1 Ivo Eliya uyo andaga mlotezi ywa Mnungu kulawa Tishibe uko Gileadi amgambaga Ahabu, "Kwa zina dya Zumbe Mnungu ywa Izilaeli uyo eli mgima humvika, iki nicho hukugambila. Hokunde na mnyuzu hegu fula kwa miyaka ino migeke, mpaka nilonge mbuli."

2 Zumbe niyo amgamba Eliya, 3 "Haluse, uhalawe aha uhinge nt'hendelo ya ulailo wa zuwa ukakefise kwa kazuto ka Kiliti ulailo wa zuwa wa Yolodani. 4 Nounywe mazi ya mwa kazuto, naho hiyagamba makungulu yakwigailage nk'hande."

5 Eliya atendaga enga ivo Zumbe amsigiilaga. Aitaga kwa kazuto ka Keliti, ke ulailo wa zuwa Yolodani. 6 Makungulu yandaga yakamwigaila mkate na nyama kila mtondo na nekisingi, naho andaga akanywa mazi yalawaga mwa kazuto. 7 Mna kadya kazuto kanyalaga kwa lupisi du kwaviya hakwandaga na fula mwe isi.

8 Niyo Zumbe amgamba mlotezi Eliya, 9 "Haluse uite Zalepita kwo mzi wa Sidoni, ukekale kudya, kwaviya himsigiila mvele yumwenga abanikilwe ni mgosiwe, yehe niye naakwink'he nk'hande." 10 Ivo Eliya aitaga uko Zelefita. Eze abule he nk'hili yo mzi, amuonaga mvele abanikilwe ni mgosiwe andaga akalogota nk'huni. Eliya niyo amgamba yudya mvele, "Nink'hage wazizi ninywe." 11 Umwo yudya mvele andaga akaita kwo kuguha mazi, Eliya niyo amwitanga naho akamgamba, "Nink'hage kabesu ka mkate."

12 Yudya mvele niyo ahitula, "Nakelisa kwa zina dya Zumbe Mnungu ywako kugamba hina chochose. Mna kifumba kimwenga du cho unga na wavuta wadodo, mwe supa. Hiza aha nilogote wakuni niwegale kaya, hambike icho kidodo nidye na mwanangu vileke kibanike kwajili ya sala."

13 Eliya niyo amgamba yudya mvele, "Usekogoha, kadamanye enga ivo ulongile, mna nk'hongo unde kunidamanyila miye kakate kadodo, akajika kedamanyile weye na mwanao. 14 Kwaviya Zumbe Mnungu, Mnungu ywa Izilaeli kagamba, ‘Unga houhunguke mwe nyungu yako hegu mavuta kusila mwe supa yako, mpaka mwe dizuwa aho Zumbe neegale fula mwe isi.’"

15 Yudya mvele abanikilwe ni mgosiwe agendaga kutenda enga ivo agambilwe ni Eliya. Mna wose mwe nyumba hawahungukilwagwa ni nk'hande kwa mazuwa yose. 16 Unga hawahungukaga mwe nyungu, mavuta nayo hayahunguke mwe supa, Ivi viligana no ulosi alongile Zumbe Mnungu kwombokela mlotezi Eliya.

17 Lupisi ludodo lwize lwomboke, yudya umwana ywo mvele uyo, andaga mnyonge naho alumiswagwa niyo abanika. 18 Yudya mvele niyo amgamba Eliya, "Nii ukanitendela ivi weye mnt'hu ywa Mnungu? Kwiza kwangu vileke ubunk'hule wavu wangu na kuleka mwanangu abanike?"

19 Eliya niyo agamba, "Nink'he uyo umwana." Eliya ahokelaga uyo mwana kulawa kwa nine, niyo aita naye kwe chumba icho naakekala cha kulanga ye nyumba na kumtambalika mwo lusazi. 20 Eliya niyo alombeza kwa izwi kulu akagamba, "Ha, Zumbe, Mnungu ywangu, kumwigaila vuma kwa kumkoma mwanawe mvele uyu abanikilwe ni mgosiwe uyo miye hwikala kwawe!" 21 Eliya akelambalikaga mnanga nk'hanana nt'hatu mwo mwana uyo uku akalombeza akagamba, "Ha, Zumbe, Mnungu ywangu, mvuzile ugima umwana uyu!" 22 Zumbe ategelazaga kulombeza kwa Eliya niyo ugima wamuuiya naho yudya mwana niyo akonga kuhema naho.

23 Eliya amvuzaga yudya mwana kulawa kwe chumba cha kulanga che nyumba, na kumwink'hiza kwa nine, niyo agamba, "Kaula mwanao mgima!"

24 Ivo yudya mvele niyo amgamba Eliya, "Haluse himanya kugamba ywi mnt'hu ywa Mnungu ni kindedi Zumbe alonga na weye!"