1 Aho Daudi eze ande hagihi na kubanika amwitaga mwanawe Selemani naho amsigiilaga akamgamba, 2 "Lupisi lwangu lwo kubanika lwi hagihi. Utoge naho unde mdahi. 3 Utende yadya Zumbe Mnungu ywako akukugamba utende. Utimile miko yose ne zisigilizi ziwandikwe mwe miko ya Musa vileke ulozole kila aho nowiite na kila kint'hu noudamanye. 4 Vileke Zumbe Mnungu akint'hize kiya alagane umwo awagambaga welekwa wangu wanazumila sigilizi zakwe, na kumdamanyila ndima kwa uhuwilwa na kwa moyo wose, hahaswese yumwenga ywawe naalongoze Izilaeli mwo lupisi lwose.

5 "Naho wakumbukila icho adamanye kwangu uyo Yoabu mwana Seluya kwangu kwa kuwakoma wakulu waidi wa watowani wa Izilaeli, uyo Abina mwana Neli na Amasa mwana Yeteli. Awakomaga want'hu heweina masa, ivo adamanyaga masa naho aungwa kusengelwa. 6 Umtendele kwa mizungu, mna use kumlekela abanike kwa utondowazi.

7 "Mna uwatendele kwa ukise naho wande hamwenga na awo mkundanya ho ludyo na kuwadima awo wana Balizilai kulawa Gileadi kwaviya wanitendelaga uwedi umwo nandaga hamnyilika nduguyo Abisalomu.

8 "Iviyaiviya eyuko Shimei mwana Gela ywo lukolo Benjamini kulawa kwo mzi wa Bahulimu. Niye aniligitaga maligito makulu mwe dizuwa diya naitaga Mahanaimu, mna aseelaga kwiza kunisingila name nakelisaga kwa zina dya Zumbe kugamba henimkome. 9 Mna haluse usekumleka enga hana masa. Weye ywi mnt'hu ywa mizungu nommanye ivo noumtendele. Umanye du kugamba aungwa kukomwa."

10 Daudi abanikaga niyo amoselwa msanga mwo mzi wakwe, ukwitangwa mzi wa Daudi. 11 Andaga seuta ywa Izilaeli kwa miyaka milongo mine na miyaka mfungate akanda Hebuloni, na miyaka milongo mitatu na mitatu akanda Yelusalemu. 12 Ivo Selemani andaga seuta hant'hu ha ise, naho useuta wakwe nawo watogaga.

13 Akajika Adoniya uyo nine andaga Hagiti amwitilaga Betisheba uyo nine dya Selemani. Nine dya Selemani niyo amuuza, "Togola kwiza kwa utondowazi?" Adoniya niyo amhitula,

"Heiye hiza kwa utondowazi." 14 Mna nna mbuli ya kukugambila.

Ivo niyo amuuza, "Mbuli yani iyo?"

15 Adoniya amhitulaga. "Umanye miye hegu nehinda seuta naho kila yumwenga mwe Izilaeli naakakawiila kint'hu icho. Mna mbuli zihituka niyo ndugu yangu anda niye seuta kwaviya nivo aungile Zumbe Mnungu. 16 Haluse nalombeza kint'hu kimwenga, naho nalombeza usekunilemela."

Betisheba niyo amgamba, "Haya longa."

17 Adoniya amgambaga, "Nalombeza umgambe seuta Selemani, himanya hakudaha kukulemela, anizumile nimguhe Abishagi yudya mvele Mshunami ande mkazangu."

18 Betisheba niyo amgamba "Ni vedi, nenimgambile seuta ayo ulongile."

19 Ivo Betisheba amwiitilaga seuta Selemani vileke akamgambile ayo akulombeza Adoniya. Seuta enukaga niyo amsingiila nine niyo afunamiza mtwi wakwe hasi ha nine kwa kumtunya. Akajika niyo ekala he difumbi dyakwe dyo useuta, niyo alagiza nine egailwe fumbi, yehe naye niyo ekala kulume kwa seuta. 20 Niyo agamba, "Nna kint'hu kidodo cha kulombeza naho nakulombeza use kunilemela."

Seuta niyo amgamba, "Longa du mnala kwaviya hohuhige."

21 Betisheba niyo amgamba, "Goja nduguyo amlombe Abishagi kulawa Shunami."

22 Seuta niyo amgamba, "Nii wanigamba nimwink'he Abishagi ande mkaziwe?" Wadaha iviya iviya kunigamba nimwink'he useuta, mna naho uyu ni mkulu ywangu naho mlavant'hambiko Abitali na Yoabu mwana Seluya we hamwenga naye. 23 Selemani niyo akelisa kwa zina dya Zumbe akagamba, "Zumbe anikome uneva Adoniya haalihe ugima wakwe kwajili ya iki alombeze! 24 Zumbe kanitenda nitoge niyo aniika mwe difumbi dyo useuta wa tate Daudi, kakint'hiza kiya anilagane niyo anink'ha useta kwangu na welekwa wangu. Haluse nakelisa kwa zina dya Zumbe kugamba Adoniya naabanike kwa lombezo idi alombeze!"

25 Seuta Selemani amtumaga Benaya mwana Yehoyada aite akamkome Adoniya, naye niyo agenda kumkoma.

26 Seuta Selemani niyo amgamba mlavant'hambiko Abiazali, "Ita kwe nk'honde yako uko Anatoti, weye kuwagilwa kukomwa, mna hohukome ivi haluse kwaviya wandaga mndima we Disanduku dye Ndagano umwo wandaga na tate Daudi naho wandaga naye mwa makunt'ho yose." 27 Selemani amuusaga mlavant'hambiko Abiazali mwe ndima yo ulavant'hambiko kwa Zumbe, vitendile yadya alongaga Zumbe kudya Shilo mwe mbuli ya mlavant'hambiko Eli hamwenga na welekwa wakwe yakint'he.

28 Yoabu eze eve ayo yalaile anyilikilaga kwe Dihema Dikukile niyo aketozela mwe zimp'hembe ze ho kulavila nt'hambiko kwaviya amgelega ludole Adoniya, naho hiyo Abisalomu. 29 Seuta Selemani eze eve kugamba Yoabu kanyilikila kwe Dihema Dikukile naho kaketozela mwe mahembe ye kilingo cho kulavila nt'hambiko, Selemani atumaga Benaya mwana Yehoyada, akamgamba "Ita ukamkome." 30 Benaya aitaga kwo uwa, kwe Dihema Dikukile niyo amgamba Yoabu, "Seuta kagamba ufosele kuse."

Yoabu niyo ahitula, "Henifose, miye nenibanikile uuku."

Benaya auyaga kwa Seuta niyo amgambila ivo Yoabu ahitule.

31 Selemani niyo agamba, "Tenda enga iivo alongile, mkome niyo wammosela msanga. Ivo miye hamwenga na welekwa wose wa Daudi hekikalalizwe kwe mbuli ya Yoabu ya kuwakoma want'hu heweina masa. 32 Zumbe naamlihize ukomi adamanye kwaviya kawakoma Abeneli mwana Neli uyo andaga mnyamp'hala ywa watowani wa Izilaeli na Amasa mwana Yeteli mkulu ywa watowani wa Yuda, want'hu wedi kujink'ha yehe. Awakomaga haheina tate Daudi kumanya. 33 Usengelo wa masulumizo yande mwa Yoabu na welekwa wakwe mazuwa yose. Mna welekwa wa Daudi no useuta wakwe ne mp'huga yakwe nawande na utondowazi mazuwa yose kulawa kwa Zumbe."

34 Ivo Benaya aitaga kwe Dihema Dikukile niyo amkoma Yoabu niyo amoselwa msanga hagihi ne nyumba yakwe uko kwe dijangwa. 35 Seuta amwiikaga Benaya kunda mkulu ywa watowani hant'hu ha Yoabu, Sadoki mlavant'hambiko naye, aikwagwa hant'hu ha mlavant'hambiko Abiazali.

36 Naho seuta amwigailaga ulosi Shimei akamgamba, "Ukezengele nyumba uko Yelusalemu niyo wekala uuko, usekufosa mwe nyumba iyo. 37 Zuwa ukufosela mwe nyumba iyo nidyo noudendelukile mto Kidiloni, umanye ikindedi kugamba noubanike naho masa nayande mwako mwenye."

38 Shimei niyo amhitula seuta, "Ayo ulongile ni yedi. Mndima ywako naatende enga ivo zumbe seuta alongile."

39 Miyaka mitatu ize isile, watumwa waidi wa Shimei wanyilikilaga kwa Akishi mwana Maaka seuta ywa Gati. Shimei eze eve kugamba watumwa wako weyuko uko Gati, 40 aikaga lumwe imp'hunda yakwe niyo aita kwa seuta Akishi ywa uko Gati niyo eze awaone awavuzaga kwe kaya. 41 Seuta Selemani eze eve kugamba Shimei alawaga Yelusalemu niyo aita Gati na kuuya, 42 amtumilaga ulosi akamgamba, "Hya kutendile ukelise kwa zina dya Zumbe kugamba houfose Yelusalemu. Naho nakukanyaga kugamba unamlawa, ikindedi noubanike. Hwazumilaga niyo wagamba noutimile ayo nilongile? 43 Haluse nii kubananga ikilapi niyo waleka kutimila yadya nilongile?" 44 Naho seuta agendeelaga kumgamba, "Shimei kumanya vedi maihi wadamanyaga kwa tate Daudi. Zumbe naakulihize kwa ayo. 45 Mna seuta Selemani naavikilwe, useuta wa Daudi nawo noutoge kwa Zumbe mazuwa yose."

46 Seuta niyo amtuma Benaya mwana Yehoyada, naye niyo agenda kumkoma Shemei. Useuta niyo wanda utogile kwa kulongozwa ni Selemani.