1 Selemani aungisaga wavele wa watakwiza. Mwana Falao na wavele wa Wamoabu na Waamoni na Waedomu na Wasidoni na Wahiti. 2 Awalombaga wavele awo wa si nt'huhu awo Zumbe Mnungu awalemezaga Waizilaeli wasekulombelana kwaviya nawawatende Waizilaeli kuvika milungu mituhu. Selemani awaungisaga wavele awo vitendese. 3 Selemani alombaga wana kiseuta magana mfungate na wawele magana matatu. Awo wamtendaga asaguke kwa Mnungu. 4 Mwo kudalahala kwakwe awo wavele wakwe wamzaganyaga niyo avika milungu mituhu. Naho handaga mhuwilwa kwa Zumbe enga ivo andaga Daudi uyo ise. 5 Selemani amvikaga Asitaloshi mnungu mvele ywa Wasidoni naho amtimilaga Moleki mnungu akuihiza ywa Waamoni. 6 Ivo Selemani adamanyaga wiihi kwa Mnungu, handaga mhuwilwa kwa Zumbe enga ivo andaga ise Daudi. 7 Uko kwo mnima, ulailo wa zuwa wa Yelusalemu, Selemani azengaga hant'hu ha kumvika Kemoshi, mnungu akuihiza wa Wamoabu, na hant'hu ha kumvika Moleki mnungu akuihiza wa Waamoni. 8 Naho awazengelaga wakaziwe wose hant'hu ha kufunk'hizila ubani na kuivika milungu yawe iyo yandaga hiyo ye kindedi.

9 Naivo elo Zumbe Mnungu ywa Izilaeli amwihiyaga Selemani kwaviya asagukaga kulawa kwakwe Zumbe Mnungu uyo amlailaga kaidi, 10 hamwenga na kugamba Zumbe Mnungu amfingizaga Selemani ase kuvika milungu mituhu, mna Selemani hatimilaga yadya alongaga Zumbe Mnungu. 11 Ivo Zumbe Mnungu amgambaga Selemani, "Kwaviya hutimile malagizo yangu ne Ndagano yangu iyo nakusigiile, ikindedi, neniuuse useuta wako na kumwink'ha yumwenga mwa wakulu wa wandima wako. 12 Hata ivo kwa kumkumbukila mndima ywangu Daudi, henitende ivo iivi ukei mgima, mna neniitende iyo mwo useuta wa mwanao. 13 Hata yehe henimhoke useuta wose. Nenimwasile mwanao kabila dimwenga kwa kumkumbukila mndima ywangu Daudi na kwajili ya mzi wa Yelusalemu uwo niusagule."

14 Ivo Zumbe Mnungu amtendaga Hadadi ywo lukolo lwa seuta ywa Edomu kunda mnk'hondo ywa Selemani. 15 Aho kale umwo Daudi andaga akatowana na Waedomu, Yoabu mnyamp'hala ywa watowani uyo akwelaga uko akawamosele msanga wabanike, awakomaga wagosi wose wa Edomu. 16 Yoabu na Waizilaeli wose wekalaga ahadya kwa miezi mtandatu mpaka aho wawakomaga pele wagosi wose wa Edomu. 17 Mna Hadadi umwo andaga akei mbwanga, anyilikilaga Misili hamwenga na Waedomu wamwenga awo wandaga wandima wa ise. 18 Wahalawaga Midiani no kuita Palani. Want'hu wamwenga wa uko wawatimilaga, niyo waita nawo mpaka Misili kwa Falao. Falao amwink'haga Hadadi nyumba na nk'hande na isi ya kwikala. 19 Falao elelesagwa ni Hadadi niyo amloza kwa mnamuwe, mvunawe dya Malikia Tapenesi. 20 Uyo mvunawe ywa Tapenesi amwelekelaga Hadadi mwana kilume etangwagwa Genubati, Genubati alelagwa na Tapenesi mwe nyumba ya Falao hamwenga na wana Falao.

21 Adadi umwo andaga uko Misili evaga kugamba Daudi hamwenga na Yoabu mnyamp'hala ywa watowani wabanika, amgambaga Falao, "Miye goja nihalawe niuye kwe kaya."

22 Mna Falao niyo amuuza, "Kuswesai kwangu vikuleka uuye kwenyu kaya?"

Hadadi niyo amhitula, "Bule nilekele du niite kaya?"

23 Naho Mnungu kamwigaila Selemani mnk'hondo mtuhu, uyo Lezoni mwana Eliyada amnyilikaga mnyamp'hala ywakwe Hadadezeli seuta ywa Soba. 24 Umwo Daudi abindaga kuwatowa want'hu wa Soba, Lezoni aduganyaga fyo dya ukwank'hwalu naho yehe mwenye andaga kilongozi. Waitaga uko Damesiki niyo wekala uuko, niyo aikwa kunda seuta ywa Dameski. 25 Andaga mnk'hondo ywa Waizilaeli mwa mazuwa yose yo useuta wakwe Selemani. Awagelaga makunt'ho enga ivo Hadadi awatendaga. Awatendelaga lubezo Waizilaeli naho niyo aikaila isi ya Asilia.

26 Mnt'hu mtuhu amsagukaga seuta Selemani andaga ni Yeloboamu mwana Nebati ywe dikabila dya Ifulaimu ywa Zeleda. Andaga yumwenga mwa wakulu wo useuta wa Selemani. Nine etangwagwa Zelua, mvele yumwenga abanikilwagwa ni mgosiwe. 27 Ivi nivo valekaga ukusaguka uko kulaile.

Umwo Selemani andaga akazenga milo no kumemeza ulongo digomela dyo mzi wa Daudi uyo ise, 28 Yeloboamu andaga mbwanga ywa ndima, naho Selemani eze aone ivo mbwanga uyo akudamanyisa zindima, amtendaga kunda mnyamp'hala ywe zindima zose zandaga zikadamanywa ni want'hu wa makabila ya Manase na ya Ifulaimu. 29 Zuwa dimwenga Yeloboamu andaga akatamba kulawa Yelusalemu niyo wadugana na mlotezi Ahiya kulawa Shilo mwe sila wakanda wenye waidi du. Ahiya avalaga mgolole mhya. 30 Ahiya ausaulaga uwo mgolole mhya niyo autatula vilebetu mlongo na viidi. 31 Naho niyo amgamba Yeloboamu, "Guha vilebetu mlongo kwaviya Zumbe Mnungu ywa Izilaeli agamba ivi, ‘Nihagihi na kuutatula useuta wa Selemani ananawo. Nohwink'he weye makabila mlongo. 32 Selemani nenimsigazile kabila dimwenga du kwajili ya mndima ywangu Daudi no mzi nisagule wa Yelusalemu mwe isi yose ya Izilaeli. 33 Nenitende ivo kwaviya, Selemani kanileka niyo avika milungu ya Ashitoleti mnungu ywa kivele ywa Wasidoni, Kemoshi mnungu ywa Wamoabu, na Milikomu mnungu ywa Wamoni. Hatimile yadya nilongile, naho hadamanye yakunelela, kaleka imiko ne zisigilizi zangu. Ise Daudi hadamanyaga enga ivo. 34 Hamwenga na ayo henimhoke useuta wose naande zumbe mazuwa yose yo ugima wakwe. Nevinde ivo kwajili ya Daudi mndima ywangu nimsagule naho yehe nakatimila imiko ne zisigilizi zangu. 35 Neni uuse useuta kwa mwanawe niyo nakwink'ha weye makabila mlongo, 36 mna nenimlekele mwanawe kabila dimwenga ninde na welekwa wa mndima ywangu Daudi na kwikaila mwe Yelusalemu vileke ande lumuli lukulangaza mazuwa yose, umzi niusagule kunda hant'hu hangu nenivikwe. 37 Weye Yeloboamu nounde seuta ywa Izilaeli nawe nowiikaile Izilaeli yose ivo nouunge. 38 Uneva unatimila yose hukusigiila naho niyo wekala kwa ivo huunga miye,niyo wadamanya yakunelela, unatimila imiko yangu ne zisigilizi zangu enga ivo mndima ywangu Daudi ivo atendaga, neninde na weye mazua yose. Nohwink'he isi ya Izilaeli naho neniutende useuta wako utoge enga ivo natendile kwa mndima ywangu Daudi. 39 Miye neniwasulumize welekwa wa Daudi kwajili yo wavu adamanye Selemani. Mna masulumizo aya hayande mazuwa yose.’"

40 Selemani aikaga mizungu ya kumkoma Yoloboamu mna Yeloboamu anyilikilaga kwa seuta Shishaki ywa Misili niyo ekala uuko mpaka aho Selemani eze abanike.

41 Naho vint'hu vituhu adamanye Selemani hamwenga ne mizungu yakwe yose yawandikagwa mwe kitabu che zimbuli za Selemani. 42 Selemani alongozaga Izilaeli yose kwa lupisi lwa miyaka milongo mine. Yehe akalaga Yelusalemu. 43 Selemani abanikaga niyo amoselwa msanga mwo mzi wa Daudi uyo ise, niyo Lehoboamu umwanawe anda seuta ywa Izilaeli hant'hu ha ise.