1 Seuta Selemani alongozaga mwe Izilaeli yose, 2 Naho awa nawo wandaga vilongozi wakulu mwo useuta wakwe,

Uzia mwana Zadoki uyo andaga mlavant'hambiko,

3 Eliholefu na Ahiya wana wa Shisha wandaga waandishi, Yehoshafati mwana Ahiludi andaga mnt'hu ywa kuwandika nk'humbukila,

4 Beyana mwana Yehoyada andaga mkulu ywa watowani,

Zadoki na Abitali awo wandaga walavant'hambiko.

5 Uzia mwana Natani andaga mkulu we vilongozi we wilaya,

Zabudi mwana Natani naye andaga mlavant'hambiko mlangilizi ywa seuta.

6 Ahishali andaga mnyamp'hala ywa wandima we nyumba ye kiseuta,

Adonilamu mwana Abida andaga niye mnyamp'hala ywe zindima za kutigizwa.

7 Iviya iviya Selemani asagulaga vilongozi wakulu mlongo na waidi kunda wakulu we ziisi kulawa mwe Izilaeli yose. Awa wandaga na ndima ya kumzunguila nk'hande seuta ne mp'huga yakwe. Kila mnt'hu mwa awo egalaga nk'hande kulawa kwe ziisi zakwe kwa mwezi umwenga mwo mwaka. 8 Aya nayo mazina ya awo wandaga vilongozi wakulu mlongo na waidi we ziisi.

Beni Huli andaga mnyamp'hala ywe isi ye vigulu ya Ifulaimu.

9 Beni Dekeli andaga mnyamp'hala ywe mizi ya Makasi na Shalubimu na Beti Shemeshi na Eloni Beti Hanani.

10 Beni Hesedi andaga mnyamp'hala ywe mizi ya Aluboti na Sokoti na isi yose ya Hefeli.

11 Beni Abinadabu uyo amlombaga Tafati mwana Selemani, andaga niye mnyamp'hala ywe zisi zose za Nafati Doli. 12 Baana mwana Ehiludi, andaga niye mnyamp'hala ywe mizi ye Taanaki, Megido, ne isi yose hagihi na Beti shani, hagihi no mzi wa Zaletani Kwa mwenye mzi yo mzi wa Yezileeli mpaka kwo mzi wa Abeli Mehola na kwo mzi wa Yokimeamu.

13 Beni Gebeli andaga mnyamp'hala wo mzi wa Lamoti hamwenga ne mizi midodo ya Gileadi yandaga ikalongozwa ni lukolo lwa Yaili, na welekwa wa Manase no mkowa wa Aligobu ukwo Bashani. Yandaga ni mizi mikulu milongo mtandatu yazengelwagwa gomela na mhindo we shaba mwe zink'hili zakwe.

14 Ahinadabu mwana Ido andaga niye mnyamp'hala ywe mizi ya Mahanaimu.

15 Ahimaazi uyo amlombaga Basemati mwana kike mtuhu ywa seuta Selemani, andaga niye mnyamp'hala ywe isi ya Nafutali.

16 Baana mwana Hushai andaga niye mnyamp'hala ywe ziisi za Asheli no mzi mdodo wa Bealoti

17 Yehoshafati mwana Palua, yehe andaga niye mnyamp'hala ywe isi ya Isakali.

18 Shimei mwana Ela, andaga niye mnyamp'hala ywe isi ya Benjamini.

19 Gibeli mwana Uli, andaga niye mnyamp'hala ywe isi ya Gileadi iyo yekailwagwa ni seuta Sihoni ywa Waamoli hamwenga na seuta Ogu ywa Bashani.

Hamwenga na awa wakulu mlongo na waidi, kwandaga na mnyamp'hala ywa wakulu wose mwe isi iyo yose.

20 Want'hu wa Yuda na Izilaeli wandaga wabindile wingi, wadyaga no kunywa no kwikala kwa kinyemi. 21 Seuta Selemani ekailaga useuta wose kukongela kwo mto wa Efulati mpaka kwe isi ya Wafilisiti ne mihaka ya Misili. Si izi zamlihaga kodi naho zandaga zikamdamanyila ndima mwo wikazi wakwe wose.

22 Vamuungaga Selemani kwa kila zuwa kunda na madebe magana matatu na milongo mtandatu na unga udinyigwe madebe magana mfungate na milongo miidi, 23 na ng'ombe mlongo zigimbale na ngo'mbe milongo miidi zikudimwa, na ngoto gana na mp'hofu na swala na nguku zedi.

24 Ivo ekailaga mwe isi yose usweelo wa zuwa wo mto Efulate, kulawa Tifusa mpaka kwo mzi wa Gaza, awekailaga maseuta wose we nt'hendelo ya usweelo wa zuwa wo mto Efulate, naho andaga na utondowazi kwe zint'hendelo zose zimzunguluke. 25 Mwa mazuwa yose ya Selemani, Yuda na Izilaeli wekalaga mp'heho tondolo, kulawa Dani mpaka Beeli sheba, kila yumwenga akanda kwe nk'honde yakwe ye mizabibu na mwe mitini yakwe.

26 Naho Selemani andaga na maheha alufu milongo mine ye zifalasi zandaga zikagendeza magali yakwe na want'hu alufu mlongo na mbili wandaga wakagendeza zifalasi. 27 Naho wadya wakulu milongo na waidi we ziisi kila yumwenga mwo mwezi apangilwe, egalaga nk'hande kwa seuta Selemani na wose wandaga hamwenga na Selemani ho ludyo haheina kuhunguka chochose. 28 Wakulu awo iviyaiviya wegalaga shayili na mani kwajili ye zifalasi ne zimp'hunda zandaga zikagendeza magali.

29 Mnungu amwink'haga seuta Selemani mizungu na ubala na umanyi ukulise hevikudahika kuhimika enga va sanga imnk'handa mwe bahali. 30 Mizungu ya Selemani yandaga ikulise kujink'ha want'hu wa ulailo wa zuwa naho kujink'ha mizungu ya want'hu wose wa Misili. 31 Andaga na mizungu kujink'ha want'hu wose na kuwajink'ha Etani wa lukolo lwa Muezelahi, na Hemani na Kalikoli na Dalida wana kilume wa Maholi. Nt'hogola zakwe zabwelekelaga mwe si zose zamzungulukaga. 32 Akemaga malango yakwe alufu nt'hatu na mila alufu imwenga na magana mashano. 33 Asimwiilaga mwe mbuli za miti ikwitangwa mielezi iyo ili uko Lebanoni ne hisopo ukuhota mwo lukazi. Naho alongaga mbuli za makala na madege na magondo ne zisamaki. 34 Want'hu kulawa mwe zi isi zi hengi na maseuta wose wa si, awo wevaga mizungu yakwe wezaga kumtegeleza.