1 Mwa mazua yadya Abiya mwana kilume ywa Yeloboamu niyo anda mnyonge. 2 Yeloboamu niyo amgamba mkaziwe, "Genda kaketende mtuhu vileke use kumanyika kugamba umkaza Yeloboamu, akajika wiite Shilo. Kudya eyuko mlotezi Ahiya uyo anigambaga neninde seuta ywa want'hu wakwe. 3 Mwigaile mikate mlongo na maandazi na supa ya uki niyo wambasa, naakumgambile yakuunga yamlaile umwana ywetu."

4 Mkaza Yeloboamu atendaga enga ivo agambilwe, aitaga uko Shilo niyo ubula kwe nyumba ya Ahiya. Kwaviya Ahiya adalahalisaga meso yakwe yandaga hayakuona vedi. 5 Zumbe Mnungu nakamgamba Ahiya kugamba, mkaza Yeloboamu eza vileke akuuze yakuunga yalaile mwa mwanawe ywe kilume mnyonge, naivo noumhitule.

Mkaza Yeloboamu akeza mpaka naaketende mnt'hu mtuhu. 6 Mna Ahiya eze eve sindo ya viga va mkaza Yeloboamu akeza, amgambaga, "Haya yomboka weye mkaza Yeloboamu. Nii waketenda enga mtuhu? Miye nna ulosi wiihile kwako. 7 Genda kamgambile Yeloboamu kugamba, Zumbe Mnungu ywa Izilaeli agamba, ‘Kwaviya nehikusagula mwa want'hu niyo nakutenda weye kunda kilongozi mwa want'hu wangu Izilaeli, 8 naho niyo nauusa useuta kulawa mwa welekwa wa Daudi niyo nakwink'ha weye, mna hundile enga mndima ywangu Daudi uyo anitimilaga miye ne zisigilizi zangu kindedindedi na kudamanya yadya yakunelela. 9 Mna kudamanya wiihi kujink'ha wose wakulongoele mwo useuta. Kunigela maya kwa kukedamanyila milungu mituhu na mahili ya kusana niyo wanileka miye, 10 haluse miye nenigale mavuma mwe nyumba ya Yeloboamu. Neniwakome welekwa wose wa kigosi wa Yeloboamu, naho neni wause pele welekwa wa Yeloboamu enga viya mnt'hu akuusa kitole mpaka kisile pele. 11 Yeyose mwa welekwa wa Yeloboamu naabanikile mwo mzi kimba chakwe nekidigwe ni makuli, naho yeyose naabanikile kwe nk'honde kimba chakwe nekidigwe ni madege ulanga, kwaviya ivo nivo alongile Zumbe Mnungu.’"

12 "Elo kweuiye kaya, naho umwo ukengila kwo mzi wako, mwanao ywe kilume naabanike. 13 Want'hu wose wa Izilaeli nawa mhongezele na kummosela msanga. Mna ni yehe du naamoselwe msanga mwa welekwa wa Yeloboamu kwaviya yehe ekedu niye amwelele Zumbe Mnungu ywa Izilaeli. 14 Hamwenga na ayo Zumbe Mnungu naegale seuta mwe Izilaeli uyo naawakome welekwa wa Yoloboamu. Naho mbuli iyo yakonga ivi haluse. 15 Zumbe naawatowe Waizilaeli na kuwasingisa enga nyasi ikusingiswa mwa mazi. Naawakwipule Waizilaeli mwe isi ino iyedi ino ewenk'haga wakale wawe, naho naawa mwaganisile hale kujink'ha mto wa Efulati kwaviya wamgela maya Zumbe umwo weze wadamanye milungu ya Ashela. 16 Zumbe naawaleke Waizilaeli kwaviya Yeloboamu kadamanya wavu niyo awatenda woho nawo watende wavu."

17 Mkaza Yeloboamu niyo akeuiya kaya uko Tiliza, naye eze abule du ho lwivi lwe nyumba mwanawe ywe kilume abanikaga. 18 Wammoselaga msanga naho Waizilaeli wose wamhongezelaga enga ivo Zumbe alongaga kwa mnomo wa mlotezi ywakwe Ahiya.

19 Mbuli zint'huhu adamanye Yeloboamu, ne zink'hondo na kwikaila, yose yawandikwa mwe kitabu che misimo ya maseuta wa Izilaeli. 20 Yeloboamu alongozaga kwa miyaka milongo miidi na miidi niyo abanika, naho Nadabu uyo mwanawe alongozaga hant'hu ha ise.

21 Lehoboamu mwana Selemani andaga seuta ywa Yuda. Yehe andaga na miyaka milongo mine na umwenga umwo akakonga kunda seuta ywa Yuda. Andaga seuta kwa miyaka mlongo na mfungate mwe Yelusalemu, umzi usagulwe ni Zumbe mwe mizi ya makabila yose ya Izilaeli vileke want'hu wamvike umwo. Nine dya Lehoboamu andaga Naama kulawa Amoni.

22 Ivo want'hu wa Yuda watendanga wiihi ha Zumbe, kwo uwo wavu wawe wadamanye, wemulaga maya yakwe kujink'a ivo watendaga wakale wawe. 23 Want'hu awa wakezengelaga hant'hu henuke ha mviko, minala ya kulavila nt'hambiko na mahili ya Ashela kwa kila kagulu katali na he nk'holo ya kila ziti dina mani yavamilize. 24 Kiihise, kwandaga na wagosi na wavele wandaga wakekaila aaho wakatenda uhabwasi mwe hant'hu he miviko yawe. Want'hu wa Yuda wandaga wakatenda mbuli za kuihiza zatendagwa ni want'hu hi Wayahudi, want'hu awo wagulusagwa ni Mnungu umwo Waizilaeli wandaga wakengila mwe isi ya Kanaani.

25 Mwo mwaka wa shano wa kwikaila kwakwe seuta Lehoboamu, seuta Shishaki kulawa Misili, aikump'hukilaga Yelusalemu, 26 atahaga vindolo ve Nyumba ya Mnungu na mwe nyumba ya seuta, na kila kint'hu, hamwenga ne zink'hindo ze zahabu adamanyaga Selemani. 27 Seuta Lehoboamu adamanyaga nk'hindo nt'huhu za shaba niyo azink'hiza kwa wakulu wo wamizi awo wandaga wakamila ho mwingiilo we nyumba ya seuta vileke wazamile. 28 Naho kila lupisi lwa seuta lwo kwingila kwe Nyumba ank'hulu ya Mnungu, wamizi waziguhaga zink'hindo izo. Umwo seuta akauya kwe nyumba yakwe, wazivuzaga kwe chumba cho wamizi.

29 Mbuli zose adamanyaga Lehoboamu, yawandikwagwa mwe kitabu che misimo cha maseuta wa Yuda. 30 Mwo lupisi lwose ulo, Lehoboamu na Yeloboamu wandaga na unk'hondo wagendeelaga. 31 Lehoboamu abanikaga niyo amoselwa msanga kwe vikuta va kiseuta mwo mzi wa Daudi. Nine etangwagwa, Naama kulawa Amoni. Na Abiamu mwanawe ywe kilume andaga seuta hant'hu hakwe.