mzungu na uwo umanyi neinkwink’he nt’hunyo, naho una utozesa noukwink’he nt’hunyo.

13 Tozesa mahinizo yo mzungu unase kuleka yahauke mwako, yaamile kwa wengele kwaviya uwo nuwo ugima wako. 14 Unase kunda hamwenga na waihi, hegu kutimila migendele ya want’hu waihile.

23 Amila umoyo wako kwa wengele wose, kwaviya umwo mwalawa nch’oko zo ugima. 24 Wikale hale na want’hu waihile, hegu milomo yako isekutambula milosi yo udant’hi. 25 Meso yako yakaule kulongole, naho ukaulise kulongole mazuwa yose. 26 Ziike vedi sila zako noumbokele, lugendo lwako lwose nolwo nolunde lwedi. 27 Usekuhituka kumoso hegu kulume, wikale hale no uwihi.

14 Mahinizo ya mnt’hu mta mizungu ni nc’hoko zo ugima, yamhitula mnt’hu kulawa mwe mitego yo kubanika.

10 Kumvika Zumbe Mnungu ni nk’hongelo yo umanyi, na kummanya yudya akukile, ni kupata ubala.

1 Nyuwe want’hu wangu mwive icho huhiniza,

muitegeleze milosi yangu.

2 Nenilonge na nyuwe kwa malango,

mbuli hezamnyikaga kulawa uko kale,

3 ni mbuli kizivile naho kizimanya,

mbuli chasimwiilwagwa ni wakale wetu.

4 Hekiwafise wana wetu

ne kikigambile cheleko kikwiza,

udahi mkulu wa Mnungu no udamanyi wakwe,

vint’hu va kweheela ivo adamanye.

10 Mna cheleko chakwe chose chakehanganyaga, na kutimila cheleko kituhu icho hachammanyaga Zumbe Mnungu hegu ivo awatendele want’hu wa Izilaeli.

17 Wadala vilongozi wakulongoza vedi wawagilwa kuleligwa vedi, vitendese wadya wakudamanyisa ndima yo kubilikiza na kuhiniza. 18 Kwaviya Mawandiko Yakukile yagamba, "Usekuifupa ing’ombe umnomo umwo ukaidamanyila ndima yo kuhuta uhule," naho "Mndima kawagilwa maliho."

16 kenege na mbuli ziihile na za kihezi, kwaviya izo zawaika want’hu hale na Mnungu. 17 Mahinizo ayo ni enga kwenge dikusunguza kwenela no kuhomola umwili. Naho wakuhiniza zimbuli izo ni Humenayo, na Filetosi.

9 Yeyose heekwikala mwe mahinizo mwa Kilisito, mna ongezela mbuli nt’huhu mwa ayo, mnt’hu uyo hana Mnungu, mna akutoza mahinizo ayo ananawo wose waidi, Tate no Mwana.

14 Mgati mwe wila Yesu niyo akwela no kwingila mwe Nyumba ank’hulu ya Mnungu no kukonga kuhiniza. 15 Wayahudi niyo wehelwa wakagamba, "Uyu kalavai umanyi wa aya yose nae hasomile heusomile?"

16 Yesu niyo awahitula, "Yano huhiniza hiyo mahinyo yangu, mna lawa kwa Tate aniletile miye. 17 Mnt’hu akuunga adamanye zimbuli ziya Mnungu akuunga, naamanye uneva aya huhiniza yalawa kwa Mnungu hegu ni yangu miye mwenye. 18 Mnt’hu akukelongela ye mwenye aunga akeink’he uwedi utendese ye mwenye. Mna yudya akuunga amwinule yudya amletile uyu niwakindedi naho hauhali wiihi mndani mwakwe.