1 Zumbe alongaga na Yehu mwana Hanani niyo amwink'ha ulosi amwigaile Baasha kugamba, 2 "Miye nehikwink'ha nt'hogola weye wandile ywa kubelwa, niyo nakutenda kilongozi ywa want'hu wangu Waizilaeli, mna niyo watenda wavu enga ni Yeloboamu niyo wawatenda want'hu wanitendela wavu miye, wavu wawe wimula maya yangu, 3 haluse nohubanange pele weye ne mp'huga yako enga ivo nimkomile pele Yeloboamu mwana Nebati ne mp'huga yakwe. 4 Want'hu we mp'huga ya Baasha nawabanikile mwo mzi, vimba vawe nevidigwe ni makuli, wadya nawabanikile kwe zink'honde vimba vawe nevidigwe ni madege."

5 Kila kint'hu kituhu adamanye Baasha, no udahi wakwe wose viwandikwa mwe kitabu che misimo ya maseuta wa Izilaeli. 6 Baasha abanikaga niyo amoselwa msanga uko Tiliza. Mwanawe Ela niyo anda seuta hant'hu ha ise.

7 Ulosi uwo wa Zumbe alongaga na mlotezi Yehu mwana Hanani, kwaviya Baasha ne mp'huga yakwe wamtendelaga wavu Zumbe. Wavu uwo wamtendaga Zumbe Mnungu ande na maya. Amtimilizaga Yeloboamu ne mp'huga yakwe ivo watendaga, mna naho kwaviya kaleka imp'huga yakwe ikomigwa pele.

8 Mwo mwaka wa milongo miidi na mtandatu yo kwikaila kwakwe seuta Asa ywa Yuda, Ela mwana Baasha niho akongaga kunda seuta ywa Izilaeli uko Tiliza, alongozaga kwa miaka miidi. 9 Zimli yumwenga mwa wandima wakwe seuta Ela uyo andaga akalongoza inusu ya magali yakwe ye nk'hondo yandaga yakugendezwa ni zifalasi, amsezengaga. Zuwa dimwenga, umwo Ela andaga uko Tiliza akanywa mp'hombe akolwagwa uko kwe nyumba ya Alisa uyo andaga mnyamp'hala ywe nyumba ye kiseuta. 10 Zimli engilaga kwe nyumba iyo ya Alisa niyo amkoma. Ino yalailaga mwo mwaka wa milongo miidi na mfungate wo useuta wa Alisa uko Yuda.

11 Ivo Zimli eze ande seuta, awakomaga want'hu wose we mp'huga ya Baasha. hasigazaga mgosi yeyose mwe mp'huga yakwe na hata mwa wambuyaze. 12 Ivo Zimli awakomaga want'hu wose we mp'huga ya Baasha viligane no ulosi wa Zumbe uwo alongaga kwe mbuli ya Baasha kwombokela mlotezi ywakwe Yehu, 13 kwajili yo wavu wose wadamanye Baasha na mwanawe Ela. Wamtendaga Zumbe Mnungu ywa Izilaeli ande na maya kwa kuyavika mahili yawe. 14 Mbuli zint'huhu zose adamanye Ela ziwandikwa mwe kitabu che misimo cha maseuta wa Izilaeli.

15 Zimli akongaga kunda seuta ywa Izilaeli uko Tiliza kwa mazuwa mfungate mwo mwaka wa milongo miidi na mfungate mwo useuta wa Asa ywa Yuda. Ivo watowani wa izilaeli waikanga nk'hambi wakauzunguluka mzi wa Gibetoni umzi wa Wafilisiti. 16 Naho watowani wa Waizilaeli weze weve kugamba Zimli kamsezenga seuta Ela naho kamkoma, Waizilaeli wose mwe dizua iidyo mwe nk'hambi iyo, wamtendaga Omli uyo mnyamp'hala ywa watowani kunda seuta ywa Izilaeli. 17 Omli na watowani wakwe wahalawaga Gibetoni niyo wagenda kuuzungulukila mzi wa Tiliza. 18 Zimli eze anone kugamba umzi uzungulukilwa, engilaga kundani kwe digomela dya kundani dye nyumba ye kiseuta niyo aitimp'ha moto inyumba iyo, yehe naye niyo abanikila uumwo, 19 kwajili yo wavu autendaga ha Zumbe, enga udya atendaga Yeloboamu, naho kwo wavu uwo awatendaga Waizilaeli nawo watende wavu. 20 Naho mbuli zose adamanye Zimli no usezengi wakwe, yose yawandikwa mwe kitabu misimo ya maseuta wa Izilaeli.

21 Aho niyo Waizilaeli wakepanganizaga mafyo maidi, wamwenga wamtimilaga Tibini mwana Ginati kunda seuta ywawe, watuhu nawo wamtimilaga Omli kuda seuta ywawe. 22 Niyo wadya wose wamtimile Omli wawahuma wadya wakumtimila Tibini mwana Ginati. Ivo Tibini mwana Ginati abanikaga. Omli niyo anda seuta. 23 Mwo mwaka wa milongo mitatu na umwenga wo useuta wa Asa ywa Yuda, Omli niho akongaga kunda seuta ywa Izilaeli. Andaga seuta kwa miaka mlongo na miidi. Miaka mtandatu mwa iyo andaga uko Tiliza. 24 Naho agulaga lugulu lwa Samalia kwa vibesu alufu mtandatu va masawa kwa mnt'hu yumwenga etangwagwa Shemeli, niyo azenga mzi kwo lunenengwa lwo lugulu ulo. Mzi uwo awink'haga zina nuwo Samalia, zina idyo ni dya mwenye mta lugulu ulo.

25 Omli atendaga wavu ha Zumbe, atendaga wavu wiihise kujink'ha maseuta wose wamlongoele. 26 Adamanyaga wavu uudya adamanyaga Yeloboamu mwana Nebati, niyo awatenda Izilaeli watende wavu, ivo wamtendaga Zumbe Mnungu ywa Izilaeli ande na maya kwa kuvika milungu ya mahili. 27 Zimbuli zint'huhu adamanye Omli no udahi alagise, vose viwandikwa mwe kitabu che misimo cha maseuta wa Izilaeli. 28 Omli abanikaga niyo amoselwa msanga aho Samalia. Ahabu mwanawe andaga seuta ywa Izilaeli hant'hu ha ise.

29 Mwo mwaka wa milongo mitatu na mnane wo useuta wa Asa ywa Yuda, Ahabu mwana Omli akongaga kunda seuta ywa Izilaeli. Yehe andaga seuta kwa miyaka milongo miidi na miidi. 30 Yehe naye adamanyisaga wavu ha Zumbe kujink'ha maseuta wose wamlongoele. 31 Naho hiyo du kwa kutimila wavu wa seuta Yeloboamu mwana Nebati, mna naho amlombaga Yezebeli mwana seuta Etibaali ywa Wasidoni niyo agenda kuvika milungu ya Baali. 32 Amzengelaga Baali nyumba ya kuvika naho kundani kwakwe adamanyaga kilingo cho kulavila nt'hambiko uko Samalia. 33 Iviyaiviya adamanyaga hili dya Ashela, mnungu mvele. Adamanyaga maihi mengi kujink'ha maseuta wose wa Izilaeli, maihi yemulaga maya ya Zumbe, Zumbe Mnungu ywa Izilaeli. 34 Mwo lupisi lwo useuta wakwe, Hieli ywa Beseli auzengaga uhya mzi wa Yeliko. Enga ivo alongaga Zumbe kwombokela kwa Yoshua mwana Nuni. Hieli abanikilwagwa ni mwanawe nt'hulasasu akwitangwa Abilamu umwo akazenga zink'hongelo za Yeliko, naho umwo andaga akazenga zink'hili zakwe, abanikilwagwa ni mwanawe Segubu ikiziwanda chakwe.