1 Selemani atendaga umbuya na Falao seuta ywa Misili, kwa kumlomba mwanakike ywa seuta. Ivo amguhaga wakekale kwo mzi wa Daudi mpaka aho naabinde kuzenga inyumba yakwe ye kiseuta ne Nyumba ya Mnungu ne digomela dikuzunguluka mzi wa Yelusalemu. 2 Want'hu wandaga wakagendeela kulavila nt'hambiko hant'hu henuke hazengigwe kwaviya Nyumba ya Mnungu yandaga ikei kuzengigwa. 3 Selemani amuungisaga Zumbe kwa kutimila sigilizi za Daudi ise, mna naho achinjaga mifugwa mingi na kuilava kunda nt'hambiko hant'hu henuke hazengigwe.

4 Ivo seuta aitaga Gibioni akalavile nt'hambiko uko kwaviya kwandaga naho hant'hu henuke hazengigwe, hamanyikise ho kuvikila. Selemani alavaga maelufu ya malavo ya kokwa aho hant'hu ho kulavila nt'hambiko. 5 Kilo kiya, Zumbe amlailaga Selemani mwe zisozi uko Gibioni, naho Mnungu amgambaga Selemani, "Lombeza chochose ukuunga hwink'he."

6 Selemani niyo agamba, "Kulagisa lukunde lukulu kwa mtumwa ywako uyo tate Daudi, kwaivo ivo andaga mhuwilwa kwako na mwo uwagilwa na kunda na moyo wedi kwako. Weye nawe kulugendeleza kwakwe lukunde ulu lukulu kwa kumwink'ha mwana kilume uyo seuta hant'hu hako ivi dielo. 7 Naho haluse, Zumbe Mnungu ywangu kuniika miye mndima ywako kunda seuta hant'hu ha tate Daudi hamwenga na kugamba miye ni mdodo hikumanya dyo kudamanya. 8 Naho mtumwa ywako ni mgati mwa want'hu wako uwasagule wande wako, want'hu wabindile wingi hewe kuwazika. 9 Haluse, nink'he miye mtumwa ywako mizungu ya kuwalongoza want'hu awa kwa uwagilwa no kumanya uwedi no uwihi. Kwaviya ni ani akudaha kuwalongoza want'hu wako awa wabindile ingi?"

10 Selemani alombezaga kint'hu chedi kimwelele Zumbe, 11 Ivo Mungu niyo agamba, "Kwaviya kulombeza mizungu kuwalongoza want'hu kwa uwagilwa, hant'hu ha kulombeza kwikalisa mwe isi na ugoli hegu kubanika kwa wank'hondo wako, 12 nenitende ivo ulombeze. Nohwink'he mizungu na umanyi uwo haheina mnt'hu mtuhu apataga umwo weye wandaga ukei kunda aho, naho haalaile mtuhu enga weye umwo ukahalawa. 13 Naho, nohwink'he hata viya hwi lombeze, kwo wikazi wako wose nounde mgoli naho noutende umanyikise kujink'ha seuta yeyose mwo lupisi lwo wikazi wako. 14 Naho uneva una damanya yadya hulonga na kutimila imiko yangu ne zisigilizi zangu enga ivo adamanyaga iso Daudi, nohutende wikalise mwe isi."

15 Selemani eze enuke mwe zint'hongo akombaganyaga kugamba Mnungu alongaga naye mwe sozi. Ivo aitaga Yelusalemu niyo akimala halongole he Disanduku dye Ndagano dya Zumbe na kulava malavo ya kokwa na malavo ya utondowazi kwa Zumbe. Akajika aho awenk'haga ludyo wandima wose wo useuta wakwe.

16 Zuwa dimwenga mapamp'he waidi wezaga ha seuta Selemani. 17 Yumwenga ywa mapamp'he awo agambaga, "Zumbe seuta ywangu, miye nekala nyumba imwenga na uyu miyangu. Miye nengilaga nyumba mwana kilume umwo uyu miyangu akanda umu mwe nyumba. 18 Mazuwa matatu yeze yomboke, yehe naye engilaga nyumba mwana kilume. Chandaga ni suwe du mwe nyumba iyo, hakwandaga na mtuhu yeyose. 19 Naho umwo nekilo mwanawe abanikaga kwaviya nine amgonelaga. 20 Niho enukaga kilogati amguhaga mwanangu na kumwiika kwo lusazi lwakwe umwo miye nandile higona, niyo amwiika yudya uywakwe abanike kwo lusazi lwangu. 21 Mtondo nize ninuke vileke nimwonk'heze niho nimuone kabanika. Nize nimkaule nehibunk'hula kugamba handile ywa kwangu ningile nyumba."

22 Mna yudya mvele mtuhu agambaga, "Bule, ywa kwangu miye ni uyo mgima, uywako niye abanike!"

Yudya yumwenga naye niyo agamba, "Bule, abanike nu uywako, uywangu miye ni uyu mgima!"

Naivo wandaga wakahigana aaho ha seuta.

23 Seuta Selemani niyo agamba, "Kila yumwenga hakumzumila umwana abanike kugamba ywakwe, mna ni ywa miyawe, uywakwe nu yudya mgima." 24 Ivo seuta alagizaga bamba. Dize digalwe niyo agamba, 25 "Kakant'heni nt'hili mbili ako katiti kagima kila mvele aguhe int'hili imwenga."

26 Nine umwelesi dya katiti kagima akaungisaga akaonelaga mbazi. Ivo amgambaga seuta, "Ako katiti kagima mwink'heni du uyo mvele. Mse kukakoma!"

Mna yudya mvele mtuhu agambaga, "Bule mwana uyo ande ywangu hegu hiyo ywangu mkant'he nt'hili mbili."

27 Seuta Selemani niyo agamba, "Mwink'heni uyo mvele ywa nk'hongo ako katiti. Mse kukakoma, uyo niye nine."

28 Waizilaeli wose weze weve ivo seuta Selemani alamule, wamtunyaga niyo wamanya kugamba andaga na mizungu ya Mnungu kulamula haheina kwazagula.