1 Seuta Daudi adalahalisaga, naho mwo lupisi lwose aonaga mp'heho hamwenga na kugamba wandima wakwe wamgubikaga na suke zizamile mna agendeelaga kuona mp'heho. 2 Ivo wandima wakwe niyo wamgamba, "Zumbe seuta ywetu, nevinde vedi kikuzunguile mndele mwikalanye na kukulela, mgonanye vileke akubwikanize." 3 Ivo wamzunguilaga mndele mwe isi yose ya Izilaeli, niyo wampata mndele ahombweele Abishagi akwikala Shunami, niyo wamwigala kwa seuta. 4 Andaga mndele ahombweele. Andaga akamdamanyila ndima na kumlela seuta, mna seuta hagonaga naye enga mkaziwe.

5 Mwo lupisi ulo Adoniya mwana seuta Daudi amwelekaga kwa Hagiti akeduvyisaga akagamba, yehe naande seuta. Ivo akeikeikilaga lumwe magali yakugendezwa ni falasi, na want'hu milongo mishano wakuunga wamlongoele wakaguluka. 6 Ise naye hamuuzaga du kugamba, "Nii ukatenda ivo?" Adoniya andaga mbwanga mta futa yedi naho niye amtimilaga Abisalomu mwo kwelekwa. 7 Adoniya akelangilizaga na Yoabu mwana Seluya na mlava nt'hambiko Abiazali niyo wamzumila Adoniya na kumwink'ha wambizi. 8 Mna Zadoki mlavant'hambiko na Benaya mwana Yehoyada na Natani mlotezi na Shimei na Lei na wamizi wa Daudi awo hawandaga hamwenga na Adoniya. 9 Niho zuwa dimwenga Adoniya alavaga nt'hambiko ya ngoto, njeku na ndama zigimbale uko kwo Luwe lwa Zohelesi nuko kugamba luwe lwa nyoka, hagihi ne nc'hoko ikwitangwa Enilongeli. Kwo ludyo ulo awalalikaga wanduguze wose, wana seuta na wandima wose wa seuta wandaga we dikabila dya Yuda, 10 mna hawalalike mlotezi awo Nasani na Benaya na wamizi wamanyike wa seuta hegu hata Solomoni uyo nduguye.

11 Nasani niyo aita kwa Batisheba, uyo nine dya Selemani niyo amgamba, "Weye hwivile kugamba Adoniya mwana Hagiti kakeika mwenye kunda seuta, naho seuta Daudi haimanyize imbuli iyo! 12 Haluse uneva waunga uyokole ugima wako na wa Selemani mwanao nakulangiliza kugamba, 13 sunguza kuita kwa seuta Daudi ukamuuze, ‘Togola zumbe dyangu seuta weye hwani ikile kilapi miye mndima ywako ukagamba, Selemani mwanangu niye naande mkipe wo useuta wako? Vinda vivihi naho kugamba Adoniya kanda seuta?’" 14 "Naho umwo ukanda ukei walonga na seuta Daudi miye nenize nilonge uwona mwo ulosi wako kugamba ni kindedi."

15 Ivo Betisheba agendaga kumkaula seuta kwe chumba chakwe, naho andaga kadalahalisa yudya mndele Abishagi kulawa Shunamu andaga akamdamanyila na kumlela. 16 Betisheba afunamizaga mtwi wakwe kwa kumtunya seuta, seuta niyo amuuza, "Waungai?"

17 Betisheba niyo amhitula, "Zumbe dyangu, weye hwaniikilaga kilapi kwa Zina dya Zumbe Mnungu ywako kugamba mwanangu Selemani niye naande seuta hant'hu hako. 18 Haluse elo, Adoniya kanda seuta, ikanda weye zumbe dyangu seuta huimanyize imbuli ino. 19 Kalava nt'hambiko ya njeku, ndama zigimbale na ngoto, naho kawalalika weze kwo ludyo wana wose wa kilume wa mlavant'hambiko Abizali na Yoabu mnyamp'hala ywa watowani wako, mna hamlalike mwanao Selemani. 20 Zumbe dyangu seuta, want'hu wose wa Izilaeli wakukaula weye uwagambile kugamba niani akuunga ande mkipe ywo useuta wako. 21 Mna hunatendile ivo, ukeza kubanika miye na mwanao Selemani nekitendelwe enga wata masa."

22 Ivo mvele uyo umwo andaga akalonga na seuta, mlotezi Natani naye engilaga. 23 Seuta Daudi agambilwagwa kugamba mlotezi Natani keza. Ivo mlotezi engilaga kundani halongole ha seuta niyo afunamiza mtwi wakwe hasi kwa kumtunya, 24 niyo agamba, "Zumbe dyangu seuta, weye nokugamba, ‘Adoniya neekaile aho miye hahalawa, naho neekale mwe difumbi dyangu dyo useuta?’ 25 Mwe dizuwa idi kagenda kulava nt'hambiko ya njeku nyingi, ngoto na nyama zigimbale. Nakawalalika wana wose we kilume, wakulu wa watowani na Abiatali mlavant'hambiko. Hake kaula ivi haluse we ho ludyo hamwenga na yehe, wakagamba, ‘Wongezelwe wikazi wako weye seuta Adoniya!’ 26 Mna miye mndima ywako na mlavant'hambiko Zadoki, Benaya mwana Yahoyada na mndima ywako Selemani hakilalikwe. 27 Zumbe dyangu seuta, kuitenda imbuli ino haheina kuwagambila wandima wako kugamba ni ani akuunga ekaile difumbi dyako aho ukeza kubanika?"

28 Aho naho seuta Daudi ahitulaga akagamba, "Hake nitangile Batisheba eze." Ivo Batisheba ezaga niyo akimaala ha seuta. 29 Ivo seuta niyo amgamba, "Nakelisa kwa Zumbe Mnungu mta ugima yehe aniyokole miye kulawa mwa makunt'ho yangu yose, 30 ikindedi diyelo nenitende enga ivo huikile kilapi kwa zina dya Zumbe Mnungu ywa Izilaeli, kugamba mwanao Selemani niye neekaile, naho naande seuta aho miye heza kubanika."

31 Niho Belisheba afunamizaga mtwi wakwe hasi kwa kumtunya, hadya eli seuta niyo agamba, "Zumbe dyangu seuta Daudi wongezelwe wikazi wako!"

32 Seuta Daudi naye niyo agamba, "Nitangileni mlavant'hambiko Sadoki na mlotezi Nasani na Benaya mwana Yehoyada." Woho nawo niyo weza ha seuta. 33 Seuta naye awagambaga, "Itanyeni na wakulu wa wandima wangu naho mwiite na Selemani mwanangu mumkweze mwe falasi yangu mwenye, niyo mwamsindikiza kuseleza kwe nch'oko ya Gihoni, 34 uko mlavant'hambilo Sadoki na mlotezi Natani nawamwiike kwa ndima yo useuta wa Izilaeli yose kwa mhaka mavuta. Akajika toweni magunda niyo mwabongeela mkagamba, ‘Unde na wikazi wa mazuwa yose seuta Selemani!’ 35 Niho nomkwele naye mkamtimila, niyo eza kwikala he difumbi dyangu dyo useuta miye habanika naho neekaile Izilaeli na Yuda."

36 Ivo Benaya mwana Yehoyada amhitulaga seuta akagamba, "Taile! Neinde iivo naho chamlombeza Zumbe ywako akint'hize aya. 37 Enga ivo Zumbe andaga na zumbe ywangu seuta, ande iivo na Selemani akuze useuta wakwe kujink'ha useuta wa Daudi!"

38 Ivo mlavant'hambiko Sadoki na mlotezi Natani na Benaya na Wakeleti na Wapeleti, wose waseelaga niyo wamkweza Selemani mwe falasi ya seuta Daudi niyo wamwigala mpaka Gihoni. 39 Ivo mlavant'hambiko Sadoki aguhaga imp'hembe ya mavuta ya mzaituni iyo aguhaga kwe dihema Dikukile niyo amhaka Selemani. Watowaga magunda, want'hu wose nawo wabongeelaga wakagamba, "Seuta Selemani wikazi wako wikalise!" 40 Naho want'hu wose wakwelaga wakamtimila wakatowa miluli yawe wakanga kwa izwi kulu vitendile sanga yose isingisike.

41 Umwo Adonia na want'hu wose andaga nawo wakabindiliza uludyo lwawe,wevaga want'hu wakabongeela. Yoabu eze eve maizwi ya magunda auzaga, "Ukubongeela kwa want'hu mwe kaya niyo imbwai?" 42 Umwo andaga akei kubinda ukulonga Yonatani mwana mlavant'hambiko Abiatali ezaga, niyo Adoniya amgamba, "Ingila kwaviya umnt'hu ywedi ukwigala mbuli yedi."

43 Yonatani niyo ahitula akamgamba Adoniya, "Bule!" Ni kwaviya zumbe seuta ywetu Daudi kamtenda Selemani kunda seuta. 44 Naho seuta amtumaga mlavant'hambiko Sadoki na mlotezi Natani, Benaya mwana Yehoyada na Wakeleti na Wapeleti niyo wamkweza mwe falasi ya seuta, 45 Mlavant'hambiko Sadoki na Natani mlotezi nawo wagendaga kumgela mavuta kunda seuta uko Gihoni niyo wahalawa aho wakanga. Nuko ukubongeela ukwivile. 46 Naho haluse Selemani kanda seuta. 47 Yakujink'ha ayo wakulu wa mwo useuta weza kumtogola zumbe seuta ywetu wakamgamba, Mnungu ywako aditende dizina dya Selemani dimanyikise kujink'ha idyako naho autende useuta wakwe kunda mkulu kujink'ha uwako, naho seuta afunamaga ho lusazi niyo amvika Mnungu, 48 niyo agamba, Zumbe Mnungu ywa Izilaeli uyo anitendile dielo nimuone uyo akunda seuta hant'hu hangu atogolwe!

49 Niho want'hu wose walalikwagwa ni Adoniya wogohaga niyo wenuka na kuhalawa kila yumwenga kwa sila yakwe. 50 Adonia amwogohaga Selemani, ivo aitaga kwe dihema Dikukile niyo azitoza mahembe ye kilingo cho kulavila nt'hambiko vileke asekukomwa. 51 Seuta Selemani agambilagwa kugamba Adoniya amwogoha naho kanyilikila kwe dihema dikukile, kaketozela mwe mahembe ye kilingo cho kulavila nt'hambiko akagamba, "Seuta Selemani akelisa kugamba haanikome."

52 Seuta Selemani niyo ahitula kugamba, "Uneva nna muwona kunda mhuwilwa heiina masa haakomwe, mna hana ndile ivo naakomwe." 53 Ivo seuta Selemani atumaga want'hu niyo wagenda kumseleza Adoniya kulawa he Dihema Dikukile. Adoniya naye ezaga na kufunamiza mtwi wakwe hasi aho ha seuta Selemani, Selemani naye niyo amgamba, "Keitile kwe kaya yako."