1 Seuta Ahabu amgambilaga Yezebeli mkaziwe mbuli zose adamanye Eliya naivo awachinjile walotezi wose wa mnungu Baali. 2 Yezebeli atumaga ulosi kwa mlotezi Eliya akagamba, "Milungu inikome uneva luvi mwo lupisi enga ulu neninde hikutendile enga ivo uwatendile walotezi wamwenga." 3 Eliya agohesaga niyo anyilikila Belisheba uko Yuda.

Eze abule Belisheba niho amwasaga mndima ywakwe. 4 Mna yehe mwenye agendaga msi mgima mwe dijangwa, niyo akwikala hasi he mp'heho yo mti ukwitangwa mkungugu. Aho amlombezaga vileke abanike akagamba, "Zumbe, ni vedi nibanike kwaviya miye hiye ywedi atendese kuwajink'ha awakale wangu."

5 Ivo atambaalaga hasi ho mti niya agona nt'hongo. Aaho mtumigwa ywa kwe mbingu amwiziilaga niyo amtoza akamgamba, "Inuka udye." 6 Mwo kubagaza aonaga mkate na mazi ya kunywa mwe digudulia hagihi ho mtwi wakwe. Adyaga na kunywa mazi niyo atambaala naho. 7 Mtumigwa ywa kwe mbingu auyaga niyo amwinula naho akamgamba, "Inuka udye kwaviya int'hambo ikei nt'hali kwako." 8 Eliya enukaga niyo adya na kunywa mazi. Apataga ludole kwe nk'hande iyo na kugenda kwa mazuwa milongo mine msi na kilo mpaka kabula kwo mnima wa Holebu, mnima wa Mnungu 9 Hant'hu hadya, engilaga kwe mp'hanga vileke akagone uuko ikilo icho.

Ahadya Zumbe niyo amgamba, "Eliya, aha Wadamanyai?"

10 Eliya niyo ahitula, "Nandaga hakudamanyila kwa uhuwilwa weye Zumbe, Zumbe Mnungu ywo udahi, mna want'hu wa Izilaeli waleka Indagano yako niyo wamola hant'ho ho kukulavila nt'hambiko, na kuwachinja walotezi wako wose. Hisigala miye nikedu, name wanizungula vileke wanikome!"

11 Niyo Zumbe amgamba, "Fosa ukakimale mwo mnima, ho undiilo wa Zumbe kwaviya aunga omboke." Niyo kwanda na nk'hung'unt'ho nk'hulu yamogolaga milima no kutulatula zinyuwe ho undiilo wa Zumbe, mna Zumbe handaga umwo mwe nk'hung'nt'ho iyo. Ink'hung'unt'ho iyo ize yomboke, kwandaga na kisingisa, mna Zumbe handaga umwo mwe kisingisa. 12 Kisingisa kize chomboke kwalailaga moto mna Zumbe handaga umwo mwo moto, moto nawo wize wajike niyo kwanda na izwi dya kutakamiza.

13 Eliya eze eve diizwi idyo agubikaga kihanga chakwe ne suke yakwe niyo afosa kuse no kukimaala ho mwingilo we mp'hanga. Niyo eva izwi dikumgamba, "Eliya, wadamanyai aha?"

14 Eliya ahitulaga kugamba, "Hingilwa ni finju kwajili ya Zumbe Mnungu ywo udahi mna Waizilaeli waleka Indagano yako niyo wamola vilingo vako vo kulavila nt'hambiko, naho wawachinja walotezi wako. Hisigala miye nikedu mna wanizungula wanikome name." 15 Zumbe niyo amgamba, "Uya mnawombikele sila ya kwe dijangwa mpaka Damesiki. Unabula uko, kamhake mavuta Hazaeli ande seuta ywe isi ya Asilia. 16 Naho noumhake mavuta Yehu mwana ywa Nimshi ande seuta ywa Izilaeli. Umhake na Elisha mwana Shefati kulawa Abeli Mehola, ande mlotezi hant'hu hako. 17 Naho nevinde, yeyose naahonywe kukomwa ni Hazaeli naakomwe ni Yehu, akuunga ahone kukomwa ni Yehu naakomwe ni Elisha. 18 Hamwenga na ivo nikei na want'hu alufu mfungate mwe Izilaeli. Nawo ni wadya wose hewefikile madi kwa kumvika Baali na kudinonela dihili dyakwe."

19 Ivo Eliya akulawaga uko niyo ambwiila Elisha mwana Shafati. Aho handaga na ng'ombe milongo miidi na kane zandaga zikalima mbilimbili, na ng'ombe mbili za Elisha zandaga kunyuma. Eliya ambokaga hagihi naye niyo amhasika divalo dyakwe. 20 Elisha azilekaga zing'ombe zakwe na kumgulukila Eliya niyo amgamba, "Hake goja hawalage tate na mnala, hawanonele akajika nohutimile."

Eliya niyo amgamba, "Ni vedi, haya uya, hikukufingiza!"

21 Elisha azibasaga zing'ombe niyo azichinja. Ainyemsaga inyama ye zing'ombe ziya, amaziti yo kukakila zing'ombe yandaga nizo zink'huni. Awapangilaga want'hu zinyama izo niyo wadya. Yehe niyo amtimila Eliya kunda mwambizi ywakwe.