1 Umwo Selemani eze ibinde kuzenga Nyumba ya Mnungu na nyumba yakwe ya kiseuta na kila kint'hu aungile kukizenga, 2 Zumbe Mnungu amlailaga naho Selemani enga ivo amlailaga kudya Gibioni. 3 Zumbe Mnungu niyo amgamba Selemani, "Hikwiva kulombeza kwako ne zimbuli ulongile. Nyumba ino dielo hiitenda ikuka kwaviya kuizenga vileke nidiike zina dyangu aho. Neniikaulise lupisi lwose na kuyamila. 4 Uneva unanidamanyila kwa kindedindedi na uhuilwa enga ivo iso Daudi atendaga, naho una timila miko yangu na kila kiya husigiile, 5 ivo neniutende useuta wako utoge enga ivo nilagane na iso Daudi aho namgambile kugamba Izilaeli neilongozwe na welekwa wakwe mazuwa yose. 6 Mna uneva weye hegu welekwa wako wananileka, hamnatimile miko ne zisigilizi zangu niwenk'hile niyo mwavika milungu mituhu, 7 aho name neniwause want'hu wangu Waizilaeli mwe isi niwenk'hile. Iviyaiviya neniileke kwaajili ya zina dyangu naho want'hu wose nawaione kunda kint'hu cha kubelwa na cha kihezi mwe si zose. 8 Inyumba ino neinde mak'halank'hala. Kila noomboke aho neehelwe na kusingisa mtwi wakauza, ‘Nii Zumbe Mnungu akaitendela ivi isi ino ne Nyumba ino?’ 9 Want'hu wamwenga nawahitule, ‘Ni kwaviya wamleka Zumbe Mnungu ywawe uyo awalavile wakale wawe kudya Misili, niyo watimila na kuivika milungu mituhu. Ino niyo ilekile Zumbe kawegaila makunt'ho aya yose.’"

10 Selemani yamguhaga miyaka milongo miidi kubinda indima yo uzesi we Nyumba ya Mnungu na nyumba yakwe ye kiseuta. 11 Seuta Selemani amwink'haga mizi milongo miidi seuta Hilamu ywa Tilo, kwaviya Hilamu amwink'haga mielezi ne mibeloshi hamwenga ne zahabu viligane na ivo aungaga. 12 Mna Hilamu eze abule uko na kuiona imizi iyo enk'hwagwa ni Selemani, hayamwelelaga. 13 Ivo Hilamu amgambaga Selemani, Togola! "Ino imizi yani unik'hile?" Nivo vikuleka mizi iyo yetangwa isi sokezi hata ivi dielo. 14 Hilamu amwigailaga seuta Selemani kilo alufu nne za zahabu.

15 Izi nizo zisigilizi seuta Selemani awadamanyise ndima za kutigizwa mwo kuzengwa Nyumba ya Mnungu na nyumba yakwe ye kiseuta na kumemeza ulongo gomela dya Milo na lukandula lwa Yelusalemu na kuizenga mizi ya Hazoli na Megido na Gezeli. 16 Seuta ywa Misili autahaga mzi wa Gezeli, naho autimp'haga moto niyo awakoma wakaya wose Wakanaani. Umzi uwo amwink'haga mwanawe ywe kike kunda geleko mwe dizuwa dye ndoza yakwe umwo akalozwa kwa Selemani. 17 Ivo Selemani aizengaga uhya imizi iyo ya Gezeli na Beti Holoni ya mwondwaisi, 18 iviyaiviya azengaga uhya Baalati na Tamali uko kwe dijangwa dya Yuda, 19 ne mizi yakwe yose ya magulu yakwe ya kuikila vint'hu vakwe na magulu ya kuikila magali yakwe yakugendezwa ni zifalasi na kila kint'hu aungaga kuzenga mwe Yelusalemu na mwe Lebanoni na kila hant'hu mwe isi aikailaga. 20 Want'hu watuhu wasigalaga mwa Waamoli na Wahiti na Wapelezi na Wahivi, na Wayebusi, awo wandaga hiyo Wazilaeli, 21 hamwenga na welekwa wawe wadya hewekomigwe pele ni Waizilaeli, Selemani awenk'haga ndima za kutigizwa mpaka dielo. 22 Mna Selemani hawatendaga Waizilaeli kunda watumwa mna watendagwa kunda watowani na vilongozi na wakulu wa watowani, na wakugendeza magali ya nk'hondo na wakugendeza zifalasi.

23 Kwandaga na wakimalizi wakulu magana mashano na milongo mishano wandaga wakakimaila zindima zi hengi za kutigizwa mwo uzesi wa Selemani.

24 Uyo mwana Falao eze asame kwo mzi wa Daudi na kuita kwikala kwe nyumba yakwe mwenye azengelwe ni Selemani, niyo Selemani amemezaga ulongo lukandula uko Milo.

25 Nk'hanana nt'hatu kila mwaka Selemani atambikaga kwa malavo ya kokwa pele na malavo ya utondowazi aho he kilingo cho kulavila nt'hambiko icho amzengele Zumbe. Okaga ubani aho ho undiilo wa Zumbe. Ivo wazesi nawo waibindaga indima yawe.

. 26 Iviyaiviya Selemani adamanyaga meli uko Esioni Gebeli hagihi na Elati uko Edomu mnk'handa ye Bahali ya Shamu mwe isi ya Edomu. 27 Seuta Hilamu naye niyo awatuma want'hu wakwe wamanyize ndima za mwe meli wakadamanye ndima hamwenga na want'hu wa Selemani. 28 Watambaga mpaka isi ya Ofili niyo waguha kilo mlongo na kane alufu za zahabu niyo wamwigaila seuta Selemani.