1 Mazuwa mengi yeze yomboke, Zumbe alongaga na Eliya mwo mwaka wa katatu wo unyazi we isi akamgamba, "Ita ukakelavilize kwa Ahabu, miye nenigale fula mwe isi." 2 Ivo Eliya agendaga kukelaviliza kwa seuta Ahabu.

Gumbo nadyo dyatendesaga mwe isi ya Samalia. 3 Ahabu amwitangaga Obadia, andaga mnyamp'hala ywe ikulu. Obadia andaga ni mviki mnyamp'hala ywa Zumbe Mnungu. 4 Umwo Yezebeli awakomaga walotezi wa Zumbe, Obadia awaguhaga walotezi gana dimwenga niyo agenda kuwafisa kwe zimp'hanga. Awapangaga vifyo viidi va want'hu milongo mishano kila kafyo, naho kila mp'hanga yandaga na want'hu milongo mishano. Andaga akawenk'ha mikate na mazi yo kunywa. 5 Ahabu niyo amgamba Obadia, "Gendela isi yose, kwe vizuto na makolongo, mafani chadaha kupata mani ya kudimila zifalasi zetu ne zimp'hunda, naivo mafani chadaha kuzihonya no kufa naivo hekiungigwe kizikome." 6 Ivo wakepangilaga isi waungaga wakakaule amani yo kudimila, ivo Ahabu na Obadia kila yumwenga ahingaga kwakwe.

7 Umwo Obadia andaga mwo utafi aduganaga na Eliya. Obadia amanyaga kugamba ni Eliya. Afunamizaga kihanga chakwe ha Eliya niyo agamba, "Ivi ni weye zumbe ywangu Eliya?"

8 Eliya niyo amhitula, "Heiye ni miye, haluse ita ukamgambile zumbe ywako kugamba miye ni aha."

9 Obadia niyo amhitula, "Miye hibanangai we ukuunga hakomigwe ni seuta Ahabu? 10 Nakelisa kwa zina dya Mnungu ywako kugamba, seuta naakakuzungula weye mwe si yose, naho uneva mnyamp'hala ywe isi iyo nakagamba huhali mwe isi yakwe, Ahabu nakamuunga akelise kugamba ni kindedi huhali. 11 Haluse weye waunga miye hamgambile kugamba weye ywi aha! 12 Nevinde vihi uneva miye nna halawa niyo Muye ywa Mnungu akwinula na kukwigala hant'hu hihamanyize! Nnagenda kumgambila Ahabu kugamba weye ywi aha, naye niyo akuzungula. Hana kuone naanikome. Kumbukila kugamba miye hinda mviki ywa Mnungu kukongela udodo wangu. 13 Weye hwivile kugamba umwo Yezebeli andaga akawakoma walotezi wa Zumbe, miye nawafisaga walotezi gana dimwenga mwe vifyo va want'hu milongo mishano kila kamwenga, niyo nawenk'ha nk'hande na mazi yo kunywa? 14 Haluse wanigamba naho niite hamgambe weye ywi aha vileke Ahabu haanikome!"

15 Eliya niyo amgamba, "Nakelisa kwa zina dya Zumbe Mnungu mta udahi, dielo nakelaviiza mwenye kwa seuta."

16 Ivo Obadia agendaga kumgambila seuta Ahabu kugamba Eliya eyaha. Ahabu naye agendaga kumuwona Eliya. 17 Ahabu eze amuone Eliya, niyo amgamba, "Ivi ni weye ukugela makunt'ho mwe isi ya Izilaeli!"

18 Eliya niyo amhitula, "Hiyo miye hwigala makunt'ho mwe isi, mna ni weye ne mp'huga ya iso iyo ikuvika mahili yenyu ya Baali. 19 Haluse wagambe want'hu wose wa Izilaeli nidugane nawo kudya kwo mnima Kalimeli, hamwenga na walotezi magana mane na milongo mishano wa Baali hamwenga na wadya walotezi milongo mine wa Ashela mnungu mvele wakwikala ho ludyo hamwenga na Yezebeli."

20 Ivo Ahabu awetangaga Waizilaeli wose na walotezi wa Baali wadugane kwo mnima Kalimeli. 21 Eliya awabasaga want'hu awo niyo awagamba, "Nyuwe nomkeuzeuze hata ini mwa Mnungu? Uneva Zumbe Mnungu niye Mnungu, mvikeni yehe, naho uneva Baali niye mnungu mvikeni!" Mna want'hu awo hawalongile dyodyose. 22 Ni miye du mlotezi ywa Mnungu nisigale, mna weyaha walotezi wa Baali magana mane na milongo mishano. 23 Kink'heni njeku mbili. Walotezi wa Baali waguhe imwenga name niguhe imwenga. Waichinje niyo waidangadanga na kuika mwe zink'huni mna wase kuitimp'ha moto. Miye name nenitende iivo kwe dijeku dituhu. 24 Akajika walombeze kwa Mnungu ywawe name nenilombeze kwa Mnungu ywangu. Uyo akuunga alete uhituzi kwa kwigala moto, niye Mnungu ywe kindedi.

Want'hu wose kwa izwi kulu niyo wagamba, "Taile."

25 Niyo Eliya awagamba walotezi wa Baali, "Kwaviya nyuwe mbinda wingi, kongeni nyuwe, kesaguileni jeku niyo mwadiikila lumwe. Mlombezeni Mnungu ywenyu, mna mse kutimp'ha moto mwe zink'huni."

26 Walotezi awo waguhaga dijeku diya wegailwe niyo wadichinja na kudiikila lumwe niyo wakonga kumlombeza mnungu Baali kulawa mtondo mpaka nomsi wakazunguluka na kuvina wakakelongela he kilingo, "Baali kink'he uhituzi!" Mna hakwandaga na uhituzi.

27 Ize ibule nomsi Eliya akongaga kuwatendela lubezo akawagamba, "Lombezeni kwa izwi kulu! Yehe mnungu, mafa naakalota hegu emwe zifanyanyi zakwe, hegu kanda kuzunguluka! Mafani kagona, mwinuleni!" 28 Walotezi awo walombezaga kwa izwi kulu na kukesenga ne zingola na mabamba yawe yakutwa kose kose viligane ne vihendo vawe na kwitila sakame. 29 Wagendeelaga kubongeela enga want'hu wakilalu mpaka kisingi mwo lupisi lwo kulava nt'hambiko. Hakwandaga na yeyose ahitulaga naho hakwandaga na yeyose akaulaga.

30 Aho Eliya niyo awagamba want'hu, "Nisogeeleni hagihi." Wose wamsogeela hagihi wakamzunguluka. Eliya niyo azenga uhya kilingo cha Zumbe Mnungu cho kulavila nt'hambiko icho chamolwagwa. 31 Eliya aguhaga maiwe mlongo na maidi dimwenga kwa kila kabila dya wana wa Yakobo uyo enk'higwe ni Zumbe zina dya Izilaeli. 32 Azengaga kilingo cha kumvika Zumbe kwa maiwe ayo. Asimbaga mkologombe uzunguluke ikilingo icho. Wandaga mkologombe mkulu wengilaga debe dimwenga na nusu dya mazi. 33 Apangaga vedi zink'huni mwe kilingo icho, niyo adangadanga inyama ye dijeku akajika azipanga zinyama mwe zink'huni, niyo awagamba, "Memezeni madebe mane ya mazi niyo mwayetila mwe nt'hambiko na mwe zink'huni." 34 Naho niyo awagamba, "Vuzagizeni, niyo wavuzagiza, awagamba naho, tendeni iivo naho." Niyo watenda. 35 Mazi yaseelaga niyo yamemeza umkologombe.

36 Ize ibule lupisi lwo kulava nt'hambikoika lwa mlotezi Eliya, asogeelaga he kilingo cho kulavila nt'hambiko niyo alombeza akagamba, "Weye! Zumbe, Mnungu ywa Abulahamu, ywa Isaka, ywa Yakobo, neimanyike ivi dielo kugamba ni weye Mnungu mwa Izilaeli, naho kugamba miye ni mndima ywako, name hidamanya ayo yose kwaviya nivo ulongile. 37 Nink'he uhituzi Zumbe, nink'he uhituzi vileke want'hu awa wamanye kugamba, weye Zumbe Mnungu ni weye Mnungu, naho waivuza mioyo yawe ikuuiye."

38 Zumbe aselezaga moto niyo woka int'hambiko yo kokwa pele ne zink'huni na maiwe no ulongo, niyo wanyaza na amazi yandile mwo mkologombe. 39 Want'hu wose weze waone viya, wagonaga hasi kigubugubi wakagamba, "Zumbe niye Mnungu, Zumbe niye Mnungu!"

40 Eliya niyo agamba, "Wagwileni walotezi wa Baali wose, msekulekela hata yumwenga anyilike!" Walotezi awo wagwilwagwa niyo Eliya awegala kwa kazuto ka Kishoni na kuwakomela uko.

41 Eliya niyo amgamba seuta Ahabu, "Haluse ita ukadye na kunywa kwaviya neva sindo ya fula nk'hulu." 42 Ahabu agendaga kudya nk'hande, mna Eliya akwelaga kwo mnima wa Kalimeli. Ukwo afunamizaga mtwi wakwe hasi, mtwi wakwe ukanda hagati ha mavindi yakwe. 43 Eliya niyo amgamba mndima ywakwe, "Ita ukakaule kudya kwe bahali."

Yudya mndima aitaga niyo auya na kumgamba, "Hiyone kint'hu." Eliya amtumaga mndima ywakwe nk'hanana mfungate ukwo kwo kukaula. 44 Nk'hanana ya mfungate eze auye, agambaga, "Hiona kavunde kadodo enga kifumba cha mkono wa mnt'hu kakusomoka kulawa kwe bahali."

Eliya niyo amtuma mndima ywakwe akamgamba, "Ita kwa seuta kamgambe akwele mwe digali dyakwe dikugendezwa ni zifalasi auye kaya iivi fula ikei kumkindila."

45 Lupisi lugihi ulanga wagubikagwa ni mavunde yatitihale, mp'heho niyo yakonga kuvumila niyo fula nk'hulu yakonga kunya. Ahabu engilaga mwe digali dyakwe dikugendezwa ni zifalasi na kukonga kuuya uko Yezileeli. 46 Udahi wa Zumbe wamwiziilaga Eliya niyo akaka isuke yakwe mwe kigudi na kuguluka kulongole kwa Ahabu kwingila kwo mzi wa Yezileeli.