1 Mwo mwaka wa magana mane na milongo mnane aho Waizilaeli weze walawe Misili, na mwo mwaka wa kane aho Selemani andaga Seuta ywa Waizilaeli, mwo mwaka wa katatu, mwezi wa Zifu, nuko kugamba nuwo mwezi wa kaidi mwe miezi ya Waizilaeli, Selemani akongaga kuzenga Inyumba ya Mnungu. 2 Inyumba iyo ya Mnungu Selemani amzengele Zumbe Mnungu yandaga na utali mita milongo miidi na mfungate, na mita kenda zo uzangalamu wakwe, na utali kuita kulanga mita mlongo na nt'hatu na nusu. 3 Homwingiilo wakwe wandaga mita nne na nusu utali, uzangalamu wakwe wandaga mita kenda. 4 Madilisha ye nyumba iyo yandaga mazangalamu kwa kundani, mna kwa kuse yandaga mafinyu. 5 Nt'hendelo nt'huhu ye Nyumba ya Mnungu azengaga golofa nt'hatu kila golofa yandaga na utali mita mbili na lobo kosekose. 6 Kila chumba cha hasi chandaga na uzangalamu wa mita mbili ne sentimita mbili. Golofa itimile nayo neinda na uzangalamu wa mita mbili na sentimita milongo mfungate na shano. Golofa ya kulanga mita nt'hatu. Golofa izo zandaga hazikuligana kwa uzangalamu, kwaviya Selemani ahunguzaga lukandula lwa kuse kuzunguluka inyumba vileke mikimailo yakwe isekutozana na lukandula.

7 Hakwevikaga izwi dyodyose dye vihuju hegu nt'hema mwo uzesi uwo kwaviya maiwe yo kuzengela yandaga yasongolwa lumwe uko yalawaga.

8 Umwingiilo wa hasi we nyumba iyo wandaga wongezelwa kwa mnk'handa mwe zimbavu ze nyumba wandaga kwe nt'hendelo ya Kwa mwenye mzi. Kundani kwandaga na mhindo, uwo want'hu wombokelaga wakaita kwe golofa ya hagati na ya kulanga. 9 Ivo Selemani abindaga kuizenga Inyumba iyo. Digulu dye nyumba iyo dyadamanyagwa kwa miti na mbao za mielezi. 10 Azengaga vyumba va golofa vina utali wa kulanga mita mbili na sentimita milongo miidi na shano. Vyumba ivo vazungulukaga lukandula lwe nyumba iyo kwa kuse. Ivo valunganyagwa ne nyumba kwa migamba ya mbao za mielezi.

11 Mwo lupisi ulo Zumbe amgambaga Selemani, 12 "Mwe mbuli ye nyumba ino, uneva unatimila imiko yangu ne zisigilizi zangu, nohutendele yadya nilagane na iso Daudi. 13 Nenikale na want'hu wangu Izilaeli naho heniwaleke."

14 Ivo Selemani abindaga kuzenga Inyumba iyo ya Mnungu.

15 Kwe nt'hendelo ya kundani kwe nk'handula ze Nyumba nokugubikwa kwa mbao za mielezi, kulawa hasi hakizigwe mpaka kwe zimbao ze golofa, hasi yakwe neinda ya mbao za maziti ya mibeloshi. 16 Chumba cha kundani kikwitangwa Hant'hu Hakukise, icho chapangagwa kundani ye Nyumba ank'hulu ya Mnungu. Chazengwagwa kwa mbao za mielezi kulawa hasi hakizigwe mpaka kwe golofa. Utali wakwe wabulaga kwe digulu, utali wakwe nounda mita kenda. 17 Chumba kikulongole ha Hant'hu Hakukise chandaga na utali wa mita mlongo na mnane. 18 Zimbao za mwo lukazi lwe nyumba zahambwagwa kwa kugadigwa enga vibuyu na mabwali ya bwalike. Kila hant'hu hagubikagwa ni mbao za mielezi. Hakwandaga na iwe dyodyose dyaonekaga.

19 Mndani mtendese mwe Nyumba ya Mnungu kwadamanyagwa Hant'hu Hakukise ho kuika Disanduku dye Ndagano. 20 Chumba iki cha kundani chandaga na utali wa mita kenda, uzangalamu wakwe nawo mita kenda, utali kuita kulanga nawo mita kenda, chumba icho chose nekigubikwa zahabu yedi. Kilingo chakwe nekigubikwa kwa mbao ya mielezi. 21 Selemani agubikaga zahabu hant'hu ha kundani he Nyumba ya Mnungu na kulongole kwe chumba icho cha kundani aikaga minyololo ya zahabu kulawa nt'hendelo imwenga na ya kaidi nahagubikwa zahabu. 22 Nyumba yose yagubikagwa kwa zahabu naho kilingo cha Hant'hu Hakukise chagubikagwa zahabu. 23 Adamanyaga kwa mbao za mizeituni mahili ya viumbwa vikwitangwa makelubi. Kila kiumbwa nekinda na utali wa mita nne na nusu. 24 Kila wawa dyandaga na utali wa mita mbili na lobo, naivo vatenda kugamba, utali we diwawa kulawa mwo uheelo we diwawa dimwenga kuita tuhu ni mita nne na nusu. 25 Kiumbwa kituhu chandaga na utali wa mita nne na nusu viumbwa wose waidi wandaga ne vihimo iviya na miumbilwe iidya. 26 Utali wa kiumbwa kimwenga wandaga mita nne na nusu, naho utali we kiumbwa kituhu wandaga enga uudya. 27 Ayaikaga makelubi ayo kundani kwe chumba cha Hakukise mwe Nyumba ya Mnungu, mawawa yawe yakanda yakungumulwa. Diwawa dyo yumwenga neditoza ulukandula lumwenga, diwawa dya kelubi mtuhu naye neditoza lukandula lutuhu, uku mawawa matuhu yakanda yakwafana hagatigati ye chumba icho. 28 Ivo viumbwa iviidi navo vandaga vigubikwa kwa zahabu.

29 Zink'handula zose mwe chumba icho, vyumba va kundani na kuse, vahambwagwa kwa picha za viumbwa vina mawawa, mitende na mabwali. 30 Akizaga zahabu, vyumba va kuse na kundani ve Nyumba ank'hulu ya Mnungu.

31 Wadamanyaga nyivi mbili za mbao za mizeituni niyo wakima kwo mwingilo wa Hant'hu Hakukise. Hant'hu hakwe ha kulanga adamanyaga mikimailo yalunganywagwa niyo yaika mp'hembe shano. 32 Zinyivi zagadagwa viumbwa vina mawawa na mitende na mabwali. Zinyivi ne viumbwa vina mawawa na mabwali, vose vakizigwaga zahabu. 33 Naho adamanyaga fulemu zo lwivi ziligane kosekose zo kwingiila kwe sebule. Fulemu izo zidamanywa kwa mbao za mizeituni. 34 Kwandaga na nyivi mbili za mbao za mibeloshi naho zikudaha kukunjigwa lumwenga, 35 zinyivi izo nezigadigwa viumbwa vina mawawa, mitende na mabwali yakizigwe zahabu yedi.

36 Balaza ya kundani neizengigwa kulongole ye Nyumba ya Mnungu, hagihi ne zink'handula zakwe zazengwagwa na safa nt'hatu za maiwe yasongolwe na safa imwenga ya mbao za mielezi.

37 Nk'hongelo ye Nyumba ya Mnungu yazengwagwa mwo mwezi wa Zifu nuwo mwezi wa kaidi wo mwaka wa kane mwo useuta wa Selemani. 38 Mwo mwezi wa mnane ukwitangwa mwezi wa Buli mwo mwaka wa mlongo na umwenga mwo kwikaila kwakwe seuta Selemani, Nyumba ya Mnungu yandaga isila pele ukuzengigwa enga ivo yafanyanyagwa. Selemani azengaga Nyumba iyo kwa miyaka mfungate.