1 Kwandaga na utondowazi mwe isi ya Izilaeli na Asilia kwa lupisi lwa miyaka mitatu, 2 niyo seuta Yehoshafati ywa Yuda agendaga kumtalamkila seuta Ahabu ywa Izilaeli.

3 Ahabu seuta ywa Izilaeli awagambaga wandima wakwe, "Ivi mmanya kugamba Lamoti Gileadi ni yetu naho hakinati kitende dyodyose kuivuza kwetu kulawa kwa seuta ywa Asilia?" 4 Ahabu niyo amuuza Yehoshafati, "Togola nekiitanye kwo kuitowa Lamosi Gileadi?"

Yehoshafati niyo amhitula, "Heiye nekindanye." Naho ni hamwenga ne zifalasi zangu na watowani wangu. 5 Mna naho Yehoshafati niyo amgamba Ahabu, "Goja kilombeze ulangilizi kwa Zumbe."

6 Ivo seuta Ahabu awetangaga walotezi. Wandaga want'hu wabuile magana mane niyo awauza, "Togoleni niite hatowane nk'hondo na Lamoti Gileadi hegu nisekuita?"

Walotezi wamhitulaga wakamgamba, "Katowane," "Zumbe naakwink'he ludole lwa uhumi."

7 Mna Yehoshafati niyo auza , "Hahana mlotezi mtuhu ywa Zumbe Mnungu hudaha kumuuza mwe mbuli ino?"

8 Ahabu seuta ywa Izilaeli niyo amhitula Yehoshafati akamgamba, "Akei uuko mtuhu akudaha kukilongela kwa Zumbe, Mikaya mwana Imla, mna miye hikumuunga kwaviya hanati alotele ayedi mwa miye, uyo anilotelaga yaihile du."

Yehoshafati niyo amgamba, "Usekulonga ivo!"

9 Ivo Ahabu seuta ywa Izilaeli niyo amgamba yumwenga ywa wandima wakwe, "Sunguza kumwitanga Mikaya mwana Imla!"

10 Wakanda wavala mavalo yawe ye kiseuta, Ahabu seuta ywa Izilaeli na Yehoshafati seuta ywa Yuda wahumulaga mwa mafumbi yawe ye kiseuta aho ho lwazo lwo kuhetela ngano kwe dizumba idi umwingiilo kuita Samalia. Mwo lupisi ulwo walotezi wandaga wakalotela wakanda kulongole kwawe. 11 Yumwenga mwa walotezi awo, uyo Zedekia mwana Kenaana adamanyaga mp'hembe za kilama niyo amgamba Ahabu, "Zumbe Mnungu agamba, ‘Nouwatowe ne zimp'hembe izi niyo wawahuma pele Waashulu.’" 12 Naho walotezi wose nawalonga kint'hu iicho kwa seuta ywa Izilaeli, "Kaitowe Lamoti Gileadi, naho nounde mhumi, Zumbe Mnungu naakwink'e ludole lwa kuwatowa."

13 Ivo yuadya mnt'hu atumigwe akamwitange Mikaya agambaga, "Walotezi wose walotela uhumi wa seuta. Nevindilise vedi una tenda aayo." 14 Mna Mikaya niyo agamba, "Kwa Zina dya Zumbe, nenilonge kiya Zumbe anigambile name!"

15 Mikaya eze eze abule seuta Ahabu amuuzaga, "Togola Mikaya, miye na seuta Yehoshafati kiite kikatowane nk'hondo na want'hu wa Lamoti hegu kisekuita?"

Mikaya niyo ahitula, "Iteni mkawatowe kwaviya Zumbe Mnungu naawenk'heni ludole lwa kuwahuma."

16 Mna seuta Ahabu niyo ahitula, "Nohutende kengahi ukelise kwa zina dya Zumbe kugamba nounigambile ye kindedi du?"

17 Niyo Mikaya ahitula, "Nawaona watowani wa Izilaeli wasambala mwe vigulu enga ngoto heziina mdimi. Ivo Zumbe niyo agamba, ‘Want'hu awa waswesa kilongozi, wakeuiye du kwe zikaya zawe kwa utondowazi.’"

18 Ahabu seuta ywa Izilaeli niyo agamba, "Nehiwagambilani, uyu hakudaha kunilotela ayedi, mazua yose alotela maihi du kwangu!"

19 Mikaya niyo agendela kulonga akagamba, "Tegelezeni niwagambileni kiya Zumbe anilagise. Mwa maona nehimuona Zumbe kekala mwe difumbi dyakwe dye Kiseuta, hamwenga na watumigwa wakwe wa kwe mbingu wamzunguluka. 20 Niyo Zumbe agamba, ‘Niani akudaha kumdant'hiliza Ahabu akatowane nk'hondo uko Lamoti vileke akakomigwe?’ Kila yumwenga ahitulaga kwa fanyanyi zakwe, 21 niyo kweza muye akimaalaga ha Zumbe niyo agamba, ‘Miye nehamhembeleze.’ 22 Zumbe niyo amuuza, ‘Kwa sila yani?’ Yudya muye niyo agamba, ‘Miye neniite na kuketenda muye ywa udant'hi na kuwatenda walotezi wose wamdant'hilize Ahabu.’ Zumbe niyo amgamba, ‘Weye wadaha,’ ‘Ita ukamdant'hilize.’"

23 "Zumbe niyo agela muye ywa udant'hi mwe milomo ya walotezi wako. Zumbe kakutambuila mbuli ziihile zilaile kwako!"

24 Aho mlotezi Zedekiya mwana Kenaana amsogeelaga Mikaya mlotezi niyo amsant'hula mwe funda, akamuuza, "Ni ini Muye ywa Zumbe alawaga kwangu niyo eza kulonga na weye?"

25 Mikaya niyo amhitula, "Nowize umanye mwe dizuwa idyo nowize wingile kwe chumba cha kundani ukakefisa."

26 Seuta Ahabu ywa Izilaeli niyo awagamba, "Mgwileni Mikaya niyo mwamwigala kwa Amoni mkulu ywo mzi uno na kwa Yoashi mwana seuta. 27 Wagambe wamvugaile kwe divulailo naho nk'hande yakwe neinde mkate na mzi mpaka mwe dizua idyo neniuiye vedi kulawa kwe nk'hondo."

28 Mikaya niyo amhitula, "Uneva unauya vedi, Zumbe naande halongile kwombokela miye! Mikaya niyo agendeela kulonga, Mkumbukile nyuwe nyose ivo nilongile!"

29 Seuta Ahabu ywa Izilaeli na Yehoshafati seuta ywa Yuda wegalaga watowani wawe uko kwo mzi wa Lamoti Gileadi. 30 Seuta Ahabu niyo amgamba seuta Yehoshafati, "Kikaita kwe nk'hondo, miye nenivale valo hi dya kiseuta, mna weye nouvale valo dya kiseuta." Ivo seuta ywa Ahabu ywa Izilaeli asakanyaga mavalo yakwe niyo aita kwe nk'hondo.

31 Seuta ywa Asilia awagambaga wadya wakulu wa watowani milongo mitatu na waidi wakulongoza magali ye nk'hondo wasekumtowa yeyose, mna wamtowe seuta ywa Izilaeli du. 32 Ivo wakulu wa watowani wakulongoza magali ye nk'hondo weze wamuone Yehoshafati, wagambaga ni seuta ywa Izilaeli. Wamhitukilaga vileke wamtowe. Mna Yehoshafati niyo aguta, 33 niyo wabunk'hula kugamba handaga seuta ywa Izilaeli niyo waleka kumtowa. 34 Mna mtowani yumwenga ywa Asilia alasaga kwa kutant'hila niyo msale wakwe wakumlasa Seuta Ahabu hant'hu ha mavalo yakwe ye kilama yalungane. Niyo aguta akamgamba yudya akulongoza digali dyakwe dye kink'hondo, "Hilumizwa, hitula digali kinyilike!"

35 Nk'hondo yagendeelaga msi mgima, seuta Ahabu andaga kegamizwa mwe digali dyakwe dye kink'hondo dikwigalwa ni falasi, uku akawakaula Wasilia. Sakame yalawaga mwe nk'wenge yakwe niyo yajabaza kundani kwe digali dyakwe, naho ize ibule kisingi niyo abanika. 36 Zuwa dize diswe, nokwivika ndilo watowani wakegamba, "Kila yumwenga akeuiye kwakwe na kwe isi yakwe!"

37 Ivo seuta Ahabu abanikaga niyo kimba chakwe chakumoselwa msanga uko Samalia. 38 Digali dyakwe dyasunt'hilwagwa kwe dikawa dya Samalia, makuli niyo yeza kulambita isakame yakwe seuta Ahabu, mapamp'he nawo wezaga kuhaka mazi aaho viligane na ivo Zumbe alongaga.

39 Vint'hu vituhu adamanye Ahabu, hamwenga na nyumba yakwe yahambagwa kwa ugoli wa nt'hembo ne mizi yose azengaga, viwandikwa mwe kitabu che misimo cha maseuta wa Izilaeli. 40 Ahabu seuta ywa Izilaeli eze abanike, Ahazia mwanawe andaga seuta ywa Izilaeli hant'hu ha ise.

41 Yehoshafati mwana Asa, andaga seuta ywa Yuda mwo mwaka wa kane wo kwikaila kwakwe seuta Ahabu ywa Izilaeli. 42 Yehoshafati andaga na miaka milongo mitatu na mishano umwo andaga seuta. Yehe alongozaga Yelusalemu kwa miyaka milongo miidi na mishano. Nine etangwagwa niye Azuba mwana Shilihi. 43 Naho andaga ywedi ha Zumbe Mnungu enga ivo andaga Asa uyo ise, mna hant'hu ho kulavila nt'hambiko haha molwagwa, na ivo elo want'hu wagendeelaga kulava nt'hambiko zawe na koka ubani aho. 44 Yehoshafati aikaga mwiivano wa utondowazi hamwenga ha seuta ywa Izilaeli.

45 Vint'hu vutuhu vose adamanyaga Yehoshafati, ne vint'hu vikulu vose adamanyaga no uhumi mwe zink'hondo viwandikwa mwe kitabu che misimo cha maseuta wa Yuda. 46 Naho awausaga mwe isi wagosi waketendaga enga wavele na mapamp'he, awo wandaga wakadamanya uhabwasi mwe vilingo va want'hu hewekumvika Zumbe Mnungu awo wasigalaga kukongela aho Asa uyo ise andaga aaho.

47 Isi ya Edomu yandaga heiina seuta, Isi yalongozagwa ni mwambizi asagulwagwa ni seuta Yehoshafati.

48 Yehoshafati seuta, awagambaga want'hu wadamaye meli nk'hulu zikwitangwa Talishishi ziite Ofili zikaguhe zahabu mna haziitile kwaviya nezibogozoka uko Esioni gebeli. 49 Mwo lupisi ulo Ahazia mwana Ahabu amlombezaga Yehoshafati kugamba wandima wakwe waitanye na wandima wa Yehoshafati mwe zimeli, mna Yehoshafati alemelaga.

50 Ivo Yehoshafati abanikaga niyo amoselwa msanga aho wamoselwagwa msanga wakale wakwe, ukwo kwo mzi wa Daudi. Yeholamu mwanawe niyo anda seuta hant'hu ha ise.

51 Ahazia mwana Ahabu andaga seuta ywa Izilaeli uko Samalia mwo mwaka wa mlongo na mfungate wo kwikaila kwakwe seuta Yehoshafati seuta ywa Yuda, naho alongozaga kwa miyaka miidi. 52 Atendelaga uwihi ha Zumbe, atimilaga mbuli ziihile enga ivo atendaga ise na nine, naho enga ivo atendaga seuta Yeloboamu mwana Nebati, uyo awatendaga Izilaeli watende wavu. 53 Amdamanyilaga na kumvika mnungu Baali, enga iviya atendaga ise, amtendaga Zumbe Mnungu ywa Izilaeli ande na maya.