1 Zuwa dimwenga Yeloboamu andaga kakimala he kilingo cho kulavila nt'hambiko akafunk'hiza ubani, mnt'hu ywa Mnungu atumwagwa ni Zumbe kulawa Yuda abulaga aho Beseli. 2 Uyo mnt'hu ahaligitaga hant'hu ho kulavila nt'hambiko akakigamba, "Weye hant'hu ho kulavila nt'hambiko, Zumbe Mnungu agamba neelekwe mwana akwitangwa Yosia umwo mwe mp'huga ya Daudi naye naawachinjile mnanga mwako wakulu wa walavant'hambiko wakulava nt'hambiko mwako, naho mavuha ya want'hu awo nayokelwe mnanga mwako." 3 Mlotezi yudya agendeelaga kulonga akagamba, "Iki nicho ikilagiso, hant'hu aha ho kulavila nt'hambiko nahabogozoke, naho maivu ye mnanga mwakwe nayetike. Aho niho nommanye kugamba Zumbe kalonga kwa mnomo wangu." 4 Umwo seuta Yeloboamu eze eve kiya alongile yudya mnt'hu mwe mbuli ye hant'hu ha kulavila nt'hambiko ha Beseli, amlolotezelaga mkono yudya mnt'hu akagamba, "Mgwileni!" Aho mkono wakwe yudya seuta waholomp'halaga. Hadahaga kuuvuza naho. 5 Hant'hu hazengigwe kwa maiwe ho kulavila nt'hambiko naho niyo chabogozoka niyo maivu yetikaga enga viya alongile yudya mnt'hu ywa Mnungu. 6 Seuta Yeloboamu niyo amgamba yudya mlotezi ywa Mnungu, "Nakulombeza unilombezele kwa Zumbe Mnungu ywako vileke anihonye umkono wangu!"

Ivo mlotezi ywa Mnungu amlombezelaga niyo mkono wa seuta wahona. 7 Seuta niyo amgamba yudya mlotezi ywa Mnungu, "Kiitanye kaya kikadye nk'hande naho nohwink'he geleko." 8 Mna yudya mlotezi ywa Mnungu niyo amgamba, "Hata uneva wanink'ha nusu yo ugoli wako hekiitanye. Naho henidye nk'hande hegu hata kunywa mazi aha. 9 Zumbe nakanigamba nisekudya chochose hegu kunywa mazi, hegu du hata kuuya ne sila nizile nayo." 10 Ivo mlotezi uyo ahalawaga akombokela sila nt'huhu, naho hauiye ne sila iidya ezile nayo Beseli.

11 Kwandaga na mlotezi adalahale mwo lupisi ulwo. Wanawe wagendaga kumgambila kila kint'hu adamanyaga yudya mlotezi ywa Mnungu kulawa Yuda kudya Beseli. Naho zimbuli amgambilaga seuta Yeloboamu, izo nazo wamgambilaga tati yawe. 12 Niyo tati yawe awauza, "Kombokela sila ihi?" Wanawe niyo wamlagisa isila iyo ombokele mnt'hu ywa Mnungu kulawa Yuda. 13 Niyo awagamba wanawe niikileni lumwe imp'hunda, naye niyo akwela mwe imp'hunda iyo, 14 amtimilaga yudya mlotezi mbwanga ywa Mnungu niyo ambwiila kekala he nk'holo yo mwaloni niyo amuuza, Weye niwe mlotezi ywa Mnungu kulawa Yuda? Amhitulaga heiye. 15 Niyo amgamba, "Kiite kwe kaya yangu kikadye nk'hande." 16 Yudya mnt'hu ywa Mnungu ahitulaga, "Hikudaha kuuyanya na weye na kudya nk'hande hamwenga na weye aha. 17 Kwaviya Zumbe nakanigamba, Usekudya nk'hande hegu kunywa mazi uko, hegu kuuya ne sila iyo wizile nayo."

18 Yudya mlotezi mdala niyo amgamba, "Miye name ni mlotezi enga weye, naho mtumigwa ywa kwe mbingu katumigwa kwangu ni Zumbe Mnungu niyo anigamba huvuze kwe kaya yangu vileke udye nk'hande." Mna kumbe naaka mdant'hiliza 19 Yudya mlotezi ywa Mnungu auyaga naye kwe kaya niyo wadyanya nk'hande na kunywa mazi. 20 Umwo wandaga wakei ho ludyo, Zumbe Mnungu alongaga na uyo mlotezi mdala, 21 mlotezi uyo mdala niyo amwiila yudya mlotezi kulawa Yuda akagamba, "Zumbe agambap hutimile yadya alongile ne zisigilizi zakwe ziya akusigiile, 22 mna weye kuuya na kudya nk'hande hant'hu wagambigwe usekudya hegu kunywa mazi, ivo kimba chako hekimoselwe msanga kwe vikuta va wakale wako." 23 Weze wajike ukudya, yudya mlotezi mdala amwikilaga lumwe imp'hunda yudya mlotezi mbwanga niyo ahalawa. 24 Umwo andaga akaita aduganaga na simba mwe sila niyo yamkoma. Kimba chakwe chaduulwagwa mwe sila, imp'hunda ikanda ikimala hank'handa, ne simba ikimaale hank'handa he kimba icho. 25 Kwandaga na want'hu wombokelaga isila idya niyo wakiona ikimba kilambalikwa hadya, simba nayo yandaga ikimaala hank'handa he kimba. Want'hu awo wagendaga kulonga kwo mzi kudya ekalaga yudya mlotezi mdala. 26 Yudya mlotezi eze eve ayo, agambaga, "Uyo ni mnt'hu ywa Mnungu yudya hetimile yadya alongile Zumbe Mnungu, haluse Zumbe kamwigaila simba vileke ikamkome enga ivo Zumbe amgambile." 27 Mlotezi awagambaga wanawe "Niikileni lumwe imp'hunda." Woho nawo niyo wamwikila lumwe. 28 Ivo aitaga niyo akiona ikimba kiduulwa mwe sila, mp'unda ne simba zakimaalaga hagihi ne kimba icho mna isimba haidile ikimba hegu kuikump'hukila imp'hunda. 29 Ivo yudya mlotezi ekinulaga ikimba cho mlotezi ywa Mnungu no kukikweza mwe mp'hunda niyo akivuza uko Beseli kwo mzi wakwe wakamhongezele na kummosela msanga. 30 Ivo wammoselaga msanga mwe kikuta chakwe niyo yehe hamwenga na wanawe wamhongezela wakagamba, "Ha! Ndugu yangu!" 31 Weze wammosele msanga niyo awagamba wanawe, "Heza kubanika mnimosele msanga mwe kikuta kiya amoselwe msanga yudya mlotezi ywa Mnungu mavuha yangu hank'handa ya mavuha yakwe. 32 Mbuli zose asigiilwe ni Zumbe Mnungu mwe mbuli ye kilingo cho kulavila nt'hambiko cha Beseli na kila hant'hu ha kulavila nt'hambiko hant'hu hose henuke ne mizi yose ya Samalia, ikindedi mbuli izo nezikint'hizwe."

33 Hamwenga na ayo yose, Yeloboamu halekile wavu wakwe, mna aikaga walavant'hambiko watuhu wa henuke kulawa kwa want'hu wose. Naho kila mnt'hu aungile kunda mlavant'hambiko nakamsagula kwa ndima ya hant'hu henuke. 34 Mbuli ino ni wavu mwo lukolo lwa Yeloboamu, vilekile lukomwe pele mwe isi.