1 Ivo Lehoboamu aitaga Shekemu uko Waizilaeli wose waduganaga vileke wamtende ande seuta. 2 Umwo Yeloboamu mwana Nebati uyo anyilikilaga Misili akamwogoha Selemani, eze eve kugamba Lehoboamu katendigwa seuta, auyaga kulawa Misili. 3 Wamwigailaga ulosi uyo Yeloboamu na kumwitanga, yehe no mdugano wose wa Izilaeli wamwiitilaga niyo wamgamba Lehoboamu, 4 "Iso kakink'ha ndima ndala naho kautenda wikazi wetu unde mdala. Ukihunguile udala we zindima izo niho nekinde want'hu wako mwo useuta wako."

5 Mna yehe niyo awagamba, "Indeni kuuya kwe kaya niyo mazua matatu yanomboka soni naho niwenk'heni uhituzi." Ivo want'hu awo wauyaga kwe kaya.

6 Seuta Lehoboamu awaduganyaga wadala wandaga walangilizi wa Selemani uyo ise akawauza, "Togoleni mwanilangiliza niwenk'he uhituzi wani want'hu wadya?"

7 Wadya wadala niyo wamgamba, "Uneva unanda mndima ywa want'hu awa, niyo wawatendela vedi na kuwahitula vedi, nawande want'hu mwo useuta wako mazuwa yose."

8 Mna Lehoboamu aubezaga ulangilizi wa wadala wadya, ivo awaguhaga wabwanga we dilika dyakwe awo wandaga wandima wakwe vileke wamlangilize. 9 Naye awauzaga, "Togoleni mwanilangiliza vihi? Niwageeze want'hu awa wakuunga niutende wikazi wawe unde mhufu, kwaviya tate autendaga kunda mdala?"

10 Wadya wabwanga we dilika dyakwe niyo wamhitula kugamba, "Awa want'hu wakugambile iso kautenda wikazi wawe kunda mdala na ivo weye uutende kunda mhufu, wagambe, ‘Miye ni mwana mdodo kwa tate mna miye nna ludole kumjink'ha tate!’ 11 Wagambe, ‘Tate autendaga wikazi wenyu kunda mdala, miye neni utende unde mdala kujink'ha. Tate awafyalikagani na mikotya, mna miye neniwafyalikeni na mikotya ina miwa!’"

12 Ivo mwe dizua dya katatu, Yeloboamu hamwenga na want'hu wose wezaga kwa Lehoboamu enga ivo awasigiilaga. 13 Seuta awakwank'hilaga want'hu na kuubela ulangilizi wa wadala, 14 viligane no ulangilizi wa wabwanga agambaga, "Tate awatendagani mnde na wikazi mdala, miye neni watendeni mndilise na wikazi mdala kujink'ha udya. Awafyalikagani na mikotya, mna miye neni wafyalikeni na mikotya ina miwa!" 15 Ivo seuta hawategeleze awant'hu kwaviya mbuli iyo yalawaga kwa Zumbe Mnungu vileke akint'hize imbuli amgambilaga Yeloboamu mwana Nebati kwombokela kwa Ahiya kulawa kwo mzi wa Shilo.

16 Aho Waizilaeli wose weze waone kugamba seuta hawategelezaga, wamhitulaga wakamgamba, "Hakina uhamwenga wowose na Daudi. Suwe hakina ukipe kwa mwana Yese. Nekiuyeni kwe zikaya zetu. Weye Daudi dima imp'huga yako mwenye!"

Ivo want'hu wa Izilaeli niyo wasaguka, 17 mna Lehoboamu alongozaga kwa Waizilaeli wandaga wakekala mwo mizi wa Yuda.

18 Seuta Lehoboamu atumaga mndima ywakwe uyo andaga akakimaila zindima zindala za kutigizwa, mna Waizilaeli wose wamtowaga maiwe niyo abanika. Ivo vamuungaga seuta Lehoboamu kwingila mwe digali dyakwe idyo dikugendezwa ne zifalasi niyo anyilikila Yelusalemu. 19 Kulawa mwo lupisi ulwo mpaka ivi haluse, want'hu wose wo useuta wa Izilaeli we nt'hendelo ya mkoma mahanya wasagukaga kwa welekwa wa Daudi.

20 Umwo want'hu wose wa Izilaeli weze weve kugamba Yeloboamu kauya kulawa Misili, wamtumilaga want'hu wakamwitange eze kwo mdugano niyo wamtenda ande seuta ywa Izilaeli yose. Dikabila dya Yuda nidyo du dyasigalaga mwo useuta wa welekwa wa Daudi.

21 Lehoboamu eze abule Yelusalemu, aduganyaga watowani laki imwenga na milongo mnane alufu mwa makabila ya Yuda na Benjamini vileke wakatowane no useuta wa Izilaeli na kuuvuza useuta kwa Lehoboamu mwana Selemani. 22 Mna Mnungu amgambaga mlotezi Shemaya, 23 amgambe Lehoboamu mwana Selemani seuta wa Yuda na want'hu wose wa makabila ya Yuda na Benjamini: 24 "Msekuwatowa wandugu zenyu Waizilaeli, keuiyeni kaya kila yumwenga ywenyu. Aya yakulaila nayo niungile." Want'hu wa kabila dya Yuda na Benjamini watimilaga yadya alongile Mnungu, niyo wakeuiya kaya.

25 Naho niyo Yeloboamu auzenga mzi wa Shekemu kwe isi ye vigulu va Ifulaimu niyo ekala hadya kwa lupisi luguhi, niyo naho ahalawa hadya auzenga uhya mzi wa Penueli na kuuzengela gomela. 26 Niho Yeloboamu afanyanyaga mwo moyo wakwe kugamba, "Haluse mafa useuta nouuye kwa welekwa wa Daudi. 27 Uneva want'hu awa wagendeela kukwela na kulava nt'hambiko zawe kwe Nyumba ya Zumbe uko Yelusalemu nawamuungise seuta ywawe Lehoboamu ywa Yuda vileke wanikome miye."

28 Eze alangilizane na wantr'hu watuhu, adamanyaga vijeku viidi, mahili ya zahabu, niyo awagamba want'hu, "Haluse inda vidala kukwela uko Yelusalemu vileke mkavike. Kauleni ino niyo milungu iwalavileni Misili." 29 Niyo aika kajeku kamwenga ke zahabu uko Beteli, katuhu nako akaikaga uko Dani. 30 Ivo want'hu watendaga wavu kwa kuitisa hale kugenda kuvika mahili uko Dani. 31 Iviyaiviya Yeloboamu azenga kilingo cho kulavila nt'hambiko hant'hu henuke, niyo asagula want'hu wandaga hiyo kabila dya Walawi wande walavant'hambiko wakwe.

32 Naho Yeloboamu aikaga zuwa dya kinyemi kila zuwa dya mlongo na shano mwo mwezi wa mnane, viligane ne dizua dye kinyemi dye viheha dyandaga dikadamanywa kudya Yuda. Alavaga nt'hambiko uko kwe milungu ye zahabu iyo adamanyaga uko Beseli mwe kilingo cho kulavila nt'hambiko. Naho aikaga walavant'hambiko wadamanyaga ndima kila hant'hu aho azengaga hant'hu henuke. 33 Mwe dizuwa dya mlongo na shano dyo mwezi wa mnane, zuwa asagulaga mwenye, alavaga nt'hambiko mwe kilingo cho kulavila nt'hambiko icho azengile uko Beseli. Ivo aikaga zuwa dya kinyemi kwajili ya Waizilaeli. Naho, yehe mwenye aitaga kwe kilingo cho kulavila nt'hambiko niyo alava nt'hambiko na kufunk'hiza ubani.