1 Naho Selemani akezengelaga nyumba yakwe ye kiseuta, ndima iyo yaguhaga miaka mlongo na mitatu. 2 Niho Azengaga nyumba ikwitangwa Mbago ya Lebanoni yandaga na utali wa mita milongo mine na shano. Uzangalamu wakwe wandaga mita milongo miidi na nusu, utali kuita kulanga mita mlongo na nt'hatu na nusu. Nyumba iyo neizengigwa mnanga mwe misafa mine ya mikola ya maziti ya mielezi. Mikola iyo niyo yatozelezaga zimp'hapi ze mielezi kwa kulanga. 3 Kila safa imwenga yandaga na mikola mlongo na mishano. Mikola yose kwa hamwenga yandaga milongo mine na mishano. Ivyumba ivo vazengwagwa mnanga mwe mikola iyo, zahangagwa kwa mbao za mielezi. 4 Mwe zink'handula zakwe zose zimbili kwandaga na safa nt'hatu zikukaulana na madilisha. 5 Zinyivi zose na madilisha fulemu zakwe zandaga ziligana kosekose ne misafa mitatu ya madilisha mwe kila lukandula yendaga ikasinyana.

6 Naho azengaga ukumbi wa mikola uwo wandaga na utali wa mita milongo miidi na nusu. Uzangalamu wakwe wandaga mita mlongo na nt'hatu na nusu. Kwandaga na sebule kulongole kwe nyumba iyo. Kulongole ye sebule kwandaga na mikola,naho kulongole kwe mikola iyo kwakelavilizaga pawo ndodo.

7 Selemani azengaga chumba che kiseuta chetangwagwa Ukumbi wo Usengelo. Aho niho Selemani alamulaga masa. Aho hahambwagwa kwa mbao za mielezi kulawa hasi mpaka kwe digulu.

8 Inyumba yakwe yo kwikala mwenye yandaga kunyuma yo Ukumbi wo Usengelo, Iyo yazengwagwa enga ivo zint'huhu zazengwagwa. Naho amzengelaga mkaziwe uyo mwana seuta ywa Misili nyumba enga iyo.

9 Nyumba izo zose zazengwagwa na maiwe ya yombe kulu kulawa kwe nk'hongelo mpaka kulanga. Maiwe ayo yasongolwagwa kwa vihimo viiikigwe lumwe na kukant'higwa kwa msumeno kundani na kuse. 10 Ink'hongelo ye nyumba yazengwagwa na maiwe ya yombe kulu naho makulu yandaga na utali wa mita nt'hatu na nusu, yamwenga yandaga na mita nne na nusu. 11 Mnanga mwe nk'hongelo ya maiwe ayo mwandaga na maiwe matuhu yakant'higwe viligane ne vihimo vikuungwa na safa ya mbao ya mielezi. 12 Uwa mkulu wandaga na nk'handula na safa imwenga ya mbao za mielezi na misafa mitatu ya maiwe ya kusongolwa. Ivo nivo vandaga na kwo uwa mdodo wa kundani kwe Nyumba ya Mnungu na kwo ukumbi we nyumba.

13 Akajika seuta Selemani amwitangaga Hilamu ywa uko Tilo uyo andaga mmanyi naho msani wa vint'hu va shaba. 14 Ise andaga kabanika, naho andaga mnt'hu ywa Tilo. Yehe andaga mmanyi mwo usani we vint'hu ve shaba. Nine andaga ywe dikabila dya Nafutali. Hilamu andaga mnt'hu ywa mizungu naho msani ywa vint'hu va shaba. Aluzumilaga lwitango lwa Selemani vileke akande mnyamp'hala ywe zindima zose zo usani we vint'hu ve shaba.

15 Hilamu adamanyaga mikola miidi ya shaba, kila umwenga wandaga na utali wa mita mnane zina mzunguluko wa mita shano na nusu na kuziika kulongole kwe Nyumba ya Mnungu. 16 Naho adamanyaga vint'hu viidi va shaba enga nyungu ihitulwe kila kimwenga kina utali wa mita mbili na lobo niyo avigeleka mnanga mwe mikola iyo. 17 Naho afumaga nyavu mbili kila imwenga neinda na mikufu mfungate. Ayo yose ni kwa kuvihamba vint'hu va shaba vikale enga nyungu viikigwe mnanga mwe mikola idya. 18 Iviyaiviya adamanyaga matunda enga makomamanga niyo ayadonga misafa miidi izunguluke ziya zink'hofia zimbili.

19 Naho zink'hofia izo zandaga mnanga mwe mikola iyo kuse ye balaza, zahambwagwa na mabwali ya nk'hulukumba, utali wakwe wandaga mita imwenga na lobo nt'hatu. 20 Zink'hofia izo zandaga mnanga mwe mikola iyo miidi na mwe mizunguluko isolokele hagihi ne ziya zinyavu handaga na vint'hu magana maidi enga makomamanga vidongigwa safa mbili kuzunguluka mwe kila nk'hofia.

21 Hilamu aisimikaga mikola iyo he balaza ye Nyumba ya Mnungu, mkola wasimikwagwa nt'hendelo ya kulume wenk'hwagwa zina dya Yakini. Udya usimikwe nt'hendelo ya kumoso nawo wenk'hwagwa zina niyo Boazi. 22 Mnanga mwe mikola iyo mwandaga enga mabwali ya nk'hulukumba.

Aho ndima ye mikola iyo yandaga iheza.

23 Hilamu adamanyaga sufulia kulu dya shaba dikwitangwa Bahali, uzangalamu wakwe wandaga mita nne na nusu, utali wa hasi wandaga mita mbili na lobo, mzunguluko wakwe wandaga mita mlongo na nt'hatu na nusu. 24 Hasi hakwe kuzunguluka sufulia idyo, kwandaga na safa mbili za vibuyu naho kila nusu mita kwaikagwa vibuyu mlongo. 25 Sufulia idyo dyadamanyagwa mnanga mwe mahili mlongo na maidi ya shaba yadamanywe enga majeku ya ng'ombe matatu yakukaula nt'hendelo ya ya kasikazi na nt'huhu usweelo wa zuwa nt'huhu nazo Kwa mwenye mzi na nt'huhu nazo ulailo wa zuwa. 26 Ukulu wa hasi we disufulia idyo wandaga wa inchi nt'hatu. Mzunguluko wakwe wandaga enga bilauli, naho enga bwali dya nk'hulukumba. Mazi yandaga yakadaha kwingila umwo yandaga lita alufu milongo mine.

27 Hilamu adamanyaga matololi mlongo ya shaba. Kila dimwenga dyandaga na utali wa mita imwenga na lobo nt'hatu, uzangalamu wakwe nawo wandaga mita imwenga na lobo nt'hatu, kuita kulanga kwandaga mita imwenga na lobo. 28 Ivi nivo yakudamanywa matololi, kwandaga na mabati ya chuma ayo yakutozeleza mitalimbo, 29 hamwenga na mahili ya simba, njeku na viumbwa vina mawawa. Ayo yandaga yagubikwa na mahambo yabilingwe kwa unt'handa. 30 Kila tololi dyandaga na makuludumu mane ya shaba ne vilama mgatigati vo kuyazungulusila. Kwe zimp'hembe izine ze ditololi kwandaga na vitozelo va shaba vo kutozela disufulia dikulu dya shaba dikwitangwa bahali. 31 Kundani kwe kisimiko kwandaga na fulemu ya duala mnanga kwaajili ye disufulia isolokele kulanga kwa inchi mlongo na mnane kulawa mnanga ye ditololi, naho neingila kundani kwa inchi mfungate. Ifulemu iyo neigadigwa. 32 Makuludumu amane ayo yandaga hasi ye zimp'hapi, Ivilama va hagati vikuzungulusa makuludumu ayo valunganywagwa hamwenga. Kila kuludumu dyandaga na uzangalamu wa inchi milongo miidi na shano. 33 Makuludumu yadamanywagwa enga makuludumu ya magali ya nk'hondo yakuvutwa ni falasi. Vilama vakwe ne vint'hu vakwe vose vikutenda makuludumu yazunguluke visanigwa kwa shaba. 34 Kwandaga na mikasi mine mwe zimp'hembe nne zakwe kila mp'hembe hasi ye tololi kwandaga na mkono wa shaba ulunganywe ne ditololi. 35 Mnanga mwe kila tololi nomnda na lupapi luzunguluke luna sentimita milongo miidi na mbili. Mikono yakwe ne zimp'hapi zakwe zalungwanywagwa kunda kint'hu kimwenga ne ditololi dyose. 36 Kila aho handaga he wazi, mwe mikono yakwe ne zimp'hapi zakwe hagadagwa futa za viumbwa vina mawawa na simba na mitende nakuzungulusilwa futa za mahambo kosekose. 37 Hilamu asanaga matoli ayo yose mlongo yaliganaga kwa ivo yakuoneka na kwa ukulu.

38 Iviya iviya Hilamu adamanyaga sufulia kulu dya shaba, kila sufulia na tololi dyakwe. Kila sufulia dyandaga dikengila lita magana mnane na mlongo mnane ya mazi. 39 Matololi mashano ayaikaga nt'hendelo ya Kwa mwenye mzi ye Nyumba ya Mnungu, mashano matuhu nayo ayaikaga nt'hendelo ya mkoma mahanya ye iyo Nyumba ya Mnungu. Sufulia kulu dikwitangwa bahali nadyo adiikaga kwe mp'hembe ya Kwa mwenye mzi ya ulailo wa zuwa.

40 Iviya iviya Hilamu adamanyaga nyungu na chepe na nyiga nk'hulu. Ivo aibindaga ndima yose ya seuta Selemani kwajili ye Nyumba ya Mnungu. Ivi nivo ivint'hu vidamanywe: 41 Mikola miidi

vint'hu viidi enga nyungu viikigwe mnanga mwe mikola

Zinyavu zimbili zibilingwe zo kugubikila zinyungu zimbili ze nk'hofia ziya zandaga mnanga mwe mikola. 42 Vint'hu magana mane vikale enga makomamanga ye ziya zinyavu zimbili; misafa miidi ya vint'hu enga makomamanga kwa kila wavu umwenga wo kutozela viya vint'hu vikale enga nyungu, no kugubikila ziya zinyungu zimbili ze mikola. 43 Iviya iviya adamanyaga matololi mlongo na masufulia mlongo ya matololi ayo. 44 Na sufulia dikulu dikwitangwa bahali na mahili mlongo na mbili hasi he disufulia idyo. 45 Iviya iviya adamanyaga nyungu na chepe na masufulia na vyombo ivo vose vandaga mwe Nyumba ya Mnungu. Ivo seuta Selemani amgambile Hilamu avidamanye vandaga va shaba isukulwe. 46 Seuta Selemani alagizaga vint'hu ivi vose vidamanywe uko kwe dikolongo dya Yolodani hant'hu hana kilongo hagati ha Sukoti na Salesani. 47 Selemani hahimaga uzami we vint'hu ivo kwaviya vandilisaga vingi, kwaivo uzami we shaba hawamanyikaga.

48 Iviyaiviya Selemani adamanyaga vint'hu vose mwe Nyumba ya Mnungu. Adamanyaga kilingo cha zahabu ne meza ya zahabu kwaajili kuikila mikate akulavilwa Zumbe. 49 Vinala va kuikila vimuli vidamanywe kwa zahabu yedi vikukimaliswa kulongole kwa Hant'hu Hakukise. Vishano vaikwagwa kwe nt'hendelo ya Kwa mwenye mzi, vishano vituhu navo vaikwagwa kwe nt'hendelo ya kasikazi, mabwali ne vimuli ne mikasi. Vint'hu vose ivo vadamanyagwa kwa zahabu. 50 Naho adamanyaga vikombe na mikasi midodo na nyiga ndodo na makulu na vyetezo vo kuikila ubani na vitozelo vo kuyokoela nk'hala zo moto, vose vandaga va zahabu yedi. Bawaba ze zinyivi za kundani he nyumba na Hant'hu Hakukise ne zinyivi za kuse ze Nyumba ya Mnungu. Hamwenga ne zibawaba ze zinyivi zo ukumbi wo mviko. Vint'hu ivi vose vadamanywagwa kwa zahabu.

51 Ivo seuta Selemani eze ibinde zindima zose ze Nyumba ya Mnungu, vint'hu vose ivo vaikwagwa ni ise kunda va Zumbe aviikaga kwe nyumba iyo. Vint'hu ivo ni, Masawa na zahabu ne vint'hu va he balaza, na kuviika he chumba cha kuikila vint'hu va Mnungu.