1 Naboti mkaya ywa Yezeleeli andaga na nk'honde yakwe ye mizabibu, hagihi ne ikulu ya Ahabu seuta wa Samalia. 2 Ivo zuwa dimwenga Ahabu amgambaga Naboti, "Nink'he miye ink'honde yako ino kwaviya ihagihi ne nyumba yangu ye kiseuta. Naunga nihande mboga. Nohwink'he nk'honde yedi ya mizabibu hegu ukaunga nohulihe matundu yedi."

3 Naboti niyo amhitula, "Nk'onde ino ni ukipe kulawa kwa wakale wangu, naungwa kuikaulisa. Zumbe Mnungu aikunt'hile hale imbuli ino ya miye kuink'hiza ink'honde ino kwako!"

4 Ivo Ahabu auyaga kwe kaya akanda na kinyulu na maya kwaviya Naboti mkaya ywa Yezileeli nakamgamba haamwink'he ink'honde idya asilwe ukipe ni wakale wakwe. Atambaalaga mwo lusazi lwakwe akahitukila kunk'handa naho haungaga hata ukudya. 5 Yezebeli uyo mkaziwe agendaga kumuuza, "Weye nii una kinyulu naho hukuunga ukudya?"

6 Ahabu niyo ahitula, "Kwaviya nehisimuila na Naboti mkaya ywa Yezileeli anitagile ink'honde yakwe ye mizabibu hegu akaunga nehamwink'ha nk'honde nt'huhu ya mizabibu. Mna yehe niyo anigamba hakudaha kunink'ha ink'honde yakwe iyo!"

7 Yezebeli uyo mkaziwe niyo amgamba, "Vedi, weye ywi seuta ywa Izilaeli hegu vihi? Usangaale. Miye nohwink'he ink'honde ya Naboti mkaya ywa Yezileeli!"

8 Ivo Yezebeli awandikaga baluwa zibindile wingi na kuzigela kiwalo cha seuta, Azigalaga zibaluwa izo kwa wadala na vilonozi wamanyikise wandaga wakekala na Naboti mwo mzi wakwe. 9 Mwe zibaluwa izo awandikaga ivi, "Walalikeni want'hu vileke wafunge, wasekudya chochose, uyo Naboti aikwe hant'hu ha nt'hunyo ho mdugano. 10 Mkaguhe want'hu waidi waihile wakamlongeleze na kulonga uwona kugamba, yehe kamhomola Mnungu na seuta. Akajika mlaveni mwo mzi mmwigale kuse mumtowe maiwe abanike."

11 Ivo wakaya weyewe Naboti. wadala na want'hu wamanyikise wo mzi wa Yezebeli watendaga enga ivo walagizwe ni Yezebeli mwe zibaluwa zakwe. 12 Wawalalikaga zuwa dya mfungo niyo wamwiika Naboti hant'hu ha nt'hunyo ha want'hu. 13 Awo want'hu waidi waihile wamlongelezaga kugamba amhomolaga Mnungu na seuta. Ivo niyo Naboti alavigwa kuse yo mzi na kutoigwa maiwe na kubanika. 14 Yezebeli agambilwagwa kugamba, "Naboti katoigwa maiwe niyo abanika."

15 Yezebeli eze eve ayo, asunguzaga kugenda kumgambila seuta Ahabu akamgamba, "Naboti kabanika. Haluse genda kaguhe ink'honde yakwe ye mizabibu idya alemelaga kukutagila." 16 Naho aaho Ahabu eze eve kugamba Naboti kabanika asunguzaga kugenda kuiguha ink'honde idya ya mizabibu.

17 Ivo Zumbe Mnungu alongaga na mlotezi Eliya ywa Tishibe akamgamba, 18 "Ita kwa seuta Ahabu ywa Izilaeli uyo akwikala Samalia, noukambwiile kwe nk'honde ya mizabibu Naboti kaitenda yakwe. 19 Mgambe Zumbe Mnungu agamba ivi, ‘Kumkoma Naboti vileke uguhe ink'honde yakwe ye mizabibu?’ Mgambe, Zumbe Mnungu agamba, ‘Ahadya makuli yalambite isakame ya Naboti, naaho nayalambite sakame iyako!’"

20 Ahabu eze amuone mlotezi Eliya niyo agamba, Ha! "Kunibunk'hula weye mnk'hondo ywangu?"

Eliya niyo amhitula, "Heiye hikubunk'hula." "Weye hulekile kumtendela Zumbe Mnungu mbuli ziihile. 21 Haluse Zumbe Mnungu agamba, ‘Nohwigaile makunt'ho. Nohukome weye na kila mgosi mwa welekwa wako, akanda mtumwa hegu mlekelwa. 22 Imp'huga yako neinde enga ni imp'huga ya seuta Yeloboamu mwana Nebati naho neinde enga ni mp'huga ya seuta Baasha mwana Ahiya kwaviya mnigela maya kwa kuwatenda want'hu wa Izilaeli wadamanye wavu.’ 23 Naho mwa Yezebeli Zumbe Mnungu agamba makuli nayadye kimba chakwe kwe zink'handula ze nyumba ye kiseuta mwo mzi uko Yezileeli. 24 Naho, makuli nayadye vimba va want'hu we mp'huga yakwe awo nawabanikile mwo mzi, wadya nawabanikile kwe zink'honde nawo vimba vawe nevidigwe ni ndege nyika."

25 Hakwandaga na mnt'hu yeyose atendaga wavu ha Zumbe Mnungu enga ivo atendaga Ahabu. Yezebeli uyo mkaziwe niye amtendaga adamanye maihizo ayo yose. 26 Maihizo adamanyaga Ahabu ni kuvika milungu ya mahili enga ivo watendaga Waamoli awo Zumbe Mnungu awagulusaga kulongole kwa Waizilaeli.

27 Aho Ahabu eze eve ulosi uwo, atatulaga zisuke zakwe niyo avala magunia. Afungaga, naho alemelaga kudya chochose. Agonaga akanda kavala magunia na kunda na kiyangayanga kwa kinyulu.

28 Mlotezi Eliya niyo ahokela ulosi kulawa kwa Zumbe akugamba, 29 "Kumuwona ivo Ahabu akeseleze kwangu? Kwaviya kakeseleza kwangu heni mwigaile makunt'ho mwo lupisi lwo ugima wakwe, mna nenigale makunt'ho na kuwakoma pele want'hu we mp'huga yakwe mwo mwanawe akeza kunda seuta."